“Iobu Ena Haheauka Sivaraina Umui Kamonai Vadaeni”

“Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.”​​—⁠IAMESI 5:​11.

1, 2. Poland ai, Harald bona Elsa be dahaka hahetoho idia davaria?

HARALD ABT be hua haida sibona lalonai Iehova ena Witnes tauna ta ai ia lao murinai, Hitler ena ami ese Poland ena not kahana ena taoni ladana Danzig (hari Gdańsk) idia abia. Bona unuseni idia noho Witnes taudia idia dagedage henia bada. Gestapo (Hitler ena pulisi) taudia ese Harald idia doria ena abidadama do ia dadaraia pepana ia sainia totona, to ia sainia lasi. Harald be pura haida lalonai dibura rumana ai ia noho murinai, ia be Sachsenhausen ena dibura kamepa dekenai idia abia lao, bona unuseniai ia idia hagaria bona botaia loulou. Ofesa ta ese mase tauanina idia gabua rumana ia poinia bona Harald ia hamaoroa: “Bema dina 14 murinai emu abidadama oi dadaraia lasi, oi be unuseniai do oi mase bona Iehova dekenai do oi daekau.”

² Harald idia dogoatao neganai, ia bona ena adavana Elsa edia hua 10 beibi kekeni be rata ia do inua noho. To, Gestapo taudia ese Elsa idia abia danu. Bena ena beibi idia abia, bona Elsa be dibura taudia idia hamasea kamepa, Auschwitz dekenai idia siaia lao. To, Elsa bona Harald be lagani momo lalonai idia haheauka. Gima Kohorona, July 1, 1981 ai edia haheauka sivaraina oi duahia diba. Harald ia gwau: “Dirava lau abidadama henia dainai lagani 14 dibura rumadia dekenai lau noho. Haida be lau dekenai idia henanadai: ‘Unai hahetoho oi davaria neganai, oiemu hahine ese oi ia durua eiava?’ Oibe! Lau diba vadaeni, ia ese iena abidadama do ia rakatania lasi; bona unai ese lau ia durua lau gini goada totona. Lau diba bema lauegu abidadama dainai lau idia hamasea, do ia moale, to bema egu abidadama lau dadaraia bona lau idia ruhaia, do ia lalohisihisi bada. . . . Elsa be Germany taudia edia dibura ruma lalodiai hahetoho momo ia haheaukalaia.”

3, 4. (a) Daidia edia haheitalai ese Keristani taudia ia durua diba idia haheauka totona? (b) Dahaka dainai Baibel ese ita ia hagoadaia Iobu ena sivarai ita tahua totona?

³ Iehova ena Witnes taudia idia diba idia davaria hisihisi be auka momokani. Unai dainai, Baibel ese Keristani taudia ia sisiba henia: “Peroveta taudia do umui laloa. Lohiabada ena ladana dekenai idia hereva neganai, hisihisi lalonai idia haheauka bona idia goada. Edia kara bamona do umui karaia be namo.” (Iamesi 5:​10) Lagani momo lalodiai, Dirava ena hesiai taudia momo be idia hamasedia kava. “Witnes taudia hutuma bada ori ta bamona” edia haheitalai ese ita idia durua diba iseda Keristani heau helulu lalonai ita heau noho totona.​​—⁠Heberu 11:​32-​38; 12:⁠1, NW.

⁴ Baibel ese ia hahedinaraia, Iobu be haheauka karana ia haheitalaia namo herea. Iamesi ia gwau: “Ita diba inai haheauka taudia ese moale idia davaria vadaeni, ani? Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.” (Iamesi 5:​11) Iobu ena sivarai ese ia hahedinaraia Dirava idia abidadama henia hesiai taudia be Iehova ese do ia hanamodia. Unai ese mai anina bada gaudia haida ia hahedinaraia, bona hisihisi ita davaria neganai, unai ese ita do ia durua. Iobu bukana ese ita ia durua inai henanadai ita haerelaia totona: Hahetoho ita davaria neganai, dahaka dainai mai anina bada gaudia ita diba be namo? Edena bamona kara bona lalohadai ese ita do ia durua ita haheauka totona? Iseda Keristani tadikaka be hisihisi idia davaria neganai, edena bamona idia ita hagoadaia diba?

