Hari Inai Negai “Davana Bada Nadi” Tahua Karana
“Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”—MATAIO 24:14.
1, 2. (a) Iesu ena nega ai, Iuda taudia ese Dirava ena Basileia be edena bamona idia laloa? (b) Basileia idia lalo-pararalaia maoromaoro totona Iesu be dahaka ia karaia, bona unai ese dahaka ia havaraia?
IESU be tanobada dekenai ia mai neganai, Iuda taudia be Dirava ena Basileia idia herevalaia momo. (Mataio 3:1, 2; 4:23-25; Ioane 1:49) To, nega ginigunana ai idia momo be Basileia ena gaukara ena bada bona lohia siahuna idia lalo-pararalaia lasi, bona idia lalo-parara lasi ia be guba gavamanina ta. (Ioane 3:1-5) Iesu ena murinai idia raka taudia haida danu idia lalo-parara lasi Dirava ena Basileia be dahaka, eiava idia diba lasi dahaka do idia karaia Iesu ida idia lohia totona.—Mataio 20:20-22; Luka 19:11; Kara 1:6.
2 Nega ia hanaia lalonai, Iesu be mai haheauka ida iena hahediba taudia dekenai gau momo ia hadibaia, hereva ginigunana dekenai ita be davana bada nadi ena parabole ita stadilaia. Unai parabole amo idia diba mai edia goada ibounai ida guba Basileia tahua karana be gau badana. (Mataio 6:33; 13:45, 46; Luka 13:23, 24) Reana, unai ese edia kudouna ia hamarerea bada, badina idia hesiku lasi to mai gari lasi ida tanobada ena kahana ibounai dekenai Basileia ena sivarai namona idia harorolaia, bona Kara bukana ese unai ia hamomokania.—Kara 1:8; Kolose 1:23.
3. Iesu ese iseda nega ia kikilaia neganai, Basileia be edena bamona ia gwauraia?
3 Vadaeni, iseda nega be edena bamona? Taunimanima milioni momo be Basileia henunai tanobada paradaisona ai do idia noho diba. Iesu be “tanobada dokona” ia perovetalaia neganai, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:3, 14; Mareko 13:10) Danu ia gwau ena be koua gaudia, hekwakwanai, bona dagedage danu do idia vara, to unai gaukara badana be do idia karaia noho. Unai dainai, inai hagoadaia herevana ia gwauraia: “Iena lalona do ia goada noho ela bona dokona, unai tauna be do ia mauri.” (Mataio 24:9-13) Unai ita karaia totona, namona be Iesu ena parabole lalonai ia kikilaia hoihoi tauna bamona, ita ese sibona eda ura gaudia ita dadaraia bona gau ta tahua goadagoada karana do ita hahedinaraia. Hari inai negai, mai edia abidadama bona goada ibounai ida Basileia idia tahua taudia idia noho, a?
Hereva Momokani Idia Davaria Ena Moale
4. Basileia ena hereva momokani dainai hari inai negai taunimanima be dahaka idia karaia?
4 Iesu ena parabole lalonai hoihoi tauna be “davana bada nadi” ia davaria neganai ia moale bada herea. Unai moale ese ena lalona ia veria bona ena goada ibounai ida ia hekwarahi unai nadi ia abia totona. (Heberu 12:1) Hari inai negai, Dirava bona ena Basileia ena sivarai momokanina dibaia karana ese taunimanima edia lalona ia veria. Unai be Tadikaka A. H. Macmillan ese ia torea bukana (Faith on the March) ena hereva hegeregerena. Unai buka lalonai Tadikaka Macmillan be Dirava bona Iena ura ia tahua sivaraina ia torea. Ia gwau: “Lau davaria gauna be lagani ta ta ai taunimanima tausen momo ese idia davaria noho. Bona idia be oi bona lau bamona, badina idia be tano idauidau, kopi idauidau, mauri idauidau bona mauri lagani idauidau taudia. Hereva momokani be taunimanima edia toana ia laloa lasi. Ia ese taunimanima idauidau ibounai ia veria.”
