Keristani Mamoe Naria Taudia, ‘Emui Kudouna Umui Kehoa’!

“LOHIABADA ese lau ia naria noho, mamoe naria tauna ese, iena mamoe ia naria bamona. Unai dainai gau ta do lau dabu lasi.” Unai hereva amo Davida ese ena abidadama Dirava dekenai ia hahedinaraia. Iehova ese Davida ia hakaua lauma dalanai “rei namona gabuna dekenai” bona “ranu namona gabuna dekenai,” “kara maoromaoro daladia dekenai” ia hakaua. Dagedage taudia ese ia idia koua hegege neganai, Davida ese heduru bona goada ia abia, unai ese ia doria Iehova dekenai ia gwau: “Dika ta dekenai do lau gari lasi, badina be, Lohiabada e, oi be lau danu oi noho.” Unai bamona Atai Momokani Mamoe Naria tauna ia noho dainai, Davida ia ura ‘Lohiabada ena Ruma dekenai do ia noho, ela bona hanaihanai.’​​—⁠Salamo 23:​1-6.

Dirava ena Natuna tamona sibona ese danu Iehova ena henari karana mai lalokauna ia mamia, bona nega sisina tanobada dekenai ia noho lalonai ena hahediba taudia ia kara henia neganai unai henari karana ia hahedinaraia namo herea. Buka Helaga ese ia gwauraia “mamoe naria tauna namona,” “Mamoe Naria Tauna Badana,” bona ‘mamoe gunalaia tauna badana.’​​—⁠Ioane 10:11; Heberu 13:20; 1 Petero 5:​2-4.

Iehova bona Iesu Keriso ese idia ruaosi idia lalokau henia taudia idia naridia noho. Edia mamoe naria dalana namona be kongregesen lalonai mai lalokau ida mamoe naria taudia idia henia. Paulo ese unai mamoe naria taudia ia herevalaia neganai ia gwau: “Umui sibona do umui naria namonamo, bona mamoe orea ibounai danu. Inai orea naria taudia Lauma Helaga ese umui ia halaoa vadaeni. Dirava ena ekalesia, iena lalokau Natuna ena rarana dekena amo ia hoia orea taudia, do umui ubua.”​​—⁠Kara 20:​28.

Iehova bona Keriso Iesu ese idia hahedinaraia dalanai mamoe oreana naria gaukarana be mai ena hekwarahi, to guna bamona lasi ia be hari mai anina bada gaukarana. Mani oi laloa ia lao vadaeni lagani toi lalonai Witnes taudia milioni ta mai kahana be idia bapatiso! Unai matamata taudia be lagani momo lalonai edia mauri lalonai lauma gaukara idia karaia lasi. Ma oi laloa, Witnes taudia haida be do natudia o matamata taudia sibona. Edia tama sina sibona amo lasi to kongregesen ena mamoe naria taudia amo danu heduru idia abia be namo.

Momokani, Keristani taudia ibounai ese metau idauidau idia davaria, bamodia edia lalo-ani karana danu. Namona be ibounai idia hekwarahi tanobada ese ia veria noho sibona ena ura laloa bada karana gavaia dalana idia dadaraia totona. Tano haida dekenai, Basileia pablisa taudia reana idia lalo-manoka badina momo be edia haroro hereva idia abia dae lasi dainai. Pablisa taudia momo be idia gorere bada herea. Moni hekwakwanai ese haida ia koua Basileia idia tahua lasi guna totona. Momokani, ita ibounai​​—⁠nega daudau hereva momokani lalonai idia noho taudia danu​​—⁠mamoe naria taudia mai edia lalokau edia heduru ita ura bona ita abia be namo.

Lalohadai Maorona

Keristani taudia ginigunadia idia hagoadaia: ‘Emui kudouna umui kehoa’! (2 Korinto 6:​11-​13) Keristani elda taudia ese edia mamoe naria gaukarana idia karaia lalonai unai sisiba idia badinaia be namo. Edena bamona unai idia karaia diba? Bona hesiai taudia be edena bamona, idia momo be gabeai mamoe naria taudia ai do idia lao?

