Mamoe Naria Taudia be Haheitalai Namona Mamoe Oreana Dekenai
“Dirava ese umui ia henia mamoe orea do umui naridia namonamo . . . emui ura dainai . . . , emui kara namodia do umui hedinaraia, vadaeni emui kara bamona do idia karaia.”—1 PETERO 5:2, 3.
1, 2. (a) Dahaka gaukara be Iesu ese Petero dekenai ia henia, bona dahaka dainai Iesu ese Petero ia abidadama henia diba? (b) Iehova ese ena mamoe naria taudia be edena bamona ia lalodia?
PENTEKOSTE 33 C.E. do lasi neganai, Galilea Gohuna ena kone ai, Petero bona hahediba taudia siks be Iesu ese ia karaia daba ena aniani idia ania noho. Unai be Petero ese Iesu ia itaia negana ginigunana lasi, bona Petero ia moale badina Iesu ia mauri lou vadaeni. To, Petero be mai ena lalohekwarahi danu. Dina haida gunanai, Petero be taunimanima vairanai Iesu ia gorea. (Luka 22:55-60; 24:34; Ioane 18:25-27; 21:1-14) Ena be Petero ia helalo-kerehai, to unai abidadama lasi karana dainai Iesu ese ia gwau henia, a? Lasi. Iesu ese ena “mamoe” ubua bona naria gaukarana ena hahenamo be Petero dekenai ia henia. (Ioane 21:15-17) Aposetolo edia negai ia noho Keristani kongrigeisen ena sivarai ese ia hahedinaraia, Iesu ese Petero ia abidadama henia diba. Badina dagedage bona haroro gaukara be ia bada ia lao haraga negana lalonai, Petero, aposetolo taudia, bona Ierusalema ena tau badadia be Keristani kongrigeisen idia naria.—Kara 1:15-26; 2:14; 15:6-9.
2 Hari inai negai, Iehova be Iesu amo elda taudia ia abia hidi, inai nega dikana lalonai Iehova ena mamoe idia naria bona hakaua totona. (Efeso 4:11, 12; 2 Timoteo 3:1) Iehova ese unai tatau ia abidadama henia diba, a? Oibe, badina tanobada ibounai tadikaka oreana be maino ai idia noho. Momokani, elda taudia be nega haida kerere idia karaia diba, Petero bamona. (Galatia 2:11-14; Iamesi 3:2) To, Iehova ese ia abia dae unai tatau be “iena lalokau Natuna ena rarana dekena amo ia hoia” mamoe taudia idia naria diba. (Kara 20:28) Iehova be unai mamoe naria taudia ia lalokau henia bada dainai, idia ita “matauraia bada” be namo.—1 Timoteo 5:17, BHğ.
3. Edena dala ai elda taudia be mai edia ura ida edia maduna idia huaia?
3 Edena dala ai elda be mai edia ura ida edia maduna idia huaia dainai, idia be haheitalai namona mamoe oreana dekenai? Petero bona mamoe naria taudia ginigunadia ma haida bamona, idia be Dirava ena lauma helaga dekenai idia tabekau, unai amo goada idia abia edia maduna idia huaia totona. (2 Korinto 4:7) Danu, lauma helaga be elda taudia ia durua lauma huahua—lalokau, moale, maino, haheauka, bogahisihisi, kara maoromaoro, abidadama momokani kara, manau, bona boga auka—idia havaraia totona. (Galatia 5:22, 23, BHğ) Elda taudia ese Dirava ena mamoe idia naria bona unai lauma huahua idia hahedinaraia be haheitalai namona, mani unai dala haida ita kikilaia.
Mamoe Oreana Bona Mamoe Ta Ta Lalokau Henia
4, 5. (a) Edena dala ai Iehova bona Iesu be mamoe oreana idia lalokau henia? (b) Edena dala ai elda taudia be mamoe oreana idia lalokau henia?
4 Dirava ena lauma helaga ese ia havaraia kara hereadaena be lalokau. Iehova be mamoe oreana dekenai lauma aniani momo ia henia karana amo ia hahedinaraia, Ia be idia ia lalokau henia. (Isaia 65:13, 14; Mataio 24:45-47) To, Iehova be mamoe oreana ia ubua sibona lasi. Ia be mamoe ta ta ia lalokau henia danu. (1 Petero 5:6, 7) Iesu danu be mamoe oreana ia lalokau henia. Idia totona iena mauri ia atoa diho, bona ia be idia ta ta “edia ladana” ia diba.—Ioane 10:3, 14-16.