5. Lagani 2004 ena hesiai laganina ena ripoti ese dahaka gau namodia ia hahedinaraia?
5 Unai hereva hegeregerena, lagani ta ta ibounai, kudou-maoro taudia handred tausen momo be Dirava ena Basileia ena sivarai namona ese edia lalona ia veria dainai, edia mauri idia gwauhamatalaia Iehova dekenai bona ena ura idia karaia. Lagani 2004 ena hesiai laganina, September 2003 ia lao August 2004 lalonai unai bamona idia karaia. Unai hua 12 lalodiai, taunimanima 262,416 be ranu bapatiso amo edia gwauhamata Iehova dekenai idia hamomokania. Unai be tano 235 lalonai ia vara, unuseniai Iehova ena Witnes taudia be pura ta ta lalonai Baibel stadi ibounai 6,085,387 idia karaia, mauri dala idauidau, tano idauidau, iduhu idauidau bona gado idauidau taudia idia durudia Dirava ena Hereva amo hahemauri ia henia hereva momokanina idia dibaia totona.—Apokalupo 7:9.
6. Dahaka dainai lagani ta ta iboudiai kudou-maoro taudia edia namba ia bada ia lao?
6 Unai gaudia ibounai be edena bamona idia vara? Ita daradara lasi Iehova ese unai kudou-maoro taudia be ia dekenai ia veria mai. (Ioane 6:65; Kara 13:48, NW ) To, Basileia idia tahua totona sibona edia ura idia dadaraia bona idia hesiku lasi taudia edia gaukara do ita laloaboio lasi. Tadikaka Macmillian ena mauri lagani be 79 neganai, ia gwau: “Nega ginigunana ai, gorere bona mase taudia totona idia noho gwauhamata lau diba neganai, unai nega amo ema bona hari, lauegu helaro Baibel ena gwauhamata dekenai ia boio lasi. Unai nega ai, egu lalona lau hadaia Baibel ese ia hadibaia gaudia ma haida lau tahua totona, unai amo lau bamona taudia, Siahu Ibounai Diravana, Iehova bona taunimanima totona do ia karaia ura namodia idia tahua taudia ma haida do lau durudia diba.”
7. Edena ekspiriens ese Baibel ena hereva momokani idia davaria taudia edia moale bona haida durua urana ia hahedinaraia?
7 Hari inai negai, haida durua urana be Iehova ena hesiai taudia dekenai oi itaia diba. Hegeregere Daniela, Vienna, Austria amo ia mai hahinena ena haheitalai ita laloa. Ia gwau: “Lau maragi negana amo Dirava be egu turana namona momokani. Lau ura bada ena ladana lau diba badina ‘Dirava’ be lada korikorina ta lasi. To, lau naria ela bona egu mauri lagani be 17, unai neganai Iehova ena Witnes taudia be egu ruma dekenai idia mai. Lau ura Dirava dekenai lau dibaia gaudia ibounai idia gwauraia hedinarai. Hereva momokani lau davaria unai, bona ia be gau namo hereana! Lau moale bada dainai taunimanima ibounai dekenai lau haroro matamaia.” Ia ura dikadika haida dekenai ia haroro dainai ena sikuli turadia ese idia kirikirilaia. To Daniela ma ia gwau: “Lau dekenai unai be hegeregere Baibel ena peroveta herevana ia guguru, badina lau diba Iesu ia gwau iena murinai idia raka taudia be iena ladana dainai, haida ese do idia dagedage bona inai henidia. Lau moale bona lau hoa bada.” Daudau lasi murinai, Daniela ese ena mauri ia gwauhamatalaia Iehova dekenai, ia bapatiso bona ia gaukara goada ena misinari gaukara urana ia hagugurua totona. Daniela ia headava murinai, ia bona ena tau, Helmut, be Vienna dekenai idia noho Africa, China, Filipino bona India taudia dekenai idia haroro. Hari, Daniela bona Helmut be sautwest Africa dekenai misinari gaukara idia karaia noho.
Idia Hesiku Lasi
8. Edena dala namona ta ai momo ese idia hahedinaraia Dirava idia lalokau henia bona iena Basileia idia badinaia?
8 Oibe, hari inai negai, misinari gaukara be dala ta Iehova ena taunimanima ese idia hahedinaraia Dirava idia lalokau henia bona iena Basileia idia badinaia. Iesu ena parabole lalonai hoihoi tauna hegeregerena, unai gaukara idia karaia taudia be Basileia totona gabu daudau dekenai idia lao. Momokani, unai misinari taudia be Basileia ena sivarai namona tahua totona idia lao lasi; idia ese tanobada ena kahana ibounai taudia dekenai unai sivarai namona idia abia lao, bona idia durudia Iesu ena hahediba taudia ai idia lao totona. (Mataio 28:19, 20) Tano haida dekenai idia ese hekwakwanai metaudia idia haheaukalaia. To edia haheauka karana dainai namo bada idia davaria.
