Iehova Ena Heduru Oi Abia Dae, A?
“Lohiabada be lauegu durua Tauna, lau be lau gari diba lasi.”—HEBERU 13:6.
1, 2. Dahaka dainai iseda mauri lalonai Iehova ena heduru bona hakaua dalana ita abia dae be gau badana?
MANI oi laloa, oi be ororo ta ena dala maragina dekenai oi raka noho. To, oi be sibona oi raka lasi, badina hakaua tauna ta ia gwau oi do ia bamoa, bona ia be hakaua tauna namo hereana. Ena be iena diba bona goada be oiemu ia hanaia, to mai haheauka ida oi kahirakahira ia raka. Ia itaia nega haida oi hekwakwanai. Emu mauri ia laloa dainai, gabu dikana ta dekenai oi ia durua totona ena imana ia henia oi dogoatao totona. Ena heduru do oi dadaraia, a? Lasi! Badina dika do oi davaria.
2 Ita Keristani taudia ese ita badinaia dalana be ia auka. Ita sibona be unai dala maragina dekenai do ita raka be namo, a? (Mataio 7:14) Lasi, Baibel ia hahedinaraia Iehova Dirava be iseda Hakaua Tauna hereadaena bona ia ura ita ida ia raka hebou. (Genese 5:24; 6:9) Iehova ena hesiai taudia idia raka neganai ia durudia, a? Ia gwau: “Lau Iehova, emu Dirava, ese emu imana idibana do lau dogoatao, oi dekenai lau hereva, ‘Oi gari lasi, lau ese oi do lau durua.’ ” (Isaia 41:13, Buka Helağa) Iehova be iseda haheitalai lalonai ia noho hakaua tauna bamona. Ia ese mai hebogahisi ida idia ura Dirava ida idia raka taudia dekenai ena imana ia henia bona ia ura ia tura henidia. Oibe, ita ibounai ita ura ena heduru ita abia!
3. Inai stadi lalonai edena henanadai do ita laloa?
3 Iseda hereva ginigunana lalonai, ita be Iehova ese idaunegai iena taunimanima ia durua daladia hani ita stadilaia. Hari inai negai, iena taunimanima be unai dala ai ia durudia danu, a? Bona unai bamona heduru ita abia totona, dahaka ita karaia be namo? Iehova be iseda Durua Tauna ita abia dae momokani totona, mani unai henanadai ita lalodia.—Heberu 13:6.
Aneru Edia Heduru
4. Dahaka dainai hari inai negai, Dirava ena hesiai taudia idia abia dae momokani aneru ese idia durudia diba?
4 Hari inai negai, aneru be Iehova ena hesiai taudia idia durua, a? Oibe, idia be unai bamona idia karaia. To hari inai negai, aneru be dika amo tomadiho momokani taudia idia durua, to idia be iseda matana amo ita itaia lasi. Baibel negadiai danu, taunimanima idia durua neganai, nega haida sibona idia hedinarai. Aneru edia gaukara momo be taunimanima ese idia itaia diba lasi dalanai idia karaia, hari danu be unai bamona. To, Dirava ena hesiai taudia idia diba aneru ese idia ia durua, bona unai ese edia lalona ia hagoadaia bada. (2 King Taudia 6:14-17) Badina namona dainai unai bamona ita lalo-goada diba.
5. Baibel ese edena bamona ia hahedinaraia hari inai nega ena haroro gaukara lalonai aneru be mai edia maduna?
5 Iehova ena aneru be ita ese ita karaia gaukara badana ta idia laloa bada. Unai gaukara be dahaka? Apokalupo 14:6 dekenai haere do ita davaria, ia gwau: “Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia.” Unai “noho hanaihanai Sivarai Namona” be “Basileia ena Sivarai Namona” hegeregerena, bona Iesu ese ia perovetalaia ia gwau “tanobada ibounai dekenai do idia harorolaia” bena dokona do ia ginidae. (Mataio 24:14) Oibe, aneru be taunimanima idia haroro henia lasi. Iesu ese unai gaukara badana be taunimanima dekenai ia henia. (Mataio 28:19, 20) To, ita goada badina ita diba unai gaukara lalonai aneru helagadia, mai edia aonega bona siahu bada ese ita idia durua noho.
6, 7. (a) Dahaka ese ia hahedinaraia aneru be iseda haroro gaukara idia durua noho? (b) Dahaka ita karaia neganai ita diba momokani Iehova ena aneru ese ita do idia durua?