5 Elda taudia be Iehova bona Iesu idia tohotohoa. Kongrigeisen “hadibaia gaukara [idia] goadalaia noho” neganai, idia hahedinaraia idia be Dirava ena mamoe oreana idia lalokau henia. Elda taudia edia tok ese mamoe oreana idia ubua bona gimaia—unai bamona gaukara be taunimanima ibounai ese idia itaia diba. (1 Timoteo 4:13, 16) To edia gaukara haida be taunimanima idia itaia lasi, hegeregere kongrigeisen ena faila idia sekea, revareva idia abia bona haerelaia, sediual idia karaia, bona ma gau haida idia karaia kongrigeisen heboudia bona ma gaukara haida be “dala maorona” ai idia heau namonamo totona. (1 Korinto 14:40) Unai gaukara momo be kongrigeisen taudia ma haida ese idia itaia lasi eiava laloa lasi. To, elda taudia be lalokau dainai unai gaukara idia karaia.—Galatia 5:13.
6, 7. (a) Elda taudia ese mamoe idia tura henia namonamo dalana be dahaka? (b) Dahaka dainai nega haida elda taudia dekenai emu hemami oi herevalaia be namo?
6 Lalokau Keristani elda taudia be kongrigeisen mamoe ta ta idia laloa bada. (Filipi 2:4) Idia ese unai mamoe ta ta idia tura henia namonamo dalana ta be inai: Haroro gaukara ai idia gaukara hebou. Nega momo, Iesu be haroro gaukara lalonai ena hahediba taudia ia bamoa, bona unai nega ia gaukaralaia idia ia hagoadaia totona. (Luka 8:1) Lo Keristani elda tauna ta ia gwau: “Lau davaria haroro gaukara lalonai tadikaka ta eiava taihu ta lau bamoa neganai, unai be dala hereadaena idia lau diba namonamo bona hagoadaia totona.” Bema haroro gaukara dekenai elda ta oi do bamoa lasi, namona be dala oi karaia unai bamona oi karaia totona, ani?
7 Lalokau dainai Iesu be ena murinai idia raka taudia edia lalohisihisi bona moale karadia ia mamia. Hegeregere, Iesu ena hahediba taudia 70 be mai moale ida edia haroro gaukara amo idia giroa lou neganai, Iesu ia “moale bada.” (Luka 10:17-21) To, Maria bona ena ruma bese, bona turadia be Lasaro ia mase dainai idia taitai neganai, “Iesu ia tai.” (Ioane 11:33-35) Hari inai negai danu, elda taudia be mamoe edia hemami idia laloa bada. Lalokau dainai elda taudia be ‘idia moale taudia danu idia moale,’ bona ‘idia taitai taudia danu idia tai’ hebou. (Roma 12:15) Bema oi be moale eiava lalohisihisi mamina oi abia, namona be Keristani elda taudia dekenai emu hemami oi herevalaia. Badina emu moale ena sivarai idia kamonai neganai, unai ese idia do ia hagoadaia. (Roma 1:11, 12) Bema idia kamonai oi be hahetoho oi davaria, oi do idia hagoadaia.—1 Tesalonika 1:6; 3:1-3.
8, 9. (a) Edena dala ai elda ta ese ena adavana ia lalokau henia? (b) Dahaka dainai elda tauna ese ena ruma bese ia lalokau henia be gau badana?
8 Bema elda tauna be ena ruma bese ia lalokau henia, vadaeni mamoe oreana danu do ia lalokau henia. (1 Timoteo 3:1, 4) Bema ia ese adavana ia lalokau henia bona matauraia bada, headava tatau ma haida danu be ena kara do idia tohotohoa. (Efeso 5:25; 1 Petero 3:7) Keristani taihu ta ladana Linda ena hereva ita laloa. Iena adavana be lagani 20 mai kahana lalonai elda gaukara ia karaia murinai ia mase. Taihu ia gwau: “Egu adavana be kongrigeisen naria totona ia bisi momo. To iena kara dainai, lau mamia ai be ai gaukara hebou bamona. Nega momo lau durua neganai lau ia tanikiu henia, bona ia bisi lasi neganai, mai moale ida ai hebamo heheni. Unai dainai, lau mamia ia be lau ia lalokau henia, bona nega bada be kongrigeisen totona ia henia neganai, lau lalohisihisi lasi.”
