“Oiemu Taravatu Lau Ura Henia”

“Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho.”​​—⁠SALAMO 119:​97.

1, 2. (a) Salamo karoa 119 ia torea tauna be dahaka hekwakwanai ia davaria? (b) To, dahaka ia karaia, bona dahaka dainai?

SALAMO karoa 119 ia torea tauna be hahetoho badana ia davaria. Dirava ena taravatu idia ura henia lasi hekokoroku taudia ese hereva koikoidia amo ena ladana idia hadikaia. Lohia taudia idia gwaubou bona idia dagedage henia. Kara dika taudia ese idia hagegea bona idia ura idia alaia. Unai gaudia ia lalohisihisilaia dainai ena ‘goada ia ore.’ (Salamo 119:​9, 23, 28, 51, 61, 69, 85, 87, 161) To, ena be unai hekwakwanai ia davaria, salamo torea tauna ia gwau: “Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho.”​—⁠Salamo 119:⁠97.

² Reana oi sibona oi nanadaia: “Edena dala ai Dirava ena taravatu ese salamo torea tauna ia durua bona ena lalona ia hagoadaia?” Ia lalogoada badina ia diba Iehova ese ia ia laloa bada. Ena be haida ese salamo torea tauna idia dagedage henia, to Dirava ese mai lalokau ida ia henia taravatuna ia badinaia dainai ia moale. Ia diba Iehova ese ia ia kara namo henia. Danu, Dirava ena taravatu be ena mauri lalonai ia badinaia dainai, salamo torea tauna ena aonega ese ena inai taudia edia aonega ia hanaia bona unai ese ia hamauria. Unai taravatu ia badinaia dainai, maino ia davaria bona ena lalomamina be ia goeva.​—⁠Salamo 119:​1, 9, 65, 93, 98, 165.

3. Dahaka dainai hari inai negai, Keristani taudia ese Dirava ena taravatu idia badinaia be auka?

³ Hari inai negai, Dirava ena hesiai taudia haida danu be edia abidadama dainai hahetoho badadia idia davaria. Ena be ita be salamo torea tauna ese ia davaria hekwakwanai ita davaria lasi, to ita be nega dokona, “metau dikadia momo” idia vara negana ai ita noho. Dina ta ta ai ita hedavari henia taudia momo be Dirava ena vairanai dahaka be namo bona dahaka be dika idia laloa bada lasi​—⁠idia be sibodia edia ura idia tahua, kohu idia laloa bada, idia hekokoroku bona idia hemataurai lasi. (2 Timoteo 3:​1-5) Keristani memero kekeni be nega momo hahetoho idia davaria kara dika idia karaia totona. Unai hahetoho dainai, Iehova ita lalokau henia bona kara maoromaoro ita badinaia noho be mai ena hekwarahi. Ita moru lasi totona, dahaka ita karaia be namo?

4. Edena dala ai salamo torea tauna ia hahedinaraia ia be Dirava ena taravatu ia laloa bada? Keristani taudia be unai bamona idia karaia be namo, a?

⁴ Hahetoho negadiai gau ta ese salamo torea tauna ia durua ia gini auka totona, unai gauna be: ia ese nega ia atoa Dirava ena taravatu ia stadilaia bona ia laloa dobu. Unai amo ia ese Dirava ena taravatu ia ura henia. Oibe, Salamo karoa 119 ena siri ibounai ta ta ese Iehova ena taravatu ta ia gwauraia.a Hari inai negai, Keristani taudia be Dirava ese Israela besena dekenai ia henia Mose ena Taravatu henunai idia noho lasi. (Kolose 2:14) To, unai Taravatu lalonai idia noho hakaua herevadia be mai anina bada hari inai negai danu. Unai hakaua herevadia ese salamo torea tauna idia hagoadaia hegeregerena, hari inai negai Dirava ena hesiai taudia be hekwakwanai idia davaria neganai, unai hakaua herevadia ese idia ia hagoadaia danu.