6 Aneru ese iseda gaukara idia durua ena hamomokania gaudia be momo herea. Hegeregere, nega momo ita kamonai, Iehova ena Witnes taudia ese haroro gaukara lalonai tau ta idia davaria bona unai tau be vanegai sibona Dirava ia guriguri henia badina ia ura hereva momokani ia diba. Unai bamona ekspiriens momo idia vara dainai, ita diba aneru ese ita idia hakaua. Aneru edia heduru dainai, taunimanima momo herea be ‘guba ataiai ia roho lao aneru’ bamona idia boiboi bada, idia gwau: “Dirava do umui gari henia, ia do umui hanamoa bada.”—Apokalupo 14:7.
7 Oi ura Iehova ena aneru goadadia ese oi idia durua, a? Vadaeni, namona be emu haroro gaukara lalonai oi gaukara goadagoada. (1 Korinto 15:58) Iehova ese ia henia gaukara badana be mai eda ura ida ita karaia neganai, ita diba momokani aneru ese ita do idia durua.
Aneru Badana Ena Heduru
8. Iesu be guba ai dahaka dagi badana ia abia bona dahaka dainai unai ese iseda lalona ia hagoadaia?
8 Iehova ese ita dekenai aneru edia heduru idauna ma ta ia henia. Apokalupo 10:1 ese “aneru goadana” ta, iena “vairana be dina bamona” ia herevalaia. Inai matahanai lalonai ia hedinarai aneru be guba dekenai siahu bona hairai ia abia vadaeni tauna, Iesu Keriso, ia laulaulaia. (Apokalupo 1:13, 16) Momokani, Iesu be aneru ta, a? Oibe, badina ia be aneru badana. (1 Tesalonika 4:16) Iehova ena lauma natudia iboudiai amo Iesu ena siahu be bada herea. Iehova ese Iesu ia atoa Iena aneru tuari oreana ibounai do ia biagua. Inai aneru badana be mai ena siahu bada ita ia durua totona. Edena dala idauidau amo ita ia durua?
9, 10. (a) Ita kara dika neganai, edena dala ai Iesu be iseda “durua tauna”? (b) Iesu ena haheitalai amo dahaka heduru ita abia diba?
9 Ia buruka aposetolo Ioane ia gwau: “Tau ta bema ia kara dika, ita be mai iseda durua tauna, iseda Tamana ena vairanai. Ia be Iesu Keriso, kara maoromaoro tauna.” (1 Ioane 2:1) Dahaka dainai Ioane ia gwau “kara dika” ita karaia neganai, Iesu be iseda “durua tauna”? Badina dina ta ta ai ita be kara dika ita karaia, bona kara dika ese mase ia mailaia. (Hadibaia Tauna 7:20; Roma 6:23) To, Iesu ese ena mauri be boubou gauna bamona ia henia iseda kara dika kokia totona. Bona ia be iseda hebogahisi Tamana ena badinai ia helai bona ita dainai ia noinoi. Ita ta ta be unai bamona heduru ita abia be namo. Edena bamona unai heduru ita abia diba? Namona be iseda kara dika amo ita helalo-kerehai bona Iesu ena boubou gauna ladana ai gwauatao karana do ita tahua. Danu, namona be ita hekwarahi unai kara dika ita karaia lou lou lasi totona.
10 Iesu be ita dainai ia mase, bona ita dekenai haheitalai goevadaena ia hahedinaraia danu. (1 Petero 2:21) Iena haheitalai ese ita ia hakaua, ita ia durua iseda raka dalana ita abia hidi namonamo, bona unai amo kara dika badadia ita dadaraia diba, bona Iehova Dirava ita hamoalea diba. Unai heduru dainai ita moale bada, a? Iesu ese iena murinai idia raka taudia ia hamaorodia heduru gauna ma ta do ia henia.
Lauma Helaga Ena Heduru
11, 12. Iehova ena lauma be dahaka, ena siahu be edena bamona, bona dahaka dainai hari inai negai ita abia be gau badana?
11 Iesu ia gwauhamata: “Tamana do lau noia, ia ese Durua Tauna ta do ia henia umui dekenai, umui dekenai do ia noho hanaihanai, hereva momokani Laumana unai. Tanobada taudia be ia idia abia dae diba lasi.” (Ioane 14:16, 17) Unai “hereva momokani Laumana” eiava lauma helaga, be tau ta lasi to ia be siahu ta—Iehova ena gaukara siahuna. Iena siahu be bada herea momokani. Iehova ese unai siahu ia gaukaralaia guba bona tanobada ia havaraia, hoa gaudia ia karaia bona matahanai amo iena ura ia hahedinaraia totona. Hari inai negai, Iehova ese unai dala ai lauma helaga ia gaukaralaia lasi dainai, ita gwau diba lauma helaga ita abia be anina lasi, a?
