Iehova ese ‘Hamatamaia Negana ai Dokona’ Ia Gwauraia
“Hamatamaia neganai lau ese dokona lau gwauraia. Gunaguna momokani lau ese, dahaka do ia vara lau gwauraia guna.”—ISAIA 46:10.
1, 2. Babulonia ena moru negana ai idia vara gaudia amo dahaka be hoa gauna, bona unai ese Iehova dekenai dahaka ia hahedinaraia?
HANUABOI ai tuari taudia be regerege lasi ida metairametaira Euperate ena sinavai lalonai idia raka daekau lao. Unai hanua ena vareai gabuna kahirakahira idia lao neganai, hoa gauna ta idia itaia. Babulonia hanua ena iduara be idia koua lasi! Vadaeni, sinavai amo idia daekau bona hanua lalonai idia vareai. Unai hanua idia abia haraga. Tuari biaguna, Sairasi ese unai tano ia abia, bona gabeai gwaumaoro ia henia Israela taudia idia ruhaia totona. Igui hesiai taudia tausen momo be Ierusalema dekenai idia giroa lou, Iehova ena tomadiho idia haginia lou totona.—2 Sivarai 36:22, 23; Esera 1:1-4.
2 Unai be lagani 539-537 B.C.E. ai ia vara, bona histori torea taudia ese idia hamomokania. Hoa gauna be, unai gauna ia do vara lasi neganai, lagani 200 bamona gunanai, peroveta herevana ta ese unai gaudia ia gwauraia. Iehova ese ena peroveta tauna Isaia ia hasiahua Babulonia ena moru ia perovetalaia totona. (Isaia 44:24–45:7) Dirava ese Babulonia do ia moru neganai do idia vara gaudia ia gwauraia hedinarai sibona lasi, to unai hanua do ia hadikaia tauna ena ladana ia gwauraia danu.a Iehova ese Israela taudia, unai negai idia be Iena Witnes taudia, ia hamaorodia: “Gunaguna idia vara gaudia do umui laloatao, bona do umui gwauraia, lau sibona be Dirava, bona do umui gwauraia hedinarai, dirava idauna ta, lau hegeregerena ta ia noho lasi. Hamatamaia neganai lau ese dokona lau gwauraia. Gunaguna momokani lau ese, dahaka do ia vara lau gwauraia guna.” (Isaia 46:9, 10a) Iehova be vaira negana ai dahaka do ia vara ia diba.
3. Dahaka henanadai edia haere do ita tahua?
3 Dirava be vaira neganai idia vara gaudia ibounai ia diba, a? Iehova be ita ta ta ese do ita karaia gaudia ia diba, a? Dirava ese iseda vaira negana ia abia hidi vadaeni, a? Inai stadi bona stadi gabena ai ita ese inai henanadai bona henanadai ma haida edia haere be Baibel ai do ita tahua.
Iehova—Vaira Negana Ia Gwauraia Diravana
4. Baibel lalonai idia torea peroveta herevadia be daika amo idia mai?
4 Iehova be vaira negana ai idia vara gaudia ia diba dainai, iena lauma amo ena hesiai taudia ia hasiahua, Baibel lalonai peroveta herevadia idia torea totona. Unai dainai, vaira negana ai Iehova ese do ia karaia gaudia ita diba. Iehova ia gwau: “Lau ese do idia vara gaudia be umui dekenai lau hadibaia guna, bona inai gaudia be idia vara vadaeni. Harihari be gau matamata, gabeai do idia vara gaudia, be umui dekenai do lau hamaoroa, idia do vara lasi neganai.” (Isaia 42:9) Dirava ena taunimanima dekenai unai be hahenamo badana!
5. Iehova ese do ia karaia gaudia ita diba dainai, iseda maduna be dahaka?
5 Peroveta tauna Amosa ia gwau: “Kara ibounai Lohiabada Dirava ia ura karaia gwauraia neganai, ia ese iena hesiai taudia, peroveta taudia ia hamaorodia guna.” Unai diba ita abia guna dainai, ita be mai eda maduna. Amosa ese ia gaukaralaia haheitalai mani oi laloa: “Bema laiona ia boiboi goada neganai, daika ese gari ena mamina ia abia lasi?” Taunimanima bona animal be leona ena boiboi idia kamonai neganai, kara ta idia karaia haraga be gau badana, unai hegeregerena peroveta taudia, hegeregere Amosa, be Iehova ena hereva idia harorolaia. “Bema Lohiabada Dirava ese ia hereva neganai, daika ese iena peroveta hereva ia gwauraia diba lasi?”—Amosa 3:7, 8.
