Iehova be Iseda Durua Tauna

“Lauegu heduru be Iehova amo. Ia be guba bona tanobada ia Karaia Tauna.”​​—⁠SALAMO 121:​2, NW.

1, 2. (a) Dahaka dainai ita gwau diba nega ta ta ai ita be heduru ita ura? (b) Iehova be edena bamona Durua Tauna?

ITA ibounai be heduru ita ura, ani? Momokani, nega ta ta ai ita ibounai be heduru ita ura​—⁠hekwakwanai badana ta, varavara ta ena mase, eiava hahetoho aukana ta ita haheaukalaia totona. Taunimanima be heduru idia ura neganai, nega momo turana namona ta dekenai idia lao. Oiemu hekwakwanai oi haheaukalaia diba bema unai bamona turana namona dekenai oi herevalaia. To, taunimanima edia heduru be mai ena hetoana. Bona danu, heduru oi tahua neganai, reana ma haida be oi idia durua diba lasi.

² To, Durua Tauna ta ia noho, ia be mai ena siahu bada bona heduru gaudia momo. Danu, ita dekenai ia gwau ita do ia rakatania diba lasi. Salamo torea tauna be mai lalo-goada ida unai Tauna ia gwauraia: “Lauegu heduru be Iehova amo.” (Salamo 121:​2, NW ) Dahaka dainai inai salamo torea tauna ia abia dae momokani Iehova ese do ia durua? Inai henanadai haerelaia totona, mani Salamo karoa 121 ita tahua. Unai amo do ita diba, ita danu be dahaka dainai mai abidadama ida ita gwau diba Iehova be iseda Durua Tauna.

Ia Doko Diba Lasi Heduruna

3. Salamo torea tauna be edena ororo dekenai ena matana ia negea lao, bona dahaka dainai?

³ Salamo torea tauna be ena hereva ia matamaia neganai, ia hahedinaraia Iehova be gau ibounai ia havaraia dainai, ita abidadama henia diba. Ia gwau: “Lau ese ororo dekenai egu matana do lau negea, to lau do ia durua tauna be edeseni do lau davaria?” Ma ia haere, ia gwau: “Lauegu heduru be Iehova amo. Ia be guba bona tanobada ia Karaia Tauna.” (Salamo 121:​1, 2; NW ) Salamo torea tauna be ororo idauna ta dekenai ena matana ia negea lao lasi. Unai hereva ia torea neganai, Iehova ena dubu helaga be Ierusalema dekenai ia gini. Ierusalema be Iuda ena ataiai momokani ororona dekenai, bona ia be Iehova ena noho gabuna ia laulaulaia. (Salamo 135:21) Salamo torea tauna be Iehova ena dubu helaga ia gini ororona, Ierusalema dekenai ena matana ia negea lao, mai abidadama ida Iehova ena heduru ia tahua totona. Dahaka dainai salamo torea tauna ia diba momokani Iehova ese do ia durua? Badina “Ia ese guba bona tanobada ia karaia.” Anina be salamo torea tauna ia gwau: ‘Mai ena siahu bada Havaraia Tauna ese lau ia durua dalana be gau ta ese do ia koua diba lasi!’​—⁠Isaia 40:⁠26.

4. Salamo torea tauna ese edena dala amo ia hahedinaraia Iehova be iena taunimanima edia dabu gaudia ia laloa bada, bona dahaka dainai unai ese iseda lalona ia hagoadaia?

⁴ Salamo torea tauna ese ma ia hahedinaraia Iehova be iena hesiai taudia edia dabu gaudia ia laloa bada: “Lohiabada ese oi do ia dogoatao, vadaeni oiemu aena do ia dedi lasi. Ia ese oi do ia naria, ia be ia mahuta lasi. Kamonai! Lohiabada ese Israela ia naria noho. Ia be nega ta ia mahuta lasi, lasi momokani.” (Salamo 121:​3, 4) Dirava ese iena abidadama taudia ia gimaia dainai, do idia “dedi lasi,” eiava bema idia moru neganai do idia toreisi lou diba. (Aonega Herevadia 24:16) Dahaka dainai unai bamona ia vara? Badina Iehova be ia noga noho mamoe naria tauna bamona ena mamoe ia gimaia noho. Unai ese iseda lalona ia hagoadaia, ani? Iehova be nega ibounai iena taunimanima edia dabu gaudia do ia henia noho. Dina bona hanuaboi ia ese idia ia gimaia noho.