12 Lasi! Hari, inai “metau dikadia” negadia ai, Iehova ena lauma helaga ita abia be gau badana. (2 Timoteo 3:1) Ita ia durua hahetoho ita haheaukalaia totona. Ita ia durua kara namodia ita badinaia totona, unai amo Iehova bona iseda tadikaka bona taihu kahirakahira do ita lao diba. (Galatia 5:22, 23) Vadaeni, Iehova ese ia henia heduru gauna namona amo, edena bamona namo ita davaria diba?
13, 14. (a) Dahaka dainai ita diba momokani, Iehova be mai ena ura ida ena taunimanima dekenai lauma helaga ia henia? (b) Dahaka kara amo ita hahedinaraia diba ita be lauma helaga ita abia dae lasi?
13 Gau ginigunana be, lauma helaga totona ita guriguri be namo. Iesu ia gwau: “Umui laloa, umui be dika taudia, gau namodia emui natuna dekenai henia be umui diba, to emui Tamana guba dekenai ia noho ese Lauma Helaga be idia noinoi taudia dekenai do ia henidia lasi, a?” (Luka 11:13) Oibe, Iehova be Tamana hereadaena. Bema mai abidadama ida ena lauma helaga totona ita noinoi, ita diba momokani unai harihari gauna do ia henia. Vadaeni, henanadai be inai: Lauma helaga totona ita noinoi, a? Namona be dina ta ta ai, iseda guriguri lalonai lauma helaga totona ita noinoi.
14 Gau iharuana be, unai harihari gauna ita abia dae bona ena hakaua dalana ita badinaia. Inai bamona ita haheitalaia diba: Reana, tadikaka ta be ia hekwarahi bada badina matabodaga laulau eiava buka ia itaia momo karana ia ura ia dadaraia. Ia guriguri vadaeni, lauma helaga ese do ia durua unai kara mirona ia rakatania totona. Ia be Keristani elda taudia amo sisiba ia tahua, bona idia hamaoroa namona be ena lalona ia hadaia, unai matabodaga gaudia amo ia gini siri totona. (Mataio 5:29) To, edena bamona bema edia sisiba ia dadaraia bona hahetoho ia mai neganai, unai gaudia ia itaia lou? Iena guriguri lauma helaga ena heduru abia totona ia badinaia, a? Eiava, ia ese Dirava ena lauma helaga do ia hahisia bona ia haboioa diba? (Efeso 4:30) Momokani, Iehova amo ia mai heduru ita abia noho totona, namona be ita ibounai ita gaukara goadagoada.
Dirava Ena Hereva amo Ia Mai Heduruna
15. Edena bamona ita hahedinaraia diba Baibel ita laloa bada?
15 Lagani handred momo lalodiai, Baibel be Iehova ena abidadama hesiai taudia ia durua. Namo lasi ita laloa Buka Helaga be buka ta sibona, to namona be ita laloatao ia be mai ena siahu bada ita ia durua totona. Unai heduru ita abia totona namona be ita hekwarahi. Nega ibounai Baibel ita duahia be namo.
16, 17. (a) Edena dala ai Salamo 1:2, 3 ese Dirava ena taravatu duahia karana ena namo ia gwauraia? (b) Edena dala ai Salamo 1:3 ese gaukara goadagoada karana ena laulau ia hahedinaraia?
16 Salamo 1:2, 3 (NW ) ese Dirava ia badinaia tauna ia herevalaia: “Iehova ena taravatu dekenai ia moale, bona iena taravatu be dina bona hanuaboi lalonai ia duahia gado maragina ai. Bona ia be sinavai momo badinai idia hadoa auna bamona ai do ia lao, ena huahua atoa negana ai huahua do ia atoa, bona ena raurau do idia kakoro lasi, bona ia karaia gaudia ibounai lalonai do ia kwalimu.” Unai siri ena hereva badana oi itaia, a? Unai siri ita duahia neganai, karaharaga ita ese sinavai badinai ia gini au mai ena keruma namona ita laloa. Adorahi ta unai au henunai ita mahuta ena mamina be ia namo herea! To, unai siri be laga-ani totona, ita ia boiria lasi. Ia be laulau idauna ia hahedinaraia, ita ia boiria ita gaukara goadagoada totona. Dahaka dainai unai bamona ita hereva?