5. Mose ena Taravatu lalonai dahaka gaudia do ita herevalaia?

⁵ Mose ena Taravatu ena kahana toi ese edena dala ai ita ia durua diba, mani ita itaia. Idia be: Sabati, ogogami taudia ese aniani idia gogoa bona mataganigani dadaraia taravatudia. Unai taravatu ta ta ita lalopararalaia be mai anina bada, badina iseda nega lalonai bema hahetoho ita davaria, unai taravatu ena hakaua herevadia ese ita do idia durua bada.

Dirava ese Ita Ia Hakaua be Namo

6. Taunimanima ese idia abia be namo mai anina bada gaudia haida be dahaka?

⁶ Dirava ese taunimanima ia havaraia neganai, idia be mai edia ura gaudia haida. Hegeregere, tau ta ia noho namonamo bona ena tauanina ia goada totona, gau badana be aniani, ranu bona noho gabuna namona ia abia be namo. To, unai tauna ese Dirava ia tomadiho henia danu be namo. Bema unai bamona ia karaia, do ia moale. (Mataio 5:​3, NW ) Iehova ia laloa unai be mai anina bada dainai, iena taunimanima dekenai taravatu ia henia​—⁠wiki ta ta lalonai dina ta do idia abia hidi Dirava idia tomadiho henia totona.

7, 8. (a) Dirava ese edena bamona ia hahedinaraia Sabati dinana be dina ma haida amo ia idau? (b) Dahaka dainai Dirava ese Sabati taravatuna ia atoa?

⁷ Sabati taravatuna ese ita ia hadibaia gauna be, namona be nega ita atoa iseda hetura karana Dirava ida ita hagoadaia totona. Tano gagaena ai, Iehova ese Israela taudia dekenai mana ia henia neganai, unai be nega ginigunana “sabati” herevana be Baibel lalonai ia hedinarai. Israela taudia ia hamaorodia dina 6 lalonai mana do idia gogoa. Dina namba 6 ai, idia ese “dina rua ena aniani” do idia haboua badina dina namba 7 ai, Iehova ese paraoa do ia henidia lasi. Dina namba 7 be “Lohiabada ena Sabati Dina,” bona unai dina ai edia noho gabuna dekenai do idia noho. (Esodo 16:​13-30) Taravatu 10 ena taravatu ta ia gwau Sabati dinana ai gaukara ta do idia karaia lasi. Unai dina be helaga bona unai taravatu idia badinaia lasi ena davana be mase.​—⁠Esodo 20:​8-11; Numera 15:​32-36.

⁸ Sabati taravatuna ese ia hahedinaraia, Iehova be tauanina dalanai iena taunimanima ia laloa bona edia hetura karana Ia ida ia laloa bada danu. Iesu ia gwau: “Dirava ese Sabati ia karaia taunimanima totona.” (Mareko 2:27) Unai dina ai, Israela taudia be idia laga-ani sibona lasi, to dala ia kehoa edia Havaraia Tauna kahirakahira idia lao bona idia hahedinaraia Ia idia lalokau henia. (Deuteronomi 5:12) Unai dina ai taunimanima be gau momo idia karaia, hegeregere, ruma bese stadi, guriguri bona Dirava ena Taravatu idia laloa dobu. Unai taravatu ese Israela taudia ia naria, unai amo edia nega bona goada be tauanina ena ura gaudia dekenai idia haorea kava lasi. Sabati taravatuna ese ia hadibadia, edia mauri lalonai edia hetura karana Iehova ida be mai anina bada gauna. Unai hakaua herevana ia idau lasi, badina Iesu ese ia gwauraia lou: “Buka Helaga lalonai ia torea vadaeni, ‘Aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.’ ”​—⁠Mataio 4:⁠4.

9. Sabati taravatuna ese Keristani taudia dekenai dahaka ia hadibaia?

⁹ Ena be hari, Dirava ena taunimanima ese hora 24 lalonai sabati dinana idia hahelagaia lasi, to Sabati ena taravatu be histori sivaraina ta sibona lasi. (Kolose 2:16) Sabati taravatuna ese ita ia hadibaia, Dirava tura henia namonamo totona ita karaia gaudia do ita atoa guna. Namo lasi kohu tahua momo eiava moale karadia ese helaga gaudia edia gabu idia abia. (Heberu 4:​9, 10) Unai dainai namona be ita sibona ita nanadaia: “Lauegu mauri lalonai dahaka gaudia lau atoa guna? Lau ese stadi, guriguri, Keristani heboudia lao henia karana, bona Basileia ena sivarai namona harorolaia gaukaradia lau atoa guna, a? Eiava egu ura gaudia haida ese unai gaudia edia gabu idia abia?” Bema iseda mauri lalonai Dirava tura henia karana hagoadaia gaudia ita atoa guna, Iehova ia gwauhamata vadaeni, iseda mauri lalonai gau ta dekenai do ita dabu lasi.​—⁠Mataio 6:​24-33.