9 Bema Keristani elda tauna ta be mai ena natudia, bona lalokau dalanai ia matahakani henidia bona hanaihanai edia kara namona ta dainai ia hanamodia, tama sina ma haida be iena kara do idia tohotohoa. (Efeso 6:4) Momokani, elda tauna ese ena ruma bese ia lalokau henia neganai, ia hamomokania ia be lauma helaga ese ia henia elda maduna ia huaia namonamo diba.—1 Timoteo 3:4, 5.
Herevahereva Karana amo Moale Bona Maino Havaraia
10. (a) Dahaka kara ese kongrigeisen lalonai moale bona maino ia hadikaia diba? (b) Dahaka kara ese kahirakahira kongrigeisen ginigunadia edia maino ia hadikaia, bona edena bamona idia hamaoromaoroa?
10 Lauma helaga be Keristani taudia ta ta edia kudouna dekenai, elda oreana huanai, bona kongrigeisen lalonai moale bona maino ia havaraia diba. To, herevahereva namonamo lasi karana ese moale bona maino ia hadikaia diba. King Solomona ia gwau: “Hereva hebou namonamo karana be lasi neganai palani idia guguru lasi.” (Aonega Herevadia 15:22, NW ) To, mai hemataurai bona momokani ida herevahereva karana ese moale bona maino ia havaraia. Hegeregere, kopina utua karana ena hepapahuahu ese kongrigeisen taudia ginigunadia edia maino ia hadikaia gwauraia neganai, Ierusalema ai hakaua oreana be lauma helaga ena hakaua dalana idia tahua. Danu, elda taudia ta ta ese edia lalohadai idia gwauraia. Idia herevahereva hebou murinai, abia hidi ta idia karaia. Unai abia hidi be kongrigeisen ibounai dekenai idia hadibaia neganai, ibounai be unai “goada henia hereva namona dekenai idia moale bada.” (Kara 15:6-23, 25, 31; 16:4, 5) Moale bona maino idia havaraia unai.
11. Edena dala ai elda taudia be kongrigeisen ena moale bona maino idia havaraia diba?
11 Hari inai negai danu, elda edia herevahereva namonamo karana ese kongrigeisen ai moale bona maino ia havaraia. Hekwakwanai haida ese kongrigeisen ena maino idia hadikaia gwauraia neganai, elda taudia idia hebou bona edia lalohadai idia herevalaia. Elda taudia be elda ta ta edia lalohadai idia hakala henia. (Aonega Herevadia 13:10; 18:13) Elda taudia be lauma helaga totona idia guriguri murinai, Baibel ena hakaua herevadia bona “hesiai tauna mai ena kamonai, bona mai ena kara maoromaoro” edia sisiba hegeregerena abia hidi idia karaia. (Mataio 24:45-47; 1 Korinto 4:6) Bema elda oreana be abia hidi ta idia karaia, vadaeni elda ta ta be unai idia abia dae danu—herevana edia lalohadai be ma elda haida ese idia abia dae lasi—unai amo idia hahedinaraia idia be lauma helaga ena hakaua dalana idia badinaia. Unai lalotamona karana ese moale bona maino ia havaraia, bona kongrigeisen ia durua Dirava ida idia raka totona. (Mika 6:8) Kongrigeisen elda oreana be Baibel ena hakaua dalana hegeregerena abia hidi idia karaia neganai, oi be mai manau ida unai abia hidi oi durua, a?