Bema Keristani elda taudia be mamoe oreana dekenai hahenamo ta ai idia lao, namo lasi gaukara dainai sibona ese idia ia doria. Ia sisiba henidia: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. Ta ese umui ia oda dainai do umui karaia lasi, to sibona emui ura dainai. Kohu do umui davaria totona do umui karaia lasi.” (1 Petero 5:⁠2) Mamoe naria gaukarana ena anina be mai ena ura bada ida ia karaia bona ia ura dikadika haida hesiai henia totona. (Ioane 21:​15-​17) Ena anina be mamoe edia dabu gaudia itaia bona heduru henia haraga. Ena anina be haida idia kara henia neganai Keristani edia kara namodia, Dirava ena lauma ena huahua, idia hahedinaraia.​​—⁠Galatia 5:​22, 23.

Mamoe naria gaukarana dekenai tadikaka idia vadivadi henidia edia ruma dekenai danu.a To ‘edia kudouna idia kehoa’ mamoe naria taudia be mai edia ura ida idia hekwarahi. Ita gwau diba, nega ta ta mamoe naria gaukarana ai tadikaka idia vadivadi sibona lasi to ma gau haida danu. Idia be hanaihanai dala idia tahua mamoe oreana taudia haida idia naria totona.

Haida Hadibaia Mamoe Naria Taudia ai Idia Lao Totona

Tadikaka ta, herevana ena lagani be hida, be “ekalesia ena gunalaia tauna ena dagi do ia tahua, ia be dagi namona ia ura henia.” (1 Timoteo 3:⁠1) Hesiai taudia momo be gaukara ma haida karaia urana idia hahedinaraia. Unai dainai, elda taudia be mai moale ida idia ura unai tadikaka idia durudia mai anina bada karana “ekalesia ena gunalaia tauna ena dagi . . . tahua” karana idia karaia totona. Ena anina be idia hadibadia namonamo mamoe naria taudia namodia ai idia lao totona.

Dirava ena taravatu namodia idia badinaia namonamo dainai, Esekiela 34:​2-6 ese ia gwauraia mamoe naria taudia koikoidia ese Iehova ena Keristani kongregesen idia hamanokaia lasi. Unai be dika momokani Iehova ena matanai bona unai be maoro. Mamoe oreana idia ubudia lasi, to sibodia idia ubua. Gorere taudia idia hagoadaia lasi, edia gorere idia hanamoa lasi, edia bero idia kumia lasi, eiava lao oho o boio taudia idia hakaua lou lasi. Edia kara be mamoe naria taudia bamona lasi to uda sisia bamona, mamoe idia dagedage henia. Idia naria lasi mamoe be idia lao idau gabu idau gabu ai, idia loa kava bona ta ese ia naridia lasi.​​—⁠Ieremia 23:​1, 2; Nahumu 3:18; Mataio 9:⁠36.

Keristani mamoe naria taudia be Iehova ena haheitalai namona idia badinaia, idia be unai abidadama lasi mamoe naria taudia bamona lasi. Mamoe be lauma dalana ai idia durua “rei namona gabuna” dekenai idia hakaua lao, bona “ranu namona gabuna dekenai danu.” Idia hekwarahi “kara maoromaoro daladia dekenai” idia hakaua totona, idia durudia Iehova ena Hereva idia lalo-pararalaia bona edia mauri lalonai idia badinaia totona. Unai idia karaia namonamo diba badina idia be ‘hadibaia gaukara namona idia karaia diba.’​​—⁠1 Timoteo 3:⁠2.

Elda taudia momo edia hadibaia dalana be kongregesen heboudia lalonai platfom amo idia karaia. To, elda taudia be ta ta idia hadibaia danu. Momokani, haida be ta ta sibona hadibaia karana idia diba momo, to ma haida be hereva henia karana idia diba momo. To hadibaia karana ta dekenai ia diba momo lasi dainai ita gwau lasi ia hegeregere lasi ma haida ia hadibaia totona. Elda taudia edia hadibaia gaukarana be dala idauidau ai idia karaia, mamoe naria gaukarana danu. Nega haida mamoe naria gaukarana be idia hegaegaelaia guna negadia ai idia karaia, hegeregere, haida idia hamaorodia guna do idia vadivadi henidia. To mamoe naria gaukara momo be idia gwauraia guna lasi negadia ai dala idauidau ai idia karaia diba, unai danu ese namo bada ia havaraia diba.

