Diabolo—Gari Havaraia Lalohadai Sibona Lasi
“Taravatu Matamatana lalonai idia heai kahadia rua idia noho, kahana ta ai be Dirava bona namo ena siahu, kahana ta ai be Satani ese ia biagua dika. Unai be toretore taudia ta eiava haida sibona ese idia hahedinaraia lasi, to idia ibounai. . . . Unai dainai, Taravatu Matamatana ese ia hamomokania gauna ia hedinarai goevagoeva. Satani be momokani ia noho, hanaihanai Dirava bona Dirava ena taunimanima ia inai henia.”—“The New Bible Dictionary.”
UNAI dainai, badina be dahaka sibona idia gwauraia Keristani taudia—idia gwau Baibel idia abia dae taudia—momo ese Diabolo ia noho lalohadaina idia dadaraia? Badina idia abia dae lasi Baibel be momokani Dirava ena Hereva. (Ieremia 8:9) Idia gwau, Baibel idia torea taudia ese idia kahirakahira idia noho bese idauidau edia aonega herevadia idia hahedinaraia bona Dirava amo ia mai hereva momokani idia hahedinaraia maoromaoro lasi. Hegeregere, Katolik tomadiho ia stadilaia tauna Hans Küng, ia gwau: “Gori lalohadai idauidau Satani bona demoni tausen momo dekenai be Babulonia taudia edia gori sivaraidia amo, idaunegai Iuda tomadihona dekenai idia hanaia bona unai amo Taravatu Matamatana lalonai idia vareai.”—On Being a Christian.
To Baibel be taunimanima edia hereva sibona lasi; ia be lauma helaga amo ia vara Dirava ena Hereva. Unai dainai, aonega dalana be iena hereva Diabolo dekenai ita laloa namonamo.—2 Timoteo 3:14-17; 2 Petero 1:20, 21.
Iesu Ena Lalohadai be Dahaka?
Iesu Keriso ese ia abia dae Diabolo be momokani ia noho. Iesu be ia lalonai ia noho dika ta ese ia tohoa lasi. Lauma korikorina ta ese Iesu ia veria toho, gabeai unai lauma ia gwauraia “tanobada ena lohia.” (Ioane 14:30; Mataio 4:1-11) Danu, ia abia dae Satani ese ena palani dikadia ia karaia lalonai, lauma ma haida ese ia idia durua. “Mai lauma dika” taudia ia hanamoa. (Mataio 12:22-28) Dirava be ia noho lasi lalohadaina ia abia isi bukana ladana A Rationalist Encyclopædia danu ese unai ena anina ia hahedinaraia, ia gwau: “Evanelia Bukadia lalonai ia hedinarai, Iesu ese lauma dikadia abidadama henia karana ia abia dae be tomadiho stadilaia taudia ia hahekwakwanaia gauna.” Iesu ese Diabolo bona ena demoni ia herevalaia neganai, ia ese Babulonia ena gori sivaraidia edia gari havaraia lalohadaina sibona ia herevalaia lasi. Ia diba idia be momokani idia noho.
Iesu ena hereva ena negai idia noho tomadiho hadibaia taudia dekenai ita laloa neganai, Diabolo ita diba namonamo, ia gwau: “Umui be emui tamana Satani dekena amo umui mai, bona umui ura emui tamana ena ura dikadia do umui karaia. Hamatamaia nega dekena amo ia be alaia tauna, bona hereva momokani be ia badinaia lasi, badina iena lalona dekenai hereva momokani be lasi. Ia be hereva koikoi ia gwauraia, iena kara momokani be unai, badina ia be koikoi tauna, bona ia be koikoi ibounai edia tamana.”—Ioane 8:44.
Unai hegeregerena, Diabolo, unai ladana ena anina be “ladana hadikaia tauna,” be ‘koikoi tauna bona koikoi ibounai edia tamana.’ Ia be Dirava ia samania koikoi tauna ginigunana, bona Eden umana dekenai unai ia karaia. Iehova ese iseda tama sina ginigunadia dekenai ia gwau, kara namo bona kara dika hadibaia au ena huahua idia ania neganai, do idia “mase momokani.” Satani be gaigai ena uduna amo ia gwau unai hereva be momokani lasi. (Genese 2:17; 3:4) Unai dainai ia maoro, ia idia gwauraia “idaunegai gaigaina, bona iena ladana be Diabolo bona Satani.”—Apokalupo 12:9.