5. Dahaka dainai Baibel ia gwau Iehova be iseda imana idibana badibadinai ia gini?

⁵ Salamo torea tauna ia diba momokani Iehova be iena taunimanima ia Gimaia Tauna dainai, ia gwau: “Lohiabada ese oi do ia gimaia. Ia be oiemu [“imana idibana,” NW ] badibadinai ia noho, oi ia naria noho. Dina neganai, dina ena siahu ese oi do ia hagorerea lasi, bona hanuaboi neganai hua ese oi do ia hadikaia lasi.” (Salamo 121:​5, 6) Middle East dekenai keruma gabuna be dina ena siahu amo loaloa tauna ia gimaia. Iehova be keruma gabuna ta bamona ena taunimanima dekenai, Ia ese dika ena hisihisi amo ia gimadia. Ita itaia unai siri ia gwau, Iehova be iseda “[“imana idibana,” NW ] badibadinai ia noho.” Idaunegai, tuari lalonai tuari tauna ena imana idibana be gau ta ese ia gimaia lasi, badina kesi be ena imana laurina dekenai ia dogoatao. Unai dainai, tuari tauna ia gimaia totona ena turana namona ta be idiba kahanai do ia gini bona ia heai. Unai tura namona hegeregerena, Iehova be hanaihanai ia idia tomadiho henia taudia badinai ia gini hegaegae idia ia durua totona.

6, 7. (a) Edena dala ai salamo torea tauna ese ita ia hagoadaia Iehova be iena taunimanima durua karana do ia hadokoa lasi? (b) Dahaka dainai ita be salamo torea tauna hegeregerena ita abidadama diba?

⁶ Iehova ese iena taunimanima ia durua karana do ia hadokoa, a? Unai do ia vara diba lasi. Salamo torea tauna ia gwau: “Lohiabada ese dika ibounai dekena amo oi ia naria noho. Ia ese oiemu mauri do ia gimaia. Oiemu ruma oi rakatania neganai, Lohiabada ese oi do ia naria, bona oi giroa mai neganai danu, ia ese oi do ia gimaia, harihari ia lao bona hanaihanai.” (Salamo 121:​7, 8) Mani oi itaia salamo torea tauna ese hari inai nega ela bona vaira negana ia herevalaia. Guna, siri 5 lalonai, salamo torea tauna ia gwau, Iehova be “oi ia naria noho.” To inai siri lalodiai, salamo torea tauna ia gwau: “Lohiabada ese oi do ia naria.” Iehova idia tomadiho henia momokani taudia idia lalo-goada, badina Iehova ena heduru be harihari ela bona vaira negana ai do idia abia noho. Herevana, edeseniai idia lao, dahaka hekwakwanai idia davaria, iena imana be ia noho hegaegae idia ia durua totona.​—⁠Aonega Herevadia 12:⁠21.

⁷ Oibe, Salamo 121 ia torea tauna ia abia dae momokani, siahu ibounai Havaraia Tauna be mai ena hebogahisi mamoe naria tauna bamona bona ia noga noho gima tauna bamona iena hesiai taudia ia naridia noho. Ita danu be salamo torea tauna bamona ita abidadama diba, badina Iehova ena kara be ia idau lasi. (Malaki 3:⁠6) Unai ena anina be hanaihanai tauanina dalanai ita do ia gimaia, a? Lasi, to bema ia be iseda Durua Tauna ai ita halaoa, lauma dalanai dika ita davaria gaudia amo ita do ia gimaia. Vadaeni, ita henanadai, ‘Edena dala ai Iehova ese ita ia durua?’ Ita ia durua daladia hani mani ita tahua. Inai hereva lalonai, Baibel negadiai iena hesiai taudia ia durua daladia do ita stadilaia. Hereva gabena ai, hari inai negai iena taunimanima ia durua daladia do ita stadilaia.

