Iehova Ena Orea Ita Moalelaia
“Inai oiemu Ruma ena lalonai, gau namodia momo idia noho. Unai dainai . . . aiemai lalona idia namo momokani.”—SALAMO 65:4.
1, 2. (a) Dubu bona ena gaukara be Dirava ena taunimanima dekenai dahaka namo do ia mailaia? (b) Davida be dahaka ia karaia dubu idia haginia totona?
GUNAGUNA ia noho Israela tauna Davida be Heberu Revarevadia ese idia herevalaia tau namona ta. Ia be Iehova Dirava ia badinaia tauna, herevana ia be mamoe naria tauna, miusiki gadaralaia tauna, peroveta tauna, bona king. Davida be Iehova ia lalokau henia bada dainai, ia ura Dirava ena dubu ta ia haginia. Unai dubu be Israela taudia edia tomadiho momokani gabuna ai do ia lao. Davida ia diba, dubu bona ena gaukara be Dirava ena taunimanima dekenai moale bona hahenamo momo do idia mailaia. Unai dainai, Davida ia gwau: “Oi [Iehova] ese oi abia hidi taudia, bona oi ese oiemu gabu helagana dekenai oi mailaidia taudia, be idia moale bada. Inai oiemu Ruma ena lalonai, gau namodia momo idia noho. Unai dainai oiemu Dubu Helaga ai noho neganai, aiemai lalona idia namo momokani.”—Salamo 65:4.
2 Davida be Iehova ena dubu haginia gaukarana ia gunalaia lasi. To, iena natuna Solomona ese unai ia abia. Davida be unai kara dekenai ia maumau lasi, ena be ia ura bada unai gaukara ia karaia. Ia dekenai, dubu ia gini be gau badana. Bona mai ena kudouna ibounai ida unai gaukara ia durua totona, Davida be Iehova amo ia abia dubu ena palani be Solomona dekenai ia henia. Danu, Davida ese Levi taudia tausen momo ia abia hidi bona edia gaukara ia haria, bona golo bona siliva momo ia henia dubu idia haginia totona.—1 Sivarai 17:1, 4, 11, 12; 23:3-6; 28:11, 12; 29:1-5.
3. Dirava ena hesiai taudia ese tomadiho momokani be edena bamona idia laloa?
3 Kamonai Israela taudia be Dirava ena dubu ai idia karaia tomadiho momokani idia durua. Ita danu be Iehova ena hesiai taudia dainai, Iehova ena orea lalonai tomadiho karadia ita durua be namo. Unai amo Davida ena kara ita tohotohoa. Ita maumau lasi. Bona Dirava ena orea ita moalelaia. Ita moalelaia diba gaudia momo idia noho, to unai gaudia ita laloa, a? Idia haida ita kikilaia be namo.
Hakaua Taudia Dekenai Ita Moale
4, 5. (a) “Hesiai tauna mai ena kamonai” ese ena gaukara be edena bamona ia hagugurua? (b) Witnes taudia haida be idia abia bukadia dainai, edia hemami be edena bamona?
4 Ita moale badina be Iesu Keriso ese “hesiai tauna mai ena kamonai, bona mai ena kara maoromaoro” ia abia hidi, tanobada ai iena kohu ia naria totona. Unai Keristani horoa oreana be sivarai namona harorolaia gaukarana ia naria, hebou idauidau ia hegaegaelaia, bona iseda buka idauidau be gado 400 mai kahana dekenai ia halasia. Tanobada ibounai dekenai, taunimanima milioni momo be nega korikori ai unai buka idauidau amo heduru idia abia. (Mataio 24:45-47) Unai ita maumauraia ena badina ta be lasi.
5 Iehova ena Witnes taihu burukana ta ladana be Elfi, bona lagani momo lalonai, ia be hesiai tauna mai ena kamonai ena buka amo sisiba namona ia badinaia amo goada bona heduru ia abia. Elfi ia gwau: “Bema Iehova ena orea be lasi, reana goada bona heduru do lau abia lasi.” Peter bona Irmgard danu be lagani momo lalonai Dirava idia hesiai henia. Irmgard ia gwau ia moale badina “Iehova ena orea namona” be buka momo ia halasia. Unai buka haida be, matakepulu bona taia kudima taudia totona.
6, 7. (a) Hakaua Oreana ese kongrigeisen edia gaukara be edena bamona ia naria? (b) Haida ese Iehova ena orea be edena bamona idia herevalaia?
