Diari Ia Bada Ia Lao Noho Dalana Dekenai Oi Raka Noho
“Kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.”—AONEGA HEREVADIA 4:18.
1, 2. Iehova amo ia mai diari ese ena taunimanima dekenai dahaka namo ia havaraia?
DABA kahanai dina ia daekau neganai, ena diari ese metairametaira gabu ia hadiaria, unai ia vara dalana be diari ena badina Iehova Dirava sibona ese ia gwauraia hedinarai diba. (Salamo 36:9) Dirava ia gwau, ‘daba rere ese tanobada ia dogoatao neganai, dina ena diari ese ororo bona koura ia hahedinaraia, dabua edia lokua gabudia bamona, bona toa karaia gauna ese raro ia moia tao bamona.’ (Iobu 38:12-14) Dina ia daekau neganai, iseda tanobada ena toana ia hedinarai goevagoeva, toa karaia gauna ese raro ena latanai revareva ia atoa goevagoeva bamona.
2 Iehova be lauma diarina ena badina danu. (Salamo 43:3) Ena be inai tanobada be dibura lalonai ia noho, to Dirava ese ena taunimanima dekenai diari ia hahedinaraia. Vadaeni, dahaka ia vara? Baibel ia gwau: “Kara maoromaoro taudia idia raka noho dalana, be daba rere bamona. Edia dala ena diari be ia bada lao noho, ela bona dina tubua momokani ia hedinarai.” (Aonega Herevadia 4:18) Iehova amo ia mai diarina ese ena taunimanima edia raka dalana ia hadiaria. Unai ese edia kara, orea haheaua dalana bona hahediba herevadia ia hanamoa.
Orea Haheaua Dalanai Diari Ia Hedinarai
3. Dahaka gwauhamata be Isaia 60:17 dekenai ia noho?
3 Peroveta tauna Isaia amo Iehova ia peroveta, ia gwau: “Lau ese auri laboralabora do lau mailaia lasi, to golo be oi dekenai do lau mailaia. Lau ese auri bona au do lau mailaia lasi, to siliva bona auri laboralabora, be oi dekenai do lau mailaia. Nadi do lau mailaia lasi, to auri.” (Isaia 60:17) Golo ese auri ena gabu ia abia be hanamoa karana ia laulaulaia, unai hegeregerena hari inai “tanobada dokona” ai Iehova ena Witnes taudia edia orea lalonai gau momo idia hanamoa noho.—Mataio 24:3; 2 Timoteo 3:1.
4. Lagani 1919 ai daika idia abia hidi, bona dahaka namo ia havaraia?
4 Dokona negana ia matamaia neganai, Baibel Stiuden taudia—guna Iehova ena Witnes taudia edia ladana unai—ese demokratik dalanai elda bona diakono taudia idia abia hidi. To elda taudia haida idia ura lasi idia haroro bona haida edia lalona ia hamanokaia unai gaukara idia karaia lasi totona. Unai dainai lagani 1919 ai, hesiai gaukara ia gunalaia tauna idia abia hidi. Ia be kongrigeisen taudia ese idia abia hidi lasi, to Dirava ena taunimanima edia brens opesi ese tiokratik dalanai ia abia hidi. Iena maduna be haroro gaukara ia naria, teritori ia abia hidi, bona kongrigeisen taudia ia hagoadaia haroro gaukara idia karaia totona. Murina laganina ai, Basileia harorolaia gaukarana idia habadaia.
5. Lagani 1920 murinai dahaka ia vara?
5 Lagani 1922 ai, Cedar Point, Ohio, U.S.A. dekenai, Baibel Stiuden ese hebouhebou badana idia abia neganai, inai hereva, “Haroro, haroro, haroro, Pavapava bona iena basileia umui harorolaia,” ese kongrigeisen taudia ibounai ia hagoadaia momokani. Bena lagani 1927 ai, idia abia dae Sunday be dina namona haroro gaukara karaia totona. Dahaka dainai Sunday idia abia hidi? Badina taunimanima momo be unai dina ai idia gaukara lasi. Hari, Iehova ena Witnes taudia danu be unai bamona idia karaia, wikeni bona adorahi ai taunimanima be ruma ai idia noho neganai, idia vadivadi henidia.