Hepapahuahu Ena Badina Ita Lalopararalaia

5. Bema hekwakwanai ita davaria, dahaka mai anina bada gauna ita laloatao be namo?

⁵ Iehova tomadiho henia karana ita goadalaia noho totona, hekwakwanai idia vara ena badina ita lalopararalaia be namo. Bema lasi, iseda hekwakwanai ese iseda tomadiho karana idia hadikaia diba. Dirava badinaia karana be mai anina bada. Iseda guba Tamana ena noinoi ita abia dae be gau badana, ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” (Aonega Herevadia 27:11) Unai be hahenamo badana! Ena be iseda goada ia hegeregere lasi bona ita be goevadae lasi taudia, to iseda Havaraia Tauna ita hamoalea diba. Unai bamona ita karaia diba, bema Iehova ita lalokau henia dainai hahetoho idauidau ita haheaukalaia. Keristani lalokau momokanina be metau ibounai lalonai ia gini goada noho. Do ia noho hanaihanai, bona ia doko lasi.​​—⁠1 Korinto 13:​7, 8.

6. Edena dala ai Satani ese Iehova ia gwauraia dika, bona lagani hida lalonai unai ia karaia?

⁶ Iobu bukana ese ia hahedinaraia goevagoeva Satani be Iehova ia gwauraia dika tauna. Danu, ia hahedinaraia Satani be tau dikana, bona ia ura iseda hetura karana Dirava ida ia hadikaia. Iobu dekenai ia vara hegeregerena, Satani ia gwau Iehova ena hesiai taudia ibounai be sibodia edia ura gaudia idia tahua bona Satani ia ura hamomokania ia ese edia abidadama ia hamanokaia diba. Lagani tausen momo lalonai unai bamona ia karaia noho. Satani be tanobada dekenai idia negea diho neganai, guba amo gado ta ia gwau, Satani be “iseda varavara ia samania” tauna bona “Dirava ena vairanai, dina bona hanuaboi” samania herevadia ia gwauraia. (Apokalupo 12:10) Hahetoho ita haheaukalaia neganai, ita hahedinaraia Satani ena samania herevadia be koikoi.

7. Ena be tauanina dalanai ita manoka, to edena dala ai hahetoho ita haheaukalaia diba?

⁷ Namona be ita laloatao, Satani be hahetoho idauidau ia gaukaralaia diba iseda hetura karana Iehova ida ia hadikaia totona. Satani ese edena negai Iesu ia tohoa? Dina 40 lalonai Iesu ia aniani lasi dainai ia hitolo bada, unai neganai Satani ese ia tohoa. (Luka 4:​1-3) To, Iesu ena hetura karana Iehova ida ia goada dainai, Satani ena hahetoho ia dadaraia diba. Unai hegeregerena, ena be tauanina dalanai ita manoka​​—⁠gorere eiava buruka dainai​​—⁠to iseda hetura karana Iehova ida ia goada neganai, hahetoho ita haheaukalaia diba! Ena be iseda “tauanina be idia bodaga lao noho,” to ita hesiku lasi badina “lauma be dina ibounai ia matamata lao.”​​—⁠2 Korinto 4:​16.

8. (a) Edena dala ai lalohadai kererena ese Iehova tomadiho henia karana ia hadikaia diba? (b) Iesu ena lalohadai be dahaka?

⁸ Danu, lalohadai kereredia ese ta ena tomadiho karana ia hadikaia diba. Ta do ia laloa: ‘Dahaka dainai Iehova be inai hekwakwanai ia koua lasi?’ Ta be ma ta ese ia kara namo henia lasi dainai, do ia gwau: ‘Dahaka dainai unai tadikaka be lau dekenai unai bamona ia karaia?’ Bema unai bamona lalohadai ita abia, mai anina bada gaudia do ita laloaboio bona iseda hekwakwanai do ita laloa momo. Gorere ese Iobu ena tauanina ia hahisia bada hegeregerena, iena koikoi turadia toi ese ena lalona idia hahisia bada. (Iobu 16:20; 19:⁠2) Unai hegeregerena, aposetolo Paulo ia gwau bema nega daudau lalonai ita badu noho, ‘Satani ena dala do ita kehoa diba.’ (Efeso 4:​26, 27) Namo lasi Keristani taudia be tau ta eiava gau ta dainai edia badu idia hahedinaraia, to namona be Iesu idia tohotohoa, bona “Kota Biaguna maoromaorona” Iehova Dirava ena imana dekenai unai hekwakwanai idia atoa. (1 Petero 2:​21-​23) Bema Iesu ena “laloa hegeregerena” ita abia, unai ese ita ia durua diba Satani ena hahetoho idauidau ita dadaraia totona.​​—⁠1 Petero 4:⁠1.

