Satani Tuari Henia, Bena Do Ia Heau Boio!

“Dirava ena ura do umui karaia. Satani do umui tuari henia, vadaeni umui dekena amo do ia heau boio.”​—⁠IAMESI 4:⁠7.

1, 2. (a) Edena dala ai Isaia karoa 14 ese Diabolo ena kara ia hahedinaraia? (b) Edena henanadai edia haere do ita tahua?

DIABOLO be hekokoroku tauna badana. Iena hekokoroku karana be Dirava ena peroveta tauna Isaia ese ia herevalaia. Lagani 100 gunanai, Babulonia be basileia goadana ai ia do lao lasi neganai, Iehova ena taunimanima ese inai hereva be “Babulonia ena king” dekenai idia gwauraia: “Oi sibona dekenai oi gwau, ‘Guba dekenai do lau daekau lao, Dirava ena hisiu edia ataiai [Davida ena bese ena lohia taudia], be lau ese egu terona do lau atoa’ bona oi gwau danu, . . . Siahu Ibounai Dirava hegeregerena do oi lao.” (Isaia 14:​3, 4, 12-15; Numera 24:17) “Babulonia ena king” ena hekokoroku karana be Satani, “inai tanobada ena dirava” ena kara bamona. (2 Korinto 4:⁠4) To, Satani be ena hekokoroku karana dainai dika do ia davaria, Babulonia basileiana ese dika ia davaria hegeregerena.

² To, Satani ia do noho dainai, ita ese inai henanadai ita laloa: Satani do ita gari henia be namo, a? Dahaka dainai taunimanima ia veria Keristani taudia idia dagedage henidia totona? Edena dala ai Diabolo ena tarapu ita dadaraia diba?

Diabolo Ita Gari Henia be Namo, A?

3, 4. Dahaka dainai horoa Keristani taudia bona tanobada helarona idia abia taudia be Diabolo idia gari henia lasi?

³ Iesu Keriso ena hereva ese horoa Keristani taudia ia hagoadaia, ia gwau: “Hisihisi do oi abia, to do oi gari henia lasi. Kamonai! Satani ese umui haida dibura ruma dekenai do ia koua, umui do ia dibagania, bona dina 10 lalonai do umui hisihisi. Do umui gini goada noho, bona lau do umui badinaia noho ela bona mase, vadaeni lau ese umui emui kwalimu ahuna, mauri, umui dekenai do lau henia.” (Apokalupo 2:10) Horoa taudia bona tanobada helarona idia abia taudia be Diabolo idia gari henia lasi. Inai gari lasi karana be sibona edia goada amo lasi. To, idia ese Dirava idia gari henia bona ‘iena hanina henunai idia hunia’ dainai, Diabolo idia gari henia lasi.​—⁠Salamo 34:9; 36:⁠7.

⁴ Iesu Keriso ena hahediba taudia ginigunadia be idia gari lasi bona ena be dagedage idia davaria, idia gini auka ela bona idia mase. Ena be Satani Diabolo ese idia dekenai dika ia havaraia diba, to idia gari lasi. Badina idia diba Iehova be ia dekenai idia abidadama taudia do ia rakatania lasi. Unai hegeregerena, hari inai negai, horoa Keristani taudia bona edia bapatiso turadia be dagedage bada idia davaria neganai, edia abidadama dekenai idia gini auka. To, aposetolo Paulo ia gwau Diabolo be mase ia havaraia diba. Unai dainai, ita gari be maoro, a?

5. Heberu 2:​14, 15 amo dahaka ita dibaia?

⁵ Paulo ia gwau Iesu be taunimanima edia tauanina ia abia, unai amo “do ia mase diba totona. Bona iena mase dekena amo, Iesu ese mase ia biagua [“havaraia,” NW ] tauna, Satani ena siahu ia hadikaia ore diba. Bona unai dala dekena amo ia ese mase dekenai idia gari taudia edia gari ia haorea. Oibe, unai mase ena gari ese ia guidia taudia edia gari ia haorea.” (Heberu 2:​14, 15) Satani, “mase ia havaraia tauna” ese Iuda Iskariote ena lalona ia veria bena Iuda besena ena gunalaia taudia bona Roma taudia ia gaukaralaia Iesu idia hamasea totona. (Luka 22:3; Ioane 13:​26, 27) To, Iesu ena boubou gauna amo, ia ese Satani ena imana amo taunimanima ia ruhaia, bona dala ia kehoa mauri hanaihanai idia abia totona.​—⁠Ioane 3:16.

