“Do Umui Maumau Lasi”
“Gau ibounai umui karaia neganai, do umui maumau lasi.”—FILIPI 2:14.
1, 2. Paulo ese Filipi bona Korinto ai idia noho Keristani taudia dekenai dahaka sisiba ia henia? Dahaka dainai unai sisiba ia henia?
APOSETOLO Paulo be Filipi kongrigeisen dekenai idia noho Keristani taudia ginigunadia ia tore henia neganai, ena revareva helagana lalonai ena tadikaka ia hanamodia bada. Filipi tadikaka edia hariharibada bona gaukara goada dainai ia tanikiu henidia, bona ia gwau edia gaukara namona ia moalelaia. To danu, Paulo ese idia ia hadibaia, ‘gau ibounai idia karaia neganai, do idia maumau lasi’ be namo. (Filipi 2:14) Dahaka dainai aposetolo tauna be unai sisiba ia henia?
2 Paulo be maumau karana ena dika ia diba. Lagani haida gunanai, ia ese Korinto kongrigeisen ia hadibaia, maumau karana ese dika bada ia havaraia diba. Paulo ia gwau, Israela taudia be tano gagaena dekenai Iehova idia habadua loulou. Edena dala ai? Idia ese gau dikadia idia ura henia, kaivakuku idia tomadiho henia, matabodaga karadia idia karaia, Dirava idia tohoa, bona idia maumau. Paulo ese Korinto tadikaka ia hagoadaia, namona be unai haheitalai amo gau ta idia dibaia. Ia gwau: “Do ita maumau lasi, idia haida idia karaia bamona. Vadaeni Alaia Aneruna ese idia ia alaia mase.”—1 Korinto 10:6-11.
3. Dahaka dainai hari maumau karana ita kikilaia be gau badana?
3 Ita be Iehova ena Witnes taudia dainai, Filipi kongrigeisen ai idia noho taudia ita tohotohoa. Gaukara namodia ita goadalaia, bona ta ta ita lalokau henia. (Ioane 13:34, 35) To danu, maumau karana ese Dirava ena hesiai taudia gunadia huanai dika ia havaraia dainai, namona be Filipi 2:14 ena sisiba ita badinaia: “Gau ibounai umui karaia neganai, do umui maumau lasi.” Vadaeni, Baibel dekenai maumau taudia haida edia haheitalai ita itaia guna be namo. Bena, hari inai negai maumau karana ese dika ia havaraia diba dainai, do ita karaia diba gaudia haida do ita herevalaia.
Israela Taudia be Iehova Idia Maumauraia
4. Dahaka dainai tano gagaena ai Israela taudia idia maumau?
4 Baibel ese lagani 40 lalonai idia vara gaudia—Israela taudia be tano gagaena ai idia noho negana—ia herevalaia neganai, Heberu herevana ena anina ‘maumau, badu, o boiboi’ ia gaukaralaia danu. Nega haida, Israela taudia be edia noho dalana dainai idia moale lasi bona idia maumau. Hegeregere, Iehova ese Israela taudia be Aigupito amo ia hamauria, to pura haida murinai “Israela taudia ibounai ese Mose bona Arona dekenai idia maumau.” Israela taudia be aniani totona idia maumau, idia gwau: “Aigupito tano dekenai Lohiabada ese ai bema ia alaia mase be namo. Unuseni uro mai vamu danu edia badibadinai ai helai noho, bona paraoa ai ania noho, aiemai ura hegeregerena. To umui ruaosi ese inai taunimanima idia noho lasi gabuna dekenai ai umui hakaua vareai vadaeni, hitolo ese ai ibounai do ia alaia mase totona.”—Esodo 16:1-3.
5. Israela taudia be daika idia maumauraia?
5 To, tano gagaena dekenai, Iehova be mai ena lalokau ida Israela taudia idia ura gaudia—aniani bona ranu—ia henidia. Israela taudia be tano gagaena ai do idia hitolo lasi bona mase lasi. To idia lalohisihisi dainai idia gwau, edia noho dalana be dika bona idia maumau. Ena be Mose bona Arona dekenai idia maumau, to Iehova matanai Israela taudia be Dirava idia maumauraia. Mose be Israela taudia dekenai ia gwau: “Lohiabada ese . . . umui emui maumau, Lohiabada dekenai umui maumau, herevana ibounai ia kamonai vadaeni. To ai be daika? Umui emui maumau be ai dekenai umui maumau lasi, to Lohiabada dekenai.”—Esodo 16:4-8.
6, 7. Numera 14:1-3 ia hahedinaraia hegeregerena, Israela taudia edia kara be edena bamona ia idau?