Iehova Ena “Hereva” ese “Anina Do Ia Havaraia”
6. Edena dala ai Babulonia ia moru neganai, Iehova ena “palani” ia guguru?
6 Iehova be peroveta tauna Isaia amo ia gwau: “Lauegu ura, lauegu palani, be do ia gini noho, do ia moru lasi. Lau ura karaia gaudia ibounai be do lau karaia.” (Isaia 46:10b) Dirava ese Parasa tauna Sairasi ia gaukaralaia Babulonia hanua do ia hadikaia totona, unai amo ena palani eiava iena ura Babulonia dekenai ia hagugurua. Iehova ese unai palani be idaunegai ia gwauraia guna. Ataiai ita gwauraia vadaeni, unai be lagani 539 B.C.E. ai ia vara.
7. Dahaka dainai ita abia dae momokani, Iehova ena “hereva” be hanaihanai do idia guguru?
7 Lagani 400 gunanai, Sairasi ese Babulonia ia do abia lasi neganai, Amono bona Moaba taudia idia ura Iuda ena King Iehosapata idia tuari henia. Iehosapata be mai abidadama ida ia guriguri: “Lohiabada e, aiemai sene taudia edia Dirava, oi be guba ena Dirava, bona oi ese bese idauidau edia basileia ibounai oi biagua noho. Oiemu siahu bona goada be bada herea dainai, tau ta ese oi ia koua diba lasi.” (2 Sivarai 20:6) Isaia ese unai bamona abidadama ia hahedinaraia danu, ia gwau: “Siahu Ibounai Lohiabada ese, inai bamona ia laloa dainai, daika ese iena ura do ia koua diba? Iena imana ia abia isi vadaeni, be daika ese ia atoa lou diba?” (Isaia 14:27) Babulonia ena King Nebukanesa be ena kavakava ia ore murinai, mai manau ida ia gwau: “Tau ta ese Dirava ena kara ia koua diba lasi, o inai bamona ia hereva henia diba lasi, ‘Oi be dahaka oi karaia?’ ” (Daniela 4:35) Oibe, Iehova ese ena taunimanima ia hagoadaia, ia gwau: “Lau ese lau gwauraia hereva, be anina do ia havaraia, bona lau dekenai do ia giroa kava lasi. Lau siaia totona gaukarana be do ia karaia momokani.” (Isaia 55:11) Ita diba momokani, Iehova ena “hereva” bona iena ura be do ia guguru momokani.
Dirava “Ena Noho Hanaihanai Urana”
8. Dirava ena “noho hanaihanai urana” be dahaka?
8 Aposetolo Paulo be Efeso Keristani taudia ia tore henia neganai, ia gwau Dirava be mai ena “noho hanaihanai urana.” (Efeso 3:11, NW ) Unai ura be Iehova ese taunimanima bona tanobada totona ia karaia ura ginigunana. (Genese 1:28) Iehova ena ura be do ia guguru momokani ita diba totona, Baibel ese ia gwauraia peroveta hereva ginigunana mani ita laloa.
9. Edena dala ai Genese 3:15 (NW ) ese Dirava ena ura ia gwauraia?
9 Adamu bona Heva idia kara dika murinai, Genese 3:15 (NW ) ai ia noho gwauhamata ese ia hahedinaraia, Iehova be laulau dalanai ia gwauraia hahine ese garana eiava natuna mero ta do ia havaraia. Iehova ia diba ena hahine bona Satani huanai, bona edia garana huanai badu do ia noho. Ena be Satani ese hahine ena garana ena aena do ia haberoa karana be Iehova ese ia koua lasi, to Dirava ena nega korikori ai unai garana ese gaigai, eiava Satani Diabolo ena kwarana do ia haberoa. Iehova ena ura be Israela besena amo ia hahedinaraia ela bona gwauhamata Mesiana, Iesu ia vara.—Luka 3:15, 23-38; Galatia 4:4.
Iehova ese Do Idia Vara Gaudia Ia Abia Hidi Guna
10. Adamu bona Heva edia kara dika be Iehova ese ia gwauraia hidi vadaeni, a?
10 Aposetolo Petero be Iesu ena maduna Dirava ena ura lalonai ia herevalaia neganai, ia gwau: “Dirava ese tanobada ia do karaia lasi neganai, ia ese Keriso ia abia hidi, inai hamauria gaukara totona. Bona inai nega dokona lalonai, ia be umui durua totona, Dirava ese Keriso ia hedinaraia.” (1 Petero 1:20) Matamanai, Iehova ese ia gwauraia hidi vadaeni, Adamu bona Heva do idia kara dika bona Iesu Keriso ena mauri davalaia boubouna do ita abia, a? Lasi. Inai hereva “tanobada” be Adamu bona Heva edia natudia ia herevalaia. Adamu bona Heva be natudia idia havaraia guna, bena gabeai idia gwau-edeede, a? Lasi. Adamu bona Heva idia gwau-edeede guna, bena gabeai natudia idia havaraia. (Genese 4:1) Unai gwau-edeede karana murinai, bona Adamu bona Heva be natudia idia do havaraia lasi neganai, Iehova ia gwau “garana” ta do ia vara. Iesu ena mase bona toreisi lou karana ese mauri davana henia dalana namona ia kehoa, bona unai amo Adamu amo ita abia kara dika bona Satani ese ia havaraia dika ibounai do ia hadokoa.—Mataio 20:28; Heberu 2:14; 1 Ioane 3:8.