10. Iseda hetura karana Iehova ida ita hagoadaia totona nega ita atoa neganai, dahaka namo ita davaria? Mani oi gwauraia.

¹⁰ Nega ita atoa Baibel bona Baibel bukadia ita stadilaia, bona edia hereva ita laloa dobu karana ese ita do ia durua Iehova kahirakahira ita lao totona. (Iamesi 4:⁠8) Susan be lagani 40 gunanai, Baibel stadi karana ia karaia totona nega ia atoa. Ia gwau matamanai unai ia moalelaia lasi, to ia hekwarahi bada. Bona gabeai, Baibel ia duahia hanaihanai dainai, Baibel stadilaia karana ia moalelaia bada. Hari, bema badina ta dainai, sibona ena stadi karana ia reaia neganai, ia lalohisihisi bada. Ia gwau: “Baibel stadi karana ese lau ia durua Iehova be egu Tamana bamona lau laloa totona. Iehova lau abidadama henia, lau tabekau henia bona ia auka lasi Ia lau guriguri henia totona. Iehova ena kara be hereadae, badina iena hesiai taudia Ia lalokau henia bada, ia ese lau ia laloa bona lau ia durua bada.” Hanaihanai, iseda hetura karana Iehova ida ita hagoadaia neganai, moale korikorina do ita davaria!

Dirava Ena Taravatu Aniani Gogoa Karana Dekenai

11. Israela taudia ese edena dala ai aniani gogoa taravatuna idia badinaia?

¹¹ Mose ena Taravatu ma ta ese ia hahedinaraia Dirava be iena taunimanima ia lalodia bada, unai taravatu be ogogami taudia ese aniani do idia gogoa. Iehova ese oda ia karaia, bema Israela biru tauna be uma ena aniani ia gogoa, ogogami taudia be aniani gogoa taudia ese idia rakatania gaudia idia gogoa diba. Biru taudia ese edia uma ena isena dekenai idia noho aniani ibounai do idia gogoa lasi, bona idia rakatania uaina vain eiava olive huahua idia gogoa totona, do idia giroa lou lasi. Uma gabu dekenai idia kwatua uiti haida idia rakatania neganai, idia gogoa totona do idia giroa lou lasi. Unai be lalokau karana ogogami, idau bese, ihareha bona vabu taudia dekenai. To, unai taudia ese aniani idia gogoa totona, idia gaukara goada be namo, bona unai idia karaia neganai, ma haida dekenai aniani totona idia noinoi lasi.​—⁠Levitiko 19:​9, 10; Deuteronomi 24:​19-22; Salamo 37:⁠25.

12. Aniani gogoa taravatuna ese dahaka dala ia kehoa biru taudia dekenai?

¹² Biru taudia ese ogogami taudia totona do idia rakatania aniani ena bada be taravatu ese ia gwauraia lasi. Biru taudia edia uma isena dekenai idia rakatania aniani be bada o maragi be idia sibona ese do idia gwauraia. Unai dala ai, aniani gogoa taravatuna ese hariharibada karana ia hadibaia. Unai ese biru taudia dekenai dala ia kehoa aniani ia Henia Tauna dekenai edia tanikiu karana idia hahedinaraia totona, badina “ogogami taudia dekenai bogahisihisi ia henia tauna ese, Dirava ia matauraia noho.” (Aonega Herevadia 14:31) Boasi be unai bamona ia karaia. Vabu hahinena, Ruta be iena uma dekenai aniani ia gogoa neganai, Boasi be hebogahisi ia hahedinaraia bona Ruta be uiti momo ia gogoa. Iehova ese Boasi ena hariharibada karana ia hanamoa.​—⁠Ruta 2:​15, 16; 4:​21, 22; Aonega Herevadia 19:⁠17.

