Iehova Ena Hairai be Ena Taunimanima Ia Hadiaria

“Lau Lohiabada, be oiemu diari do lau lao, ela bona hanaihanai.”​​—ISAIA 60:20.

1. Iehova be edena dala ai ena kamonai taudia ia hanamoa?

IEHOVA ese “iena bese taudia ia moalelaia noho momokani. Ia ese manau taudia dekenai kwalimu ia henia noho.” (Salamo 149:4) Unai be idaunegai salamo torea tauna ena hereva, bona histori ese iena hereva ia hamomokania. Iehova ena taunimanima be ia idia kamonai henia neganai, idia ia naria, edia namba ia habadaia, bona idia ia gimaia. Idaunegai, ia durudia edia inai taudia idia halusia totona. Hari, idia ia durua lauma dalanai idia goada totona, bona ia hamaorodia Iesu ena boubou dainai hahemauri idia abia diba. (Roma 5:9) Unai ia karaia badina iena matana dekenai idia be mai hairai.

2. Ena be Dirava ena taunimanima ese dagedage idia davaria, to dahaka idia diba momokani?

² Momokani, hari inai dibura masemase tanobadana lalonai, “Dirava badinaia idia ura taudia ibounai” ese dagedage do idia davaria. (2 Timoteo 3:12) To, Iehova ese unai dagedage taudia ia itaia, bona idia ia sisiba henia, ia gwau: “Oiemu hesiai gaukara idia karaia lasi besedia, be lau ese do lau hadikaia ore momokani.” (Isaia 60:12) Hari inai negai, dagedage karadia be idauidau. Tano haida lalonai, dagedage taudia idia ura Keristani taudia momokanidia ese Iehova dekenai idia henia tomadiho karana dekenai hetoana idia atoa, eiava idia taravatua. Tano ma haida ai, edia tomadiho idia goadalaia kava taudia ese Iehova idia tomadiho henia taudia idia botaia, bona edia kohu idia gabua. To laloaboio lasi, Iehova ese iena ura ia hagugurua dalana idia dagedage henia taudia edia davana ia gwauraia hidi vadaeni. Dagedage taudia do idia kwalimu lasi. Siona bona iena natudia, iena ladanai idia hereva taudia tanobada dekenai, idia tuari henia taudia ibounai do idia kwalimu lasi. Iseda Dirava goadana, Iehova, amo unai gwauhamata ita abia dainai, ita ia hamoalea bada, ani?

Guna Idia Laloa Lasi Hahenamodia Idia Davaria

3. Iehova idia tomadiho henia taudia edia hairai bona huahua havaraia karana be dahaka gaudia ese idia laulaulaia?

³ Inai be momokani, inai nega dikana ena dina dokodia lalonai, Iehova ese ena taunimanima ia hanamoa, bona guna idia laloa lasi hahenamodia idia abia. Iena tomadiho gabuna bona iena ladana idia abia taudia ia hanamoa noho. Isaia ena peroveta hereva hegeregerena, Siona dekenai ia gwau: “Kasuarina audia, iunipa audia bona saipresi audia, Lebanona ena uda ena au namodia momokani, be Ierusalema haginia lou totona do idia huaia mai, lauegu Dubu Helaga do idia karaia namo herea totona, bona hairai momokani gabuna, be lauegu hanua do idia halaoa totona.” (Isaia 60:13) Ororo mai edia au momo oi itaia neganai edia toana be namo herea. Unai dainai, au namodia ese Iehova ena tomadiho taudia edia hairai bona huahua havaraia karana idia laulaulaia be maoro.​—Isaia 41:19; 55:13.

4. “Dubu Helaga” bona “[Iehova ena] hanua” edia anina be dahaka, bona edena dala ai Dirava ese idia ia hahairaia?