9, 10. Tano daudaudia hegeregere Central African Republic dekenai, misinari taudia be edena bamona ekspiriens idia moalelaidia?
9 Hegeregere, Central African Republic dekenai, lagani 2004 ai Lohiabada ena mase ena Memorial dekenai idia lao taudia be 16,184, unai tano ena Basileia pablisa taudia edia namba be nega 7 amo ia hanaia. Unai tano ena gabu momo dekenai paoa be lasi dainai, vaia taunimanima edia dina ta ta ena gaukara be au henunai idia karaia. Unai dainai, misinari taudia danu edia gaukara be unai bamona idia karaia—Baibel stadi be au henunai idia karaia. Murimuri ai, gabu ia diari bona ia keru sibona lasi, to badina namona ta danu ia noho. Unai tano taudia be Baibel idia ura henia bada, bona idia ura Baibel ena hereva idia kikilaia, hegeregere tano ma haida dekenai spot gadara idia kikilaia bamona. Nega momo, idia raka hanaia taudia idia itaia stadi idia karaia noho, bona idia danu idia helai vareai.
10 Unai hegeregere, misinari ta be murimuri ai Baibel stadi ia karaia noho lalonai, dala kahanai ia noho tau matamata ta ia mai bona ia gwau Witnes taudia ese ia idia do vadivadi henia lasi dainai, ia ura unai misinari tauna do ia lao bona ia ida Baibel ia stadilaia danu. Oibe, misinari tauna be mai moale ida unai ia karaia, bona unai tau matamata be lauma dalanai ia goada ia lao noho. Unai tano dekenai, pulisi ese dala dekenai Witnes taudia idia hastopua, idia dogoatao totona lasi, to idia ura Gima Kohorona bona Awake! magasin matamatadia idia abia, eiava guna idia abia magasin ena hereva ta idia moalelaia dainai idia ura tanikiu herevana idia gwauraia.
11. Ena be hekwakwanai idia vara, nega daudau misinari gaukara idia karaia taudia ese edia gaukara be edena bamona idia laloa?
11 Lagani 40 eiava 50 gunanai misinari gaukara idia matamaia taudia be mai abidadama ida tano idauidau dekenai idia do gaukara noho. Idia be ita ibounai dekenai abidadama bona hesiku lasi karana ena haheitalai namona! Lagani 42 idia ore vadaeni, headava tau bona hahine ta be tano idauidau toi dekenai misinari gaukara idia karaia hebou. Tau ia gwau: “Hekwakwanai momo ai davaria. Hegeregere, lagani 35 lalonai, nega momo malaria gorere ai abia. To, misinari gaukara ai abia hidi dainai ai lalohisihisi lasi.” Iena adavana ia gwau: “Nega ibounai gau momo dainai ai tanikiu bada. Haroro gaukara ai moalelaia bada, bona Baibel stadi ai hamatamaia be auka lasi. Baibel stiuden taudia be hebou dekenai idia mai bona ta ta idia diba neganai, ia be hegeregere hebou negadia ta ta dekenai ruma bese ta idia noho hebou bamona.”
Idia ‘Laloa Gau Ibounai be Anina Lasi’
12. Edena dala ai ta ese ia hahedinaraia ia abia dae Basileia be mai anina bada gauna?
12 Hoihoi tauna be davana bada nadi ia davaria neganai, “ia lao, iena gau ibounai ia hoia lao, unai nadi namo herea ia hoia” totona. (Mataio 13:46) Mai edia ura ida edia mauri dekenai gau badadia idia rakatania taudia, be vaia Basileia be mai anina bada gauna idia abia dae taudia edia kara. Basileia dekenai Keriso ida do ia lohia tauna ta, aposetolo Paulo ia gwau: “Gau ibounai lau laloa be anina lasi gaudia, inai mai anina bada gauna do lau abia totona, gauna be inai: Keriso Iesu, lauegu Lohiabada do lau diba momokani. Ia dainai gau ibounai lau negea vadaeni. Lau laloa idia be momoru, Keriso do lau abia momokani totona.”—Filipi 3:8.