17 Mani oi itaia, unai au be sinavai badinai ia tubu keruma ia henia au ta sibona lasi. Ia be huahua ia havaraia auna bona idia abia hidi gabuna ta dekenai “idia hadoa”—“sinavai momo badinai.” Unai au tamona be edena bamona sinavai momo badinai ia gini? Oibe, huahua audia ena uma lalonai, uma biaguna ese koupa momo ia geia au edia ramuna dekenai ranu ia aru lao totona. Vadaeni, hereva ena anina ia hedinarai unai! Bema lauma dalanai unai au bamona ita tubu namonamo, ena badina be tau ta ia gaukara goadagoada ita ia durua totona. Ita dekenai hereva momokani ena ranu goevana ia mailaia oreana ita bamoa, to namona be iseda maduna ita huaia. Namona be unai ranu goevana ita abia diba gabuna dekenai ita gini, bona laloa dobu bona tahua karana amo Dirava ena Hereva momokanidia be iseda lalona bona kudouna dekenai do ita atoa. Unai dala amo, ita danu be huahua namodia do ita havaraia.
18. Baibel lalonai iseda henanadai edia haere ita davaria totona, dahaka ita karaia be namo?
18 Bema Baibel be teibolo latanai ia noho kava, ita dekenai namo do ia mailaia lasi. Bona danu, Baibel be toni bamona lasi—hegeregere ita laloa iseda matana ita koua, bona Baibel ita kehoa kava bona ita kehoa rau dekenai iseda henanadai edia haere do ia hedinarai. Lasi. Abia hidi ita karaia totona, namona be Dirava ena diba do ita tahua, idia hunia dava bada kohu ita tahua bamona. (Aonega Herevadia 2:1-5) Iseda hekwakwanai ta ita hamaoromaoroa totona, namona be mai hekwarahi ida Baibel ena sisiba ita tahua namonamo. Ita be mai eda Baibel bukadia momo, iseda tahua karana lalonai ita gaukaralaia totona. Unai buka lalodiai Dirava ena Hereva ena dava bada aonega herevadia ita abia totona ita hekwarahi neganai, ita be Iehova ena heduru ita gaukaralaia namonamo noho.
Iseda Tadikaka Edia Heduru
19. (a) Dahaka dainai ita gwau diba Gima Kohorona bona Awake! magasin edia hereva be iseda tadikaka amo idia mai durua gaudia? (b) Iseda magasin edia hereva ta ese edena bamona oi ia durua?
19 Iehova ena hesiai taudia be nega ibounai idia heduru heheni. Iehova be ena kara ia haidaua, a? Lasi. Oibe, reana ita ta ta be nega ta ita laloatao, unai negai ita be mai iseda hekwakwanai bona iseda tadikaka ese ita idia durua bada. Hegeregere, oi laloatao Gima Kohorona eiava Awake! magasin ena hereva ta be oi lalohisihisi neganai oi ia hagoadaia, eiava oi ia durua emu hekwakwanai ta oi hamaoromaoroa, eiava oi ia durua emu abidadama ia tohoa gauna ta oi haheaukalaia totona, a? Iehova be “hesiai tauna mai ena kamonai, bona mai ena kara maoromaoro” dekenai gaukara ia henia nega korikori ai “aniani do ia henia” totona, unai dala amo Iehova be oi dekenai unai heduru ia henia.—Mataio 24:45-47.
20. Edena dala ai Keristani elda taudia idia hamomokania idia be “harihari gaudia”?
20 To nega momo iseda tadikaka amo heduru ita abia. Keristani elda ta ese ia henia tok ese ita ia hagoadaia, eiava hekwakwanai ita davaria neganai, ena mamoe vadivadi gaukarana amo ita ia durua, eiava mai manau ida sisiba ia henia dainai ita ia durua iseda manoka gauna ita itaia bona hanaia totona. Keristani taihu ta ese elda ta ena heduru be inai bamona ia gwauraia: “Haroro gaukara lalonai, lau ia durua egu lalona ai idia noho gaudia lau kikilaia totona. Hanuaboi gunanai, lau ese Iehova lau noia, lau hereva henia diba tauna ta ia siaia totona. Bena dabai, unai tadikaka be mai hebogahisi ida lau ia hereva henia. Unai tadikaka ese lau ia durua, Iehova ese lagani momo lalonai lau ia durua noho dalana lau lalo-pararalaia totona. Iehova lau tanikiu henia bada badina lau dekenai unai elda tauna ia siaia mai.” Unai kara idauidau amo, Keristani elda taudia idia hahedinaraia idia be “harihari gaudia.” Iesu Keriso amo Iehova ese elda taudia ia henia ita dekenai, mauri ia lao henia dalana dekenai ita raka neganai, idia ese ita idia durua totona.—Efeso 4:8.