⁴ Isaia 60:13 ia gwauraia “Dubu Helaga” bona “lauegu hanua” edia anina be dahaka? Unai hereva ese Iehova ena lauma dubuna badana ena ariara, anina be Iesu Keriso amo Iehova ita tomadiho henia dalana, idia herevalaia. (Heberu 8:​1-5; 9:​2-10, 23) Iehova ia hahedinaraia ena ura be unai lauma dubuna do ia hahairaia, bese idauidau ibounai amo taunimanima do ia veria mai, unuseniai ia do idia tomadiho henia totona. (Hagai 2:7) Guna Isaia ese ia itaia bese iboudiai amo hutuma bada be Iehova ena tomadiho ataiai gabuna dekenai idia aru lao. (Isaia 2:​1-4) Lagani handred momo murinai, aposetolo Ioane be matahanai ta lalonai “hutuma bada herea, tau ta ese ia duahidia diba lasi, bese idauidau bona iduhu idauidau bona kopina idauidau bona gado idauidau amo” ia itaia. Idia be “Dirava ena helai gabuna badana ena vairanai idia gini noho. Dina bona hanuaboi idia ese Dirava ena hesiai gaukara idia karaia noho, iena dubu helaga lalonai.” (Apokalupo 7:​9, 15; NW ) Unai peroveta herevadia be iseda nega lalonai idia guguru vadaeni dainai, ita itaia diba Iehova ese ena ruma ia hahairaia.

5. Siona ena natudia be edena hanamoa karana idia davaria?

⁵ Unai ese Siona ena noho ia hanamoa momokani! Iehova ia gwau: “Oi be idia ese do idia badu henia lou lasi, bona oi dekena amo do idia raka siri lou lasi. Guna be oi idia rakatania, bona oi noho kava, to hari lau ese oiemu ladana do lau habadaia, bona oi dekenai hairai do lau henia. Vadaeni oi be dohore gabu mai moale bada danu, ela bona hanaihanai.” (Isaia 60:15) Tanobada tuarina ginigunana ia doko gwauraia neganai, “Dirava ena Israela” ese ia noho kava negana ta ia davaria. (Galatia 6:16) Iena hemami be iboudiai ese ia “idia rakatania,” badina ena natudia tanobada dekenai ese Dirava ena ura idia totona idia lalo-pararalaia goevagoeva lasi. Bena lagani 1919 ai, Iehova ese ena horoa hesiai taudia ia hagoadaia lou, bona unai nega amo lauma dalanai idia ia hanamoa bada. Ma danu, unai siri ena gwauhamata be namo herea, ani? Iehova ena vairanai Siona be ‘ladana bada’ gauna bamona. Oibe, Siona ena natudia, bona Iehova danu, ese Siona do idia laloa bada. Ia be “moale bada” gabuna ai do ia lao. Bona unai be nega kwadogina sibona lalonai lasi. Siona ena noho namona, ena tanobada natudia ese idia laulaulaia hegeregerena, be do ia abia “ela bona hanaihanai.” Do ia doko lasi.

6. Keristani taudia momokanidia be edena dala ai bese idauidau edia kohu idia gaukaralaia?

⁶ Hari, Dirava ena gwauhamata ma ta oi kamonai. Iehova be Siona dekenai ia hereva, ia gwau: “Oi ese bese idauidau edia ratana do oi topoa, bona king taudia edia ratana do oi topoa; bona do oi diba momokani lau, Iehova, be emu Hamauria Tauna, bona Iakobo ena Siahu Tauna be emu Hoia Lou Tauna.” (Isaia 60:​16, NW ) Siona be edena dala ai “bese idauidau edia ratana” bona ‘king taudia edia ratana ia topoa’? Horoa Keristani taudia bona edia bamodia, “mamoe idaudia” taudia, ese bese idauidau edia kohu namodia idia gaukaralaia tomadiho goevana idia habadaia totona. (Ioane 10:16) Mai edia ura ida kontribusen moni idia henia karana amo, tanobada ibounai dekenai idia karaia haroro bona hadibaia gaukara badana idia durua. Idia ese taunimanima idia karaia masini matamatadia be mai aonega ida idia gaukaralaia dainai, hari Baibel bona Baibel idia herevalaia bukadia be gado handred momo dekenai idia printaia diba. Hari taunimanima momo herea ese Baibel ena hereva momokani idia abia diba, guna bamona lasi. Taunimanima momo bese idauidau amo idia diba Iehova, lauma dalanai dibura dekenai idia noho horoa hesiai taudia ia hoia lou Diravana, be momokani Hamauria Tauna.