Aneru Edia Heduru

8. Dahaka dainai aneru ese Dirava ena hesiai taudia idia laloa bada karana be ita hoalaia lasi?

⁸ Iehova ese aneru milioni momo herea ia biagudia. (Daniela 7:​9, 10) Unai lauma natudia be mai abidadama ida iena ura idia karaia. (Salamo 103:20) Idia diba Iehova be ia idia tomadiho henia taudia ia lalokau henidia bada bona ia ura ia durudia. Unai dainai ita diba, tanobada ai Dirava ena hesiai taudia dekenai dahaka ia vara be aneru ese idia laloa bada. (Luka 15:10) Oibe, aneru idia moale bada, badina Iehova ese ia gaukaralaidia taunimanima idia durua totona. Idaunegai, edena dala ai Iehova ese aneru ia gaukaralaidia iena hesiai taudia idia durua totona?

9. Iehova ese aneru dekenai siahu ia henia abidadama taudia gimaia totona ena sivarai ta, mani oi gwauraia.

⁹ Dirava ese aneru dekenai siahu ia henia abidadama taudia idia gimaia bona hamauria totona. Aneru rua ese Lota bona ena natuna kekeni rua idia durudia, Sodoma bona Gomora ena dika amo idia roho mauri totona. (Genese 19:​1, 15-17) Asuria tuari taudia be Ierusalema idia hadikaia gwauraia neganai, aneru tamona ese unai tuari taudia 185,000 ia hamasedia. (2 King Taudia 19:35) Daniela be laiona edia guri lalonai idia negea diho neganai, Iehova “ese iena aneru ia siaia mai, laiona edia uduna ia koua.” (Daniela 6:​21, 22) Aneru ta ese dibura ruma amo aposetolo Petero ia ruhaia. (Kara 12:​6-11) Baibel lalonai aneru ese taunimanima idia gimaia edia sivarai momo idia noho. Unai ese Salamo 34:7 ia hamomokania, ia gwau: “Lohiabada ena aneru ese, Dirava dekenai idia gari taudia ia naridia noho, bona dika dekena amo ia hamauridia noho.”

10. Edena dala ai Iehova ese aneru ia gaukaralaia Daniela ia hagoadaia totona?

¹⁰ Nega haida, Iehova ese aneru ia gaukaralaidia abidadama taudia idia durua bona hagoadaia totona. Haheitalai namona ta be Daniela karoa 10 lalonai. Unai nega ai, reana Daniela ena mauri lagani be kahirakahira 100 bamona. Unai peroveta tauna ia lalo-manoka badina Ierusalema be ia dika bona dubu helaga idia do haginia lou lasi. Danu, gari ia havaraia matahanaina ta ia itaia murinai ia lalo-hekwarahi bada. (Daniela 10:​2, 3, 8) Dirava be mai lalokau ida aneru ta ia siaia Daniela ia hagoadaia totona. Nega momo aneru be Daniela ia hamaoroa Dirava ese “ia lalokau henia bada.” Vadaeni, dahaka ia vara? Unai buruka peroveta tauna ese aneru ia hamaoroa: “Oiemu hereva dekena amo goada lau abia vadaeni.”​—⁠Daniela 10:​11, 19.

11. Aneru ese sivarai namona harorolaia gaukarana idia gunalaia ena haheitalai ta oi gwauraia.

¹¹ Iehova ese aneru ia gaukaralaia danu sivarai namona harorolaia gaukara idia gunalaia totona. Aneru ta ese Filipo ia hakaua lao Etiopia eunuko tauna dekenai Keriso ena sivarai ia harorolaia totona, bena unai tau ia bapatiso. (Kara 8:​26, 27, 36, 38) Nega sisina murinai, Dirava ia ura sivarai namona be kopina idia utua lasi Idau Bese taudia dekenai do idia harorolaia. Matahanai ta lalonai, aneru ta be Korenelio, Dirava ia gari henia Idau Bese tauna dekenai ia hedinarai, bona ia hamaoroa hesiai taudia do ia siaidia aposetolo Petero idia hakaua mai totona. Korenelio ese ia siaia taudia be Petero idia davaria neganai, idia gwau: “Aneru helagana ta ese Dirava ena hereva Korenelio dekenai ia hamaoroa, ia gwau, ‘Oi ese Petero do oi boiria mai oiemu ruma dekenai, bona iena hereva do oi kamonai.’ ” Petero be idia danu ia lao, bona kopina utua lasi Idau Bese taudia ginigunadia be Keristani kongrigeisen lalonai idia vareai. (Kara 10:​22, 44-48) Mani oi laloa emu hemami be edena bamona, bema aneru ta ese oi ia hakaua lao bona kudou-maoro tauna ta oi davaria!