6 Gabeai, Israela taudia idia maumau lou. Mose be spai taudia 12 ia siaia lao Gwauhamata Tanona dekenai. To spai taudia ten be sivarai dikana idia mailaia. Bena dahaka ia vara? “Israela taudia ibounai ese Mose bona Arona dekenai idia maumau. Idia gwau, ‘Aigupito dekenai o inai taunimanima noho lasi tanona dekenai ai mase be namo. Badina dahaka Lohiabada ese unai tano [Kanana] dekenai ai ia hakaua noho gwauraia? Unuseni tuari dekenai do ai mase, bona aiemai adavana bona natuna do idia abia mauri. Aigupito dekenai do ai giroa lou be namo, ani?’ ”—Numera 14:1-3.
7 Israela taudia edia kara ia idau! Matamanai, Iehova ese Aigupito bona Davara Kakakakana amo Israela taudia ia hamauria neganai, idia moale bada bona ane amo Iehova idia hanamoa. (Esodo 15:1-21) To, Israela taudia be tano gagaena idia ura henia lasi bona Kanana taudia idia gari henia dainai, idia lalohisihisi. Idia be Iehova ena heduru dainai idia tanikiu lasi, to idia gwau Iehova be gau namodia ia kokia. Edia maumau karana ese ia hahedinaraia, idia be Iehova ena harihari gaudia idia laloa bada lasi. Unai dainai, Iehova ia gwau: “Inai orea dikana lau dekenai do idia maumau ela bona edena negai?”—Numera 14:27; 21:5.
Maumau Karana—Aposetolo Edia Negai
8, 9. Baibel ese ia sivarailaia maumau taudia haida edia haheitalai mani oi gwauraia.
8 Israela taudia edia maumau karana ena haheitalai dekenai, taunimanima be edia badu herevadia idia gwauraia badabada. To, lagani 32 C.E. ai, Iesu be Ierusalema ena Au Raurau Ruma Maragidia Aria dekenai ia lao neganai, taunimanima be Iesu idia herevalaia. (Ioane 7:12, 13, 32, NW ) Hereva maragi dekenai Iesu idia maumauraia, haida idia gwau, ia be tau namona to ma haida idia gwau, ia be tau namona lasi.
9 Ma nega ta ai, Iesu bona ena diba tahua taudia be takisi gogoa tauna Levi, eiava Mataio ena ruma dekenai idia lao. “To Farisea taudia bona taravatu hadibaia taudia ese idia dekenai idia maumau, Iesu ena diba tahua taudia dekenai idia nanadaia, idia gwau, ‘Dahaka dainai takisi gogoa taudia bona kara dika taudia danu umui aniani hebou?’ ” (Luka 5:27-30) Gabeai, Galilea dekenai, “Iuda taudia idia maumau Iesu dekenai, badina be ia gwau, ‘Lau be guba dekena amo ia diho anianina.’ ” Iesu ena murinai idia raka taudia haida danu be unai hereva dekenai idia moale lasi bona idia maumau.—Ioane 6:41, 60, 61.
10, 11. Dahaka dainai Helene gado idia hereva Iuda taudia idia maumau? Aposetolo taudia ese maumau karana idia hamaoromaoroa dalana be Keristani elda taudia ese edena bamona idia tohotohoa diba?
10 Pentekoste 33 C.E. murinai, taunimanima idia maumau dainai gau namona ta ia vara. Unai negai, diba tahua taudia matamatadia momo be Iuda tadikaka edia heabidae karana idia moalelaia, to aniani haria karana dekenai hekwakwanai ia vara. Kara bukana ia gwau: “Helene gado idia hereva Iuda taudia, ese Heberu gado idia hereva Iuda taudia dekenai idia maumau. Idia gwau, ‘Dina ibounai, aniani idia haria neganai, aiemai vabu dekenai umui henia hegeregere lasi.’ ”—Kara 6:1.
11 Unai taudia edia maumau karana be tano gagaena ai idia noho Israela taudia edia maumau karana bamona lasi. Helene gado idia hereva Iuda taudia be edia namo idia tahua lasi, o edia noho dalana dainai idia lalohisihisi lasi. To idia maumau badina vabu haida be aniani idia abia lasi. Ma danu, unai maumau taudia be dika idia havaraia lasi bona Iehova idia maumauraia lasi. To edia maumau herevana be aposetolo taudia idia hadibaia dainai, aposetolo taudia be unai maumau ia vara ena badina idia hamaoromaoroa haraga. Hari inai negai, namona be elda taudia ese unai aposetolo taudia edia haheitalai idia tohotohoa! Unai elda taudia ese “taitai” taudia edia maumau idia “kamonai henia” be namo.—Aonega Herevadia 21:13; Kara 6:2-6.