Orea Ena Heau Dalana

7. Siona ena natudia dekenai edena hanamoa karadia idia vara?

⁷ Iehova ese dala ma ta ai ena taunimanima ia hahairaia danu. Edia orea ena heau dalana ia hanamoa noho. Isaia 60:17 ia gwau: “Lau ese auri laboralabora do lau mailaia lasi, to golo be oi dekenai do lau mailaia. Lau ese auri bona au do lau mailaia lasi, to siliva bona auri laboralabora, be oi dekenai do lau mailaia. Nadi do lau mailaia lasi, to auri. Oiemu biaguna taudia ese, oi do idia hisihisi henia lou lasi. Lau ese idia do lau hanamoa, vadaeni mai maoromaoro bona maino danu oi do idia biagua noho.” Auri laboralabora ena gabu dekenai golo ia atoa be hanamoa karana ta, bona ia kikilaia gaudia ma haida ia haidaua be hanamoa karadia danu. Unai hegeregerena, dina gabedia lalonai, Dirava ena Israela ena orea ena heau dalana ia hanamoa noho. Haheitalai haida mani oi laloa.

8-10. Lagani 1919 amo ema bona hari idia vara orea hanamoa daladia haida mani oi gwauraia.

⁸ Lagani 1919 do lasi neganai, elda bona diakono taudia ese Dirava ena bese taudia edia kongregesen idauidau idia biagua, bona kongregesen taudia ese demokratik dalanai unai taudia be vouti karana amo idia abia hidi. Unai lagani ai, “hesiai tauna mai ena kamonai, bona mai ena kara maoromaoro” ese kongregesen ta ta lalonai hesiai gaukara ia gunalaia tauna ia abia hidi, haroro gaukara idauidau do ia naria totona. (Mataio 24:​45-47) To, kongregesen momo dekenai unai dala ia heau namonamo lasi, badina vouti amo idia abia hidi elda taudia haida ese evanelia gaukara idia durua lasi. Unai dainai, lagani 1932 ai, kongregesen idia hamaorodia elda bona diakono taudia be vouti amo abia hidi karana do idia hadokoa. To, idia be tatau haida do idia abia hidi, hesiai komiti lalonai hesiai gaukara ia gunalaia tauna ida do idia gaukara hebou totona. Unai be “auri laboralabora” bamona, “au” ena gabu ia abia​​—hanamoa karana badana unai!

⁹ Lagani 1938 ai, tanobada hegegemadai kongregesen iboudiai ese Baibel ia gwauraia hanamoa dalana ta idia abia dae. Kongregesen naria gaukarana be hakaua naria tauna bona hesiai taudia ma haida dekenai idia henia, to hesiai tauna mai ena kamonai bona kara maoromaoro oreana ena hakaua siahuna henunai unai taudia idia abia hidi. Vouti karana ia ore! Unai amo, kongregesen lalonai idia karaia abia hidi ibounai be tiokratik dalanai idia karaia. Unai be hegeregere “auri” ese “nadi” ena gabu ia abia, bona “golo” ese “auri laboralabora” ena gabu ia abia.

¹⁰ Unai nega amo ema bona hari, hanamoa karadia idia do vara noho. Hegeregere, lagani 1972 ai, idia laloa tiokratik dalanai idia abia hidi elda oreana ese kongregesen do idia naria be namo, elda ta ena siahu ese ma haida edia do ia hereaia lasi, bona unai dala be aposetolo taudia edia negai Keristani kongregesen idauidau idia naria dalana hegeregerena. Bena lagani rua bamona gunanai, hanamoa karana ma ta ia vara. Koporeisen haida edia dairekta taudia idia haidaua, unai amo Hakaua Oreana ese Dirava ena taunimanima edia namo lauma dalanai idia tahua badabada diba, to dina ta ta ai gavamani ena taravatu dainai idia karaia gaudia dekenai edia nega do idia halusia kava lasi.

