Duahia Taudia Edia Henanadai

Baibel ia gwau: “Dirava idia abidadama henia lasi taudia danu do umui hakapua tamona lasi”; unai dainai Keristen tauna ta be abidadama lasi tauna ta ida bisinesi ta idia haheaua hebou be maoro, eiava?

Unai sisiba be 2 Korinto 6:​14-16 ai: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? Edena bamona diari bona dibura idia noho hebou diba? Keriso bona Satani be edena bamona idia laloa tamona diba? Abidadama tauna bona abidadama lasi tauna ruaosi be idia hegeregere diba, a? Dirava ena dubu helaga bona kaivakuku be edena bamona idia hakapua tamona diba?”

Aposetolo Paulo ese unai sisiba ia torea neganai, Keristen tauna bona abidadama lasi tauna be bisinesi ta idia haheaua hebou karana ia herevalaia lasi. To, ena sisiba be mai anina, unai kara bona ma kara haida ediai.

Paulo ese unai bamona ia sisiba henidia taudia edia hanua Korinto be dika rohoroho dainai, dina iboudiai hedibagani idauidau idia hekwarahilaidia. Ena be ‘Dirava ese ia abidia hidi vadaeni, idia be iena bese, idia be King ena boubou helaga karaia taudia, bese helagana, bona Dirava ena orea korikori taudia,’ to bema idia naria namonamo lasi, unai hanua taudia edia lalo-ani dikana ese edia lalodia ia hamanokadia diba.​—1 Petero 2:9.

Guna, Paulo ese 2 Korinto 6:​14-16 ena hereva ia do torea lasi neganai, ia haganidia, ia heudahanai bena ia helalo-kerehai lasi tauna be kongregesen amo do idia atoa siri. (1 Korinto 5:1) Unai tau ena kerere ese ia hahedinaraia, kara dika taudia edia hebamo bona tanobada ena kara goadalaia karana ese Keristen taudia idia hakereredia diba.

Unai Keristen taudia Korinto ai ese murimuri ai idia atoa siri tauna do idia tura henia lasi, anina be abidadama lasi taudia iboudiai amo do idia gini siri vaitani a? Paulo ia gwau: “Revareva ta umui dekenai lau torea guna, lau gwau, ‘Heudahanai taudia danu umui turana karaia lasi.’ Lau hereva lasi, Dirava diba lasi taudia, idia heudahanai . . . do umui rakatania. . . . Badina be bema idia umui ura rakatania, dala tamona be inai tanobada do umui rakatania momokani.”​—1 Korinto 5:​9, 10.

Paulo ia diba Keristen taudia be tanobada ai idia noho dainai, abidadama lasi taudia, mauri dalana maorona idia badinaia lasi taudia, bogaragidiai idia noho bona dina iboudiai idia hedavari henidia. Idia amo idia siri vaitani diba lasi dainai, namona be Keristen taudia idia naria namonamo, edia hebamo ese do ia hadikadia garina.

Paulo ena revareva iharuana Korinto taudia edia mani ita laloa lou. Ia gwau horoa Keristen taudia be Dirava ena hesiai taudia, Keriso ena gwaukau taudia. Ia haganidia do idia naria namonamo, ta do idia hahekwakwanaia bena haida ese edia hesiai gaukarana do idia gwauraia dika garina. (2 Korinto 4:​1–6:3) Paulo ese ena Keristen tadikakadia ia sisiba henidia edia lalokau do idia habadaia. (2 Korinto 6:13) Bena ia gwau: “Dirava idia abidadama henia lasi taudia danu do umui hakapua tamona lasi.”

Ena revareva ena hereva oredia ese idia hahedinaraia Paulo ese kara ta, hegeregere bisinesi o moni gaukarana, ia taravatua lasi. To heduru sisibana namona mai lababana be ia ese ia lalokau henidia bada tadikakadia ia henidia.

Bema Keristen tauna ta ia ura headava, unai sisiba be mai anina ia enai a? Oibe. Ena revareva ginigunana ai Paulo ese Korinto taudia ia hamaorodia ‘ekalesia taudia sibodia do idia adavadia.’ (1 Korinto 7:39) Gabeai, 2 Korinto 6:​14-18 ai ia torea herevana amo, ia ese unai hereva ena anina namona ia habadaia. Iehova ena hesiai ia lao henia lasi bona Keriso ia gavaia lasi tauna ta bema Keristen hahinena ta ese ia adavaia gwauraia, Dirava abidadama henia lasi tauna ida do idia hakapua tamona karana ia laloa unai. (Levitiko 19:19; Deuteronomi 22:10 itadia.) Do idia lalo-tamona momokani lasi dainai, hekwakwanai do idia vara. Abidadama lasi tauna be reana dirava koikoina ia tomadiho henia noho, eiava gabeai do ia tomadiho henia. Paulo ia gwau: “Keriso bona Satani be edena bamona idia laloa tamona diba?”

