Duahia Taudia Edia Henanadai
Taravatu Mauana lalonai be nadi palaka rua sibona idia noho, eiava ma gau haida idia noho danu?
Lagani 1026 B.C.E. ai Solomona ena dubu idia hahelagaia neganai, “Taravatu Maua lalonai be gau rua sibona idia noho, unai nadi palaka rua, Sinai Ororo dekenai Mose ese ia udaia gaudia sibona. Unai be Lohiabada ese Israela taudia dekenai Taravatu ia henidia, Aigupito tano dekena amo idia raka mai neganai.” (2 Sivarai 5:10) To, Solomona ena dubu idia do hahelagaia lasi neganai, Taravatu Mauana lalonai gau ma haida idia noho danu.
“Aigupito idia rakatania murinai hua rua idia ore, hua toi ena dina ginigunana dekenai,” Israela taudia be Sinai ena tano gagaena dekenai idia ginidae. (Esodo 19:1, 2) Unai neganai, Mose be Sinai Ororo dekenai ia daekau bona Taravatu nadi palaka rua ia abia. Ia gwau: “Bona ororo dekena amo lau diho mai. Unai neganai lau karaia hegaegae Mauana dekenai unai nadi ruaosi lau udaia. Idia be unuseni do noho, Lohiabada ese iena oda lau dekenai ia henia bamona.” (Deuteronomi 10:5) Unai maua, Iehova ese Mose ia hamaoroa Taravatu nadi palaka rua do ia udaia mauana unai, be au amo ia karaia bona ia be nega sisina lalonai idia gaukaralaia. (Deuteronomi 10:1) Badina unai nega amo ela bona lagani 1513 B.C.E., Taravatu Mauana be idia do gaukaralaia lasi.
Iehova ese Aigupito amo Israela taudia ia hamauridia murinai, idia be aniani totona idia maumau matamaia. Unai dainai, Iehova ese mana ia henidia. (Esodo 12:17, 18; 16:1-5) Unai nega ai, Mose ese Arona ia hamaoroa, ia gwau: “Uro ta oi abia, mana hegeregere kapusi badadia 4 oi udaia. Lohiabada ena vairana dekenai do oi atoa, vadaeni ia noho, oiemu bese, gabeai idia vara taudia do idia itaia, bona laloa totona. Unai dainai, Arona ese uro be gabu helagana ta Lohiabada ena vairana dekenai ia atoa, unuseni do ia noho totona, Lohiabada ena oda Mose dekenai hegeregerena.” (Esodo 16:33, 34) Ita diba Arona ese uro ta lalonai mana ia udaia, to namona be ia naria ela bona Mose ese Taravatu Mauana ia karaia bona nadi palaka rua ia udaia murinai, mana ia udaia.
Lagani 1513 B.C.E. ena dokona kahanai Taravatu Mauana idia karaia. Arona ena itotohi be Taravatu Mauana lalonai ia noho lasi, to nega daudau murinai, Kora bona ma haida idia gwau-edeede, unai neganai Arona ena itotohi be Taravatu Mauana lalonai idia udaia. Aposetolo Paulo ia gwau: “Taravatu Maua lalonai be uro ta, golo gauna, bona uro lalonai be mana ia noho. Unai Maua lalonai danu be Arona ena itotohi, ia latanai raurau idia tubu gauna. Bona inai Maua lalonai be nadi palaka rua, edia latanai Dirava ese Taravatu ia torea gaudia.”—Heberu 9:4.
Lagani 40 lalonai, Israela taudia be tano gagaena dekenai idia loaloa neganai, Dirava ese mana amo ia ubudia. To gwauhamata tanona dekenai idia vareai bona unai “tano ena aniani idia ania” matamaia neganai, mana idia ania lou lasi. (Iosua 5:11, 12) Taravatu Mauana lalonai Arona ena itotohi ia noho be mai ena badina: unai bese be gwau-edeede besena. Unai ese ia hahedinaraia Israela taudia be tano gagaena dekenai idia loaloa neganai, unai itotohi be Taravatu Mauana lalonai ia noho. Unai dainai ita gwau diba Israela taudia be gwauhamata tanona dekenai idia vareai murinai, bona Solomona ena dubu idia do hahelagaia lasi neganai, Arona ena itotohi bona mana idia udaia golo urona be Taravatua Mauana amo idia kokidia.