11. Daika ese Iehova ena taunimanima edia orea ena heau dalana hanamoa karadia ia karaia, bona unai haidaua karadia dainai dahaka ia vara?

¹¹ Daika ese unai hanamoa karadia ia karaia noho? Unai be Iehova Dirava. Ia gwau: ‘Lau ese golo do lau mailaia.’ Bona ma ia gwau: “Lau ese idia do lau hanamoa, vadaeni mai maoromaoro bona maino danu oi do idia biagua noho.” Oibe, Iehova ese iena taunimanima ia naria. Ia perovetalaia orea ena heau dalana ia hanamoa karadia be ena taunimanima ia hahairaia dalana ma ta. Bona unai dainai, Iehova ena Witnes taudia be dala momo ai hahenamo idia davaria. Isaia 60:18 ia gwau: “Dagedage bona heatu ena regena, be do oi kamonai lou lasi. Gau ta ese oiemu tano do ia hadikaia lou lasi. Lau ese oi do lau naria bona gimaia, magu bamona, bona lau ese oi lau hamauria vadaeni dainai, oi ese lau do oi hanamoa bada.” Unai hereva be mai hairaina! To edena dala ai ia guguru vadaeni?

12. Dahaka dainai Keristani taudia momokanidia huanai maino ia noho?

¹² Keristani taudia momokanidia ese Iehova ena hadibaia bona hakaua herevadia idia tahua goadagoada, bona unai dainai Isaia ia perovetalaia gauna ia vara: “Bona emu natuna memerodia iboudiai be Iehova ese do ia hadibaia, bona emu natuna memerodia edia maino do ia bada.” (Isaia 54:​13, NW ) Danu, Iehova ena lauma be iena taunimanima dekenai ia gaukara, bona unai lauma ena huahua ta be maino. (Galatia 5:​22, 23) Iehova ena taunimanima edia maino havaraia karana dainai, inai dagedage tanobadana lalonai idia be laga-ani bona ranu momo gabuna bamona. Keristani taudia momokanidia be maino ai idia noho badina idia lalokau heheni, unai ese tanobada matamatana lalonai do idia abia maino ena mamina ia hahedinaraia. (Ioane 15:17; Kolose 3:14) Momokani, ita ta ta iboudiai ita ura bada unai maino ita moalelaia bona ita habadaia, unai ese iseda Dirava ia abia isi bona hanamoa bona ia be iseda lauma paradaiso ena kahana badana ta!​—Isaia 11:9.

Iehova Ena Diari Do Ia Diari Noho

13. Dahaka dainai ita diba Iehova ese ena taunimanima dekenai ena diari ia halasia noho karana do ia hadokoa lasi?

¹³ Iehova ena diari be iena taunimanima dekenai do ia diari noho, a? Oibe! Isaia 60:​19, 20 ia gwau: “Dina ese oi do ia hadiaria lou lasi, dina neganai, bona hua ese oi do ia hadiaria lou lasi, hanuaboi neganai. Badina be lau, Lohiabada, be oiemu noho hanaihanai diarina do lau lao, bona egu hairaina ena diari ese, oi dekenai diari bada do ia henia. Oiemu lalohisihisi dinadia be do idia ore. Lau Lohiabada, be oiemu diari do lau lao, ela bona hanaihanai. Oiemu dina be do ia diho lou lasi, bona oiemu hua ena diari be do ia maragi lou lasi.” Lagani 1919 ai, lauma dalanai edia tano idia haboioa taudia edia “lalohisihisi dinadia” idia ore neganai, Iehova ena diari idia abia matamaia. Lagani 80 bona ma haida murinai, Iehova ena lalo-namo bona diari idia moalelaia noho. Bona do ia doko lasi. Iseda Dirava be ena taunimanima totona dina bamona do ia “diho” lasi, eiava hua bamona ena diari do ia “maragi” ia lao lasi. To, iena diari do ia halasia idia dekenai ela bona hanaihanai. Inai diari lasi tanobadana ena dina gabedia lalonai ita noho dainai, unai hereva ese ita ia hagoadaia momokani!