Diabolo ese kara namo bona kara dika hadibaia auna ena anina ia gwauraia koikoi. Ia gwau, unai au ena huahua ania taravatuna be maoro lasi; ia be siahu gaukaralaia kerere karana. Ia gwau, Adamu bona Heva be ‘Dirava hegeregerena’ do idia lao bona dahaka be namo bona dahaka be dika be idia sibona ese do idia abia hidi diba. Satani ia hahedinaraia idia be ura kwalimu taudia dainai, namona be sibona edia ura hegeregerena gau iboudiai idia abia hidi be maoro. (Genese 3:1-5) Unai dala ai Dirava ena lohia dalana ena maoro ia gwauraia dika dainai, henanadai badadia idia vara. Bona Iehova ese nega ia henia, unai henanadai ia haerelaia totona. Unai ena anina be Iehova ese nega ia henia Satani be nega sisina lalonai do ia noho totona. Hari ena nega kwadogina ia ore gwauraia. (Apokalupo 12:12) To, taunimanima ese Dirava idia dadaraia totona koikoi herevadia bona karadia ia gaukaralaia noho, ia ese taunimanima, Iesu ena negai idia noho taravatu hadibaia bona Farisea taudia bamona, amo ena hahediba herevadia ia habadaia.—Mataio 23:13, 15.
Danu, Iesu ia gwau “hamatamaia nega dekena amo [Diabolo] be alaia tauna, bona hereva momokani be ia badinaia lasi.” To ita gwau lasi unai ena anina be Iehova ese Diabolo ia havaraia neganai ia be “alaia tauna.” Lasi. Dirava idia dadaraia taudia hahisia lahi gabuna ia gunalaia dagedage laumana ai ia halaoa lasi. Baibel ia gwau lasi “hel” ena anina be Satani ena noho gabuna. Ia be mase taudia edia guri gabuna sibona.—Kara 2:25-27; Apokalupo 20:13, 14.
Matamanai Diabolo ese “hereva momokani be ia badinaia.” Nega ta lalonai, ia be guba dekenai Iehova ena ruma bese lalonai, Dirava ena lauma natudia goevadaena ta. To “hereva momokani be ia badinaia lasi.” Sibona ena dala bona sibona ena hakaua hereva koikoidia ia ura henia. Unai “hamatamaia nega” be Dirava ese ena aneru natuna bamona ia havaraia negana lasi, to mai ena ura ida Iehova ia gwau-edeede henia bona Adamu bona Heva ia koia negana. Diabolo be Mose ena negai Iehova idia gwau-edeede henia taudia bamona. Mose ese ia hereva henidia, ia gwau: “To umui be iena vairana dekenai umui kara dika noho. Umui be iena natuna taudia lasi, badina umui be mai emui miro. Umui be dagedage bona gagevagageva besena.” (Deuteronomi 32:5) Unai hereva be Satani dekenai ia guguru danu. Ia gwau-edeede bona Adamu bona Heva, bona idia amo taunimanima ibounai, dekenai mase ia havaraia neganai, “alaia tauna” ai ia lao.—Roma 5:12.
Idia Kamonai Lasi Anerudia
Aneru ma haida be Satani ena gwau-edeede lalonai idia vareai. (Luka 11:14, 15) Unai aneru ese “edia gabu korikori idia rakatania” bona tauanina idia atoa, Noa ena nega ai “taunimanima edia natuna kekeni” ida mahuta hebou karana idia moalelaia totona. (Iuda 6; Genese 6:1-4; 1 Petero 3:19, 20) “Hisiu ibounai orea toi dekena amo hisiu orea ta,” eiava lauma iboudiai amo kahana maragina, ese unai bamona idia karaia.—Apokalupo 12:4.
Laulau herevadia ena buka Apokalupo ese Diabolo ia gwauraia “huala badana ta, kakakaka gauna.” (Apokalupo 12:3) Dahaka dainai? Unai be ena gari havaraia toana dikana dainai lasi, badina lauma edia tauanina be edena bamona be ita diba lasi, to ita laloa diba Satani ena toana be lauma anerudia ma haida hegeregerena. To, “huala badana ta, kakakaka gauna” ese Satani ena kara ia laulaulaia namo herea, ia dagedage, gari ia havaraia, ia be mai ena siahu, bona dika ia havaraia.