13. Aniani gogoa taravatuna ese ita dekenai dahaka ia hadibaia?

¹³ Aniani gogoa taravatuna ena hakaua herevana be ia idau lasi. Iehova ia ura ena hesiai taudia be dabu taudia dekenai hariharibada karana do idia hahedinaraia. Hariharibada karana ita hahedinaraia neganai, iseda hahenamo danu be do ia bada. Iesu ia gwau: “Taunimanima dekenai do umui henia lao, vadaeni Dirava ese do ia henia umui dekenai. Taunimanima ese emui puse do idia hahonua ela bona do ia bubua danu. Oibe, umui dekenai idia haria gauna be do ia hegeregere momokani, bona do ia hanaia danu. Badina be umui henia lao ena maka hegeregerena, Dirava ese umui dekenai do ia henia lao.”​—⁠Luka 6:⁠38.

14, 15. Edena dala ai hariharibada karana ita hahedinaraia diba, bona ita durua taudia bona ita be dahaka hahenamo ita davaria diba?

¹⁴ Aposetolo Paulo ia gwau: “Taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:10) Unai dainai, iseda Keristani turadia be hahetoho idia davaria neganai, namona be ita durudia edia hetura karana Dirava ida idia hagoadaia totona. To, nega haida, reana Kingdom Hall dekenai hebou totona do ita abidia lao, eiava sitoa dekenai ita lao edia aniani ita hoia totona. Emu kongrigeisen lalonai buruka taudia, gorere taudia eiava idia raka diba lasi taudia idia noho, a? Reana, oi vadivadi henidia, idia oi hagoadaia eiava edia ruma gaukara ta oi karaia totona be namo, ani? Bema mai hebogahisi ida unai bamona taudia ita durua, reana edia guriguri haerelaia totona, Iehova ese ita ia gaukaralaia. Oibe, ta ta ita durua heheni karana be Keristani maduna ta, to unai bamona ia karaia tauna ese hahenamo bada ia davaria. Iseda Keristani tadikaka dekenai lalokau korikorina ita hahedinaraia neganai, moale momokani ita davaria badina Iehova ese ita ia lalonamo henia.​—⁠Aonega Herevadia 15:⁠29.

¹⁵ Keristani taudia ese ma haida edia namo idia laloa bada dalana ta be, edia nega bona goada idia gaukaralaia Dirava ena ura be ma haida dekenai idia harorolaia totona. (Mataio 28:​19, 20) Keristani tauna be Iesu ena hereva ena anina do ia lalopararalaia momokani, bema Baibel stiuden ia durua ela bona ena mauri be Iehova dekenai ia gwauhamatalaia. Unai hereva be: “Henia kara ena moale be bada, abia kara ena moale be maragi.”​—⁠Kara 20:⁠35.

Mataganigani Karana Dadaraia

16, 17. Taravatu 10 ese edena kara ia gwauraia dika, bona dahaka dainai?

¹⁶ Hari, ita ese Dirava be Israela besena dekenai ia henia Taravatuna ena taravatu namba 10, mataganigani karana ita dadaraia be namo do ita herevalaia. Unai Taravatu ia gwau: “Taunimanima ta ena ruma dainai oi mama henia lasi. Iena adavana totona do oi mama henia lasi, o iena hesiai tauna, o iena hesiai hahine, o iena boromakau, o iena doniki, o iena kohu ta totona do oi mama henia lasi.” (Esodo 20:17) Tau ta ese unai taravatu ia karaia diba lasi, badina ia ese taunimanima edia kudouna ia duahia diba lasi. Esodo 20:17 ese ia gwauraia taravatuna dainai, Dirava ena Taravatu be taunimanima edia taravatu idauidau ia hanaia momokani. Unai taravatu dainai Israela taudia idia laloparara, Dirava be kudouna ena ura gaudia ia itaia diba, bona Israela taudia ta ta be Iehova vairanai do idia gini. (1 Samuela 16:⁠7) Oibe, unai taravatu ese kara dikadia momo edia badina ia hahedinaraia danu.​—⁠Iamesi 1:⁠14.

