Duahia Taudia Edia Henanadai

Korinto Iharuana 6:14 ai, Paulo ese ‘abidadama lasi taudia’ ia herevalaia neganai, ia be daidia ia herevalaia?

Korinto Iharuana 6:14 ai, ia gwau: “Dirava idia abidadama henia lasi taudia danu do umui hakapua tamona lasi.” Bema unai siri ena hereva ma haida ita itaia, ia hedinarai goevagoeva Paulo ese Keristani kongrigeisen lalonai idia noho lasi taudia ia herevalaia. Baibel ena siri ma haida ese Paulo ia gaukaralaia herevana, ‘abidadama lasi tauna’ eiava ‘abidadama lasi taudia’ idia durua.

Hegeregere, Paulo ese Keristani taudia ia sisiba henidia badina “abidadama lasi taudia” edia kota dekenai idia lao. (1 Korinto 6:​6, NW ) Unuseniai, abidadama lasi taudia be Korinto ena kota ena diadi taudia. Paulo ena revareva iharuana lalonai ia hahedinaraia, Satani ese ‘abidadama lasi taudia edia lalona ia koua, dibura dekena amo.’ Unai bamona taudia edia matana be “muko” ese ia koua dainai, sivarai namona idia itaia lasi. Idia ese gau ta idia karaia lasi Iehova idia hesiai henia totona, unai dainai guna Paulo ia hereva bamona: “Bema Lohiabada dekenai iena lalona ia giroa neganai, Dirava ese unai muko do ia kokia.”​—⁠2 Korinto 3:16; 4:⁠4.

Abidadama lasi taudia haida ese taravatu idia utua eiava kaivakuku idia tomadiho henia. (2 Korinto 6:​15, 16) To, idia ibounai ese Iehova ena hesiai taudia idia inai henia lasi. Haida be hereva momokani dekenai edia ura idia hahedinaraia. Idia momo be mai edia Keristani adavadia bona idia moale idia ida idia noho totona. (1 Korinto 7:​12-14; 10:27; 14:​22-25; 1 Petero 3:​1, 2) To, Paulo ese inai hereva ‘abidadama lasi tauna’ ia gaukaralaia, ataiai ita herevalaia bamona, Keristani kongrigeisen lalonai idia noho lasi taudia, “Lohiabada idia abidadama henia” lasi taudia unai, ia herevalaia totona.​—⁠Kara 2:41; 5:14; 8:​12, 13.

Korinto Iharuana 6:14 ai ia noho hakaua herevana be mai anina bada Keristani taudia edia mauri ibounai lalonai. Nega momo adavana idia tahua noho Keristani taudia dekenai aonega sisiba henia totona, unai siri idia gaukaralaia. (Mataio 19:​4-6) Ia gwauhamata bona bapatiso Keristani tauna be abidadama lasi taudia huanai adavana ia tahua lasi, badina abidadama lasi taudia edia taravatu, tahua gaudia bona idia abia dae gaudia be Keristani momokani tauna ena amo idia idau momokani.

To, Baibel idia stadilaia bona Keristani kongrigeisen idia bamoa taudia be edena bamona? Idia bapatiso lasi pablisa be edena bamona? Idia be abidadama lasi taudia, a? Lasi. Sivarai namona ena hereva momokani idia abia dae bona bapatiso abia totona idia goada idia lao taudia be abidadama lasi taudia ita gwauraia lasi. (Roma 10:10; 2 Korinto 4:13) Korenelio be bapatiso ia do abia lasi neganai, Baibel ese ia gwauraia ‘Dirava ia badinaia bona ia gari henia tauna.’​—⁠Kara 10:⁠2.

Paulo ena sisiba 2 Korinto 6:14 ai dainai, ia gwauhamata vadaeni Keristani tadikaka eiava taihu ese ia do bapatiso lasi tadikaka eiava taihu ia tura henia badina ia ura adavaia be maoro, a? Lasi, unai be aonega karana lasi. Dahaka dainai? Badina Paulo ese Keristani vabu taudia dekenai ia henia sisiba herevana dainai. Paulo ia gwau: “Unai hahine ese ia ura henia tauna do ia adavaia diba, taravatu lasi. To Keristani tauna sibona do ia adavaia diba.” (1 Korinto 7:39) Unai sisiba herevana hegeregerena, Baibel ese idia gwauhamata vadaeni Keristani taudia ia hagoadaia “Keristani tauna sibona” idia adavaia be namo.