13. Czech Republic dekenai tau ta ena lalokau Basileia totona be edena bamona ia hahedinaraia?
13 Unai hegeregerena, momo be hari inai negai, Basileia ena hahenamo idia abia totona, mai edia ura ida edia mauri lalonai gau badadia haida idia haidaua. Hegeregere, October 2003 ai Czech Republic dekenai, hedmasta ta ena mauri lagani be 60 ese Baibel stadilaia bukana Diba ese Mauri Dekenai Ita Ia Hakaua Lao ia abia. Ia duahia ore murinai, maoromaoro Baibel stadi karaia totona, iena gabu dekenai idia noho Iehova ena Witnes taudia ia hereva henidia. Lauma dalanai ia goada ia lao bona daudau lasi murinai hebou ibounai dekenai ia lao. To, ia ura taoni naria tauna badana bona minista ena dagi abia totona eleksen dekenai do ia vareai karana be edena bamona? Ia ese heau helulu idauna ta ia abia hidi—Basileia harorolaia tauna ai ia lao bona mauri ena heau helulu lalonai ia vareai. Ia gwau: “Egu stiuden taudia dekenai Baibel bukadia momo lau henia.” July 2004 ai, iena gwauhamata Iehova dekenai be ranu bapatiso amo ia hamomokania.
14. (a) Basileia ena sivarai namona ese taunimanima milioni momo ia veria dahaka idia karaia totona? (b) Edena mai anina bada henanadai be ita ta ta ese ita lalohadailaia be namo?
14 Tanobada hegegemadai, taunimanima milioni momo be Basileia ena sivarai namona dainai unai bamona idia karaia. Idia be tanobada dikana amo idia raka-lasi, edia kara gunadia, edia tura gunadia bona idia tahua tanobada gaudia idia rakatanidia. (Ioane 15:19; Efeso 4:22-24; Iamesi 4:4; 1 Ioane 2:15-17) Dahaka dainai unai gaudia ibounai idia rakatania? Badina idia abia dae Dirava ena Basileia amo do idia davaria hahenamo be hari inai tanobada ese ia henia gaudia ibounai ia hereaia momokani. Oi ese Basileia ena sivarai namona be unai bamona oi laloa danu, a? Oiemu lalona ia hamarerea dainai, oiemu mauri lalonai oi laloa bada gaudia bona oi tahua gaudia be Iehova ena ura hegeregerena oi haidaua, a? Unai bamona oi karaia neganai, hari bona nega vaira ai, hahenamo bada do oi davaria.
Taunimanima Gogoa Gaukarana Ena Dokona be Kahirakahira
15. Peroveta herevana hegeregerena nega dokona ai Dirava ena taunimanima be dahaka do idia karaia?
15 Salamo torea tauna ia gwau: ‘Oi tuari dinana dekenai, oiemu orea taudia ese oi dekenai do idia haboua, bona mai edia ura kwalimu danu oi do idia durua.’ Mai edia ura kwalimu ida durua do idia henia taudia be daba maragi ena paripari bamona tau matamatadia, bona sivarai namona idia gwauraia hedinarai hahinedia be tuari orea badana ta. (Salamo 68:11, NW; 110:3) Inai nega dokona ai, Iehova ena taunimanima—tatau bona hahine, matamata bona buruka taudia—be mai edia ura kwalimu ida sibona idia henia bona idia gaukara goada dainai dahaka ia vara?
16. Dirava ena hesiai taudia ese ma haida idia durua Basileia idia dibaia dalana ta mani oi gwauraia.
16 India dekenai, painia ta eiava ful-taim Basileia harorolaia kekeni ta ese unuseniai idia noho kudima taudia milioni 2 bamona, be edena bamona do ia durua diba Basileia idia dibaia totona ia lalo-hekwarahilaia. (Isaia 35:5) Ena lalona ia hadaia bona kudima taudia edia gado dibaia sikulina Bangalore dekenai ia lao. Unai sikuli dekenai kudima taudia momo dekenai Basileia ena helaro ia gwauraia, bona Baibel stadi grup idia hamatamaia. Pura haida murinai, taunimanima 12 mai kahana be Kingdom Hall dekenai hebou totona idia mai. Gabeai, headava ta ena aria dekenai, unai painia taihu ese Calcutta amo ia mai kudima tau matamata ta ia hedavari henia, ia be mai ena henanadai momo bona ia ura dikadika Iehova ia diba. To hekwakwanai ta ia noho. Unai tau matamata be Calcutta dekenai do ia giroa lou, unai gabu ena daudau be kilomita 1,600, unuseniai koledi dekenai do ia sikuli, bona unai gabu ai Witnes taudia be kudima taudia edia gado idia diba lasi. Ia hekwarahi bada ena tamana ena lalona ia haidaua Bangalore ena sikuli ta dekenai ia lao totona, unai amo ena Baibel stadi ia karaia noho diba. Lauma dalanai ia goada ia lao bona lagani ta murinai, Iehova dekenai iena mauri ia gwauhamatalaia. Bena, ia ese kudima taudia ma haida ida Baibel stadi ia karaia, iena turana namona ta ia stadi henia danu. Hari, India ena brens opesi be dala ia karaia noho painia taudia be kudima taudia edia gado idia dibaia totona, unai amo kudima taudia idia durua diba.