¹⁷ Mataganigani taravatuna ese Dirava ena taunimanima ia durudia kohu ura henia, mataganigani, bona edia mauri maumauraia karadia idia dadaraia totona. Ia durudia henaohenao bona matabodaga karadia idia karaia lasi totona. Taunimanima haida be edia mauri lalonai idia kwalimu eiava mai edia kohu namodia bona ita ura ita be idia bamona. To, bema iseda lalohadai ita biagua namonamo lasi, do ita lalohisihisi diba bona unai taudia do ita mama henidia. Baibel ia hahedinaraia, mataganigani karana be lalohadai kererena amo ia vara gauna. Oibe, namona be mataganigani karana ita dadaraia.​—⁠Roma 1:​28-30.

18. Tanobada dekenai edena kara idia ura henia bada, bona unai kara ese dahaka dika ia havaraia?

¹⁸ Hari, tanobada taudia be kohu idia ura henia bada bona ma haida halusia karana idia laloa bada. Bisinesi ese taunimanima edia lalona idia veria kohu matamatadia idia hoia totona, bona nega momo idia gwau bema unai gaudia ita abia lasi do ita moale diba lasi. Iehova ena Taravatu ese unai bamona kara ia taravatua. Bona, Dirava ena taravatu ese inai lalohadai ia taravatua danu: herevana dahaka dika do idia davaria, to tanobada taudia idia ura kohu momo bona ladana bada idia abia. To, aposetolo Paulo ia gwau: “Kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore vadaeni.”​—⁠1 Timoteo 6:​9, 10.

19, 20. (a) Iehova ena taravatu ia ura henia tauna dekenai dahaka be mai anina bada? (b) Stadi gabena ai dahaka do ita herevalaia?

¹⁹ Dirava ena taravatu idia ura henia taudia ese kohu mataganigani henia karana ena dika idia diba, bona unai ese idia ia gimaia. Hegeregere, salamo torea tauna be Iehova dekenai inai bamona ia guriguri: “Egu kudouna do oi hamanadaia, vadaeni do lau ura oiemu taravatu do lau kamonai henia. Bona unai neganai lau ese kohu bona moni do lau laloa momo lasi. Oiemu uduna hereva ena taravatu be namo herea lau dekenai. Golo bona siliva momo herea, be oiemu taravatu ese ia hereaia momokani.” (Salamo 119:​36, 72) Unai hereva ita abidadama henia momokani neganai, ita do ia durua kohu ura henia, mataganigani bona iseda mauri ita maumauraia karana edia tarapu dekenai do ita moru lasi. ‘Dirava badinaia’ karana amo moale korikorina do ita davaria, kohu haboua karana amo lasi.​​—⁠1 Timoteo 6:⁠6.

²⁰ Iehova ese Israela besena dekenai Taravatu ia henia neganai, idia be mai anina bada. Hari inai nega aukadia dekenai danu, unai Taravatu ena hakaua herevadia be mai anina bada ita dekenai. Unai hakaua herevadia be iseda mauri lalonai ita badinaia neganai, edia anina do ita laloa bada, do ita ura henidia bona iseda mauri be do ia namo. Taravatu ese ita dekenai mai anina bada gaudia ia hadibaia bona unai be Baibel ese ia gwauraia taudia edia kara bona sivarai ese idia hahedinaraia. Unai taudia haida edia sivarai be stadi gabena lalonai do ita herevalaia.

[Footnote]

Edena Bamona Do Oi Haere?

• Dahaka dainai Salamo karoa 119 ia torea tauna ese Iehova ena taravatu ia ura henia?

• Keristani taudia be Sabati taravatuna amo dahaka idia dibaia?

• Ogogami taudia ese aniani do idia gogoa taravatuna ena namo be dahaka?

• Mataganigani dadaraia taravatuna ese edena dala ai ita ia gimaia?

[Picture on page 5]

Sabati taravatuna ese dahaka ia hahedinaraia?

[Picture on page 7]

Aniani gogoa taravatuna ese ita dekenai dahaka ia hadibaia?