6 Iehova ena Witnes taudia edia Hakaua Oreana—Keristani horoa tatau haida—be “hesiai tauna mai ena kamonai” ena ladanai ia gaukara oreana, bona ia be Iehova ena Witnes taudia edia hedikwota Brooklyn, New York dekenai idia gaukara. Hakaua Oreana be lo taudia haida ia abia hidi brens opesi ai idia gaukara totona—tanobada hegegemadai, brens opesi ibounai be kongrigeisen 98,000 mai kahana idia naria. Danu, Hakaua Oreana be Baibel ena taravatu idia badinaia tatau haida ia abia hidi, unai kongrigeisen edia elda bona hesiai taudia ai idia lao totona. (1 Timoteo 3:1-9, 12, 13) Elda taudia ibounai be kongrigeisen gaukaradia idia gunalaia bona mai edia lalokau ida Dirava ena mamoe oreana idia naria. Unai mamoe oreana lalonai ita noho bona “Keristani taudia” edia lalotamona bona lalokau ita mamia be hahenamo badana!—1 Petero 2:17; 5:2, 3.
7 Nega momo tadikaka be elda taudia edia sisiba namona dainai idia maumau lasi, to idia tanikiu. Hegeregere, Birgit ita laloa—ia be Keristani headava taihu ta, bona ena mauri lagani be 30 bamona. Ia matamata neganai, ia be taunimanima kereredia ia bamoa bona kahirakahira kerere badana ia karaia. To, elda taudia ese Baibel amo sisiba namona idia henia, bona tadikaka bona taihu edia heduru dainai, ia be kerere badana ia karaia lasi. Hari, Birgit ena hemami be edena bamona? Ia gwau: “Lau moale bada herea, badina Iehova ena orea namona lau rakatania lasi.” Mauri lagani 17 merona Andreas ia gwau: “Momokani, inai be Iehova ena orea, bona tanobada ena orea idauidau ia hereaia.” Iehova ena orea ita moalelaia be namo, ani?
Hakaua Taudia be Idia Goevadae Lasi
8, 9. Davida ena turadia haida edia kara be edena bamona, bona Davida be dahaka ia karaia?
8 Momokani, tomadiho momokani idia gunalaia taudia be idia goevadae lasi. Ibounai be kerere idia karaia diba, bona haida be idia hekwarahi noho edia kara haida idia biagua totona. Unai dainai ita lalohisihisi, a? Lasi. Maduna badadia idia huaia Israela taudia haida danu be kerere badadia idia karaia. Hegeregere, Davida be ia matamata neganai, ia idia boiria miusiki do ia gadaralaia, ia lalohekwarahi tauna King Saulo ena lalona ia hanamoa totona. Gabeai, Saulo ia ura Davida ia alaia mase, to Davida be ia heau mauri.—1 Samuela 16:14-23; 18:10-12; 19:18; 20:32, 33; 22:1-5.
9 Israela taudia ma haida be idia koikoi. Hegeregere, Davida ena tuari oreana ena biaguna Ioaba be Saulo ena varavara Abinere ia alaia. Abesaloma be king dagina ia abia totona, ena tamana Davida ena ladana ia hadikaia. Bona Davida ese ia abidadama henia sisiba tauna namona Ahitopela be Davida ia dadaraia. (2 Samuela 3:22-30; 15:1-17, 31; 16:15, 21) To, Davida be ia maumau lasi, bona tomadiho momokani ia rakatania lasi. Ia be kara namona ia karaia. Dika ia vara neganai, Davida be Iehova dekenai ia tabekau, bona Saulo dainai ia heau boio be kara maorona. Unai nega ai, Davida ia gwau: “Dirava e, lau dekenai do oi bogahisihisi, lau dekenai do oi bogahisihisi henia, badina be mauri abia totona, oi dekenai egu lauma ia hunia noho gwauraia. Oiemu hanina edia henunai be egu hunia gabuna, ela bona inai nega dika be do ia ore.”—Salamo 57:1.
10, 11. Gertrud ia matamata neganai, dahaka ia vara? Gertrud ese tadikaka edia kara be edena bamona ia herevalaia?
10 Hari, Dirava ena orea lalonai koikoi karana ia noho lasi dainai, ita maumau be badina lasi. Iehova, ena aneru, eiava elda taudia ese koikoi taudia be Keristani kongrigeisen amo idia atoa siri. To, ita bona Dirava ena hesiai taudia ma haida be goevadae lasi bona ita ibounai be kerere ita karaia diba.