6, 7. Edena dala ai Satani be mase ia havaraia?

⁶ Edena dala ai Satani be mase ia havaraia? Matamana ai, Satani ese kara dika ia karaia neganai, iena koikoi herevadia ese taunimanima dekenai mase ia mailaia. Unai ia vara badina, Adamu ia kara dika bona iena natudia dekenai kara dika bona mase ia henia hanai. (Roma 5:12) Bona danu, Satani ena hesiai taudia tanobada dekenai ese Iehova ena tomadiho taudia idia dagedage henidia, bona Iesu Keriso idia hamasea hegeregerena, idia haida idia hamasea danu.

⁷ To namo lasi ita laloa, Diabolo be mai ena siahu, daika ia ura ia hamasea, ia hamasea sibona. Lasi. Dirava be Iena taunimanima ia gimaia, bona Satani ia hegeregere lasi Iehova idia tomadiho henia taudia tanobada ai ia haorea totona. (Roma 14:⁠8) Momokani, Diabolo ese Iehova ena taunimanima ia dagedage henidia bona haida idia mase danu, bona Iehova be unai ia koua lasi. To, Baibel ia hahedinaraia idia mase taudia edia ladana be Dirava ena “buka” lalonai idia noho bona idia do ia hatorea isi lou​—⁠bona Diabolo ese edia toreisi lou dalana ia koua diba lasi!​​—⁠Malaki 3:16; Ioane 5:​28, 29; Kara 24:⁠15.

Dahaka Dainai Satani ese Ita Ia Dagedage Henia?

8. Dahaka dainai Diabolo ese Dirava ena hesiai taudia ia dagedage henia?

⁸ Bema ita be Dirava ena hesiai taudia, Diabolo be badina ta dainai ita ia dagedage henia. Ia ura iseda abidadama dekenai do ita manoka. Ita be iseda guba Tamana ita tura henia namo herea, bona Satani ia ura unai ia hadikaia. Unai kara dekenai do ita hoa lasi. Eden umana ai, Iehova ia gwau “hahine” bona “gaigai” bona edia garana huanai badu do ia vara. (Genese 3:​14, 15, NW ) Baibel ia hahedinaraia Diabolo be “idaunega gaigaina” bona ena nega be kwadogi dainai ia badu dikadika. (Apokalupo 12:​9, 12) Oibe, hahine bona gaigai edia garana huanai badu ia noho dainai, mai abidadama ida Iehova idia hesiai henia taudia idia diba dagedage do idia abia. (2 Timoteo 3:12) Satani ese unai dagedage karana ia karaia ena badina oi diba, a?

9, 10. Diabolo ese dahaka hepapahuahu ia havaraia, bona taunimanima dekenai dahaka ia gwau?

⁹ Diabolo ese Iehova ena lohia siahuna ena maoro ia hepapahuahulaia. Bona unai hepapahuahu lalonai ia gwau danu taunimanima be edia Havaraia Tauna idia abidadama henia momokani lasi. Bena, Satani ese kara maoromaoro tauna Iobu ia dagedage henia. Dahaka dainai? Ia ura Iobu ena abidadama Iehova dekenai ia hadikaia. Iobu ena adavana bona “hagoadaia taudia dikadia” toi be Diabolo ena ura idia karaia. Iobu bukana lalonai, Diabolo ese Dirava ia hamaoroa, bema taunimanima ia tohodia edia abidadama Dirava dekenai do ia manoka. To, Iobu be ena abidadama dekenai ia gini auka, bona Satani ena hereva ia hakoikoia. (Iobu 1:8–2:9; 16:2; 27:5; 31:⁠6) Hari inai negai, Diabolo ese Iehova ena Witnes taudia ia dagedage henidia, badina ia ura edia abidadama ia hadikaia bona iena hereva ia hamomokania.