Maumau Karana be Ita Ia Hadikaia Diba
12, 13. (a) Maumau karana ese ita ia hadikaia diba dalana ena haheitalai oi gwauraia. (b) Dahaka dainai ta ia maumau?
12 Baibel ena haheitalai momo amo ita itaia, Dirava ena hesiai taudia gunadia be maumau karana dainai dika bada idia davaria. Unai dainai, namona be hari inai negai maumau karana ese ita ia hadikaia diba daladia ita laloa bada. Inai haheitalai ita laloa: Auri idauidau be idia rasta diba. Bema auri ta dekenai rasta sisina ita itaia to kara ta ita karaia lasi, unai rasta ia bada momokani neganai, ta be unai auri do ia gaukaralaia lasi. Motuka haida be edia ensini dainai lasi to edia auri momo idia rasta neganai idia taria lasi, dika ia havaraia garina. Edena dala ai unai haheitalai be maumau karana bamona?
13 Auri haida idia rasta hegeregerena, goevadae lasi taudia be idia maumau diba. Namona be unai kara dekenai ita naria namonamo. Paripari bona davara ena tadi ese rasta idia havaraia hegeregerena, hisihisi ita davaria neganai, ita ura ita maumau. Lalohekwarahi ese hisihisi maragina ia habadaia diba. Nega dokona lalonai dika be ia bada ia lao dainai, maumau karana danu do ia bada ia lao. (2 Timoteo 3:1-5) Unai dainai, reana Iehova ena hesiai tauna ta be ma tadikaka ta do ia maumauraia. Reana ia lalohisihisi badina tadikaka be kerere maragidia haida ia karaia, gau namodia haida ia karaia, eiava kongrigeisen ena maduna haida ia abia.
14, 15. Dahaka dainai ita maumau momo lasi be namo?
14 Herevana gau ta dekenai ita moale lasi, to bema ita maumau momo, reana do ita lalohisihisi bona maumau karana ita manadalaia diba. Momokani, maumau karana ese iseda tomadiho dalana ia hadikaia diba. Israela taudia be tano gagaena ai edia noho dalana idia maumauraia neganai, idia ese Iehova idia maumauraia. (Esodo 16:8) Israela taudia edia kara ita tohotohoa lasi!
15 Auri ena rasta ita koua diba bema ita hagoevaia haraga o peni maorona amo ita penia. Unai hegeregerena, bema ita itaia maumau karana be eda hekwakwanai ta, unai do ita biagua namonamo diba bema ita gurigurilaia bona ita hekwarahi ita hanaia haraga totona. Edena dala ai?
Iehova Ena Lalohadai Ita Abia
16. Edena dala ai maumau karana ita hanaia diba?
16 Bema ita Iehova ena Witnes taudia be ita sibona eda namo ita tahua guna bona eda hekwakwanai ita laloa momo dainai ita maumau momo, vadaeni hahenamo namodia do ita laloa maragi. Maumau karana ita hanaia totona, gau badana be unai hahenamo idauidau ita laloa bada. Hegeregere, ita ibounai ese Iehova ena ladana ita abia be hahenamo badana. (Isaia 43:10) Ita be Iehova ita tura henia namonamo diba, bona nega idauidau ai ‘guriguri ia kamonai’ Diravana ita hereva henia diba. (Salamo 65:2; Iamesi 4:8) Iseda mauri be mai anina bada, badina ita laloparara daika ese guba bona tanobada ia lohiaia be maoro, bona ita laloatao Dirava ita badinaia be hahenamo badana. (Aonega Herevadia 27:11) Basileia ena sivarai namona ita harorolaia hanaihanai diba. (Mataio 24:14) Iesu Keriso ena mauri davalaia boubouna ita abidadama henia neganai, iseda lalomamina ia goeva. (Ioane 3:16) Unai hahenamo ita moalelaidia be namo, herevana dahaka hekwakwanai ita haheaukalaia.
17. Ena be ita maumau be mai ena badina namona ta, to dahaka dainai Iehova ena lalohadai ita abia be namo?
17 Namona be Iehova ena lalohadai ita abia, ita sibona eda lasi. Davida ia gwau: “Lohiabada e, oiemu kara lau dekenai do oi hadibaia. Oiemu dala lau dekenai do oi hedinaraia.” (Salamo 25:4) Bema badina namona ta dainai ita maumau, Iehova be unai ia diba. Ia be unai ia hamaoromaoroa haraga diba. To, nega haida Iehova ese hisihisi ia koua lasi ena badina be dahaka? Reana Iehova ia ura ita ia durua kara namodia ita hahedinaraia totona, hegeregere haheauka, abidadama, bona boga auka.—Iamesi 1:2-4.