6. Lagani 1931 ai, dahaka gwaubou herevana idia abia dae, bona edena dala ai Basileia harorolaia gaukarana ia durua?
6 Sunday adorahi July 26, 1931 ai, Columbus, Ohio, U.S.A. dekenai, ena hebouhebou badana ta ai, Iehova ena Witnes taudia ese Basileia harorolaia gaukara habadaia gwaubouna ta idia abia dae. Bona unai gwaubou herevana be gabeai tanobada hegegemadai idia halasia. Unai gwaubou herevana ena kahana be inai: “Ai be Iehova Dirava ena hesiai taudia bona iena ladana dekenai do ai gaukara, bona ena taravatu ai badinaia dainai, taunimanima dekenai Iesu Keriso ena sivarai do ai gwauraia bona do ai hahedinaraia Iehova be Dirava momokanina bona ia be Siahu Ibounai Diravana; unai dainai Dirava ese ai dekenai ia henia ladana be mai moale ida ai abia dae bona ai ura taunimanima ese ai idia gwauraia Iehova ena witnes taudia.” (Isaia 43:10) Unai ladana matamata ese edia gaukara ia hahedinaraia goevagoeva! Iehova be mai ena gaukara iena taunimanima totona. Oibe, iena bese taudia ese mai edia moale ida unai ladana idia abia dae!
7. Lagani 1932 ai, dahaka idia haidaua bona dahaka dainai?
7 Elda taudia momo be mai edia manau ida haroro gaukara idia karaia. To gabu haida ai, vouti dalanai idia abia hidi elda taudia idia ura lasi kongrigeisen taudia ese haroro gaukara idia karaia. To gabeai gau haida idia haidaua. Lagani 1932 ai, tadikaka ese Gima Kohorona amo kongrigeisen idia hadibaia, vouti dalanai elda bona diakono abia hidi karana idia hadokoa. To hesiai komiti ta idia abia hidi, unai komiti lalonai lauma dalanai idia goada bona haroro gaukara idia karaia tatau idia noho. Unai dainai gaukara naria ena maduna be haroro gaukara idia goadalaia tadikaka dekenai idia henia, bona gaukara be ia heau namonamo.
Diari Ia Bada Ia Lao Dainai Gau Haida Idia Hanamoa
8. Lagani 1938 ai, dahaka hanamoa karana ta ia vara?
8 ‘Diari be ia bada ia lao.’ Lagani 1938 ai, vouti amo tadikaka abia hidi karana idia hadokoa momokani. “Hesiai tauna mai ena kamonai, bona mai ena kara maoromaoro” henunai, kongrigeisen ena hesiai taudia ibounai be tiokratik dalanai do idia abia hidi. (Mataio 24:45-47) Unai dala matamatana be Iehova ena Witnes taudia edia kongrigeisen ibounai ese idia abia dae, bona haroro gaukara ese anina namona ia havaraia.
9. Lagani 1972 ai, dahaka idia haidaua, bona dahaka dainai unai be hanamoa karana ta?
9 October 1, 1972 ai, kongrigeisen haheaua dalana dekenai gau ma ta idia haidaua. Tanobada ibounai Iehova ena Witnes taudia edia kongrigeisen lalonai, kongrigeisen naria tauna ena gabu be elda oreana matamatana ese ia abia. Unai ese lo tatau ia hagoadaia bada kongrigeisen lalonai gunalaia gaukara idia karaia totona. (1 Timoteo 3:1-7) Unai dainai, tadikaka momo ese treinini idia abia kongrigeisen ena maduna idauidau idia huaia totona. Idia be mai anina bada, badina idia ese Baibel ena hereva momokani idia abia dae kamonai matamata taudia idia durua diba!