Lauma Helaga Ena Heduru

12, 13. (a) Iesu ena aposetolo taudia be dahaka badina namona dainai, idia abia dae momokani lauma helaga ese do ia durudia? (b) Edena dala ai lauma helaga ese Keristani taudia ginigunadia dekenai goada ia henia?

¹² Iesu ena mase negana ia kahirakahira neganai, ena aposetolo taudia ia hamaoroa idia do ia durua bona do ia rakatanidia kava lasi. Ena Tamana ese “Durua Tauna, Lauma Helaga” do ia siaia. (Ioane 14:26) Badina namona dainai aposetolo taudia idia abia dae momokani diba lauma helaga ese idia do ia durua. Oibe, Iehova ese lauma helaga, siahu ibounai ia hanaia siahuna unai, ia gaukaralaia iena taunimanima ia durua dalana edia sivarai momo be Baibel lalonai.

¹³ Nega momo, lauma helaga ese taunimanima dekenai goada ia henia Iehova ena ura idia karaia totona. Lauma helaga ese Diadi Taudia dekenai goada ia henia Israela taudia idia hamauria totona. (Gunalaia Taudia 3:​9, 10; 6:34) Unai lauma ese ma Keristani taudia ginigunadia dekenai goada ia henia, dagedage negadia lalonai mai gari lasi ida idia haroro noho totona. (Kara 1:8; 4:31) Edia haroro gaukara dekenai idia kwalimu ese ia hamomokania lauma helaga ia gaukara noho. Dala ma ta be lasi “sikuli bada lasi bona aonega bada lasi taudia” ese Basileia ena sivarai be unai nega ai idia noho besedia dekenai idia harorolaia totona, ani?​—⁠Kara 4:13; Kolose 1:⁠23.

14. Edena dala ai Iehova ese ena lauma helaga ia gaukaralaia ena taunimanima dekenai lalo-parara ia henia totona?

¹⁴ Iehova ese ena lauma helaga ia gaukaralaia iena taunimanima dekenai lalo-parara ia henia totona. Dirava ena lauma helaga ena heduru dainai, Iosepa be Farao ena peroveta nihi edia anina ia gwauraia hedinarai diba. (Genese 41:​16, 38, 39) Iehova ese ena lauma helaga amo, manau taudia dekenai ia ura karaia gaudia ia hahedinaraia, to hekokoroku taudia amo ia hunia. (Mataio 11:25) Unai dainai, aposetolo Paulo be Iehova ese “ia idia lalokau henia taudia” dekenai ia henia gaudia ia herevalaia neganai, ia gwau: “Inai gaudia be hunia dekenai idia noho, to Dirava ese iena Lauma dekena amo ita dekenai ia hedinaraia.” (1 Korinto 2:​7-10) Lauma helaga ena heduru sibona amo tau ta be Dirava ena ura gaudia ia lalo-pararalaia diba.

Dirava Ena Hereva amo Ia Mai Heduruna

15, 16. Dirava ese Iosua ia hamaoroa dahaka do ia karaia iena raka ia namo totona?

¹⁵ Iehova ena Hereva, lauma helaga amo idia torea bukana be ‘mai ena siahu, hereva momokani ita dekenai ia hadibaia’ totona bona Dirava ena hesiai taudia ia durua ‘kara namodia ibounai do idia karaia diba, mai kwalimu danu.’ (2 Timoteo 3:​16, 17) Idaunegai, idia torea vadaeni Baibel ena kahana haida ese Dirava ena taunimanima idia durua dalana edia sivarai momo be Baibel lalonai idia noho.