11. Iehova be ena ura ia hagugurua totona, dahaka gau ma ta ia gwauraia guna?
11 Dirava ese ena ura ia hagugurua totona gau ma ta ia gwauraia guna. Paulo ese Efeso taudia ia tore henia neganai, unai ia hahedinaraia, ia gwau: “Dirava ia karaia gaudia ibounai, guba dekenai bona tanobada dekenai be Keriso ese do ia biagua.” ‘Guba gaudia’ ia gwauraia neganai, ia be Iesu ida do idia lohia taudia ia herevalaia. Paulo ia gwau: “Gau ibounai be Dirava ese ia karaia, iena palani hegeregerena. Bona ia ese ai Iuda taudia ia abia hidi, iena bese korikori do ai lao, bona Keriso danu do ai hakapua. Inai be Dirava ena palani, tanobada ia karaia hamatamaia neganai ia laloa gauna.” (Efeso 1:10, 11) Oibe, Iehova ese ia gwauraia guna vadaeni, taunimanima haida be hahine ena garana ena kahana ta ai do idia lao, bona Iesu Keriso ida mauri davalaia boubouna ena hahenamo be taunimanima dekenai do idia henia. (Roma 8:28-30) Aposetolo Petero ia gwau idia be “bese helagana.” (1 Petero 2:9) Aposetolo Ioane ena hahenamo badana be matahanai amo Keriso ida do idia lohia 144,000 taudia ia itaia. (Apokalupo 7:4-8; 14:1, 3) Keriso ida king gaukara idia karaia dainai, ‘Dirava ena hairai do idia hanamoa bada.’—Efeso 1:12-14.
12. Edena bamona ita diba 144,000 taudia ta ta be guna ia gwauraia hidi lasi?
12 Iehova be ia gwauraia guna vadaeni 144,000 taudia be Iesu ida do idia lohia, to unai nega ai idia ta ta ia abia hidi lasi, mai abidadama ida Dirava do idia hesiai henia totona. Keristani Greek Revarevadia idia torea ena badina be horoa taudia idia durua bona hagoadaia, Dirava idia badinaia bona edia guba helarona idia laloa bada totona. (Filipi 2:12; 2 Tesalonika 1:5, 11; 2 Petero 1:10, 11) Iehova ia diba 144,000 taudia be do idia hegeregere Keriso ida guba ai idia lohia totona. Bona Iehova ese ia boiridia unai gaukara idia karaia totona, to idia ta ta be edia mauri lalonai dahaka do idia karaia be sibona ese idia abia hidi. Unai ese do ia hahedinaraia idia be unai orea lalonai eiava lasi.—Mataio 24:13.
Iehova Ia Diba Gauna
13, 14. Iehova ese vaira neganai do idia vara gaudia ia diba karana be edena bamona ia gaukaralaia, bona dahaka dainai?
13 Iehova be peroveta bona palani ia karaia Diravana dainai, vaira negana ai do idia vara gaudia ia diba karana be edena dala ai ia gaukaralaia? Ita diba momokani Dirava ena kara ibounai lalonai, ia be mai momokani, maoromaoro bona lalokau ida ia kara. Aposetolo Paulo be Heberu Keristani taudia ia tore henia neganai, ia gwau Dirava ena hereva helagana bona iena gwauhamata idia noho dainai, “ita diba Dirava ia koikoi diba lasi.” (Heberu 6:17, 18) Paulo ese Tito ia tore henia neganai, unai lalohadai ia hahedinaraia, ia gwau Dirava be ia “koikoi diba lasi.”—Tito 1:2.
14 Danu, ena be Iehova ena siahu be bada, to unai siahu be dala kererena ai ia gaukaralaia lasi. Mose ese Iehova ia gwauraia ‘abidadama ena Dirava, ia kara dika lasi. Ia be momokani bona maoromaoro.’ (Deuteronomi 32:4) Iehova ena kara idauidau lalonai unai kara namodia ia hahedinaraia, hegeregere iena kara badadia, lalokau, aonega, hahemaoro goeva, bona siahu.
15, 16. Eden umana lalonai Iehova ese Adamu dekenai dahaka abia hidi ia henia?