To, unai hereva be mai anina abidadama lasi tauna ta ida bisinesi haheaua hebou karana dekenai a? Reana Keristen tauna ta ia laloa ena bese naria totona moni do ia davaria dalana tamona be Keristen lasi tauna ta ida bisinesi ta do idia haheaua hebou. (1 Timoteo 5:8) Unai bisinesi karadia haida mani oi lalodia:

Reana Keristen tauna ta ia ura bisinesi ta, kohu hoihoilaia bisinesina, do ia haginia, to unai do ia karaia dalana tamona be unai kohu o moni ia abia diba tauna ida unai bisinesi do idia haheaua hebou. Keristen tauna ma ta ia ura biru gaukarana (o boroma naridia gaukarana) do ia karaia, to unai do ia karaia dalana tamona be tano biaguna ta ena tano do ia vatua (lease) bena bisinesi ai do ia abia moni gagaena (profit) ena kahana ta do ia henia. Reana Keristen tauna ma ta be palama laiseni ia abia diba lasi, gavamani ese iboudiai ia henidia vadaeni dainai; unai bisinesi do ia karaia dalana tamona be ena Keristen lasi varavarana mai ena laiseni ida do idia karaia hebou.​—Mareko 12:17.

Unai be haheitalai mo. Unai bamona karadia iboudiai ai gwauraidia toho lasi, bona ai gwau lasi idia maoro eiava idia kerere. To unai haheitalai oi lalodia neganai, oi diba dahaka dainai 2 Korinto 6:​14-18 ena sisiba ita negea lasi be namo, ani?

Bema Keristen tauna ta be abidadama lasi tauna ta ida bisinesi ta idia haheaua hebou, herevana unai be ena varavara o lasi, hekwakwanai bona hedibagani do ia davaridia diba. Reana ena bamona ia laloa do idia kwalimu dalana tamona be, idia davaria monina ena kahana mo o edia gaukara taudia haida mo edia ladadia bona edia pei be pepa ai do idia toredia, herevana unai be gavamani ena taravatu utua karana. O reana ena lalona ia hegeregere, idia hoidia gaudia be dala idaudia amo do ia koikoilaidia. Vadaeni, takisi pepadia o gavamani ena pepa idaudia sainidia neganai, Keristen tauna be edena bamona do ia kara?​—Esodo 23:1; Roma 13:​1, 7.

Eiava ena bamona ia ura Kirisimasi bona Ista gaudia be edia sitoa ai do ia hoihoilaidia, bona unai dina dainai kadi be kampani ena ladana ai do ia siaidia bona edia bisinesi rumana do idia haheraia. Paulo ia gwau: “Dirava ena dubu helaga bona kaivakuku be edena bamona idia hakapua tamona diba? Badina ita be Mauri Dirava ena dubu helaga!” Bona Iehova ia gwau: “Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri. Vadaeni umui do lau abia dae”! (2 Korinto 6:​16, 17) Unai sisiba namona idia badinaia dainai, Keristen taudia momo ese hekwakwanai momo lasi gabudia ai moni gaukarana idia tahua.​—Heberu 13:​5, 6, 18.

Dirava ese kongregesen ia hagania lasi, Keristen taudia edia moni gaukaradia ai o edia bisinesi ai idia karaia karadia iboudiai do idia itadia tao o do idia tahudia. Momokani, bema Keristen tauna ta ese tomadiho koikoi durua karana ta ia karaia eiava ia hereva koikoi o ia kara koikoi o ia henao, bona bema kongregesen be unai idia diba, kara ta do idia karaia, Iehova ena taravatu badinaia totona.

To gau badana be inai: Paulo ena sisiba, “Dirava idia abidadama henia lasi taudia danu do umui hakapua tamona lasi” herevana, ese Keristen taudia ia durudia, hekwakwanai bona hahemaoro amo do idia raka siri totona. Keristen taudia mai edia aonega ese unai sisiba do idia abia dae, bona bema idia laloa gaukara ta ai Baibel ena taravatu do idia badinaia be auka, do idia tahua lasi. Bema ta ia laloa dala idauna ta be lasi dainai abidadama lasi tauna ta ida bisinesi ta do idia haheaua hebou be namo, haida ese idia hahemaoro henia o idia maumauraia haraga be namo lasi, badina be ia abia hidi dalana ena maduna be sibona do ia huaia. Paulo ese abidadama lasi tauna ta ida bisinesi haheaua hebou karana ia taravatua lasi. To, iena sisiba ita negea be namo lasi. Dirava ese ena lauma amo ia hasiahua, bena unai sisiba be Baibel ai ia torea ita do ia durua totona. Do ita badinaia be aonega dalana.