¹⁰ Hari ita laloparara Diabolo be ita ia dagedage henia badina ia ura iseda abidadama Dirava dekenai ia hadikaia. Unai ita diba dainai ita gari lasi to ita gini auka. (Deuteronomi 31:⁠6) Iseda Dirava be Tanobada bona Guba edia Lohia Badana, bona ia ese ita do ia durua iseda abidadama dekenai ita gini auka totona. Namona be iseda abidadama dekenai ita gini auka noho, vadaeni Iehova ena kudouna do ita hamoalea, bona unai amo Satani Diabolo ia haere henia diba.​—⁠Aonega Herevadia 27:⁠11.

‘Satani Ena Imana amo Ai Oi Hamauria’

11. “Dibagani dika gabuna dekenai ai do oi hakaua vareai lasi,” ena anina be dahaka?

¹¹ Iseda abidadama dekenai ita gini auka karana be mai anina bada, unai dainai Dirava dekenai ita gurigurilaia be namo. Iesu ese ena hahediba taudia dekenai ia hadibaia guriguri ese ita do ia durua. Iesu ia gwau: “Dibagani dika gabuna dekenai ai do oi hakaua vareai lasi, to Satani ena imana dekena amo do oi hamauria ai.” (Mataio 6:13) Iehova be kara dika amo ita ia tohoa lasi. (Iamesi 1:13) Nega haida Baibel ia gwau Dirava ese hisihisi ia havaraia, to unai be momokani lasi. Nega momo idia vara vadaeni dika gaudia ia koua lasi. (Ruta 1:​20, 21) Iesu ese ita ia hadibaia dalanai ita guriguri neganai, ita be Iehova ita noia hahetoho negadiai ita do ia rakatania lasi totona. Oibe, unai do ia karaia lasi badina Baibel ia gwau: “Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.”​—⁠1 Korinto 10:⁠13.

12. Dahaka dainai ita guriguri neganai, ita gwau: “Satani ena imana dekena amo do oi hamauria ai”?

¹² Hedibagani amo ita do ia hamauria ia gurigurilaia murinai, Iesu ia gwau: “Satani ena imana dekena amo do oi hamauria ai.” Baibel haida idia gwau: “Kara dika amo ai oi hamauria” eiava “Kara dika amo ai oi gimaia.” To, Baibel lalonai inai hereva “hamauria” be nega momo taunimanima ida idia gaukaralaia, bona Mataio ena evanelia bukana ese ia hahedinaraia Dirava ese Satani amo ita ia hamauria be namo. (Mataio 4:​3, 11) Unai dainai, Dirava ita noia Satani Diabolo amo ita do ia hamauria be mai anina bada. Satani ia ura ita ia koia bena Dirava do ita kara dika henia. (1 Tesalonika 3:⁠5) ‘Satani ena imana amo ita do ia hamauria,’ ita guriguri neganai, ita be iseda guba Tamana ita noia ita do ia hakaua bona ia durua Diabolo ese ita ia hamorua lasi totona.

Namo Lasi Diabolo ese Oi Ia Hamorua

13, 14. Dahaka dainai Korinto tadikaka ese ia kerere tauna dekenai edia lalohadai idia haidaua be namo?

¹³ Paulo ese Korinto Keristani taudia dekenai dika gwauatao karana ia sisibalaia neganai, ia gwau: “Umui ese tau ta ena dika umui gwauatao neganai, lau danu ese iena dika do lau gwauatao. Badina be bema tau ta ena dika lau gwauatao umui dainai neganai, iena dika lau gwauatao Keriso ena vairana dekenai, Satani ese ita dekena amo kwalimu do ia abia garina, badina be iena koikoi ita diba vadaeni.” (2 Korinto 2:​10, 11) Satani be dala idauidau ai ita ia hamorua diba. Vadaeni, dahaka dainai, Paulo be unai hereva ia gwauraia?

