Iehova Ena Hereva be Ia Mauri Noho
Numera Bukana Ena Hereva Badadia
ISRAELA taudia be Aigupito idia rakatania murinai, bese ta ai idia lao. Daudau lasi murinai, Gwauhamata Tanona dekenai idia vareai be hegeregere, to idia vareai lasi. To, “taunimanima noho lasi tano badana bona dikana” dekenai lagani 40 lalonai idia loaloa kava. (Deuteronomi 8:15) Dahaka dainai? Baibel bukana Numera dekenai ia noho idaunega sivaraina ese ia vara gauna be ita dekenai ia hadibaia. Unai sivarai ese ita ia hadibaia Iehova Dirava ita kamonai henia bona ia abia hidi taudia ita matauraia be gau badana.
Mose ese Numera bukana be taunimanima idia noho lasi gabuna bona Moaba Taorana dekenai ia torea, ia sivarailaia negana be lagani 38 bona hua 9—lagani 1512 B.C.E. amo ia lao bona lagani 1473 B.C.E. (Numera 1:1; Deuteronomi 1:3) Israela taudia be nega rua sensas idia karaia, nega ginigunana idia duahia bena lagani 38 murinai, nega iharuana idia duahia lou neganai, unai buka ena ladana idia atoa. (Karoa 1-4, 26) Unai sivarai be kahana toi dekenai idia haria. Kahana ginigunana be Sinai Ororona ai idia vara gaudia ia herevalaia. Iharuana be Israela taudia be taunimanima idia noho lasi gabunai idia loaloa kava negana ai idia vara gaudia ia herevalaia. Bona kahana ihatoina ese Moaba Taorana ai idia vara gaudia ia herevalaia. Inai sivarai oi duahia neganai, reana oi sibona oi nanadaia: ‘Idia vara gaudia amo dahaka lau dibaia? Inai buka ai idia noho hakaua herevadia ese hari lau idia durua diba, a?’
SINAI ORORONA AI
Israela taudia be Sinai Ororona badinai idia noho neganai, duahia gaukara ginigunana idia karaia. Mauri lagani 20 bona 20 idia hanaia tatau ibounai be 603,550, to Levi taudia sibona be idia duahia lasi. Tuari dekenai idia lao diba taudia totona unai duahia gaukarana idia karaia. Idia ibounai, hahine, natudia bona Levi taudia danu edia namba be taunimanima milioni toi ia hanaia.
Sensas idia karaia murinai, Israela taudia be edia raka dalana, Levi taudia edia gaukara bona palai dubu ena hesiai gaukarana, gorere taudia be hanua murimurinai do idia atoa ena hahegani, mama karana ena taravatu bona Nasiri gwauhamatana dekenai hakaua herevadia idia abia. Karoa 7 be iduhu lohia taudia ese boubou patana hahelagaia negana dekenai idia henia boubou ia herevalaia, bona karoa 9 be Pasova negana ia herevalaia. Idia hebou taudia dekenai kamepa haginia eiava kokia dalana ena hakaua herevadia idia henia danu.
Baibel Henanadaidia Edia Haere:
2:1, 2—Taunimanima idia noho lasi gabuna ai, iduhu toi toi ai idia hapararaia oreadia be edena “pepe” eiava toa badinai idia haboua? Baibel ese unai toa idauidau ia hahedinaraia lasi. To, idia be helaga gaudia bamona idia laloa lasi eiava tomadiho dalanai idia gaukaralaia lasi. Idia be toa sibona—ta ia durua kamepa dekenai ena gabu ia davaria totona.
5:27—Heudahanai karana dainai ia kerere hahine ena “mamuna ruaosi do idia mase” ena anina be dahaka? Inai hereva “mamuna” be hahine ena natuna havaraia tauanina kahana ia herevalaia. “Do idia mase” ese ia hahedinaraia unai tauanina kahana ia maragi ia lao, unai dainai do ia auka hahine ia rogorogo totona.