15 Eden umana ai Iehova ese ena kara badadia ia hahedinaraia dalana mani ita laloa. Iehova be lalokau Tamana dainai, taunimanima dekenai gau ibounai ia henia. Iehova ese Adamu dekenai gau ta laloa namonamo bona abia hidi karaia diba dalana ia henia. Adamu be animal bamona lasi, ia be abia hidi ia karaia diba. Unai dainai, Dirava be ena guba terona amo ia karaia gaudia ibounai ia itaia, “bona momokani idia be namo herea.”—Genese 1:26-31; 2 Petero 2:12.
16 Iehova ese Adamu ia hamaoroa “kara namo bona kara dika hadibaia au ena huahua” do ia ania lasi neganai, Ia ese hakaua hereva ia henia, unai amo Adamu be abia hidi ia karaia diba. Adamu ia hamaoroa “uma gabu dekenai gini au ibounai edia huahua” ia ania diba, to ia hadibaia bema “kara namo bona kara dika hadibaia au” ena huahua ia ania neganai, dika bada do ia davaria. (Genese 2:16, 17) Adamu ia hadibaia dahaka do ia vara bema Iena hereva ia kamonai lasi. Adamu be dahaka do ia karaia?
17. Dahaka dainai ita gwau Iehova ese vaira negana ai edena gaudia do idia vara ia diba totona, abia hidi ia karaia?
17 Ena be Iehova be nega vaira do idia vara gaudia ia itaia diba, to ia ura lasi Adamu bona Heva ese do idia karaia gaudia ia diba guna. Vadaeni, ita diba Iehova be vaira neganai do idia vara gaudia ia itaia diba, to Ia ese abia hidi ia karaia edena gaudia ia gwauraia guna totona. Danu, Iehova be lalokau Diravana dainai, ita diba Adamu bona Heva idia gwau-edeede bona idia vara dika ibounai be ia ese ia abia hidi guna lasi. (Mataio 7:11; 1 Ioane 4:8) Oibe, vaira negana ai edena gaudia do idia vara ia itaia totona, Iehova be abia hidi ia karaia.
18. Dahaka dainai Iehova ese vaira neganai edena gaudia do idia vara ia diba totona, abia hidi ia karaia karana be maoro?
18 Iehova ese vaira neganai edena gaudia do idia vara ia diba totona, abia hidi ia karaia ese ia hahedinaraia Iehova ena kara be maoro lasi, a? Lasi. Mose ese Iehova ia gwauraia “Nadi Badana,” ma ia gwau: “Iena gaukara be namo momokani.” Ita gwau lasi taunimanima idia kara dika neganai, unai be Dirava ena kerere. To, Adamu ena kamonai lasi karana dainai hari inai negai ita ibounai ese inai dika bada ita davaria. Aposetolo Paulo ese ia hahedinaraia namo herea, ia gwau: “Tau tamona dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.”—Deuteronomi 32:4, 5; Roma 5:12; Ieremia 10:23.
19. Stadi gabena ai, edena henanadai do ita stadilaia?
19 Ita herevalaia gaudia amo ita itaia vadaeni, Iehova be kara maoromaoro Diravana. (Salamo 33:5) Iehova ena diba, kara namodia, bona taravatu be iena ura ia durua. (Roma 8:28) Iehova be peroveta Diravana dainai ia gwau diba: “Hamatamaia neganai lau ese dokona lau gwauraia. Gunaguna momokani lau ese, dahaka do ia vara lau gwauraia guna.” (Isaia 46:9, 10) Danu, ita laloparara Iehova ese vaira neganai edena gaudia do idia vara ia itaia diba totona, abia hidi ia karaia. Vadaeni, ita be dahaka do ita karaia? Edena dala ai ita hamomokania diba ita abia hidi gaudia be Dirava ena ura hegeregerena? Bona bema unai bamona ita karaia, dahaka hahenamo do ita davaria? Stadi gabena ai unai henanadai do ita stadilaia.
[Footnote]
a Buklet ladana A Book for All People, rau 28 itaia, Iehova ena Witnes taudia ese idia karaia.
Anina Oi Gwauraia Diba, A?
• Edena idaunegai sivarai ese idia hahedinaraia Dirava ena “hereva” be hanaihanai “anina do ia havaraia”?
• Dirava ena “noho hanaihanai urana” hegeregerena, Iehova ese dahaka ia gwauraia hidi vadaeni?
• Edena dala ai Iehova be vaira negai do idia vara gaudia ia diba karana ia gaukaralaia?
[Picture on page 14]
Iehosapata be Iehova ia abidadama henia
[Picture on page 15]
Dirava ese Iesu ena mase bona toreisi lou ia gwauraia guna
[Picture on page 16]
Adamu bona Heva edia gwau-edeede karana be Iehova ese ia gwauraia guna, a?