Iobu—Dirava Ia Badinaia Bona Ia Haheauka Tauna
“Lauegu hesiai tauna Iobu oi itaia vadaeni, a? Tanobada dekenai ia be tau ta ese ia hereaia lasi, ani? Ia be kerere ta lasi, bona kara maoromaoro tauna. Ia ese lau Dirava dekenai ia gari, bona kara dika dekena amo ia siri momokani, ani?”—IOBU 1:8.
1, 2. (a) Iobu dekenai dahaka dika badadia idia vara? (b) Unai dika badadia idia do vara lasi neganai, Iobu ena mauri be edena bamona?
TAU ta be mai ena kohu momo, ia be ladana bada tauna, ia gorere lasi, bona mai ena ruma bese namona. Bena karaharaga dika bada ia davaria: Iena kohu ibounai ia haboioa. Gabeai, lai badana ese iena natudia ibounai ia hamasea. Unai murinai, gorere dikana ta ia abia bona iena tauanina ibounai be iohururu amo ia honu. Reana, oi diba unai tauna Iobu, bona Baibel bukana Iobu ese ena sivarai ia gwauraia.—Iobu, karoa 1 bona 2.
2 Mai lalohisihisi ida Iobu ia gwau: “Egu nega gunadia lau laloa noho.” (Iobu 3:3; 29:2) Dika badana ta ia vara neganai, taunimanima be nega gunadia do idia laloa, ani? Iobu be dika ia do davaria lasi neganai, ia be mauri namona ia noholaia. Ladana bada taudia ese Iobu idia matauraia bona ena sisiba idia tahua. (Iobu 29:5-11) Ena be ia be taga tauna, to iena moni ia gaukaralaia namonamo. (Iobu 31:24, 25, 28) Ia ese vabu bona tama sina lasi natudia ia durua. (Iobu 29:12-16) Bona iena adavana sibona ia badinaia.—Iobu 31:1, 9, 11.
3. Iehova ese Iobu be edena bamona ia laloa?
3 Iobu be ena mauri lalonai kerere ta ia karaia lasi, badina ia ese Dirava ia tomadiho henia. Iehova ia gwau: “Tanobada dekenai ia be tau ta ese ia hereaia lasi, ani? Ia be kerere ta lasi, bona kara maoromaoro tauna. Ia ese lau Dirava dekenai ia gari, bona kara dika dekena amo ia siri momokani, ani?” (Iobu 1:1, 8) Ena be Iobu be kara maoromaoro ia badinaia, to dika bada ese ena noho namona ia hadikaia. Iobu be gau ibounai ia haboioa, bona ia davaria gorere bona lalohisihisi ese ena Dirava badinaia karana ia tohoa.
4. Dahaka dainai Iobu ena sivarai ita laloa be namo?
4 Oibe, Dirava ena hesiai taudia huanai Iobu sibona be unai bamona hisihisi ia davaria lasi. Hari, Keristani taudia momo be unai bamona hisihisi idia davaria danu. Unai dainai, inai mai anina bada henanadai rua ita laloa be namo: Dika ita davaria neganai, Iobu ena sivarai ese edena bamona ita ia durua? Bona edena dala ai ita ia hadibaia hisihisi idia davaria taudia edia hemami ita laloa totona?
Dirava Badinaia Karana Ena Hepapahuahu Bona Hahetoho
5. Satani ia gwau, Iobu ese Dirava ia hesiai henia ena badina be dahaka?
5 Iobu dekenai ia vara gauna be idau momokani. Satani be Iobu ena Dirava hesiai henia karana ena badina ia hepapahuahulaia, to Iobu be unai ia diba lasi. Guba ai idia hebou bona Iehova be Iobu ena kara namodia ia herevalaia neganai, Satani ia gwau: “Oi be nega ibounai oi ese ia bona iena famili oi naria noho. Oi ese ia biagua gaudia ibounai danu oi naria noho.” Satani ia gwau Iobu bona Dirava idia hesiai henia taudia ibounai be sibona edia ura gaudia idia tahua dainai Dirava idia hesiai henia. Satani ese Iehova ia hamaoroa: “Bema iena kohu, bona ia biagua gaudia ibounai oi kokia neganai, ia ese oiemu ladana do ia hadikaia momokani!”—Iobu 1:8-11.