Hari Satani bona demoni edia kara be mai ena hetoana. Hari tauanina idia atoa diba lasi, guna idia karaia diba bamona. Lagani 1914 ai Keriso ese Dirava ena Basileia ia lohiaia matamaia murinai, maoromaoro tanobada kahirakahira dekenai idia ia negea diho.—Apokalupo 12:7-9.
Diabolo be Iseda Inai Tauna Badana
Ena be unai ia vara, to Diabolo be iseda inai tauna badana. Ia be “laiona mai ena boiboi bada bamona . . . do ia ania ore taudia ia tahua noho.” (1 Petero 5:8) Ia be iseda goevadae lasi tauanina lalonai ia noho dika ena siahu sibona lasi. Momokani, dina iboudiai sibona eda kara dika urana dainai ita hekwarahi. (Roma 7:18-20) To, “lauma dikadia danu, guba dekenai . . . bona tanobada ena dibura lohiadia, be ita ese ita tuari henidia noho.”—Efeso 6:12.
Diabolo ena siahu ena bada be edena bamona? Aposetolo Ioane ia gwau: “Satani ese tanobada taudia ibounai ia gunalaia noho.” (1 Ioane 5:19) Momokani, ita ura lasi Diabolo ita laloa momo eiava ia ita gari henia karana ese eda mauri ia hadikaia. To, aonega dalana be ita naria namonamo, badina ia ura iseda lalona ia koua, hereva momokani ita itaia lasi totona bona ia ura iseda Dirava badinaia karana ia hadikaia.—Iobu 2:3-5; 2 Korinto 4:3, 4.
Diabolo ese nega ibounai dagedage gaudia amo Dirava ena ura idia ura karaia taudia ia hahisia lasi. Nega haida, sibona ena toana ia haidaua, “diari aneruna” bamona ia hedinarai totona. Aposetolo Paulo ese unai dainai Keristani taudia ia sisiba henia, ia gwau: “Gaigai ese Heva ia koia hegeregerena, lau gari inai, namo lasi laloa idauidau ese umui do idia hakaua kerere, vadaeni emui lalokau goevagoeva Keriso dekenai do umui rakatania.”—2 Korinto 11:3, 14.
Unai dainai namona be ‘ita laloa maoromaoro, ita naria namonamo, bona abidadama dekenai ita gini goada, vadaeni Satani do ita koua.’ (1 Petero 5:8, 9; 2 Korinto 2:11) Namona be oi naria namonamo, meamea karadia oi ura itaia karana amo Satani ese oi ia veria garina. (Deuteronomi 18:10-12) Dirava ena Hereva oi stadilaia namonamo, bona oi laloatao Diabolo ese Iesu Keriso ia tohoa neganai, Iesu ese Dirava ena Hereva ia gwauraia loulou. (Mataio 4:4, 7, 10) Dirava ena lauma totona oi noinoi. Lauma helaga ia havaraia karadia ese oi idia durua, Satani ia hagoadaia tauanina ena karadia oi dadaraia totona. (Galatia 5:16-24) Danu, dala ta ai Diabolo bona ena demoni ese oi idia veria toho neganai, Iehova dekenai oi guriguri mai momokani ida.—Filipi 4:6, 7.
Diabolo dainai ita gari bada be anina lasi. Iehova ia gwauhamata, Satani ena kara iboudiai amo ita do ia naria. (Salamo 91:1-4; Aonega Herevadia 18:10; Iamesi 4:7, 8) Aposetolo Paulo ia gwau: “Lohiabada ena siahu dekena amo do umui siahu, bona Lohiabada ena goada dekena amo do umui goada . . . vadaeni do umui goada, Satani ena koikoi karadia do umui koua.”—Efeso 6:10, 11.
[Picture on page 5]
Iesu ia diba Diabolo be momokani ia noho laumana
[Picture on page 6]
“Satani ese tanobada taudia ibounai ia gunalaia noho”
[Credit Line]
NASA photo
[Pictures on page 7]
Dirava ena Hereva oi stadilaia bona oi guriguri hanaihanai karana amo Diabolo oi dadaraia