Duahia Taudia Edia Henanadai
Dahaka dainai Davida bona Bataseba be edia heudahanai karana dainai idia mase lasi, to edia natuna merona ia mase?
Mose ena Taravatu ia gwau: “Bema tau ta ese ma tau ta ena adavana danu ia heudahanai, bona idia mahuta hebou neganai, taunimanima ese idia davaria neganai, idia ruaosi be do umui alaia mase. Unai dala dekenai inai bamona kara dika do umui haorea momokani.” (Deuteronomi 22:22) Bema Iehova Dirava ese tanobada hahemaoro taudia ia koua lasi Davida bona Bataseba ese idia karaia kara dika be taravatu hegeregerena idia hamaoromaoroa, unai heudahanai tau bona hahine idia hamasea diba. Tanobada hahemaoro taudia ese taunimanima edia kudouna ai idia noho gaudia idia itaia lasi, unai dainai idia ese kerere idia karaia taudia edia kara bona idia kamonai herevadia amo hahemaoro idia karaia. Taravatu ia gwau heudahanai ena davana be mase. To, Israela ena hahemaoro taudia be mai edia maoro lasi unai bamona kara dika idia gwauatao totona.
Bona danu, Dirava momokanina ese taunimanima edia kudouna ia itaia diba bona edia dika ia gwauatao diba, bema ia itaia badina namona ia noho unai bamona ia karaia totona. Unai kerere ia karaia tauna be Davida, bona Iehova be ia ida Basileia gwauhamatana ia karaia dainai, Ia sibona ese Davida hahemaoro henia dalana ia abia hidi. (2 Samuela 7:12-16) “Tanobada ibounai ena kota biaguna” be mai ena maoro unai bamona abia hidi ia karaia.—Genese 18:25.
Iehova ese Davida ena kudouna dekenai dahaka ia itaia? Davida ena hemami be Salamo karoa 51 ese ia hahedinaraia, unai be Bataseba ida ia mahuta hebou bona peroveta tauna Natana ese ia vadivadi henia murinai, unai hereva ia gwauraia. Salamo 51:1-4 ia gwau: “Dirava e, mani oi bogahisihisi lau dekenai. Oiemu lalokau badana dainai, bona oiemu bogahisihisi bada herea dainai, egu kara dika do oi kokia ore. Egu dika mani do oi huria ore, bona egu kerere dekena amo lau do oi hagoevaia. Badina be egu kara dika be lau diba momokani. Lauegu kerere be egu vairana dekenai ia noho nega ibounai. Lau ese oi sibona dekenai lau kara dika vadaeni. Lau be oiemu vairana dekenai kerere lau karaia.” Iehova be Davida ena kudouna dekenai ena sori bada karana ia itaia bona unai ese ia dekenai ia hamomokania Davida ia helalo-kerehai momokani, bona ia laloa badina namona dainai kerere idia karaia taudia dekenai hebogahisi ia hahedinaraia be namo. Ma danu, Davida be hebogahisi tauna, bona Iehova ese hebogahisi taudia dekenai hebogahisi ia hahedinaraia. (1 Samuela 24:4-7; Mataio 5:7; Iamesi 2:13) Unai dainai, Davida ese ena kara dika ia gwauraia hedinarai neganai, Natana ese ia hamaoroa, ia gwau: “Lohiabada ese oiemu dika ia gwauatao vadaeni, do oi mase lasi.”—2 Samuela 12:13.
To, Davida bona Bataseba be edia kara dika dainai idia vara dika idauidau idia mamia. Natana ese Davida ia hamaoroa, “unai kara dekena amo oi ese Lohiabada oi negea momokani dainai, hari ia vara vadaeni merona be do ia mase.” Ena be dina seven lalonai Davida ia aniani lasi bona ia taitai, to edia natuna ia gorere bona ia mase.—2 Samuela 12:14-18.
Haida idia daradara dahaka dainai edia natuna ia mase, badina Deuteronomi 24:16 ia gwau: “Tamana taudia be do idia alaia lasi edia natudia edia kerere dainai.” To, namona be ita laloatao, bema tanobada hahemaoro taudia ese unai hahemaoro karana idia karaia, ia do vara lasi natuna bona ena tama sina ese edia mauri idia haboioa diba. Davida ena natuna ia mase karana amo ia laloparara, Bataseba ida ia karaia kara dikana be Iehova ese ia moalelaia lasi. Ita diba momokani Iehova be mai maoromaoro ida unai kara ia hamaoromaoroa badina “ena dala be maoromaoro.”—2 Samuela 22:31.
[Picture on page 31]
Davida ese helalo-kerehai momokani toana ia hahedinaraia