6. Satani ese edena mai anina bada hepapahuahu herevana ia havaraia?
6 Unai hepapahuahu herevana be mai anina bada. Satani ese Iehova ena lohia dalana ia hepapahuahulaia. Momokani, Dirava be mai lalokau ida guba bona tanobada ia lohiaia, a? Eiava, Satani ia hereva bamona, taunimanima be sibodia edia ura gaudia do idia tahua noho, a? Satani ese Iobu ia tohoa neganai, Iehova ese ia koua lasi, to Iehova ia diba momokani iena hesiai tauna, Iobu, ese Ia do ia badinaia noho. Unai dainai, Satani ese Iobu dekenai dika bada ia havaraia haraga. Satani be ena hahetoho ginigunadia dekenai ia kwalimu lasi neganai, Iobu dekenai gorere dikana ta ia havaraia. Satani ia gwau: “Kopina ena davana be kopina. Tau ta ese iena gau ibounai do ia negea, iena mauri do ia dogoatao totona.”—Iobu 2:4.
7. Hari, edena dala ai Dirava ena hesiai taudia be Iobu ese ia davaria hahetoho bamona idia davaria noho?
7 Hari inai negai Keristani taudia be hisihisi idauidau idia davaria, to unai hisihisi be Iobu ena bamona lasi. Momo be dagedage eiava ruma bese ena hekwakwanai idia davaria. Moni ena hekwakwanai eiava gorere dainai lalohisihisi bada idia davaria. Haida be edia abidadama dainai edia mauri idia haboioa. To, namo lasi ita laloa ita davaria hisihisi ta ta be Satani ese ia havaraia. Sibona iseda kerere eiava iseda goevadae lasi tauanina dainai hekwakwanai haida idia vara. (Galatia 6:7) Bona ita ibounai be buruka ena hisihisi ena hemami do ita abia bona idia vara kava dika badadia dainai, hisihisi ita davaria diba. Baibel ese ita ia hadibaia goevagoeva, hari inai negai Iehova ese ena hesiai taudia be hoa dalanai unai dika idauidau amo ia gimaia lasi.—Hadibaia Tauna 9:11.
8. Edena dala ai Satani ese ita davaria hahetoho ia gaukaralaia iseda abidadama ia hamanokaia totona?
8 Oibe, Satani ese ita davaria hahetoho ia gaukaralaia iseda abidadama ia hamanokaia totona. Aposetolo Paulo ia gwau “ginigini ta, Satani ena hesiai tauna bamona,” ese ia ia “gwadaia” noho. (2 Korinto 12:7) Reana, Paulo ena matana idia dika, eiava ma gau ta dainai ia lalohekwarahi, to ia laloparara Satani ese unai manoka gauna ia gaukaralaia diba Paulo ena moale bona Dirava badinaia karana ia hadikaia totona. (Aonega Herevadia 24:10) Hari inai negai, Satani ese ruma bese taudia, sikuli turadia eiava gavamani ia gaukaralaia diba, Dirava ena hesiai taudia ia dagedage henia totona.
9. Dahaka dainai hisihisi eiava dagedage ita davaria neganai, ita hoa lasi?
9 Unai hekwakwanai be edena bamona ita hanaia diba? Namona be inai bamona ita laloa: dagedage ita davaria neganai, unai be nega namona iseda lalokau Iehova dekenai ita hahedinaraia bona Iena lohia siahuna ita badinaia totona. (Iamesi 1:2-4) Ena be ita dekenai lalohisihisi idia havaraia gaudia be idauidau, to Dirava badinaia karana be mai anina bada, bona unai ita lalopararalaia neganai, ita do ia durua iseda hetura karana Dirava ida ita hagoadaia totona. Aposetolo Petero ese Keristani taudia ia hamaorodia: “Lauegu lalokau taudia e, inai hisihisi bada, umui ia hisihisi henia noho gauna, be umui tohoa totona ia vara noho. Unai dainai do umui hoa lasi, do umui laloa lasi idau gauna ta be umui dekenai ia ginidae vadaeni.” (1 Petero 4:12) Bena, Paulo ia gwau: “Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.” (2 Timoteo 3:12) Satani ese Iehova ena Witnes taudia edia Dirava badinaia karana ia hepapahuahulaia, Iobu dekenai ia karaia hegeregerena. Momokani, Baibel ese ia hahedinaraia inai nega dokona ai, Satani ese Dirava ena taunimanima ia dagedage henia karana do ia habadaia noho.—Apokalupo 12:9, 17.