11 Gertrud—lagani momo lalonai Iehova ia tomadiho henia taihuna—be ia matamata neganai, haida idia gwau ia be Basileia ia harorolaia hanaihanai kekenina lasi to koikoi kekenina. Gertrud be edena bamona ia kara? Ia maumau, a? Lasi. Lagani 2003 ai, ena mauri lagani be 91 neganai—ia do mase lasi negana ai—ia ese ena mauri gunana ia laloa lou, bona ia gwau: “Inai bona gabeai ekspiriens amo lau davaria, ena be taunimanima be kerere idia karaia diba, to Iehova be ita goevadae lasi taudia ia gaukaralaia, ena gaukara badana ia haheaua totona.” Bema ia itaia Dirava ena hesiai taudia ma haida edia hereva o kara be namo lasi, Gertrud be Iehova dekenai ia guriguri.
12. (a) Keristani taudia ginigunadia edia haheitalai dikana be dahaka? (b) Dahaka gaudia ita laloa be namo?
12 Keristani taudia goadadia danu be idia goevadae lasi dainai, bema gunalaia tauna ta be kerere ta ia karaia, ‘ita maumau lasi’ be namo. (Filipi 2:14) Aposetolo edia negai idia noho Keristani taudia dikadia edia haheitalai ita tohotohoa lasi! Iuda ia gwau, unai negai hahediba taudia koikoidia be “siahu taudia idia dadaraia, bona hairai anerudia idia hereva dika henia.” Danu, unai kara dika taudia be “maumau taudia, idia sibona edia ura idia tahua.” (Iuda 8, 16, BHğ) Namona be maumau taudia edia dala ita dadaraia, bona “hesiai tauna mai ena kamonai” oreana amo ita abia gau namodia ita laloa. Oibe, Iehova ena orea ita moalelaia bona ‘ita maumau lasi.’
“Unai Hereva be Ia Metau”
13. Iesu Keriso ena hahediba hereva haida dainai, taunimanima haida be edena bamona idia kara?
13 Aposetolo edia negai, taunimanima haida be gunalaia taudia idia maumauraia, bona ma haida be Iesu ena hahediba herevadia idia maumauraia. Ioane 6:48-69 dekenai, Iesu ia gwau: “Lauegu tauanina do ia ania, bona lauegu rarana do ia inua tauna ese mauri hanaihanai do ia abia.” Unai hereva dainai, Iesu ena “diba tahua taudia momo . . . idia gwau, ‘Unai hereva be ia metau, daika ese do ia abia dae diba?’ ” Iesu ia diba, ena “diba tahua taudia be unai hereva dekenai idia maumau.” Ma danu, “unai neganai [idia] momo ese Iesu idia rakatania, bona ia danu idia raka hebou lou lasi.” To Iesu ena diba tahua taudia ma haida be idia maumau lasi. Iesu ese aposetolo taudia 12 ia nanadaia: “Umui danu do umui raka siri, a?” Petero ia haere: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho? Ai be ai abidadama henia, bona ai diba vadaeni, oi be Dirava ena Helaga Tauna.”
14, 15. (a) Dahaka dainai haida be Keristani hahediba hereva haida dekenai idia moale lasi? (b) Emanuel ena haheitalai amo dahaka ita dibaia?
14 Hari, Dirava ena hesiai taudia haida be Keristani hahediba hereva haida idia moalelaia lasi bona Iehova ena orea idia maumauraia. Dahaka dainai? Badina nega momo idia be Dirava ena dala idia lalopararalaia lasi. Havaraia Tauna ese hereva momokani be ena taunimanima dekenai ia hahedinaraia noho. Unai dainai, nega haida Baibel ena hereva haida idia idau neganai, iseda laloparara ita haidaua danu be namo. Iehova ena hesiai taudia momo be mai moale ida orea ese ia haidaua gaudia idia abia dae. To, haida idia laloa idia be “kara maoromaoro” idia karaia dainai, orea ese ia haidaua gaudia idia moalelaia lasi. (Hadibaia Tauna 7:16) Unai be hekokoroku karana, bona haida be sibona edia laloa dalana idia badinaia. Herevana dahaka ia vara, to maumau karana ese ita ia veria lao diba tanobada bona ena dala ita badinaia lou totona.
15 Hegeregere, Witnes tauna Emanuel be “hesiai tauna mai ena kamonai” oreana ena buka ia duahia neganai, hereva haida ia maumauraia. (Mataio 24:45) Bena iseda buka duahia karana ia hadokoa, bona gabeai, kongrigeisen elda taudia ia hadibaia, ia be Iehova ena Witnes tauna lasi. To, nega sisina murinai, Emanuel ia laloparara Iehova ena orea ena hahediba herevadia be maoro. Witnes taudia ia itaia lou, ena kerere ia gwauraia hedinarai, bona ia idia abia-vareai-lou bona hari ia be Iehova ena Witnes tauna ta. Unai dainai, Emanuel be moale tadikaka ai ia lao lou.