10. Lagani 1976 ai, dahaka dala matamatana idia hamatamaia?
10 Hakaua Oreana ena memba taudia be komiti siks dekenai idia atoa, bona January 1, 1976 ai, unai komiti ese orea ena gaukara bona tanobada ibounai kongrigeisen edia gaukara idia naria. Basileia ena gaukara ibounai be ‘sisiba taudia namodia’ ese idia naria be hahenamo badana!—Aonega Herevadia 11:14.
11. Lagani 1992 ai, dahaka hanamoa karana ma ta ia vara, bona dahaka dainai?
11 Lagani 1992 ai gau ma ta idia hanamoa, ia vara gauna be guna Israela taudia bona ma haida be Babulonia amo idia giroa lou murinai ia vara gauna bamona. Unai nega ai, Levi taudia be momo lasi dubu gaukarana idia karaia totona. Unai dainai, Israela lasi Netinim taudia idia abia hidi Levi taudia idia durua totona. Unai hegeregerena, tanobada ai Basileia ena gaukara naria totona, lagani 1992 ai “mamoe idaudia” haida idia abia hidi hesiai gaukara ena maduna haida idia huaia totona. Unai taudia idia abia hidi Hakaua Oreana ena komiti idia durua totona.—Ioane 10:16.
12. Edena dala ai maino ese Iehova ena taunimanima ia biagua?
12 Unai dainai dahaka ia vara? Iehova ia gwau, ‘Lau ese idia do lau hanamoa, vadaeni kara maoromaoro bona maino ese idia do ia biagua.’ (Isaia 60:17) Hari, Iehova ena hesiai taudia huanai maino ia noho bona kara maoromaoro ese idia ia biagua—unai ese idia ia veria Dirava idia hesiai henia totona. Edia gaukara ia heau namonamo dainai, idia hegeregere Basileia harorolaia bona hahediba taudia halaoa gaukarana idia karaia totona.—Mataio 24:14; 28:19, 20.
Iehova ese Baibel Ena Hahediba Herevadia Dekenai Laloparara Ia Habadaia
13. Lagani 1920 murinai, Iehova ese edena dala ai ena taunimanima ia durua Baibel ena hahediba herevadia idia lalopararalaia totona?
13 Iehova ese ena taunimanima edia laloparara, Baibel ena hahediba herevadia dekenai ia habadaia noho. Apokalupo 12:1-9 dekenai haheitalai ta ia noho. Unai siri ese gau toi be laulau dalanai ia gwauraia—ia rogorogo “hahine ta” ia mara, “huala badana ta,” bona “mero ta.” Unai gau toi ese dahaka idia laulaulaia? March 1, 1925, Gima Kohorona ena hereva ta ladana, “Bese ta Ena Vara” lalonai, unai gau toi edia anina idia gwauraia hedinarai. Unai Gima Kohorona ese Dirava ena taunimanima ia durua Basileia ena vara idia perovetalaia herevadia idia lalopararalaia totona, ia hahedinaraia orea rua idia noho—Iehova ena bona Satani ena. Bena lagani 1927 bona 1928 ai, Dirava ena taunimanima idia laloparara, Krismas bona vara dinana moalelaia karana be Baibel ena hereva ida ia hegeregere lasi bona unai moale karadia idia hadokoa.
14. Lagani 1930 murinai, edena hahediba herevadia dekenai diari ia hedinarai?
14 Lagani 1930 lalonai, hahediba herevadia toi dekenai diari ia hedinarai. Lagani momo lalonai, Baibel Stiuden taudia idia diba Apokalupo 7:9-17 ese ia herevalaia hutuma bada, bona 144,000, Keriso ida guba ai do idia lohia king bona hahelaga taudia, be orea idaudia rua. (Apokalupo 5:9, 10; 14:1-5) To, hutuma bada herea be daidia idia do diba namonamo lasi. Daba ena diari be metairametaira gabu ia hadiaria bona gau edia toana bona kala idia hedinarai hegeregerena, lagani 1935 ai ia hedinarai hutuma bada taudia be “hisihisi bada herea” amo do idia roho mauri, bona tanobada dekenai do idia mauri hanaihanai. Gabeai, unai lagani ai gau ma ta idia hamaoromaoroa, bona unai ese Iehova ena Witnes natudia tano haida dekenai ia durua. Unai negai tanobada hegegemadai bese abia isi karana idia bada lalonai, Witnes taudia idia laloparara pepe saluti henia karana be tomadiho karana ta. Murina lagani ai, idia hamaoromaoroa hahediba herevana ta be Keriso be au ta dekenai ia mase to korosi dekenai lasi.—Kara 10:39.