14, 15. (a) Edena dala ai Dirava ena taunimanima ibounai idia “maoromaoro”? (b) Isaia 60:21 ena peroveta herevana be dahaka mai anina bada dalana ai do ia guguru bona mamoe idaudia taudia ese unai negana idia naria?

¹⁴ Hari, Iehova ese tanobada dekenai Siona ena ladanai idia hereva taudia, Dirava ena Israela, dekenai ia gwauraia gwauhamatana ma ta mani oi kamonai. Isaia 60:21 ia gwau: “Oiemu taunimanima ibounai, be do idia kara maoromaoro, bona tano be idia ese do idia biagua ela bona hanaihanai. Lau ese idia lau hadoa, bona lau ese idia lau havaraia, idia ese egu siahu badana, be taunimanima ibounai dekenai do idia hedinaraia totona.” Lagani 1919 ai, horoa Keristani taudia idia gaukara matamaia lou neganai, idia be orea idauna ta. Kara dika tanobadana lalonai, Dirava ese idia “ia gwauraia maoromaoro,” badina Keriso Iesu ena mauri davalaia boubouna idia abidadama henia goada. (Roma 3:24; 5:1) Bena, Babulonia amo idia ruhaia Israela taudia bamona, “tano” idia biagua matamaia, unai lauma tanona be edia gaukara gabuna, bona ia lalonai lauma paradaisona idia moalelaia. (Isaia 66:​8, NW ) Unai tano ena hairai, paradaiso bamona, be do ia ore lasi, badina, idaunegai Israela bamona lasi, Dirava ena Israela besena ese edia kamonai karana do idia rakatania lasi. Edia abidadama, haheauka, bona gaukara goadagoada karadia ese Dirava do idia hanamoa, bona unai do ia doko lasi.

¹⁵ Unai lauma besena taudia ibounai be gwauhamata matamatana lalonai idia vareai. Idia iboudiai edia kudouna lalonai Iehova ena taravatu idia torea, bona Iesu ena mauri davalaia boubouna dainai Iehova ese edia kara dika ia gwauatao. (Ieremia 31:​31-34) Idia ia gwauraia maoromaoro, iena ‘natudia,’ bona ia kara henidia, hegeregere idia goevadae vadaeni. (Roma 8:​15, 16, 29, 30) Dirava ese edia bamodia, mamoe idaudia taudia, edia kara dika danu ia gwauatao Iesu ena boubou dainai, bona Aberahamo bamona Dirava ese edia abidadama dainai iena turadia ai ia halaodia bona idia ia gwauraia maoromaoro. “Edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro bona goeva momokani.” Bona edia bamodia, mamoe idaudia taudia, ese hahenamo ma ta idia naria. Hisihisi badana amo idia roho mauri, eiava mase amo idia toreisi lou murinai, Isaia 60: 21 ia guguru karana iharuana do idia itaia, tanobada be paradaiso ai do ia lao. (Apokalupo 7:14; Roma 4:​1-3) Unai negana ai, “manau taudia ese noho gabuna tano do idia abia, do idia helai namonamo, mai moale bona mai maino danu.”​—Salamo 37:​11, 29.