Ita Dibaia Gaudia:
6:1-7. Nasiri taudia be uaina bona kekero muramura ibounai do idia inua lasi, anina be sibodia edia ura idia dadaraia. Edia huina do idia utua lasi—unai be Iehova matauraia toana, hahine ese edia adavadia eiava tamadia idia matauraia bamona. Nasiri taudia idia goeva noho totona, namona be mase tauanina ta kahirakahira idia lao lasi, herevana ia be edia varavara ta. Hari, ful-taim hesiai taudia ese edia ura gaudia idia dadaraia bona Iehova bona ia abia hidi dalana idia badinaia. Reana haida be tano daudauna ta dekenai idia siaidia, unai dainai edia varavara korikorina ta ena mase guria totona idia giroa lou be ia auka.
8:25, 26. Levi gaukara idia karaia namonamo totona, tatau matamata haida idia abia bona idia buruka vadaeni taudia be edia mauri lagani dainai idia hamaoroa gaukara idia rakatania totona. To, sibona idia henia diba Levi taudia ma haida idia durua totona. Hari, Basileia harorolaia gaukarana be do ita rakatania lasi, to unai taravatu ena hakaua herevana ese mai anina bada gauna ta ia hadibaia. Bema Keristani tauna ta be buruka dainai maduna haida ia huaia diba lasi, iena goada hegeregerena ia karaia diba gaukarana ia karaia diba.
TAUNIMANIMA IDIA NOHO LASI GABUNAI GABU TA AMO MA GABU TA IDIA LAO
Palai Dubu ataiai ia noho ori be ia daekau neganai, Israela taudia be edia laolao idia matamaia, lagani 38 bona hua ta eiava rua idia raka murinai Moaba ena tano palakana gabunai idia ginidae. Edia laolao dalana oi badinaia totona “See the Good Land,” Iehova ena Witnes taudia ese idia halasia buklet ena rau 9 ai ia noho mapu ese oi do ia durua.
Parana ena Taunimanima Noho Lasi Gabunai, Kadesi idia lao henia noho lalonai, maumau karana be nega toi ia vara. Iehova ese lahi ia siaia bona taunimanima haida ia gabua ore neganai, maumau karana ginigunana ia ore. Iharuana be Israela taudia be vamu totona idia noinoi, bona Iehova ese kibi manu ia henia neganai ia vara. Bona ihatoina be Miriama bona Arona ese Mose idia maumauraia neganai, Miriama be nega sisina lepera gorerena danu ia noho.
Kadesi dekenai idia kamepa noho lalonai, Mose ese spai taudia 12 ia siaia Gwauhamata Tanona idia itaia totona. Dina 40 murinai idia giroa. Taunimanima ese spai taudia 10 edia ripoti dikana idia abia dae dainai idia ura Mose, Arona, bona mai edia kamonai spai taudia Iosua bona Kaleba be nadi amo idia hodoa. Iehova ia ura taunimanima dekenai gorere dikana ia siaia, to Mose ese ia koua, unai dainai Dirava ia gwau idia be taunimanima idia noho lasi gabunai lagani 40 lalonai do idia loa kava—ela bona idia duahia taudia ibounai idia mase.
Iehova be idia dekenai taravatu ma haida ia henia. Kora bona ma haida ese Mose bona Arona idia gwau-edeede henia, to unai gwau-edeede taudia be lahi ese ia hadikaia ore eiava tano ese ia hadonoa. Unai dina murinai Israela taudia ibounai ese Mose bona Arona idia maumauraia. Unai dainai, Iehova ese ia siaia daihanai gorerena amo taunimanima 14,700 idia mase. Dirava ese ia abia hidi hahelaga tauna badana ia hahedinaraia totona, Arona ena itotohi dekenai rigi Ia hatubua. Gabeai, Iehova ese Levi edia maduna bona taunimanima hagoevaia gaukarana dekenai taravatu ma haida ia henia. Boromakau hahine kakakakana ena kahu gaukaralaia karana ese Iesu ena boubou amo ia vara hagoevaia karana ia laulaulaia.—Heberu 9:13, 14.