15. Edena negai bona edena dala ai idia laloparara rara be helaga?
15 Tanobada Tuarina Iharuana lalonai, bero idia davaria tuari taudia dekenai rara idia henia hanai, to gabeai diari ia bada dainai ia hedinarai rara be helaga. July 1, 1945 ena Gima Kohorona ia hahedinaraia, “Iehova idia tomadiho henia bona tanobada matamata ai idia ura mauri hanaihanai taudia ibounai ese rara idia matauraia badina ia be helaga bona Dirava ena lalohadai rara dekenai idia badinaia be gau badana.”
16. New World Translation of the Holy Scriptures be edena negai idia halasia, bona ia lalonai dahaka gau namodia rua idia noho?
16 Lagani 1946 ai, tadikaka idia laloparara Baibel matamata ta idia hahanaia be namo. Idia ura unai Baibel lalonai be Kerisendom ena sene hahediba herevadia idia noho lasi. Unai dainai December 1947 ai, Baibel hahanaia gaukarana idia hamatamaia. Bena lagani 1950 ai, New World Translation of the Christian Greek Scriptures be English gado ai idia halasia. Lagani 1953 ai, Heberu Revarevadia ena volium ta ta be English gado dekenai idia halasia matamaia. Unai hahanaia gaukara idia hamatamaia negana amo lagani 12 ia ore murinai, lagani 1960 ai, volium ginigabena idia karaia. New World Translation of the Holy Scriptures be lagani 1961 ai idia halasia. Hari, unai Baibel be gado momo dekenai idia hahanaia vadaeni, bona ia dekenai gau namodia haida idia noho. Hegeregere, ia lalonai Dirava ena ladana, Iehova ia noho. Danu, ia be toretore gunadia amo ia idau lasi, unai dainai Dirava ena hereva momokani dekenai laloparara matamata idia hahedinaraia noho.
17. Lagani 1962 ai, dahaka diari ma ta ia hedinarai?
17 Lagani 1962 ai ia hedinarai, Roma 13:1 ena hereva hegeregerena, Keristani taudia ese “gavamani taudia” idia matauraia be namo, to gavamani kamonai henia karana be mai ena hetoana. Roma karoa 13 bona Baibel ena siri haida hegeregere, Tito 3:1, 2 bona 1 Petero 2:13, 17 idia stadilaia namonamo karana amo idia itaia, inai hereva “gavamani taudia” ese Iehova Dirava bona Iesu Keriso ia herevalaidia lasi, to tanobada ena gavamani ia herevalaia.
18. Lagani 1980 murinai, edena hereva momokani ma haida edia anina idia hahedinaraia?
18 Murina laganidia lalonai, diari ia bada ia lao. Lagani 1985 ai, Dirava ese taunimanima haida ia gwauraia kara maoromaoro taudia bona ‘mauri do idia abia,’ bona idia haida be ena turana ai idia lao ena anina ia hedinarai. (Roma 5:18; Iamesi 2:23) Lagani 1987 ai, Keristani Iubili ena anina idia gwauraia hedinarai.
19. Vanegai laganidia lalonai, Iehova ese edena dala ai iena taunimanima dekenai diari ia hahedinaraia?
19 Lagani 1995 ai, “mamoe” bona “nanigosi” hapararaia gaukarana dekenai laloparara matamatana ia hedinarai. Bena lagani 1998 ai, Esekiela ena dubu matahanaina ena anina idia gwauraia hedinarai, unai peroveta herevana be hari ia guguru noho. Lagani 1999 ai, edena negai bona edena dala ai ‘gau dika rohorohona be dubu helaga lalonai ia gini’ idia hahedinaraia. (Mataio 24:15, 16; 25:32) Lagani 2002 ai, mai “lauma bona momokani” ida Dirava ita tomadiho henia ena anina dekenai diari ia hedinarai.—Ioane 4:24.