Edia Lalohadai Ia Kerere Bona Sisiba Dikana Idia Henia
10. Iobu be dahaka ia diba lasi?
10 Ena be hari ita diba dahaka dainai dika idia vara, to Iobu be ia diba lasi dahaka dainai unai hisihisi ia davaria. Iobu ia gwau: “Lohiabada ese lau dekenai gau momo ia henia, bona hari Lohiabada ese unai gaudia ia abia lao.” (Iobu 1:21) Reana, Satani ia ura Iobu ia koia, unai amo Iobu do ia laloa Dirava ese unai hisihisi ia havaraia.
11. Iobu be hisihisi ia davaria neganai, dahaka ia laloa?
11 Ena be Iobu ia lalomanoka, to ena adavana ese ia hamaoroa Dirava do ia gwauraia dika neganai, Iobu ese unai ia dadaraia. (Iobu 2:9, 10) Iobu ia gwau, ‘kara dika taudia edia mauri namona ese iena mauri idia hereaia.’ (Iobu 21:7-9) Danu ia laloa, ‘Dahaka dainai Dirava ese lau ia panisia noho?’ Nega haida ia ura ia mase. Ia gwau: “Lau ura mase gabuna dekenai lau do oi hunia. Mani lau do oi hunia, ela bona oiemu badu ia ore.”—Iobu 14:13.
12, 13. Iobu ena turadia toi edia hereva ese edena bamona iena lalohisihisi idia habadaia?
12 Iobu ena turadia toi be ia idia vadivadi henia, bona toana be idia ura “iena lalona do idia hagoadaia.” (Iobu 2:11) To, idia be “hagoadaia taudia dikadia.” (Iobu 16:2) Bema idia be tura namodia, Iobu ese idia dekenai ena lalohekwarahi gaudia ia gwauraia neganai, idia ese ia do idia durua. To, unai turadia toi be Iobu ena lalohisihisi idia habadaia bona Iobu ia daradara.—Iobu 19:2; 26:2.
13 Unai dainai Iobu be sibona ia nanadaia: ‘Dahaka dainai unai be lau dekenai ia vara? Dahaka lau karaia dainai inai dika be lau dekenai idia vara?’ Ena turadia edia hereva ese lalohadai kererena ia havaraia. Idia laloa Iobu be kara dika badana ta ia karaia dainai hisihisi ia davaria. Elipasa ia gwau: “Tau ta, bema ia be mai ena kerere lasi, unai tau do ia mase, a? Lau ese lau itaia vadaeni, taunimanima ese kerere bona kara dika idia geia, bona dika idia hadoa. Vadaeni anina idia utua neganai, anina dikana sibona idia abia.”—Iobu 4:7, 8.
14. Dahaka dainai ta be hisihisi ia davaria neganai, namo lasi karaharaga ita gwau ia be kara dika ta ia karaia?
14 Momokani, bema tauanina ena ura ita tahua, hekwakwanai do idia vara. (Galatia 6:7, 8) To hari inai negai, herevana ita be kara maoromaoro ita badinaia, hekwakwanai idia vara diba. Danu, do ita gwau lasi kara maoromaoro taudia be dika ta do idia davaria lasi. Iesu Keriso, be “kerere ta lasi. Ia be kara dika taudia bamona lasi,” to satauro ai mai hisihisi bada ida ia mase, bona aposetolo Iamesi be ena abidadama dainai ia mase danu. (Heberu 7:26; Kara 12:1, 2) Elipasa bona ena turadia rua edia lalohadai kererena dainai, Iobu ia gwau ia be kerere ta ia karaia lasi. Danu, idia gwau Iobu ia kara dika dainai hisihisi ia davaria bona unai ese Iobu ena lalohadai Dirava ena kota maoromaoro karana dekenai ia hadikaia.—Iobu 34:5; 35:2.