9. Hahetoho eiava hisihisi ita davaria neganai, Dirava be dahaka gwauhamata ia henia?

⁹ Namo lasi ita laloa hekwakwanai ita davaria neganai, unai ena anina be Dirava be ita dekenai ia moale lasi. Unai lalohadai kererena ese Iobu ena lalona ia hahisia bada, unai negai danu iena koikoi turadia toi ese idia hereva auka henia. (Iobu 19:​21, 22) Iamesi 1:13 ese ita ia hagoadaia, ia gwau: “Kara dika ese Dirava ia dibagania diba lasi momokani. Bona Dirava ese tau ta do ia dibagania lasi.” To, Iehova ia gwauhamata bema hekwakwanai ta ita davaria, ita do ia durua ita haheaukalaia totona bona ita do ia hamauria. (Salamo 55:22; 1 Korinto 10:13) Hisihisi negadiai bema Dirava kahirakahira ita lao, do ita laloa namonamo bona Satani do ita dadaraia.​​—⁠Iamesi 4:​7, 8.

Heduru Gaudia Haida Haheauka Totona

10, 11. (a) Dahaka ese Iobu ia durua ia haheauka totona? (b) Iobu be lalomamina namona ia abia dainai, unai ese edena bamona ia durua?

¹⁰ Ena be Iobu be hisihisi bada ia davaria, turadia koikoi ese ia idia gwau henia, bona ia diba lasi dahaka dainai unai dika ia davaria, to Iobu be Dirava ia badinaia noho. Iena haheauka karana amo dahaka ita dibaia? Iobu ia haheauka diba ena badina ta be Iehova ia kamonai henia. ‘Ia be Dirava dekenai ia gari, bona kara dika amo ia siri.’ (Iobu 1:⁠1) Unai be ena mauri dalana. Ena be Iobu ia laloparara lasi dahaka dainai dika ia davaria, to ia ura lasi Iehova ia dadaraia. Iobu ia abia dae nega namodia bona nega dikadia ai Iehova ita hesiai henia be namo.​​—⁠Iobu 1:​21; 2:​10.

¹¹ Lalomamina namona ese Iobu ia hagoadaia danu. Ena be ia laloa kahirakahira do ia mase, to ena mauri lalonai ia karaia gaudia namodia ia laloa neganai, unai ese ia hagoadaia. Hegeregere, ia hekwarahi ma haida ia durua totona, Iehova ena kara maoromaoro taravatudia ia badinaia, bona tomadiho koikoi ia dadaraia.​​—⁠Iobu 31:​4-​11, 26-28.

12. Elihu ese Iobu ia sisiba henia neganai, Iobu be dahaka ia karaia?

¹² Momokani, Iobu ena lalohadai haida be kerere dainai, heduru ia abia be namo. Bona Iobu be mai manau ida unai heduru ia abia dae, unai dainai ia haheauka diba. Iobu be mai hemataurai ida Elihu ena sisiba ia kamonai, bona Iehova ese ia hamaoromaoroa neganai, ia abia dae. Iobu ia gwau: “Lau herevalaia gaudia lau diba namonamo lasi. . . . Lau be lau hemarai, bona harihari tano kahu, bona lahi kahu danu dekenai, lauegu lalona lau giroa momokani inai.” (Iobu 42:​3, 6) Ena be Iobu ia davaria gorere dikana ese ia hahisia bada, to ia moale badina iena lalohadai ia haidaua dainai ia mamia ia be Dirava kahirakahira ia lao. Iobu ia gwau: “Lau diba oi [Iehova] be gau ibounai oi karaia diba.” (Iobu 42:⁠2) Iehova be Iobu dekenai ia hahedinaraia Ia be siahu ibounai Diravana, unai amo Iobu ia laloparara Havaraia Tauna ese ia ia hereaia.

13. Edena dala ai Iobu be hebogahisi ia hahedinaraia dainai, hahenamo ia davaria?

¹³ Iobu be hebogahisi ena haheitalai namona ia hahedinaraia. Iena koikoi turadia toi ese idia hahisia bada, to Iehova ese Iobu ia noia idia totona ia guriguri neganai, ia karaia sibona. Unai murinai, Iehova ese Iobu ena gorere ia hanamoa. (Iobu 42:​8, 10) Unai ese ia hahedinaraia, badu ese ita do ia durua lasi ita haheauka totona, to lalokau bona hebogahisi ese ita do ia durua. Badu karana ita hadokoa neganai, iseda hetura karana Iehova ida do ia namo, bona Iehova ese unai kara ia abia dae.​​—⁠Mareko 11:⁠25.