20. Edena dala ai Dirava ena taunimanima edia kara idia haidaua?
20 Orea ena heau dalana bona Baibel ena hahediba herevadia sibona idia hanamoa lasi, to Keristani kara danu idia hanamoa. Hegeregere, lagani 1973 ai, tadikaka idia laloparara kuku ania karana be ‘tauanina hamiroa’ karana ta, bona ia be kerere badana. (2 Korinto 7:1) Bena lagani 10 murinai, February 1, 1984 Gima Kohorona ese ia hahedinaraia, ipidi ita gaukaralaia be maoro lasi. Unai haheitalai haida amo ita itaia diba, hari iseda nega lalonai diari be ia bada ia lao noho.
Diari Ena Dala Dekenai Raka Noho
21. Edena bamona laloa dalana ese ita ia durua diari ena dala dekenai ita raka noho totona?
21 Lagani momo elda gaukara ia karaia tadikaka ta ia gwau, “idia haidaua herevana ta abia dae bona badinaia totona be ia auka.” Lagani 48 lalonai idia haidaua gaudia idauidau ia itaia neganai, dahaka ese ia ia durua idia haidaua herevadia ia abia dae totona? Ia gwau: “Lalohadai maorona dogoatao karana be mai anina bada. Bema ta ese idia haidaua herevana ia abia dae lasi, anina be Iehova ena orea ida ia raka hebou lasi. Bema gau haida idia haidaua bona lau abia dae be auka, Petero ena hereva Iesu dekenai lau laloa, ia gwau: ‘Lohiabada e, ai be daika dekenai do ai lao? Mauri hanaihanai herevadia be oi dekenai idia noho.’ Bena lau sibona lau nanadaia, ‘Edeseniai do lau lao—tanobada diburana dekenai, a?’ Unai ese lau ia durua Dirava ena orea ida lau raka hebou noho totona.”—Ioane 6:68.
22. Diari dekenai ita raka noho karana ese edena bamona ita do ia durua?
22 Ita noholaia tanobadana be dibura masemase gabuna. Iehova ese ena taunimanima dekenai diari ia halasia noho lalonai, ia hedinarai idia bona tanobada taudia edia kara ia idau momokani. Unai diari ese edena bamona ita ia durua? Dibura lalonai tosi ena diari ese dala dekenai ia noho guri ta ia hahedinaraia, to ia kokia lasi. Unai hegeregerena, Dirava ena Hereva amo ia mai diarina ese ita idia hamanokaia gaudia ia kokia lasi. To ita ia durua unai gaudia ita dadaraia, bona unai amo diari ia bada noho dalana dekenai ita raka noho diba. Vadaeni, namona be Iehova ena peroveta herevana—dibura gabuna ia hadiaria lamepa bamona—ita badinaia noho.—2 Petero 1:19.
Oi Laloatao, A?
• Iehova ese ena taunimanima edia orea ena heau dalana be edena dala ai ia hanamoa?
• Iehova ese edena dala ai Baibel ena hahediba hereva dekenai, laloparara ia habadaia?
• Emu nega lalonai Iehova ena orea ese dahaka gaudia ia haidaua, bona dahaka ese oi ia durua unai lalohadai matamatadia oi abia dae totona?
• Dahaka dainai oi ura diari ena dala dekenai oi raka noho?
[Pictures on page 19]
Lagani 1922 ai, Cedar Point, Ohio, dekenai idia abia hebouhebou badana ese Baibel Stiuden taudia ia hagoadaia Dirava ena gaukara idia karaia totona
[Picture on page 21]
Tadikaka N. H. Knorr be lagani 1950 ai “New World Translation of the Christian Greek Scriptures” ia halasia
[Picture Credit Line on page 18]
© 2003 BiblePlaces.com