Iehova ese mai Momokani ida Ia Idia Tahua Taudia Edia Davana Do Ia Henia

1, 2. (a) Edena dala ai lalokau bona abidadama idia gaukara hebou? (b) Edena henanadai do ita herevalaia?

IEHOVA ita lalokau henia, “badina ia ese ita ia lalokau henia guna.” (1 Ioa. 4:19) Ena lalokau ia hahedinaraia dalana ta be, iena abidadama hesiai taudia ia hanamoa. Iseda abidadama be do ia goada, bema Dirava ita lalokau henia bona ita abia dae ia noho, to danu ita abia dae ia ese ena lalokau taudia dekenai davana do ia henia.​—Heberu 11:6 duahia.

² Iehova ena kara badana ta be, ia ura iena hesiai taudia edia davana ia henia. Iseda abidadama be do ia goada, bema ita abia dae momokani Dirava ese mai momokani ida ia idia tahua taudia edia davana do ia henia, badina “abidadama ena anina be inai, oi daradara lasi to oi diba oi naria noho gauna be do ia vara.” (Heb. 11:1) Oibe, abidadama ena anina be ita daradara lasi, to ita diba Dirava ese ia gwauhamatalaia hahenamo do ita abia. To, do ita abia davana laloa karana ese edena dala ai ita do ia durua? Idaunega amo ema bona hari, Iehova ese edena dala ai iena hesiai taudia ia hanamoa? Mani ita itaia.

IEHOVA IA GWAUHAMATA ENA HESIAI TAUDIA DO IA HANAMOA

3. Malaki 3:10 ai, dahaka gwauhamata ia noho?

³ Iehova Dirava ia gwauhamata ia ese ena abidadama hesiai taudia do ia hanamoa, unai dainai ita ia noia do ita gaukara goada unai hahenamo ita abia totona. Ia gwau: “Lau do umui tohoa karaia . . . vadaeni lauegu kara namona do umui itaia. Lau ese guba ena uindo do lau kehoa, bona gau namodia momo herea umui dekenai do lau bubua diho.” (Mal. 3:10) Iehova ena noinoi ita abia dae neganai, ita hahedinaraia ia ita tanikiu henia bona laloa bada.

4. Dahaka dainai Iesu ena hereva Mataio 6:33 ai, ita abia dae momokani be namo?

⁴ Iesu ese ena hahediba taudia ia hamaoroa, bema Basileia idia atoa guna, Dirava ese idia do ia durua. (Mataio 6:33 duahia.) Iesu ese unai gwauhamata ia gwauraia badina ia ese Iehova ia abidadama henia momokani. Ia diba Dirava ese ena gwauhamata ibounai do ia hagugurua. (Isa. 55:11) Ita danu, ita diba momokani bema mai kudouna ibounai ida Iehova ita abidadama henia, ia ese iena gwauhamata do ia hamomokania, ia gwau: “Lau ese umui do lau negea lasi, bona umui do lau rakatania lasi momokani.” (Heb. 13:5) Unai gwauhamata bona Iesu ena hereva, Basileia bona Dirava ena kara maoromaoro tahua guna karana be idia gaukara hebou.

5. Dahaka dainai Iesu ena haere ese iseda abidadama ia hagoadaia?

⁵ Nega ta aposetolo Petero ese Iesu ia nanadaia, ia gwau: “Ai be gau ibounai ai rakatania bona oi murinai ai raka, vadaeni dahaka do ai abia?” (Mat. 19:27) Unai henanadai dainai Iesu ese Petero ia gwau-henia lasi, to iena hahediba taudia ia hamaoroa edia gaukara goada karana dainai edia davana do ia henia. Abidadama aposetolo taudia bona ma haida be ia ida guba dekenai do idia lohia. To, hari danu davana namona ita abia diba. Iesu ia gwau: “Bona egu ladana dainai ruma, tadikaka, taihu, tamana, sinana, natudia, eiava tano idia rakatania taudia ibounai, ese unai gaudia momo do idia abia bona mauri hanaihanai do idia abia.” (Mat. 19:29) Iesu ena hahediba taudia be sibona edia ura idia dadaraia dainai, hahenamo momo do idia abia. Orea lalonai ita abia tamadia, sinadia, tadikakadia, taihudia, bona natudia ena namo ese Basileia dainai ita rakatania gaudia idia hereaia momokani, ani?