Israela taudia be Kadesi dekenai idia giroa lou, unuseniai Miriama ia mase. Ranu be lasi dainai Israela taudia ese Mose bona Arona idia maumauraia lou. Mose bona Arona be hoa dalanai ranu idia henia neganai, Iehova ena ladana idia hahelagaia lasi, unai dainai Gwauhamata Tanona ai idia vareai lasi. Israela taudia be Kadesi idia rakatania, bona Arona be Horo Ororona dekenai ia mase. Israela taudia be Edoma tano idia rakaia hegege neganai, idia hesiku bona Dirava bona Mose idia gwauraia dika. Iehova ese gaigai mai edia poisini ia siaia idia ia panisia totona. Mose ese Dirava ia noia lou unai panisia karana ia koua totona, vadaeni Dirava ese ia hadibaia auri labora amo gaigai ta do ia karaia bona au ta dekenai do ia kokoa, unai amo gaigai ese idia koria taudia ese idia itaia neganai, do idia namo. Unai gaigai ese Iesu idia hasatauroa karana, ita be namo hanaihanai ita abia diba dalana ia laulaulaia. (Ioane 3:14, 15) Israela taudia ese Amoro taudia edia King Sihona bona Oga idia halusia bona edia tano idia abia.
Baibel Henanadaidia Edia Haere:
12:1—Dahaka dainai Miriama bona Arona ese Mose idia maumauraia? Edia maumau ena badina korikori be Miriama ia ura siahu bada ia abia. Mose ena adavana, Sipora ese taunimanima idia noho lasi gabunai Mose ia bamoa lou neganai, reana Miriama ia gari badina kamepa dekenai ia be edia hakaua hahinena do idia gwauraia lasi.—Esodo 18:1-5.
12:9-11—Dahaka dainai Miriama sibona ese lepera gorerena ia abia? Badina ia ese unai maumau ia hamatamaia bona Arona ena lalona ia veria ia do ia bamoa totona. Arona be ena kerere ia gwauraia hedinarai karana amo lalohadai maorona ia hahedinaraia.
21:14, 15—Inai siri ese ia herevalaia bukana be dahaka? Baibel be Baibel idia torea taudia ese idia gaukaralaia buka idauidau ia gwauraia. (Iosua 10:12, 13; 1 King Taudia 11:41; 14:19, 29) “Lohiabada ena tuari buka” be unai bamona buka ta. Ia lalonai Iehova ena taunimanima ese idaunegai idia karaia tuari ia sivarailaia.
Ita Dibaia Gaudia:
11:27-29. Mose ese haheitalai namona ia hahedinaraia, edena bamona Iehova ena hesiai gaukara dekenai hahenamo idia abia taudia ita kara henia be namo. Mose be sibona ena ladana bada abia totona ia maumau lasi, to Eledada bona Medada be peroveta taudia bamona idia gaukara matamaia neganai, ia moale.
12:2, 9, 10; 16:1-3, 12-14, 31-35, 41, 46-50. Iehova ia ura ia idia tomadiho henia taudia ese Dirava ia abia hidi taudia idia matauraia.
14:24. Tanobada ena lalo-ani karadia ita dadaraia totona, gau badana be ‘lauma idauna’ eiava lalohadai idauna ita abia. Namona be unai lalohadai be tanobada ena lalohadai amo ia idau.
15:37-41. Israela taudia edia dabua ena isena dekenai idia noho varo ese idia ia hadibaia lou, Dirava ese idia ia abia hidi Ia idia tomadiho henia bona ena taravatu idia badinaia totona. Namona be Dirava ena kara namo taravatudia hegeregerena ita noho bona ita hahedinaraia ita be tanobada taudia amo ita idau, ani?
MOABA TAORANA AI
Israela taudia be Moaba ena palaka gabunai idia kamepa neganai, Moaba taudia be idia dainai idia gari bada herea. Unai dainai, Moaba ena King Balaki ese Balama ia gaukaralaia Israela taudia ia hadikaia totona. To Iehova ese Balama ia doria Israela taudia ia hanamoa totona. Bena Moaba bona Midiana taudia ese edia hahine idia gaukaralaia Israela tatau idia koia bena idia sihari kava bona kaivakuku idia tomadiho henia. Unai dainai, Iehova ese idia kerere taudia 24,000 ia hamasedia. Pineha ia hahedinaraia ia ese Iehova gwau-edeede henia karana ia ura henia lasi neganai, unai gorere dikana ia ore.
Duahia gaukarana iharuana ese ia hahedinaraia duahia ginigunana ai idia duahia tatau ibounai idia mase vadaeni, to Iosua bona Kaleba sibona idia noho. Iosua idia abia hidi Mose ena gabu ia abia totona. Israela taudia be boubou idauidau karaia dalana bona gwauhamata karaia daladia totona hadibaia hereva idia abia. Danu, Israela taudia ese Midiana taudia edia kerere davana idia henia. Rubena, Gadi, bona Manase ena iduhu kahana be Ioridane Sinavai ena ist kahana idia abia. Israela taudia be Ioridane idia hanaia bona unai tano idia abia totona hadibaia hereva idia henia. Iehova ese Israela taudia ibounai totona tano ia makaia. Laki gadara dekenai iduhu ta ta edia tano idia abia hidi. Levi taudia dekenai hanua 48 idia henia, bona idia 6 be heau mauri hanuadia.
