Duahia Taudia Edia Henanadai

Iesu be ena hahediba taudia ia hamaoroa, “Lau be Satani lau itaia, kevaru bamona guba dekena amo ia moru” neganai, ena hereva ena anina be dahaka?

Iesu ese hahediba taudia 70 ia abia hidi bona “rua rua dekena amo ia siaia guna, do idia lao, ia be idia edia murina dekenai do ia mai.” Unai hahediba taudia 70 idia giroa lou neganai, idia be edia haroro gaukara lalonai anina namona idia havaraia dainai idia moale bada. Idia gwau: “Lohiabada e, lauma dikadia ese aiemai hereva idia kamonai, oiemu ladana dainai. Ia ese do ia lao hanuadia bona gabudia ibounai dekenai be idia ese do idia lao hedinarai guna.” Unai neganai, Iesu ia gwau: “Lau be Satani lau itaia, kevaru bamona guba dekena amo ia moru.”​​—⁠Luka 10:​1, 17, 18.

Matamanai, do oi laloa Iesu be ia vara vadaeni karana ta ia herevalaia. To, Iesu ese ataiai ia noho herevana ia gwauraia bena lagani 60 murinai, ia buruka tauna aposetolo Ioane ese unai bamona hereva ma ia gwauraia lou: “Vadaeni unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho.”​​—⁠Apokalupo 12:⁠9.

Ioane ese unai hereva ia torea neganai, Satani be guba dekenai ia do noho. Edena bamona ita diba? Badina Apokalupo be peroveta bukana, ia be idaunegai sivaraidia bukana lasi. (Apokalupo 1:⁠1) Unai dainai, Ioane ena negai, Satani be tanobada dekenai idia do negea diho lasi. Oibe, hamomokania gaudia ese idia hahedinaraia, Iesu be lagani 1914 ai Dirava ena Basileia ena King ai ia lao murinai, unai ia vara.a​​—⁠Apokalupo 12:​1-​10.

Vadaeni, Iesu ese Satani ena moru guba amo ia herevalaia neganai, dahaka dainai ia vara vadaeni bamona ia herevalaia? Diba bada taudia haida idia gwau Iesu ese ena hahediba taudia ia gwau henidia badina idia ese hekokoroku kererena idia hahedinaraia. Idia laloa, Iesu ena hereva ena anina be inai: ‘Demoni umui lulua dainai umui moale, to namo lasi unai umui hekokorokulaia. Badina Satani ia hekokoroku, bona unai kara dainai ia moru haraga.’

Namona be Iesu ena hereva ita laloa kerere lasi. To, ia hedinarai Iesu be ena hahediba taudia ida ia moale bona vaira negana ai Satani dekenai do ia vara gauna ia herevalaia. Ena hahediba taudia ibounai amo, Iesu be Diabolo ena badu dikadika karana ia diba. To, mai edia siahu demoni ese goevadae lasi hahediba taudia edia hereva idia kamonai neganai, Iesu ena moale mani oi laloa! Edia kamonai karana ese vaira negana ai do ia vara gauna ta ia laulaulaia, unai nega ai Iesu, aneru badana Mikaela unai, be Satani ida do ia tuari bona guba amo do ia negea diho tanobada dekenai.

Iesu ia gwau Satani ia itaia “guba . . . amo ia moru” neganai, ia hahedinaraia goevagoeva Satani be do ia moru momokani. Baibel lalonai ita davaria peroveta hereva ma haida danu be unai bamona, idia torea dalana be hegeregere idia vara vadaeni. Hegeregere, Isaia 52:13–​53:12 dekenai Mesia idia perovetalaia herevadia ena kahana haida be ia vara vadaeni dalanai idia herevalaia. Iesu ia diba momokani, Satani ena moru karana guba amo, be Iena Tamana ena ura hegeregerena do ia guguru. Iesu ia diba danu Dirava ese ena nega korikori ai, Satani bona ena demoni be guri dobu masemasena lalonai do ia koudia bona gabeai do ia hadikaia ore vaitani.​​—⁠Roma 16:20; Heberu 2:​14; Apokalupo 20:​1-3, 7-​10.

[Footnote]