“ISEDA MAURI ENA DOGO”

6. Dahaka dainai Iehova ia gwauhamata ena hesiai taudia dekenai davana do ia henia?

⁶ Iehova ia gwauhamata ia idia tomadiho henia taudia edia davana do ia henia, unai dainai hahetoho negadiai ia ese idia ia hagoadaia. Iehova Dirava ena abidadama hesiai taudia be hari idia abia hahenamo idauidau sibona idia moalelaia lasi, to mai ura bada ida vaira nega ena hahenamo idia naria noho danu. (1 Tim. 4:8) Oibe, ita abia dae momokani Iehova ese “mai momokani ida ia idia tahua taudia edia davana do ia henia” bona iseda abidadama do ia hagoadaia.​—Heb. 11:6.

7. Edena dala ai iseda helaro be dogo bamona?

⁷ Iesu be Ororo Harorona ai, ia gwau: “Do umui moale bada badina emui davana guba dekenai be bada. Guna idia noho peroveta taudia be unai bamona idia dagedage henidia danu.” (Mat. 5:12) Guba dekenai davana do idia abia taudia sibona lasi, to tanobada paradaisona ai mauri hanaihanai do idia abia taudia danu be do idia “moale bada.” (Sal. 37:11; Luka 18:30) Ena be iseda helaro be guba ai eiava tanobada ai, to iseda helaro be “iseda mauri ena dogo bamona, ia be ia momokani bona ia goada.” (Heb. 6:17-20) Lai bada negadiai dogo ese bouti ia dogoatao auka, unai hegeregerena iseda helaro ese iseda hemami, lalohadai, bona abidadama ia hagoadaia. Bona hekwakwanai idauidau ita haheaukalaia diba.

8. Edena dala ai iseda helaro ese iseda lalohekwarahi ia hamaragia diba?

⁸ Baibel ese ia gwauraia helarona ese iseda lalohekwarahi ia hamaragia diba. Dirava ena gwauhamata be dehoro namona ta bamona, iseda lalona ia hanamoa diba. Unai dainai namona be ‘iseda laloa hekwarahi be Lohiabada dekenai do ita henia,’ badina ita diba ‘ia ese idia dekena amo ita do ia durua’! (Sal. 55:22) Oibe, ita abia dae momokani Dirava ese “ita noia eiava lalohadailaia gaudia sibona lasi, to unai gaudia idia hereaia gaudia ia henia diba.” (Efe. 3:20) Mani oi laloa​—ia ese ita dekenai ita noia eiava lalohadailaia “gaudia idia hereaia gaudia” do ia henia!

9. Edena bamona ita diba Iehova be ita ia hanamoa diba?

⁹ Davana namona ita abia totona, namona be Iehova ita abidadama henia momokani bona ena hakaua herevadia ita badinaia. Mose ese Israela besena ia hamaoroa: “Lohiabada emui Dirava ese umui dekenai ia henia noho tano dekenai umui do ia hanamoa bada. Unai dainai tau ta be do ia ogogami lasi emui huana dekenai, bema Lohiabada do umui kamonai henia, bona hari dina umui dekenai lau henia oda do umui badinaia neganai. Lohiabada ese umui do ia hanamoa, umui dekenai ia gwauhamata hegeregerena.” (Deu. 15:4-6) Iehova ese oi do ia hanamoa, bema mai abidadama ida ia oi hesiai henia noho. Unai oi abia dae, a? Badina namona dainai unai oi karaia.

IEHOVA ESE DAVANA IA HENIDIA

10, 11. Iehova ese edena dala ai Iosepa ia hanamoa?

¹⁰ Baibel be iseda namo totona idia torea. Baibel ai, Dirava ese ena abidadama hesiai taudia dekenai ia henia davana ena sivarai momo idia noho. (Roma 15:4) Iosepa be haheitalai namona. Iena kakadia edia palani hehunina hegeregerena ia idia kara henia bona gabeai ena biaguna ena adavana ena koikoi herevadia dainai, ia be Aigupito ena dibura ruma ai idia atoa. Unai nega ai, Dirava ese Iosepa ia rakatania, a? Lasi! Baibel ia gwau: “[Iehova] ese Iosepa dekenai ia itaia noho, ia bogahisihisi henia . . . Lohiabada ese Iosepa ia itaia noho, bona iena gaukara ibounai dekenai anina ia havaraia.” (Gen. 39:21-23) Unai hahetoho negadiai, Iosepa be mai haheauka ida iena Dirava ia naria.

