Duahia Taudia Edia Henanadai
Bema ta be demoni ese ia hahisia, heduru abia totona dahaka do ia karaia?
Baibel lalonai ia hahedinaraia, demoni ese idia hahisia taudia be heduru idia abia diba. Bona demoni edia hahisia karadia amo idia siri totona, guriguri karana be mai anina bada. (Mareko 9:25-29) To demoni ese idia hahisia tauna be kara haida ia karaia danu be namo. Keristani ginigunadia edia haheitalai ese ta ia durua diba, demoni edia hahisia karana amo ia heau siri totona.
Idaunegai idia noho Efeso taudia haida be Keriso ena hahediba taudia ai idia do lao lasi neganai, idia be demoni tomadiho henia karadia idia karaia. To, Dirava ena hesiai taudia ai idia lao neganai, “meamea taudia momo ese edia buka idia mailaia, idia haboua, bona idia gabua taunimanima ibounai edia vairanai.” (Kara 19:19) Efeso dekenai kamonai matamata taudia momo be edia meamea bukadia idia gabua. Bona edia haheitalai be hari inai negai demoni ese ia hahisia taudia ia durua diba. Unai bamona taudia ese meamea gaudia idauidau ibounai idia negea be gau badana. Hegeregere buka, magasin, muvi, Internet, lauma dikadia edia lalohadai idia hahedinaraia miusiki, bona sibodia idia gimaia totona, ageva bona ma gau haida idia negea danu be namo.—Deuteronomi 7:25, 26; 1 Korinto 10:21.
Efeso Keristani taudia ese edia meamea bukadia idia gabua bona lagani haida idia hanaia murinai, aposetolo Paulo ese idia ia tore henia, ia gwau: “Iseda tuari be lauma dikadia danu.” (Efeso 6:12) Paulo ese Keristani taudia ia sisiba henia, ia gwau: “Dirava ese ia henia tuari dabua ibounai do umui kwatua, vadaeni do umui goada, Satani ena koikoi karadia do umui koua.” (Efeso 6:11) Hari, unai sisiba be mai anina bada danu. Keristani taudia be lauma dikadia amo idia heau siri totona, gau badana be lauma dalanai idia goada. Paulo be ma ia gwau, “Nega ibounai abidadama, emui kesi bamona, do umui abia loaloa. Abidadama dekena amo, Satani ena diba bona peva, lahi gaudia, be do umui habodoa diba.” (Efeso 6:16) Ta be Baibel ia stadilaia karana amo ena abidadama ia hagoadaia diba. (Roma 10:17; Kolose 2:6, 7) Unai dainai, Baibel stadilaia hanaihanai karana ese iseda abidadama ia hagoadaia bona lauma dikadia ita koua diba.—Salamo 91:4; 1 Ioane 5:5.
Efeso dekenai idia noho Keristani taudia ese mai anina bada gauna ma ta idia karaia be namo. Paulo ese ia hamaorodia: “Nega ibounai Lauma Helaga ena siahu dekena amo guriguri bona noinoi do umui gwauraia.” (Efeso 6:18) Oibe, hari inai negai ta be demoni ena siahu amo ia heau siri totona, gau badana be Iehova ia noia do ia gimaia totona. (Aonega Herevadia 18:10; Mataio 6:13; 1 Ioane 5:18, 19) Baibel ia gwau: “Unai dainai Dirava ena ura do umui karaia. Satani do umui tuari henia, vadaeni umui dekena amo do ia heau boio.”—Iamesi 4:7.
Namona be demoni ese ia hahisia tauna be Iehova ena heduru totona ia guriguri goadagoada. Bona Keristani taudia ma haida ese unai tauna—ia ura momokani Iehova ia hesiai henia bona lauma dikadia edia siahu amo ia heau siri tauna—totona idia guriguri be namo. Idia ese Dirava idia noia unai tauna be lauma dalanai ia hagoadaia, unai amo demoni ia dadaraia diba. Badina Dirava ena Hereva ia gwau: “Kara maoromaoro tauna ena guriguri be mai ena siahu. Inai bamona guriguri ese taunimanima ia durua diba.” Oibe, Dirava ena hesiai taudia edia guriguri be mai ena heduru bada demoni ese idia hahisia taudia dekenai.—Iamesi 5:16.
[Picture on page 3]
Efeso dekenai abidadama taudia ese edia meamea bukadia idia gabua