Edia Namba Ia Bada Ia Lao Noho

16. Iehova ese edena gwauhamata namona ta ia karaia, bona edena dala ai ia guguru?

¹⁶ Isaia karoa 60 ena siri ginigabena ai, Iehova ese ia karaia gwauhamatana ginigabena ita duahia. Siona dekenai ia gwau: “Ladana maragi momokani tauna mai ena famili, be bese badana mai goadana danu do idia lao. Oibe, negana korikori ia ginidae neganai, lau [Iehova] ese inai kara do lau havaraia haraga.” (Isaia 60:22) Iseda nega lalonai, Iehova ese unai gwauhamata ia hagugurua. Lagani 1919 ai, horoa Keristani taudia idia gaukara matamaia lou neganai, idia be momo lasi​​—edia orea be maragi momokani. Lauma Israela taudia ma haida idia abia mai noho lalonai edia namba ia bada ia lao. Bena idia dekenai idia mai mamoe idaudia taudia edia namba ia bada ia lao. Dirava ena taunimanima be maino ai idia noho dalana bona edia “tano” ai ia noho lauma paradaisona, ese kudou-maoro taudia momo ia veria mai dainai, “ladana maragi momokani tauna” be “bese badana mai goadana” ai ia lao. Hari unai “bese”​​—Dirava ena Israela bona edia mauri idia gwauhamatalaia vadaeni “idau bese taudia” milioni 6 bamona​​—edia namba ese tanobada ena tano momo edia bese taudia edia namba ia hanaia. (Isaia 60:10) Unai taudia ibounai ese Iehova ena diari idia hahedinaraia dainai, iena matana ai idia iboudiai be mai edia hairai.

17. Isaia karoa 60 ita kikilaia ena anina emu mauri dekenai be dahaka?

¹⁷ Oibe, Isaia karoa 60 ena hereva badadia ita laloa karana ese iseda abidadama ia hagoadaia. Ita ia durua gauna be Iehova be gunaguna ia diba vadaeni iena taunimanima be lauma dalanai edia tano do idia haboioa bena do idia abia lou. Ita hoa, badina gunaguna Iehova ia hahedinaraia goevagoeva iseda nega lalonai tomadiho momokani taudia edia namba do ia bada ia lao. Danu, ita ia hagoadaia bada bema ita laloatao Iehova ese ita do ia rakatania lasi! Inai lalokau herevana, “Hanua Badana” ena geiti do idia kehoa noho bona “mauri hanaihanai idia ura kudou-maoro taudia ibounai” do idia vareai diba ese ita ia hagoadaia bada! (Kara 13:​48, NW ) Iehova ese iena taunimanima do ia hadiaria noho. Siona do ia heagilaia noho, badina iena natudia ese idia hahedinaraia diari do ia bada ia lao noho. (Mataio 5:16) Momokani, iseda lalona ita hadaia Dirava ena Israela kahirakahira dekenai do ita noho, bona iseda hahenamo, Iehova ena diari hahedinaraia hahenamona, do ita laloa bada noho!

Anina Oi Gwauraia Diba, A?

• Dagedage karadia ita davaria neganai, dahaka ita diba momokani?

• Edena dala ai Siona ena natudia ese ‘bese idauidau edia ratana idia topoa’?

• Edena dala idauidau ai Iehova be ‘auri laboralabora ia mailaia to au lasi’?

• Isaia 60:​17, 21 ai, edena kara rua idia hahedinaraia goevagoeva?

• Edena dala ai “ladana maragi momokani tauna” be “bese badana mai goadana” ai ia lao?

[Box/Pictures on page 30]

ISAIAH’S PROPHECY—Light for All Mankind

Inai stadi herevadia rua lalonai idia noho hereva badadia be lagani 2001/02 “Dirava Ena Hereva Hadibaia Taudia” Distrik Hebouhebouna ai idia henia herevana amo. Unai hereva ia doko neganai, gabu momo dekenai hereva henia tauna ese buka matamata, Isaiah’s Prophecy​—Light for All Mankind, Volium 2 ia halasia. Lagani gunanai Isaiah’s Prophecy​—Light for All Mankind, Volium 1 idia halasia. Unai buka matamatana dainai, kahirakahira siri ta ta Isaia bukana lalonai edia anina ita tahua diba. Unai volium ese ita idia durua, iseda abidadama ia hagoadaia peroveta bukana Isaia ita lalo-pararalaia bona laloa bada totona.

[Pictures on page 27]

Iehova ena taunimanima ese dagedage dikadia idia davaria neganai, ia ese idia “dekenai kwalimu ia henia noho”

[Pictures on page 28]

Dirava ena taunimanima ese bese idauidau edia kohu namodia idia gaukaralaia tomadiho goevana idia habadaia totona

[Picture on page 29]

Iehova ese ena taunimanima ia hanamoa dainai, edia orea ia heau namonamo bona maino ai idia noho