¹¹ Lagani haida murinai, Farao ese dibura ruma amo Iosepa ia ruhaia, bona unai manau igui hesiai tauna be Aigupito ena lohia iharuana ai ia halaoa. (Gen. 41:1, 37-43) Iosepa ena adavana be memero rua ia havaraia neganai, ia ese “ia vara guna mero . . . iena ladana ia atoa Manase, ena anina be ‘Laloaboio’. Ia gwau, ‘Dirava ese lauegu hekwarahi bona lauegu tamana, bona lauegu varavara laloa be ia kokia vadaeni lau dekena amo.’ Gabeai ia vara mero ena ladana ia atoa Eparaima, ena anina be ‘Natuna Henia’. Ia gwau, ‘Hisihisi lau abia tanona dekenai Dirava ese lauegu natuna ia henia vadaeni.’” (Gen. 41:51, 52) Iosepa ese Dirava ia badinaia noho dainai, Israela bona Aigupito taudia be edia mauri idia haboioa lasi. Oibe, Iosepa ia abia dae momokani ia abia davana namona bona hahenamo be Iehova amo.​—Gen. 45:5-9.

12. Hahetoho negadiai, edena dala ai Iesu ese Dirava ia badinaia noho?

¹² Iesu Keriso danu be ena abidadama idia tohoa gaudia ia davaria neganai, ia be Dirava ia badinaia noho, unai dainai davana namona ia abia. Dahaka ese Iesu ia durua? Baibel ia gwau: “Ia be iena vairanai ia noho moalena dainai, hisihisi auna ia haheaukalaia, bona do ia abia hemaraina ia laloa lasi.” (Heb. 12:2) Iesu ia moale badina ia ese Dirava ena ladana ia hahelagaia. Danu, iena Tamana ese ia lalonamo henia bona hahenamo momo ia abia. Baibel ia gwau, “ia be Dirava ena terona ena idibana kahanai ia helai vadaeni.” Ma gwau: “Dirava ese ia dekenai dagi hereadaena ia henia bona ena hariharibada amo, ia ese ia dekenai ladana ibounai ia hereaia ladana ia henia.”​—Fili. 2:9.

IEHOVA BE ISEDA GAUKARA IA LALOATAO

13, 14. Iehova totona ita karaia gaudia be ia ese edena bamona ia laloa?

¹³ Ita diba momokani, Iehova be iseda hesiai gaukara ibounai ia laloa bada. Iseda manoka o daradara gaudia ia lalopararalaia. Bona ia ese ita do ia hebogahisi henia, bema moni dalanai ita hegeregere lasi eiava iseda gorere o hemami dainai, iseda hesiai gaukara ita karaia goadagoada lasi. Ma danu ita abia dae, Iehova be ena hesiai taudia ese edia abidadama hagoadaia totona idia karaia gaudia ia laloa bada.​—Heberu 6:10, 11 duahia.

¹⁴ Namona be ita laloatao, ita ese ‘guriguri ia kamonai’ Diravana ita hereva henia diba, badina ita diba ia ese iseda lalohekwarahi do ia kamonai. (Sal. 65:2) Bona danu, ia be “hebogahisi Tamana bona lalogoada ibounai ia henia Diravana” dainai, ia ese reana iseda tadikaka taihu amo iseda abidadama ia hagoadaia diba. (2 Kor. 1:3) Ma haida ita hebogahisi henia neganai, Iehova ia moale. Baibel ia gwau: “Bema ogogami taudia dekenai oi bogahisihisi henia neganai, oi ese Lohiabada dekenai oi heniatorehai noho. Lohiabada ese unai davana oi dekenai do ia henia lou.” (Aon. 19:17; Mat. 6:3, 4) Momokani, bema hekwakwanai idia davaria taudia ita durua, unai be hegeregere Iehova dekenai ita henitorehai bamona. Bona ia gwauhamata iseda kara namona ena davana do ia henia.

HARI BONA VAIRA NEGA ENA DAVANA NAMONA

15. Vaira nega ai dahaka davana do oi abia? (Laulau ginigunana herevalaia.)

¹⁵ Horoa Keristani taudia be do idia abia davana idia naria. Idia totona “kara maoromaoro ena korona ia noho hegaegae. Lohiabada, hahemaoro maoromaoro tauna, ese hahemaoro dinana ai [idia] dekenai unai ahuna do ia henia.” (2 Tim. 4:7, 8) Bema Iehova be oi dekenai helaro ma ta ia henia, ia amo idia mai hahenamo do oi reaia lasi. Iesu ena “mamoe idaudia” milioni momo be vaira nega ena davana namona idia naria noho​—tanobada paradaisona ai do idia mauri hanaihanai. Unuseniai idia be “do idia helai namonamo, mai moale bona mai maino danu.”​—Ioa. 10:16; Sal. 37:11.