¹⁴ Paulo be Korinto tadikaka ia sisiba henidia neganai, reana Satani ia moale bada, badina idia ese matabodaga tauna ta be kongrigeisen murimurinai idia atoa lasi. Paulo ese idia ia gwau henia, badina unai lebulebu karana be Dirava diba lasi taudia danu idia karaia lasi. Daudau lasi murinai, unai kerere tauna be kongrigeisen amo idia atoa siri. (1 Korinto 5:​1-5, 11-13) Gabeai, unai tauna ia helalo-kerehai. Bema, Korinto kongrigeisen ese unai tauna ena dika idia gwauatao lasi bona idia abia vareai lasi, Satani ena tarapu ma ta dekenai idia moru diba. Unai be dahaka? Satani bamona, idia ese unai tauna idia kara dika henia bona idia hebogahisi henia lasi. Bema unai ia vara bona unai helalo-kerehai tauna ena “lalohisihisi ese iena abidadama do ia haorea,” elda taudia be hebogahisi Diravana, Iehova ese do ia kota henidia. (2 Korinto 2:7; Iamesi 2:13; 3:⁠1) Oibe, Keristani tauna korikorina ia ura lasi Satani ena hebogahisi lasi karana ia tohotohoa.

Dirava Ena Tuari Dabuana ese Ita Ia Gimaia

15. Edena bamona tuari lalonai ita tuari, bona edena bamona do ita kwalimu diba?

¹⁵ Diabolo amo do ita heau mauri totona, gau badana be lauma dikadia do ita tuari henia. Unai tuari lalonai ita kwalimu totona, “Dirava ese ia henia tuari dabua” ibounai do ita hahedokilaia be gau badana. (Efeso 6:​11-18) Unai dabua ena kahana ta be iseda kemena ena “kara maoromaoro ena auri dabuana.” (Efeso 6:14) Guna Israela besena ena King Saulo, be Dirava ia kamonai henia lasi dainai, lauma helaga ese ia rakatania. (1 Samuela 15:​22, 23) To, bema kara maoromaoro ita badinaia bona lauma tuari dabua ibounai ita hahedokilaia, Dirava ena lauma helaga do ita abia bona Satani bona ena aneru dikadia amo ita do ia gimaia.​—⁠Aonega Herevadia 18:⁠10.

16. Edena dala ai lauma helaga ese lauma dikadia amo ita ia gimaia noho diba?

¹⁶ Lauma Helaga ese lauma dikadia amo ita ia gimaia noho totona, namona be Dirava ena Hereva do ita duahia bona stadilaia hanaihanai, bona “kohu naria tauna mai ena kamonai” ese ia hegaegaelaia bukadia do ita gaukaralaia namonamo. (Luka 12:42) Unai amo Paulo ena sisiba hegeregerena, iseda lalona be lauma gaudia namodia amo do ita hahonua, ia gwau: “Lauegu varavara taudia e, lauegu hereva orena be inai. Inai bamona karadia sibona do umui laloa: Kara namodia, taunimanima edia ladana idia hanamoa karadia, momokani karadia, bogahisihisi henia karadia, kara maoromaoro, kara goevagoeva, lalokau karadia, bona taunimanima namodia matauraia karadia.”​—⁠Filipi 4:⁠8.

17. Dahaka ese ita do ia durua sivarai namona harorolaia taudia namodia ai ita lao totona?

¹⁷ Iehova ese ita ia durua iseda ‘aena dekenai maino ena Sivarai Namona do ita atoa, tamaka bamona.’ (Efeso 6:15) Keristani hebouhebou ena kahana idauidau lalonai ita vareai karana ese ita ia durua Dirava ena Basileia ena sivarai namona ita harorolaia totona. Ma haida ita durua Dirava ena hereva momokani idia diba bona tomadiho koikoi idia heautania neganai, ita moale bada! (Ioane 8:32) “Lauma Helaga ena tuari kaia . . . Dirava ena hereva” unai, ese hahediba koikoi herevadia amo ita ia gimaia. (Efeso 6:17; 2 Korinto 10:​4, 5) Mai aonega ida Dirava ena Hereva, Baibel ita gaukaralaia neganai, ita ia durua hereva momokani ita hadibaia namonamo, bona ita ia gimaia Satani ena koikoi karadia dekenai ita moru lasi totona.