17. Rau 24 ia lao 27 dekenai ia noho lagani 2004 ena hesiai laganina ena ripoti dekenai oi itaia hagoadaia gauna ta oi herevalaia.
17 Inai magasin ena rau 24 ia lao 27 dekenai, Iehova ena Witnes taudia edia lagani 2004 ena hesiai laganina ena ripoti ai tanobada ibounai dekenai idia karaia gaukara do oi itaia. Nega oi atoa unai ripoti oi itaia namonamo totona, bona hari inai negai Iehova ena taunimanima be tanobada ibounai dekenai “dava bada nadi” idia tahua gaukarana idia karaia goadagoada noho ena toana oi itaia.
‘Basileia Do Umui Tahua Guna’ Noho
18. Hoihoi tauna ena parabole lalonai Iesu ese dahaka ia herevalaia lasi, bona dahaka dainai?
18 Iesu ena hoihoi tauna parabolena ita laloa lou neganai, ita itaia unai hoihoi tauna ese ena gau ibounai ia hoia murinai, edena bamona sibona do ia naria dalana be Iesu ese ia gwauraia lasi. Reana haida do idia henanadai: ‘Unai hoihoi tauna ese ena gau ibounai ia hoihoilaia dainai, edena bamona aniani, dabua, bona noho gabuna do ia abia diba? Unai dava bada nadina ese edena bamona do ia durua?’ Taunimanima edia lalohadai ai unai be henanadai maorodia. To, Iesu ese iena hahediba taudia dekenai inai hereva ia gwauraia, ani? Ia gwau: “Umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” (Mataio 6:31-33) Unai parabole ese ia hahedinaraia mai kudouna ibounai ida Dirava badinaia karana bona iena Basileia ura henia bada karana be mai anina bada gaudia. Unai ese ita dekenai gau ta ia hadibaia, a?
19. Iesu ena dava bada nadi parabolena lalonai, dahaka mai anina bada gauna ita dibaia?
19 Herevana, ita be hari sibona sivarai namona ita dibaia, eiava lagani momo lalodiai ita ese Basileia ita tahua bona ma haida dekenai ena hahenamo ita harorolaia noho, namona be iseda mauri lalonai Basileia ita laloa bada bona ita tahua noho. Hari inai nega be nega dikana, to ita diba momokani ita tahua noho gauna be gau momokanina bona gau ibounai ia hereaia—hoihoi tauna ese ia davaria dava bada nadina hegeregerena. Tanobada hegegemadai idia vara noho gaudia bona idia guguru vadaeni Baibel ena peroveta herevadia ese idia hamomokania, ita be “tanobada dokona” ai ita noho. (Mataio 24:3) Namona be ita be unai hoihoi tauna bamona, mai eda kudouna ibounai ida Dirava ena Basileia ita ura henia bona sivarai namona ita harorolaia ena hahenamo dainai ita moale.—Salamo 9:1, 2.
Oi Laloatao, A?
• Idia hanaia laganidia lalonai, dahaka dainai tomadiho momokani taudia idia hutuma idia lao?
• Misinari taudia ese edena bamona lalohadai idia hahedinaraia?
• Basileia ena sivarai namona dainai, haida be dahaka gaudia idia haidaua?
• Iesu ena dava bada nadi parabolena amo dahaka mai anina bada gauna ita dibaia?
[Chart on page 24-27]
IEHOVA ENA WITNES TAUDIA EDIA HESIAI LAGANINA 2004 ENA RIPOTI
(See bound volume)
[Pictures on page 22]
Hoihoi tauna hegeregerena, hari inai negai misinari taudia be hahenamo bada idia abia