Nega Ibounai Idia be Mamoe Naria Taudia Bona Hadibaia Taudia

Doketa be diba bona ekspiriens ia abia be namo ena gaukara ia karaia totona. To bema doketa ese ia naridia gorere taudia ia hebogahisi henia, edia mamina ia laloa, edia hekwakwanai hanaia dalana ia laloa bada, bona ia laloa bada neganai gorere taudia do idia moale. Unai kara be iena kara korikori be namo. Unai bamona karadia be tisa namona bona mamoe naria tauna ena kara korikorina be namo, dina ta ta iena mauri dalana ai ia karaia karadia. Tisa korikorina be do ia hegaegae hanaihanai ia badinai idia noho taudia ia hadibaia totona. Aonega Herevadia 15:23 ia gwau, “nega korikori dekenai, hereva namona ta ia gwauraia, be namo bada!” “Nega korikori” anina be reana bema platfom ai hereva ia henia neganai, ruma ta ruma ta ai ia haroro neganai, o Kingdom Hall lalonai o telefon ai ta danu ia herevahereva neganai. Unai hegeregerena, mamoe naria tauna namona ia hekwarahi, nega ibounai kara namodia bona ma haida lalodia bada karana ia hahedinaraia totona, mamoe naria gaukarana ai haida ia vadivadi henia negadia ai sibona lasi. Iena ‘kudouna ia kehoa’ dainai, do ia hekwarahi dala ia kehoa negadia ibounai mamoe ia naria totona, nega korikorina ai idia ura abia heduruna do ia henia. Unai gauna dainai mamoe taudia ese do idia lalokau henia.​​—⁠Mareko 10:⁠43.

Wolfgang, hari ia be elda tauna, ia laloatao hesiai tauna ta bona ena hahine ese iena ruma bese idia vadivadi henia. Ia gwau: “Emai natudia idia moale idia ese edia hereva idia kamonai bona nega namona ai abia dainai. Unai idia do herevalaia noho.” Momokani, unai hesiai tauna ia hahedinaraia idia ia laloa bada; ia ese ena ‘kudouna ia kehoa.’

Ta ese ena ‘kudouna ia kehoa’ dalana namo hereana ta be gorere taudia ia vadivadi henia, nouti kwadogina amo idia dekenai hagoadaia hereva maragina oi siaia, o telefon amo oi rini henia​​—⁠gau ta amo oi hahedinaraia idia oi laloa! Heduru idia ura neganai oi henia. Bema idia ura hereva neganai, oi kamonai namonamo. Tiokratik gaukara namona kongregesen ai bona ma gabu haida dekenai oi herevalaia. Oi durudia Iehova idia lalokau henia taudia dekenai ia henia helaro namona idia laloa bada totona.​​—⁠2 Korinto 4:​16-​18.

Mamoe Naria Gaukara Ma Haida

Mamoe naria gaukara ena badina oi laloa neganai, momokani, tadikaka oi vadivadi henia edia ruma dekenai be mai anina bada, to ia be unai gaukara ena kahana sibona. Lalokau mamoe naria tauna ese ena ‘kudouna ia kehoa’ noho dala iboudiai bona nega ibounai ia dekenai idia lao diba totona. Tadikaka ida turana karana namona ia karaia ese ia hagoadadia hekwakwanai negadiai, gau dikana ta dekenai idia gari lasi, idia diba edia lalokau tadikaka, Keristani mamoe naria taudia, ese idia ia laloa.​​—⁠Salamo 23:⁠4.

Oibe, umui Keristani mamoe naria taudia ibounai, emui ‘kudouna umui kehoa.’ Lalo-momokani lalokauna umui hahedinaraia emui tadikaka dekenai​​—⁠idia umui hagoadaia, laga-ani umui henidia, lauma dalanai umui hagoadaia dala iboudiai ai. Oi durudia abidadama dekenai idia gini goada totona. (Kolose 1:⁠23) Edia ‘kudouna idia kehoa’ Keristani mamoe naria taudia idia noho be hahenamo dainai, mamoe be gau ta dekenai do idia dabu lasi. Davida bamona, edia ura be Iehova ena ruma dekenai do idia noho ela bona hanaihanai. (Salamo 23:​1, 6) Mamoe naria tauna mai lalokauna be ma dahaka do ia ura?

[Footnote]

[Box on page 30]

Keristani Mamoe Naria Taudia

• Idia gaukara mai edia ura bada bona ura ibounai ida

• Mamoe oreana idia ubua bona naridia

• Haida idia durua mamoe naria gaukara ena dagi idia tahua totona

• Gorere taudia idia vadivadi henia bona idia laloa bada

• Nega ibounai idia hegaegae edia tadikaka idia durudia totona

[Pictures on page 31]

Herevana haroro gaukara dekenai, hebou ai, o hebamo heheni negadiai, elda taudia be hanaihanai mamoe idia naria taudia