¹⁶ Baibel ese Dirava idia tomadiho henia taudia ia durua sisiba maorona idia abia totona. Iosua be Israela besena do ia gunalaia maduna ia abia neganai, Dirava ese ia hamaoroa: “Inai Taravatu Buka [Mose ese ia torea gauna] be nega ibounai emui guriguri heboudia lalonai do umui duahia. Dina bona hanuaboi do oi tahua, bona iena torea herevadia ibounai do oi kamonai henia. Unai neganai oiemu raka do ia namo, bona oiemu kara ena anina do ia vara momokani.” Ita itaia, Dirava ia gwauhamata lasi Iosua be hoa dalanai aonega do ia abia. Lasi, to bema Iosua ese “Taravatu Buka” ia duahia bona ia laloa dobu, vadaeni iena raka do ia namo.​—⁠Iosua 1:8; Salamo 1:​1-3.

17. Daniela bona King Iosaia be edena dala ai edia negai idia torea vadaeni Baibel ena kahana haida amo heduru idia abia?

¹⁷ Dirava ena Hereva ese Dirava ena ura ia hahedinaraia danu. Hegeregere, Daniela be Ieremia ena toretore amo ia diba Ierusalema be lagani hida lalonai do ia noho kava. (Ieremia 25:11; Daniela 9:⁠2) Danu, King Iosaia ese Iuda ia lohiaia lalonai ia vara gauna mani oi laloa. Unai nega ai, taunimanima be Iehova idia rakatania, bona king taudia be sibodia edia Taravatu idia torea lasi bona idia badinaia lasi. (Deuteronomi 17:​18-20) To dubu helagana idia hanamoa noho lalonai, “Taravatu Bukana,” reana Mose ese ia torea gauna idia davaria. Reana ia be Taravatu ena toretore ginigunana, lagani 800 gunanai idia torea haorea gauna. Iosaia dekenai unai Taravatu idia duahia murinai, ia lalo-parara taunimanima be Iehova ena ura idia rakatania momokani, bona King Iosaia ese dala ia karaia unai buka ena hereva ia badinaia totona. (2 King Taudia 22:8; 23:​1-7) Oibe, ia hedinarai goevagoeva, idaunegai Dirava ena taunimanima be idia torea vadaeni Buka Helagana ena kahana haida amo heduru idia abia.

Iseda Tadikaka Edia Heduru

18. Dahaka dainai ita hereva diba tomadiho momokani tauna ta ese ena tadikaka ia durua neganai, Iehova ese unai ia karaia?

¹⁸ Iehova ese ia henia heduru be nega momo iseda tadikaka amo ia mai. Oibe, tomadiho momokani tauna ta ese ena tadikaka ta ia durua neganai, unai heduru be Iehova amo. Dahaka dainai unai bamona ita hereva diba? Badina rua dainai. Ginigunana be Dirava ena lauma helaga ese unai ia karaia. Lauma helaga ena siahu idia tahua taudia ese lauma ena huahua, hegeregere lalokau bona kara namo idia hahedinaraia. (Galatia 5:​22, 23) Unai dainai, Dirava ena hesiai tauna ta ia ura ena tadikaka ia durua neganai, unai ese ia hamomokania Iehova ena lauma helaga ia gaukara noho. Iharuana be, ita be Dirava ena toana hegeregerena ai ia karaia. (Genese 1:26) Unai anina be ita ese Dirava ena kara, hegeregere manau bona hebogahisi ita hahedinaraia diba. Unai dainai, Dirava ena hesiai tauna ta ese ena tadikaka ia durua neganai, unai heduru ena Badina korikori be Iehova, badina unai hesiai tauna ese Dirava ena kara ia hahedinaraia.