Inai hereva “Keristani tauna sibona” ena anina be dahaka? Paulo ese unai bamona Keristani taudia be Roma 16:​8-10 bona Kolose 4:7 dekenai ia herevalaia. Bema unai siri oi duahia, do oi itaia unai taudia be ‘Keriso ena hesiai gaukara idia karaia taudia,’ ‘Keriso totona idia gini goada taudia,’ ‘Lohiabada idia lalokau henia taudia,’ bona ‘hesiai taudia namodia.’

Tau ta be edena negai ‘Lohiabada ena hesiai tauna’ ai ia lao diba? Ia lao diba bema hesiai tauna ia karaia gaudia be mai ena ura ida ia karaia bona ia sibona ia laloa lasi. Iesu ia gwau: “Tau ta bema ia ura lauegu murina dekenai do ia raka, ia sibona ena ura do ia laloa lasi, to iena satauro do ia huaia, lauegu murina dekenai do ia raka.” (Mataio 16:24) Ta be Dirava dekenai ena mauri ia gwauhamatalaia neganai, Keriso ena murinai ia raka matamaia bona Dirava ena ura ia badinaia momokani. Unai murinai, ia be bapatiso ia abia bona haroro tauna ai ia lao, bona Iehova Dirava ena lalo-namo ia abia.a Unai dainai, “Keristani tauna sibona” oi adavaia ena anina be abidadama momokani tauna, ia gwauhamata bona “Dirava bona Lohiabada Iesu Keriso edia hesiai tauna” ai ia lao tauna sibona, oi adavaia.​—⁠Iamesi 1:⁠1.

Iehova ena Witnes taudia ida Baibel ia stadilaia bona lauma dalanai ia goada ia lao tauna ita hanamoa be namo. To, ia be Iehova dekenai ena mauri ia do gwauhamatalaia lasi bona ena mauri ia do henia lasi bona sibona ena namo ia dadaraia lasi hesiai gaukara ia karaia totona. Ena mauri lalonai gau haida ia do haidaua noho. Namona be gau badadia haida ia haidaua bena gwauhamata bona bapatiso Keristani tauna ai ia lao guna, gabeai ena mauri ia haidaua gauna badana ma ta, hegeregere headava, ia laloa diba.

Keristani tadikaka eiava taihu ta, ese ia stadi noho bona ia goada ia lao Baibel stadi tauna ta ia tura henia badina ia ura adavaia​—⁠reana ia laloa ia naria ela bona stadi tauna ia bapatiso murinai idia headava be maoro, a? Lasi. Bema Baibel stiuden tauna ia diba, ia gwauhamata vadaeni Keristani tauna ia ura ia ia adavaia, to do ia karaia lasi ela bona ia bapatiso, unai kara dainai stadi tauna be ia bapatiso ena badina do ia daradaralaia.

Nega momo ta be nega sisina sibona lalonai bapatiso lasi pablisa bamona ia noho, ela bona bapatiso ia abia. Unai dainai, Keristani tauna sibona adavaia ena sisiba be ia maoro. To bema ta be ia hegeregere ia headava totona, Keristani ruma besena lalonai ia tubu daekau, lagani haida lalonai kongrigeisen ai ia goada, bona ia be bapatiso lasi pablisa, unai be edena bamona? Vadaeni, dahaka ese ia koua Iehova dekenai ena mauri ia gwauhamatalaia totona? Dahaka dainai ia bapatiso haraga lasi? Ia be mai ena daradara haida dainai, a? Ena be ia be abidadama tauna lasi, to ita gwau lasi ia be “Keristani tauna.”

Paulo ena sisiba headava dekenai be iseda namo totona. (Isaia 48:17) Bema idia ura headava taudia rua be Iehova dekenai edia mauri idia gwauhamatalaia vadaeni, lauma dalanai edia headava be badina aukana latanai idia haginia dainai, ta ta do idia badinaia heheni namonamo. Taravatu bona tahua gaudia tamona idia badinaia. Unai ese edia headava lalonai moale bada do ia havaraia. Ma danu, ta ese “Keristani tauna sibona” ia adavaia karana amo ia hahedinaraia Iehova ia badinaia, bona unai ese nega daudau do idia noho hahenamo idia mailaia, badina Iehova ese ‘kara maoromaoro tauna dekenai, kara maoromaoro do ia hahedinaraia.’​—⁠Salamo 18:⁠25.

[Footnote]

[Picture on page 31]

Iehova ese ‘kara maoromaoro tauna dekenai, kara maoromaoro do ia hahedinaraia’