Baibel Henanadaidia Edia Haere:
22:20-22—Dahaka dainai Iehova be Balama dekenai ia badu? Iehova ese peroveta tauna Balama ia hamaoroa Israela taudia do ia hadikaia lasi. (Numera 22:12) To, unai peroveta tauna be Balaki ena tatau ida ia lao, badina ia ura Israela taudia ia hadikaia. Balama ia ura Moaba edia King ia hamoalea bona ia amo moni ia abia. (2 Petero 2:15, 16; Iuda 11) Ena be Iehova ese Balama ia doria Israela taudia ia hanamoa, to ia hadikaia lasi totona neganai, Balama ese king ena hereva ia abia dae bona Bala idia tomadiho henia hahine idia gaukaralaia Israela tatau idia koia totona. (Numera 31:15, 16; Buka Helağa) Unai dainai, Peroveta tauna Balama ena mataganigani karana dainai Dirava be ia dekenai ia badu.
30:6-8—Keristani tauna ta be ena adavana ese ia karaia gwauhamata ia koudia diba, a? Iehova ese hari taunimanima ese idia karaia gwauhamata dainai idia ta ta ia kara henidia. Hegeregere, Iehova dekenai mauri gwauhamatalaia karana be ita sibona ese ita karaia gwauhamatana. (Galatia 6:5) Ena adavana be siahu lasi unai ia koua totona. To, namo lasi hahine ese ia karaia gwauhamata ese Dirava ena Hereva eiava ena maduna idauidau ena adavana dekenai ia utua.
Ita Dibaia Gaudia:
25:11. Pineha ese haheitalai namo hereana ia hahedinaraia, ia ese Iehova tomadiho henia karana ia ura henia bada! Ita ura kongregesen ia goeva noho totona, matabodaga karadia be Keristani elda taudia dekenai ita hadibaia be namo, ani?
35:9-29. Aksiden amo ta ia alaia tauna ta ese ena hanua do ia rakatania bona heau mauri hanuana ta dekenai do ia heau lao bona nega sisina lalonai unuseniai do ia noho, unai ese ita ia hadibaia mauri be helaga bona ita matauraia be namo.
35:33. Kerere lasi tauna ena rara ese ia hamiroa tanona be unai tauna ia alaia tauna idia hamasea karana sibona amo idia hagoevaia diba. Iehova ese tanobada be paradaiso ai ia do halaoa lasi neganai, ia ese kara dika taudia do ia kokia guna be maoro momokani!—Aonega Herevadia 2:21, 22; Daniela 2:44.
Dirava Ena Hereva be mai Ena Siahu
Namona be Iehova bona ena taunimanima naria totona ia abia hidi taudia ita matauraia. Numera bukana ese unai hereva momokani ia hahedinaraia namo herea. Unai amo ita diba hari kongregesen lalonai maino bona lalo-tamona ia noho be gau badana!
Numera bukana dekenai idia noho sivarai ese idia hahedinaraia lauma gaudia idia laloa bada lasi taudia be inai bamona kerere, hegeregere maumau, matabodaga karadia bona kaivakuku tomadiho henia karana lalonai idia vareai diba. Inai Baibel bukana lalonai idia noho sivarai bona haheitalai haida be Iehova ena Witnes taudia edia kongregesen ena hesiai hebou ena kongregesen durua herevana ena kahana dekenai idia gaukaralaia diba. Oibe, iseda mauri lalonai “Dirava ena hereva be ia mauri noho, bona ia be mai ena siahu.”—Heberu 4:12.
[Picture on page 28, 29]
Iehova ese palai dubu ataiai hoa dalanai ia noho ori amo ia hahedinaraia, ia ese Israela taudia edia kamepa karaia bona kokia dalana ia hakaua
[Pictures on page 30]
Iehova ia ura Ia ita kamonai henia bona ia abia hidi taudia ita matauraia