18, 19. Dika ita haheaukalaia bona ita maumau lasi ena namo oi herevalaia.
18 Bema dika ita haheaukalaia bona ita maumau lasi, unai ese eda kara ia hanamoa sibona lasi, to danu, reana eda kara idia itaia taudia ia durua. Lagani 2003 ai, Germany dekenai idia noho Iehova ena Witnes taudia haida be PMV basi amo Hungary ena hebouhebou ta idia lao henia. Basi ena draiva be Iehova ena Witnes tauna ta lasi, bona unai dina ten lalonai ia ura lasi Witnes taudia ia hereva henia. To, unai dina ten murinai, unai draiva be ena lalona ia haidaua momokani. Dahaka dainai?
19 Unai dina 10 ena loaloa lalonai hekwakwanai haida idia vara. To, Witnes taudia idia maumau lasi. Draiva ia gwau, idia be pasendia grup hereadaena! Bona ia gwauhamata, gabeai Witnes taudia be iena ruma dekenai idia mai neganai, idia do ia kamonai henia. Unai pasendia taudia ‘idia maumau lasi’ dainai, haroro namona idia henia!
Ta Ena Dika Gwauatao Karana ese Lalotamona Ia Havaraia
20. Dahaka dainai ma ta ena dika ita gwauatao be namo?
20 Bema tadikaka ta ena kara ta ita maumauraia be edena bamona? Bema ia be kerere badana, vadaeni Iesu ese Mataio 18:15-17 dekenai ia gwauraia hakaua herevana ita badinaia be namo. To hanaihanai unai hakaua herevana do ita badinaia lasi, badina ita lalohisihisilaia gaudia momo be gau maragidia sibona. Bona unai be nega namona tadikaka ena dika ita gwauatao totona, ani? Paulo ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu. To unai kara ibounai ia hereaia kara be lalokau. Do umui lalokau henia, vadaeni do umui noho hebou namo herea, mai laloa tamona danu.” (Kolose 3:13, 14) Ma ta ena dika ita gwauatao diba, a? Iehova be mai ena maoro ita ia maumauraia totona, ani? To, nega momo Iehova be ita ia hebogahisi henia bona iseda dika ia gwauatao.
21. Maumau herevadia idia kamonai taudia be edena bamona idia kara?
21 Maumau karana ese hekwakwanai idauidau do ia hamaoromaoroa lasi. Heberu gado ai, “maumau” ena anina ma ta be “badu” (o growl). Toana be, maumau momo tauna ta ia noho neganai, iseda mamina ia namo momokani lasi bona ita raka siri. Bema ita badu dainai ita maumau momo, reana kamonai taudia edia hemami ita hadikaia danu. Reana edia mamina ia namo momokani lasi bona ita amo idia raka siri! Ta be reana iseda maumau o badu herevadia do ia kamonai henia, to ita do ia ura henia lasi.
22. Kekeni ta ese Iehova ena Witnes taudia be edena bamona ia herevalaia?
22 Dika gwauatao karana ese lalotamona—Iehova ena taunimanima ese idia ura henia karana unai—ia havaraia. (Salamo 133:1-3) Europe ai ia noho Catholic kekenina ta ena mauri lagani be 17, bona ena hanamoa herevana ta be Iehova ena Witnes taudia edia brens opesi dekenai ia siaia. Ia gwau: “Iehova ena Witnes taudia sibona be idia inai heheni lasi, mataganigani lasi, dagedage lasi, sibona edia namo idia tahua lasi, to idia lalotamona.”
23. Stadi gabena ai dahaka do ita kikilaia?
23 Ita be Dirava momokanina Iehova ita tomadiho henia dainai, namona be Iehova amo ita abia hahenamo ibounai ita moalelaia, unai amo lalotamona do ia vara bona ma haida do ita maumauraia kava lasi. Stadi gabena ese do ia hahedinaraia edena dala ai kara namodia ese ita do ia durua maumau karana ma ta—Iehova ena orea maumauraia karana unai—ita dadaraia totona.
Oi Laloatao, A?
• Maumau karana ese dahaka ia havaraia diba?
• Maumau karana ese ita ia hadikaia karana be edena bamona oi haheitalaia diba?
• Dahaka ese ita ia durua diba maumau karana ita hanaia totona?
• Mai moale ida ta ena dika ita gwauatao karana ese ita ia durua diba maumau karana ita hanaia totona?
[Picture on page 8]
Israela taudia be Iehova idia maumauraia!
[Picture on page 11]
Iehova ena lalohadai oi abia, a?
[Picture on page 12]
Ta ena dika gwauatao karana ese Keristani lalotamona ia havaraia