Haheauka Bona Hebogahisi Hahedinaraia
12. Dahaka dainai Iesu be mai haheauka bona hebogahisi ida aposetolo taudia ia kara henia?
12 Herevana aposetolo taudia be idia kerere loulou, to Iesu be mai haheauka bona hebogahisi ida idia ia kara henia. Hegeregere, nega momo Iesu ese ena aposetolo taudia ia hadibaia idia manau be namo. (Mataio 18:1-4; 20:25-27) Hanuaboi ginigabena ai, Iesu be aposetolo taudia edia aena ia huria bena manau karana ia hadibaia, to unai murinai, idia “sibona idia hepapahuahu, idia be daika do ia herea.” (Luka 22:24; Ioane 13:1-5) Iesu ese aposetolo taudia ia gwau henia, a? Lasi, mai hebogahisi ida idia ia hereva henia: “Badana be daika, aniani gabuna dekenai do ia helai diho tauna, o hesiai tauna? Aniani gabuna dekenai ia helai diho tauna, ani? To lau be umui emui huanai lau noho, emui hesiai tauna bamona.” (Luka 22:27) Iesu ena haheauka bona hebogahisi karana—ena haheitalai namona danu—ese aposetolo taudia ia hagoadaia bada.
13, 14. Edena negai elda taudia ese hebogahisi karana idia hahedinaraia be namo?
13 Unai hegeregerena, tadikaka ta be kerere ta dainai elda tauna be sisiba do ia henia loulou. Bona reana elda tauna be unai tadikaka dekenai do ia badu. To, elda tauna be ‘kerere tauna ia sisiba henia’ neganai, namona be ia laloatao ia danu be nega haida kerere ia karaia. Unai ese elda tauna ia durua ena tadikaka ena kara ia haheaukalaia bona hebogahisi henia totona. Unai dala amo ia be Iesu bona Iehova ia tohotohoa, badina idia ruaosi be Keristani taudia ibounai—elda taudia danu—be unai bamona idia kara henidia.—1 Tesalonika 5:14; Iamesi 2:13.
14 Nega haida, elda taudia ese tadikaka ta ena kara dika badana dainai, sisiba auka idia henia. Bema unai tadikaka ia helalo-kerehai lasi, vadaeni elda taudia ese unai tau be kongrigeisen amo idia atoa siri. (1 Korinto 5:11-13) To, namona be elda taudia edia kara ese ia hahedinaraia, idia be unai tadikaka idia inai henia lasi, to tadikaka ia karaia kara dikana idia inai henia. (Iuda 23) Elda taudia edia hebogahisi karana dainai, reana lauma dalanai ia manoka mamoe be kongrigeisen dekenai do ia giroa lou.—Luka 15:11-24.
Abidadama ese Kara Namodia Ia Havaraia
15. Edena dala ta amo elda taudia be Iehova ena kara namo idia tohotohoa, bona dahaka ese idia ia hagoadaia?
15 Herevana “Lohiabada ena kara be namo, taunimanima ibounai dekenai,” to haida be Iehova ena harihari gaudia dainai idia tanikiu lasi. (Salamo 145:9; Mataio 5:45) Iehova ena kara namona ta be, iena taunimanima ia siaia “Basileia ena Sivarai Namona” idia harorolaia totona. (Mataio 24:14) Elda taudia be unai gaukara idia gunalaia neganai, Dirava ena kara namo idia hahedinaraia unai. Dahaka ese elda taudia ia hagoadaia? Iehova bona ena gwauhamata idia abidadama henia momokani karana ese idia ia hagoadaia.—Roma 10:10, 13, 14.
16. Edena dala ai elda taudia be kongrigeisen taudia dekenai ‘kara namodia idia karaia’ diba?
16 Namona be elda taudia be haroro gaukara amo ‘taunimanima ibounai dekenai kara namodia idia karaia sibona lasi,’ to danu, Keriso idia abidadama henia taudia idia kara namo henia be namo. (Galatia 6:10) Unai idia karaia dalana ta be, mamoe vadivadi henia gaukarana amo. Elda ta ia gwau: “Mamoe vadivadi henia gaukarana lau moalelaia. Unai be nega namona tadikaka bona taihu edia gaukara namona dainai lau hanamodia totona, bona idia laloparara edia hekwarahi be ai laloa bada.” Nega haida, elda taudia be heduru daladia idia gwauraia, tadikaka ese Iehova hesiai henia karana ia hanamoa diba. Unai bamona idia karaia elda taudia be aposetolo Paulo ena kara idia tohotohoa. Paulo ese Tesalonika tadikaka ia hagoadaia dalana mani oi laloa: “Ai be Lohiabada ai abidadama henia dainai, ai ese umui danu ai abidadama henia. Ai diba momokani, umui dekenai ai hadibaia hereva be umui karaia noho, bona do umui karaia noho.” (2 Tesalonika 3:4) Unai bamona hereva namodia ese kongrigeisen ia durua kara namodia idia karaia totona, bona dala ia kehoa idia ese ‘hakaua taudia do idia kamonai henia, bona edia hereva do idia badinaia.’ (Heberu 13:17) Elda taudia ese mamoe vadivadi henia gaukarana amo oi ia hagoadaia neganai, idia oi tanikiu henia be namo, ani?