21, 22. (a) Dahaka do ia vara bema kongrigeisen taudia ese Filipi 2:4 ena sisiba idia badinaia? (b) Dahaka dainai hebogahisi kara maragidia be mai anina bada?
21 Elda taudia sibona lasi, to abidadama Keristani taudia ta ta ese inai hahegani do idia badinaia be namo, ia gwau: “Umui ese umui emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia.” (Filipi 2:4) Keristani kongrigeisen lalonai tadikaka be unai sisiba idia badinaia neganai, hebogahisi ena kara namodia idia hahedinaraia. Hegeregere, ruma bese ta be dika badana idia davaria. Tamana be natuna kekeni maragina danu sitoa dekenai idia lao. Ruma dekenai idia giroa lou lalonai, motuka aksiden idia davaria. Kekeni maragina ia mase bona tamana be bero dikadia ia davaria. Hospital ia rakatania neganai, ena tauanina be ia manoka dainai, ia sibona durua totona, gau ta ia karaia diba lasi. Ena hahine be ia lalohisihisi bada dainai, ia hegeregere lasi ia naria totona. Kongrigeisen lalonai headava tau bona hahine ese edia ruma dekenai idia abidia dae, bona wiki haida lalonai idia naridia.
22 Momokani, unai bamona aksiden sibona negadia ai, unai bamona hebogahisi karadia idia hedinarai lasi. Heduru haida be dala maragidia amo ita abia. To herevana, ia be hebogahisi kara maragina sibona, ita moalelaia bada, ani? Oi laloatao nega ta, tadikaka eiava taihu ta ena hebogahisi herevana eiava kara namona ese oi ia durua bada, a? Nega momo, unai bamona dala idauidau amo Iehova ese ita ia naria.—Aonega Herevadia 17:17; 18:24.
23. Ita heduru heheni totona ita hekwarahi neganai, Iehova be dahaka ia laloa?
23 Oi ura Iehova ese oi ia gaukaralaia ma haida oi durua totona, a? Unai hahenamo oi abia diba. Momokani, Iehova ese oiemu kara namo ia laloa bada. Iena Hereva ia gwau: “Bema ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” (Aonega Herevadia 19:17) Mai eda ura ida iseda tadikaka bona taihu ita durudia neganai moale bada ita davaria. (Kara 20:35) Idia ura sibona idia noho taudia be haida idia durua eiava ma haida ese idia durudia karana ena moale idia mamia lasi. (Aonega Herevadia 18:1) Unai dainai, namona be Keristani hebou dekenai ita lao hanaihanai, unai amo ita hahegoada heheni diba.—Heberu 10:24, 25.
24. Dahaka dainai ita lalohisihisi lasi ena be Iehova ese guna ia karaia hoa gaudia be hari ita itaia lasi?
24 Iehova ese ita ia durua daladia ita herevalaia neganai ita moale, ani? Ena be iseda nega lalonai Iehova ese ena ura hagugurua totona hoa kara badadia ia karaia lasi, to namona be ita lalohisihisilaia lasi. Mai anina bada gauna be, Iehova ese iseda abidadama dekenai ita gini goada noho totona, durua gaudia ibounai ia henia. Bona bema mai abidadama ida ita haheauka hebou noho, Iehova ese hoa bona hairai gaudia ia karaia negana do ita itaia! Namona be iseda lalona ita hadaia, Iehova ese mai lalokau ida ita dekenai ia henia heduru do ita abia dae bona ita gaukaralaia, unai amo ita danu be lagani 2005 ena siri badana do ita gwauraia: “Lauegu heduru be Iehova amo.”—Salamo 121:2, NW.
Dahaka Oi Laloa?
Edena dala ai hari inai negai Iehova ese heduru ia henia—
• aneru edia amo?
• ena lauma helaga amo?
• ena Buka Helaga amo?
• iseda tadikaka amo?
[Picture on page 10]
Ita diba aneru be haroro gaukara idia durua noho ese iseda lalona ia hagoadaia
[Picture on page 13]
Iehova ese iseda tadikaka ta ia gaukaralaia diba ita ia durua totona