Duahia Taudia Edia Henanadai
Aposetolo Paulo be Sanhedrin dekenai inai hereva, “Lau be Farisea tauna” ia gwauraia neganai, anina be Paulo be ena Keristani abidadama ia negea, eiava?
Paulo ena hereva Kara 23:6 ai ita lalopararalaia totona, unai hereva ena badina siridia ita laloa be namo.
Ierusalema dekenai Iuda taudia ese Paulo idia dagedage henia murinai, Paulo be hutuma ia hereva henidia, ia gwau: “Lau be inai hanua Ierusalema lalonai lau bada, bona Gamaliela be lauegu hadibaia tauna. Ia ese iseda sene edia taravatu korikori lau dekenai ia hadibaia.” Ena be hutuma ese nega sisina lalonai Paulo ena hereva idia kamonai, to gabeai ia dekenai idia badu dikadika neganai, tuari biaguna ese Paulo ia hakaua lao tuari rumana dekenai. Paulo be idia dadabaia gwauraia neganai ia gwau: “Taravatu be ia gwau dahaka? Bema ia be kota lasi guna, Roma tauna umui dadabaia diba, o lasi?”—Kara 21:27–22:29.
Unai dina murinai, tuari biaguna ese Paulo ia hakaua lao Iuda taudia edia kota badana, Sanhedrin dekenai. Paulo be Sanhedrin dekenai idia noho taudia ia itaia, bona unuseniai be Sadukea taudia bona Farisea taudia idia noho. Bena ia gwau: “Egu varavara e, lau be Farisea tauna, bona Farisea tauna ena natuna. Iniseni idia kota henia lau, badina be lau laloa momokani, mase taudia dohore idia toreisi lou.” Vadaeni, Farisea taudia bona Sadukea taudia idia hepapahuahu, “badina be Sadukea taudia idia gwau toreisi lou be lasi, aneru be lasi, lauma danu be lasi. To Farisea taudia be inai toi idia abidadama henia noho.” Farisea taudia haida idia hereva goada, idia gwau: “Inai tau dekenai kerere ta ai davaria lasi.”—Kara 23:6-10.
Momo idia diba Paulo be Keristani tauna goadana dainai, Sanhedrin dekenai ia gwau lasi ia be Farisea taudia edia tomadiho ia badinaia. Unuseniai idia noho Farisea taudia be edia hahediba herevadia idia dadaraia taudia idia abia dae lasi. Unai dainai Paulo ena hereva, “Lau be Farisea tauna,” ese ia hahedinaraia lasi Paulo be Farisea tauna korikorina ta, bona Sanhedrin dekenai idia noho Farisea taudia be reana Paulo ena hereva idia lalopararalaia.
Paulo ia gwau ia idia kota henia badina ia abia dae mase taudia be do idia toreisi lou neganai, iena hereva amo ia hahedinaraia unai kara dekenai ia be Farisea taudia bamona. Unai toreisi lou herevana dainai hepapahuahu ia vara neganai, Paulo ia ura hahedinaraia ia abia dae herevana be Farisea taudia edia bamona to Sadukea taudia edia bamona lasi, badina Sadukea taudia be toreisi lou herevana idia abia dae lasi.
Keristani tauna Paulo ia abia dae gaudia haida be Farisea taudia edia bamona, hegeregere, toreisi lou, aneru, bona Taravatu ena hereva haida. (Filipi 3:5) Unai dainai, Paulo ia gwau diba ia be Farisea tauna, bona Sanhedrin dekenai idia noho taudia be Paulo ena hereva idia lalopararalaia. Paulo ese ena mauri gunana ia herevalaia badina ia diba Iuda ena kota badana taudia be Paulo idia laloa kerere.
To, Paulo be ena abidadama ia negea lasi ena hamomokania gauna badana be inai: Ita diba ia be Iehova ena lalonamo ia abia noho. Paulo be inai hereva, “Lau be Farisea tauna” ia gwauraia bena hanuaboi ai, Iesu ia gwau: “Oi goada noho, badina Ierusalema dekenai lauegu hereva oi gwauraia hegeregere, Roma dekenai danu do oi gwauraia.” Paulo be Dirava ena lalonamo ia abia dainai, ita gwau diba Paulo be iena Keristani abidadama ia negea lasi.—Kara 23:11.