Heduru Ita Tahua be Namo
15. Hisihisi ita davaria neganai, edena bamona lalohadai ese ita do ia durua?
15 Iobu ena sivarai amo gau ta ita dibaia, a? Dika badadia, gorere, eiava dagedage oi davaria neganai, reana oi laloa, dahaka dainai unai gaudia be lau dekenai idia vara. Taunimanima haida be unai bamona hekwakwanai idia davaria lasi. (Salamo 73:3-12) Nega haida, ita sibona dekenai inai bamona mai anina bada henanadai ita henia diba: ‘Herevana dahaka ia vara, Iehova lau lalokau henia dainai Ia lau tomadiho henia noho, a? Lau ura Iehova lau badinaia, unai amo tau ta ese ia gwauraia kerere neganai, Ia ese iena hereva do ia halusia diba, a?’ (Aonega Herevadia 27:11; Mataio 22:37) Namo lasi haida edia lalohadai kereredia dainai, ita laloa Iehova ese ita do ia durua lasi. Lagani momo lalonai ia gorere Keristani hahinena ta ia gwau: “Lau diba Iehova ese ia koua lasi hisihisi be do lau haheaukalaia diba. Lau diba Ia ese lau do ia hagoadaia, badina nega ibounai unai bamona ia karaia.”
16. Edena dala ai Dirava ena Hereva ese hekwakwanai idia davaria taudia ia durua diba?
16 Ita be Satani ena “koikoi ita diba vadaeni,” to Iobu be ia diba lasi. (2 Korinto 2:11) Danu, ita be aonega sisiba namodia momo ita abia diba. Baibel lalonai, hekwakwanai idauidau idia haheaukalaia abidadama taudia momo edia sivarai ia noho. Hisihisi idauidau ia davaria tauna aposetolo Paulo, ia gwau: “Buka Helaga dekenai idia torea hereva be ita dekenai hadibaia totona idia torea, vadaeni do ita gini goada, bona Dirava ena namo dekenai do ita naria, mai haheauka danu.” (Roma 15:4) Europe ai, tanobada tuarina iharuana lalonai dibura dekenai ia noho Iehova ena Witnes tauna ta, be dina toi edia aniani amo Baibel ta ia hoia. Ia gwau: “Unai Baibel lau abia neganai, lau moale bada herea! Ena be tauanina dalanai lau hitolo, to Dirava ena hereva ese lau bona ma haida ia durua hahetoho ai davaria neganai, ai haheauka totona. Unai Baibel be lau dekenai ia do noho ema bona hari.”
17. Ita haheauka totona, heduru gaudia haida be dahaka?
17 Baibel sibona amo hagoadaia hereva ita abia lasi, to Baibel stadilaia bukadia idauidau amo heduru ita abia danu. Bema Watch Tower Publications Index oi itaia, reana Keristani tadikaka ta ena ekspiriens do oi davaria, bona ia davaria hekwakwanai be oiemu hekwakwanai bamona. (1 Petero 5:9) Danu, oiemu hekwakwanai be elda taudia eiava lo Keristani taudia ida oi herevalaia neganai, unai ese oi ia durua diba. Bona gau badana be Iehova bona lauma helaga ena heduru oi abia totona, oi guriguri be namo. Paulo be Satani ese ginigini amo ia “gwadaia” neganai, edena bamona ia haheauka diba? Ia be Dirava ena siahu dekenai ia tabekau. (2 Korinto 12:9, 10) “Lau dekenai goada ia henia Diravana dainai, lau be mai egu goada gau ibounai lau karaia totona.”—Filipi 4:13, BHğ.