16. Dahaka ese ita ia durua diba Keristani hahediba hereva haida dekenai ita daradara lasi totona?
16 Bema Iehova ena orea ena hahediba hereva haida ita daradaralaia dainai ita maumau be edena bamona? Namona be ita haheauka. Reana gabeai “hesiai tauna mai ena kamonai” be hereva haida do idia halasia, unai amo iseda henanadai do ia haerelaia eiava eda daradara gauna do ia hamaoromaoroa. Namona be Keristani elda taudia edia heduru ita abia. (Iuda 22, 23, BHğ) Danu, guriguri, stadi, bona Iehova idia badinaia taudia ita bamoa karana ese daradara ia kokia diba, bona ita ia durua diba Iehova ena orea amo ita dibaia Baibel ena hereva momokani—eda abidadama idia hagoadaia herevadia unai—ita moalelaia totona.
Lalohadai Maorona Ita Abia
17, 18. Ita maumau lasi to dahaka ita karaia be namo, bona dahaka dainai?
17 Momokani, taunimanima ibounai be kerere idia karaia diba, bona reana haida be anina lasi gaudia dainai do idia maumau momo. (Genese 8:21; Roma 5:12) To bema ita be maumau taudia ai ita lao, eda hetura karana Iehova Dirava ida do ita hadikaia. Unai dainai, maumau karana ita biagua be namo.
18 Namo lasi kongrigeisen ita maumauraia, to namona be lalohadai maorona ita abia bona gaukara idauidau dekenai ita bisi, ita moale, Dirava ita gari henia, ita laloa namonamo, bona eda abidadama ita hagoadaia. (1 Korinto 15:58; Tito 2:1-5) Iehova be ena orea dekenai idia vara gaudia ia biagua, bona Iesu be kongrigeisen ta ta ai idia vara gaudia ia diba, aposetolo edia negai ia diba hegeregerena. (Apokalupo 1:10, 11) Dirava bona kongrigeisen ena Kwarana Keriso ita naria noho be namo. Idia ese elda taudia amo hekwakwanai idauidau idia hamaoromaoroa totona.—Salamo 43:5; Kolose 1:18; Tito 1:5.
19. Basileia ese tanobada gaudia ibounai do ia biagua dainai, hari dahaka ita karaia be namo?
19 Kahirakahira inai nega dikana do ia ore, bona Mesia Basileiana be tanobada gaudia ibounai do ia biagua. Unai nega ita naria noho lalonai, gau badana be ita ibounai ese lalohadai maorona ita abia! Unai amo, ita be tadikaka edia kerere do ita laloa momo lasi, to edia kara namodia do ita laloa bada. Unai ese ita do ia hamoalea. Momokani, ita ura lasi maumau karana dainai ita lalohisihisi bona lalomanoka, to ita ura lalogoada ita abia bona eda hetura karana Iehova ida ita hagoadaia.
20. Lalohadai maorona ese ita do ia durua dahaka hahenamo ita moalelaia totona?
20 Danu, lalohadai maorona dainai do ita laloatao gauna be inai: Ita be Iehova ena orea ita bamoa dainai, hahenamo momo ita abia. Tanobada ai, unai orea sibona be guba bona tanobada edia Lohia Badana ia badinaia noho. Dirava momokani tamona Iehova oi tomadiho henia ena hahenamo be edena bamona oi laloa? Namona be Davida oi tohotohoa, ia gwau: “Oi [Iehova] ese aiemai guriguri oi kamonai. Taunimanima ibounai be oi dekenai do idia mai, Oi ese oi abia hidi taudia, bona oi ese oiemu gabu helagana dekenai oi mailaidia taudia, be idia moale bada. Inai oiemu Ruma ena lalonai, gau namodia momo idia noho. Unai dainai oiemu Dubu Helaga ai noho neganai, aiemai lalona idia namo momokani.”—Salamo 65:2, 4.
Oi Laloatao, A?
• Dahaka dainai kongrigeisen gunalaia taudia dainai ita moale be namo?
• Gunalaia taudia be kerere idia karaia neganai, dahaka ita karaia be namo?
• Baibel ena hahediba herevana ta idia haidaua neganai, dahaka ita karaia be namo?
• Keristani taudia idia daradara lasi totona, dahaka idia karaia be namo?
[Picture on page 14]
Davida be mai ena kudouna ibounai ida tomadiho momokani ia durua bona Solomona dekenai dubu ena palani ia henia
[Picture on page 17]
Keristani elda taudia be mai moale ida heduru idia henia