18. Edena dala ai ita gini auka, bona Satani ena koikoi karadia ita dadaraia diba?

¹⁸ Paulo ese iseda lauma tuari dabua ia herevalaia, ia gwau: “Lohiabada ena siahu dekena amo do umui siahu, bona Lohiabada ena goada dekena amo do umui goada. Dirava ese ia henia tuari dabua ibounai do umui kwatua, vadaeni do umui [“gini,” NW ] goada, Satani ena koikoi karadia do umui koua.” (Efeso 6:​10, 11) Greek gado herevana idia hahanaia “gini goada,” ese tuari tauna ta be ena gabu dekenai ia gini noho lalohadaina ia hahedinaraia. Unai dainai, ena be Satani ese koikoi karadia idauidau ia gaukaralaia iseda lalotamona ia hadikaia, iseda hahediba herevadia ia mogea bona iseda abidadama Dirava dekenai ia hamanokaia totona, to lauma tuarina lalonai do ita gini goada noho. To Diabolo be inai tuari dekenai do ia kwalimu lasi!a

Diabolo Umui Tuari Henia, Bena Do Ia Heau Boio

19. Edena dala ta ai Diabolo ita halusia diba?

¹⁹ Inai lauma tuarina lalonai, Diabolo bona ena lauma dikadia ita halusia diba. Satani dekenai do ita gari lasi badina hahediba tauna Iamesi, ia gwau: “Dirava ena ura do umui karaia. Satani do umui tuari henia, vadaeni umui dekena amo do ia heau boio.” (Iamesi 4:⁠7) Satani bona ena lauma dikadia ita halusia dalana ta be meamea bona babalau karadia do ita dadaraia vaitani, bona unai kara idia karaia taudia do ita bamodia lasi. Baibel ia hahedinaraia goevagoeva, Iehova ena hesiai taudia ese hisiu amo toa do idia tahua lasi bona meamea karadia ibounai do idia dadaraia. Bema hesiai gaukara lalonai ita bisi bada bona lauma dalanai ita goada, tau ta ena meamea karana dekenai do ita gari lasi.​—⁠Numera 23:23; Deuteronomi 18:​10-12; Isaia 47:​12-15; Kara 19:​18-20.

20. Edena dala ai Diabolo ita tuari henia diba?

²⁰ Baibel ena taravatu bona hereva momokani ita badinaia neganai, ita be ‘Diabolo ita tuari henia’ unai. Inai tanobada taudia be Satani ida idia lalotamona badina ia be edia dirava. (2 Korinto 4:⁠4) Unai dainai ita ese tanobada ena kara hegeregere hekokoroku, matabodaga, dagedage bona kohu ura henia bada karadia ita dadaraia. Diabolo ese Iesu ia tohoa bona Iesu be Baibel siri ia gaukaralaia Satani ena hereva ia koua neganai, Satani ia heau boio. (Mataio 4:​4, 7, 10, 11) Unai hegeregerena, bema ita ese Iehova ita badinaia bona mai guriguri ida Ia dekenai ita tabekau, Satani be do ia kwalimu lasi bona ita amo do ia “heau boio.” (Efeso 6:18) Iehova Dirava bona iena lalokau Natuna ese ita idia durua dainai, tau ta ese ita dekenai dika ta do ia havaraia lasi​—⁠Diabolo danu be ia hegeregere lasi!​—⁠Salamo 91:​9-11.

[Footnote]

Edena Bamona Do Oi Haere?

• Satani Diabolo ita gari henia be namo, a?

• Dahaka dainai Satani ese Keristani taudia ia dagedage henidia?

• Dahaka dainai ita guriguri neganai, ita gwau: “Satani ena imana dekena amo do oi hamauria ai”?

• Lauma tuarina lalonai edena bamona ita kwalimu diba?

[Picture on page 12]

Keriso ena hahediba taudia ginigunadia be mai gari lasi ida idia gini auka ela bona idia mase

[Picture on page 13]

Iehova ese ia lalodiatao mase taudia do ia hatoredia isi lou bona Diabolo be unai ia koua diba lasi

[Picture on page 14]

Dirava oi noia ‘Satani ena imana dekena amo oi do ia hamauria’ totona, a?

[Picture on page 15]

“Dirava ese ia henia tuari dabua” ibounai oi kwatua noho, a?