18. Edena dala ai iseda tadikaka ese ita idia hagoadaia diba?
18 Heduru gaudia idia noho, bona namona be unai gaudia oi tahua be namo. Baibel ia gwau: “Bema hekwakwanai neganai oi manoka neganai, oiemu goada be maragimaragi momokani.” (Aonega Herevadia 24:10) Dimairi be au amo idia karaia ruma ia hadikaia diba hegeregerena, lalomanoka ese Keristani tauna ena abidadama karana ia hamanokaia diba. Unai bamona ia vara lasi totona, Iehova ese iseda tadikaka amo heduru ia henia. Iesu do idia dogoatao hanuaboina ai, aneru ta ese Iesu ia hagoadaia. (Luka 22:43) Paulo be dibura tauna bamona Roma dekenai ia lao neganai, hoihoi gabu ladana Apio bona Laga-ani Ruma Toi dekenai tadikaka haida ia davaridia dainai, “Dirava dekenai ia tanikiu henia, bona iena lalona dekenai goada ia abia.” (Kara 28:15) Germany ai, Witnes taihu be ia matamata neganai, Ravensbrück dibura kamepa dekenai idia abia lao, bona unuseniai taihu haida ese ia idia durua karana ia laloatao. Ia gwau: “Taihu ta ese lau ia davaria bona lau ia abia dae. Taihu ta be egu sinana bamona ai ia lao. Ia ese lau ia naria bona lau ia durua egu hetura karana Iehova ida lau hagoadaia noho totona.”
Dirava Badinaia Noho
19. Dahaka ese Iobu ia durua Satani ena hahetoho ia dadaraia totona?
19 Iehova ia gwau Iobu be kara maoromaoro tauna. (Iobu 2:3) Ena be Iobu ia lalomanoka bona ia diba lasi dahaka dainai hisihisi ia davaria, to Dirava ia badinaia noho. Iobu be ena lalona ia hadaia ena mauri lalonai Dirava badinaia karana ia rakatania lasi totona. Ia gwau: “Harihari ia lao bona do lau mase, egu laloa maoromaoro, bona egu kerere lasi, do lau gwauraia noho.”—Iobu 27:5.
20. Dahaka dainai ita haheauka be mai anina bada?
20 Herevana hahetoho, dagedage eiava hisihisi ita davaria Iobu hegeregerena, to namona be iseda lalona ita hadaia Iehova ita badinaia totona. Iesu ese Semurana kongrigeisen ia hamaoroa: “Hisihisi do oi abia, to do oi gari henia lasi. Kamonai! Satani ese umui haida dibura ruma dekenai do ia koua, umui do ia dibagania, bona dina 10 lalonai do umui hisihisi. Do umui gini goada noho, bona lau do umui badinaia noho ela bona mase, vadaeni lau ese umui emui kwalimu ahuna, mauri, umui dekenai do lau henia.”—Apokalupo 2:10.
21, 22. Hisihisi ita davaria neganai, dahaka ese ita ia hagoadaia diba?
21 Satani ese ia lohiaia tanobadana lalonai, iseda Dirava badinaia karana bona haheauka idia tohoa gaudia momo do ita davaria. To, Iesu ese ita ia hagoadaia vaira negana ita naria noho lalonai, ita gari lasi be namo. Mai anina bada gauna be Iehova do ita badinaia noho. Paulo ia gwau: “Hisihisi be . . . idia noho nega daudau lasi,” to Iehova ese ia gwauhamatalaia “hanamoa bada herea momokani” be do ia noho “ela bona hanaihanai.” (2 Korinto 4:17, 18) Ena be Iobu be hisihisi ia davaria, to unai be nega sisina sibona, guna ia noholaia maurina bona gabeai ia abia maurina ena moale ese unai hisihisi ia hanaia.—Iobu 42:16.
22 To, nega haida iseda mauri lalonai ita davaria hekwakwanai be ia ore haraga lasi bona toana be ita abia hisihisina be bada herea. Stadi gabena ai, Iobu ena haheitalai ese edena bamona ita ia durua ita haheauka totona do ita herevalaia. Bona hisihisi idia davaria taudia ita durua diba daladia do ita herevalaia danu.
Edena Bamona Do Oi Haere?
• Iobu ena Dirava badinaia karana dekenai, Satani be dahaka hepapahuahu ia havaraia?
• Dahaka dainai hisihisi ita davaria neganai, ita hoa lasi?
• Edena dala ai Iehova ese ita ia durua ita haheauka totona?
[Pictures on page 7]
Iseda lalohekwarahi gauna be lo Keristani taudia ida ita herevalaia, ita gurigurilaia, bona tahua karana ita karaia ese ita do ia durua ita haheauka totona