16. Ioane Ginigunana 3:19, 20 ese edena dala ai ita ia hagoadaia?

¹⁶ Nega haida do ita mamia ita be gau momo ita hagugurua lasi, eiava ita laloa Iehova be iseda hesiai gaukara ia laloa bada lasi. Bona reana ita daradara bema Dirava ese ita dekenai davana namona do ia henia. To laloatao, “Dirava be iseda kudouna ia hereaia bona gau ibounai ia diba.” (1 Ioane 3:19, 20 duahia.) Dirava ita abidadama bona lalokau henia dainai, ita karaia hesiai gaukarana be Dirava ese ia abia dae, herevana ia be maragi o bada.​—Mar. 12:41-44.

17. Hari dahaka hahenamo idauidau ita moalelaia?

¹⁷ Ena be ita be Satani ena tanobada dikana bona diburana lalonai ita noho, to Iehova ese ita do ia hanamoa noho. Dirava ena hesiai taudia edia abidadama ia hagoadaia, unai dainai idia dekenai gau namodia momo ia henia. (Isa. 54:13) Iesu ena gwauhamata hegeregerena, Iehova ese hari ita dekenai davana namona ia henia​—tanobada hegegemadai ita be mai iseda tadikaka taihu. (Mar. 10:29, 30) Ma danu, mai momokani ida Dirava idia tahua taudia be idia lalomaino, noho namo, bona moale.​—Fili. 4:4-7.

18, 19. Iehova ena hesiai taudia ese idia abia hahenamo be edena bamona idia laloa?

¹⁸ Tanobada hegegemadai, Iehova ena hesiai taudia be davana namona idia abia. Hegeregere, Germany ai ia noho kekeni ta ladana Bianca, ia gwau: “Iehova lau tanikiu henia bada, badina lau lalohekwarahi neganai, ia be lau ia durua bona dina ta ta ai egu badibadinai ia noho. Inai tanobada be hekwakwanai momo amo ia honu. To, Iehova ena orea danu lau gaukara hebou neganai, lau mamia ia be lau ia gimaia. Bona sibona egu ura lau dadaraia neganai, ia ese lau dekenai hahenamo momo ia henia.”

¹⁹ Mani taihu Paula ita laloa. Iena mauri lagani be 70 bona Canada ai ia noho. Bona ia be mai ena doruna gorerena (spina bifida). Ia gwau: “Ena be egu gorere dainai lau loaloa momo lasi, to unai ese egu haroro gaukara ia koua lasi. Lau be dala idauidau ai lau haroro, hegeregere telefon amo bona nega bona gabu idauidau ai. Lau ia durua gauna ta be egu noutbuk ta lalonai, Baibel siri haida bona iseda pablikeisen amo lau davaria point namodia lau torea, bona nega ta ta ai lau itaia. Unai buka lau gwauraia, ‘Lauegu Hahemauri Bukana.’ Bema Iehova ena gwauhamata idauidau ita laloa, unai ese iseda lalometau o lalohekwarahi ia hamaragia diba. Iehova be hanaihanai ia noho hegaegae ita ia durua totona, herevana iseda hekwakwanai be dahaka.” Reana oi davaria hekwakwanai be Bianca o Paula edia bamona lasi. To, Iehova ese oi bona ma haida ia hanamoa daladia oi laloa diba. Iehova amo hari oi abia hahenamo bona vaira nega ai do oi abia hahenamo oi lalohadailaia be moale gauna, ani?

20. Bema mai kudouna ibounai ida Iehova ita hesiai henia noho, dahaka davana namona do ita abia?

²⁰ Laloaboio lasi, mai kudouna ibounai ida Dirava dekenai ita gwauraia guriguridia be “mai ena davana bada.” Bona namona be inai oi abia dae, ‘Dirava ese ia gwauhamatalaia gauna do oi abia. To Dirava ena ura oi karaia guna be namo.’ (Heb. 10:35, 36) Unai dainai namona be iseda abidadama ita hagoadaia noho bona mai kudouna ibounai ida Iehova ita hesiai henia. Unai ita karaia diba, badina ita diba, Iehova amo davana namona do ita abia.​—Kolose 3:23, 24 duahia.