19. Baibel ena sivarai hegeregerena, edena dala ai Iehova ese tadikaka amo heduru ia henia?

¹⁹ Baibel negadiai, edena dala ai Iehova be tadikaka amo heduru ia henia? Nega momo Iehova ese ena hesiai tauna ta amo ma ta dekenai sisiba ia henia; Ieremia ese Baruku hamauria totona sisiba ia henia bamona. (Ieremia 45:​1-5) Nega haida, tomadiho momokani taudia ese edia tadikaka be tauanina dalanai idia durudia, Makedonia bona Akaia dekenai Keristani taudia be mai edia ura bada ida Ierusalema dekenai idia noho tadikaka idia durudia hegeregerena. Aposetolo Paulo ia gwau unai bamona hariharibada karana ese ‘Dirava ia hanamoa.’​—⁠2 Korinto 9:⁠11.

20, 21. Roma tadikaka ese Paulo be edena bamona idia hagoadaia?

²⁰ Iehova ena hesiai taudia ese ta ta idia durua bona hagoadaia heheni sivaraidia ese ita idia durua bada. Mani aposetolo Paulo dekenai ia vara sivaraina ta ita itaia. Paulo be dibura tauna bamona Roma dekenai ia lao neganai, Roma ena dala, Apio Dalana, amo idia hakaua lao. Ena laolao dokona be ia namo lasi, badina unai dala dekenai idia raka taudia be kopukopu gabuna idia hanaia.a Roma ena kongrigeisen tadikaka idia diba Paulo ia mai noho. Dahaka do idia karaia? Edia ruma namodia lalonai do idia naria noho ela bona Paulo ia ginidae, bena do idia lao idia hedavari henia, a?

²¹ Baibel torea tauna, Luka, be Paulo ida ia raka, bona ia vara gauna be ita dekenai ia gwauraia: “Roma dekenai Keristani taudia ese ai mai noho sivarai idia kamonai. Vadaeni dala dekenai idia raka mai, bona hoihoi gabu ladana Apio bona Laga-ani Ruma Toi dekenai idia danu ai hedavari.” Emu matana ena lalona dekenai unai oi itaia diba, a? Idia diba Paulo ia mai noho dainai, tadikaka haida be Roma amo idia raka lao ia idia hedavari henia totona. Idia haida be laga-ani gabuna ta, Apio ena maketi gabuna dekenai idia naria, ena daudau Roma amo be kilomita 74 bamona. Tadikaka ma haida be laga-ani gabuna ma ta, Laga-ani Ruma Toi dekenai idia naria, ena daudau Roma amo be kilomita 58 bamona. Paulo be unai ia diba neganai, dahaka ia karaia? Luka ia gwau: “Paulo ese idia ia itaia neganai, Dirava dekenai ia tanikiu henia, bona iena lalona dekenai goada ia abia.” (Kara 28:15) Mani oi laloa​—⁠Paulo ia itaia unai tadikaka idia hekwarahi bada ia idia hedavari henia totona idia raka mai neganai, unai ese Paulo ia hagoadaia bada! Bona Paulo be unai heduru karana dainai daika ia tanikiu henia? Unai heduru ena badina​—⁠Iehova Dirava​—⁠ia tanikiu henia.

22. Lagani 2005 ena siri badana be dahaka, bona hereva gabena lalonai dahaka do ita stadilaia?

²² Oibe, Baibel lalonai Dirava ese taunimanima ia kara henidia edia sivarai ese idia hamomokania Ia be ita ia Durua Tauna. Ma ta ese ia hereaia lasi. Unai dainai, Iehova ena Witnes taudia ese idia abia hidi lagani 2005 ena siri badana be Salamo 121:​2, (NW ) ia gwau: “Lauegu heduru be Iehova amo.” To, hari inai negai, Iehova ese edena bamona ita ia durua? Hereva gabena ese unai do ia hahedinaraia.

[Footnote]

Oi Laloatao, A?

Edena dala ai Iehova ese heduru ia henia​—⁠

• aneru amo?

• ena lauma helaga amo?

• Buka Helaga amo?

• tadikaka amo?

[Blurb on page 7]

Lagani 2005 ena siri badana be: “Lauegu heduru be Iehova amo.”​—⁠Salamo 121:⁠2, NW.

[Picture on page 8]

Roma tadikaka edia heduru dainai, Paulo ese Dirava ia tanikiu henia