Boga Auka Karana ese Manau Ia Havaraia
17. Petero be Iesu ena kara amo dahaka ia dibaia?
17 Ena be haida ese Iesu idia habadua, to Iesu ia manau. (Mataio 11:29) Iesu idia samania bona dogoatao neganai, manau bona boga auka karana ia hahedinaraia. To Petero ia laloa namonamo lasi, bena kaia ia abia bona dagedage karana ia karaia. Unai dainai, Iesu ese Petero ia hamaoroa: “Oi laloa lau be siahu lasi a, lauegu Tamana bema lau noia, be ia ese aneru orea 12, bona ma haida danu do ia siaia, lau dekenai durua henia totona?” (Mataio 26:51-53; Ioane 18:10) Petero be Iesu ena kara amo gau ta ia dibaia, bona gabeai Keristani taudia dekenai ia hadibaia: “Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka . . . Idia hereva dika henia, to ia hereva dika henia lou lasi. Hisihisi ia abia neganai, ia dagedage lasi.”—1 Petero 2:21-23
18, 19. (a) Edena nega ai elda taudia ese manau bona boga auka idia hahedinaraia be namo? (b) Dahaka henanadai be stadi gabena ai do ita herevalaia?
18 Unai hegeregerena, ena be haida be elda taudia idia habadua to elda taudia idia manau be namo. Hegeregere, kongrigeisen lalonai elda taudia ese idia durua toho taudia haida be idia badu. Bema kongrigeisen tadikaka ta be lauma dalanai ia gorere o bero ia abia dainai elda ta ese ia durua toho, reana unai tadikaka be elda ena sisiba dainai ia badu bona ia gwauraia herevadia “be tuari kaia ia gwadaia noho bamona.” (Aonega Herevadia 12:18) To Iesu bamona, elda taudia be idia hereva auka lasi eiava kara auka lasi. To, idia boga auka bona durua karadia idia hahedinaraia noho, reana edia kara dainai manoka tadikaka ta be do ia goada lou. (1 Petero 3:8, 9) Elda taudia edia haheitalai oi tohotohoa, bona oi idia sisiba henia neganai oi manau bona boga auka be namo.
19 Momokani, tanobada hegegemadai, elda taudia tausen momo be mai edia ura bada ida kongrigeisen idia naria dainai, Iehova bona Iesu be elda taudia edia gaukara namona idia laloa bada. Iehova bona ena Natuna be kongrigeisen hesiai taudia tausen momo idia laloa bada danu, badina idia be elda taudia ida ‘Dirava ena taudia idia durua’ hebou. (Heberu 6:10) To, dahaka dainai tadikaka haida be unai “dagi namona” idia tahua lasi? (1 Timoteo 3:1) Bona edena dala ai Iehova be elda taudia ia hadibaia? Unai henanadai be stadi gabena dekenai do ita herevalaia.
Oi Laloatao, A?
• Elda taudia ese mamoe oreana idia lalokau henia daladia haida be dahaka?
• Edena dala ai kongrigeisen taudia ibounai ese moale bona maino idia havaraia diba?
• Dahaka dainai elda taudia ese sisiba idia henia neganai, haheauka bona manau idia hahedinaraia be namo?
• Edena dala ai elda taudia ese kara namo bona abidadama idia hahedinaraia?
[Picture on page 18]
Lalokau dainai elda taudia be kongrigeisen idia hesiai henia
[Pictures on page 18]
Danu, elda taudia be nega idia atoa edia famili ida moale karadia idia karaia hebou . . .
. . . bona idia haroro hebou
[Picture on page 20]
Elda taudia edia herevahereva karana ese kongrigeisen ena moale bona maino idia havaraia