Mai Aonega ida Sisiba Idia Henia Taudia

14, 15. (a) Edena kara ese sisiba henia tauna ta ia durua ma haida idia hagoadaia totona? (b) Dahaka dainai Elihu ena sisiba ese Iobu ia durua?

¹⁴ Iobu ena sivarai amo ita dibaia gauna ma ta be: mai aonega ida sisiba idia henia taudia ese ita idia durua bada diba. Unai bamona taudia be tadikaka korikori bamona, bema nega dika ia vara neganai, idia ese ‘edia lalokau idia hahedinaraia noho.’ (Aonega Herevadia 17:17) To, Iobu ena sivarai ese ia hahedinaraia, sisiba henia taudia ese oi idia hahisia eiava hagoadaia diba. Elihu bamona, sisiba tauna namona be ma haida edia hemami ia laloa, bona hemataurai bona hebogahisi ia hahedinaraia. Nega haida elda bona lo tadikaka ma haida ese hekwakwanai idia davaria tadikaka edia lalohadai idia hamaoromaoroa. Unai sisiba henia taudia be Iobu bukana amo gau momo idia dibaia diba.​​—⁠Galatia 6:1; Heberu 12:​12, 13.

¹⁵ Elihu ese sisiba ia henia dalana amo gau namodia momo ita dibaia. Ia ese Iobu ena turadia toi edia hereva ia kamonai henia guna, bena gabeai ia hereva. (Iobu 32:11; Aonega Herevadia 18:13) Elihu be tura namona ta bamona Iobu ia hereva henia. (Iobu 33:⁠1) Iobu ena koikoi turana toi idia laloa idia ese Iobu idia hereaia, to Elihu be unai bamona ia laloa lasi. Elihu ia gwau: “Ita ruaosi be raro dekena amo ita ia karaia.” Ia ura lasi Iobu ena lalona ia hahisia herevadia ia gwauraia. (Iobu 33:​6, 7; Aonega Herevadia 12:18) Elihu be Iobu ena mauri gunana ia gwauraia dika lasi, to ena kara maoromaoro dainai ia hanamoa. (Iobu 33:32) Mai anina bada gauna be, Elihu ese Dirava ena lalohadai ia abia, bona Iobu ia durua Iehova be gau dikana ta do ia karaia diba lasi ia lalopararalaia totona. (Iobu 34:​10-​12) Elihu be Iobu ia hagoadaia Iehova dekenai ia naria totona, bona sibona ena kara maoromaoro do ia gwauraia lasi. (Iobu 35:2; 37:​14, 23) Keristani elda taudia bona ma haida be unai sivarai amo gau namodia haida idia dibaia diba.

16. Edena dala ai Iobu ena turadia toi be Satani ena gaukara idia karaia?

¹⁶ Elihu ese ia henia aonega sisibana be Elipasa, Biledada, bona Sopara ese idia henia sisiba amo ia idau. Iehova ese idia ia hamaoroa: “Lauegu sivarai umui gwauraia maoro lasi, Iobu, lauegu hesiai tauna ese ia gwauraia hegeregerena.” (Iobu 42:⁠7) Ena be Iobu ena turadia toi idia gwau idia ura Iobu idia hagoadaia, to Satani ese idia ia gaukaralaia Iobu ena lalona idia hahisia totona. Idia toi edia hereva idia hamatamaia neganai, idia gwau Iobu be ia kerere dainai unai dika ia davaria. (Iobu 4:​7, 8; 8:6; 20:​22, 29) Elipasa ia gwau Dirava be ena hesiai taudia ia abidadama henia lasi, bona kara maoromaoro ita karaia eiava lasi be Iehova ese ia laloa bada lasi. (Iobu 15:15; 22:​2, 3) Danu Elipasa ia gwau Iobu be kara dika haida ia karaia, ena be Iobu be unai gaudia ia karaia lasi. (Iobu 22:​5, 9) To, Elihu be Iobu ia durua ena hetura karana Iehova ida ia goadalaia totona, bona sisiba henia tauna namona be ia ura unai ia karaia.

17. Hahetoho ita davaria neganai, dahaka ita laloatao be namo?

¹⁷ Iobu bukana amo haheauka karana dekenai gau ma ta ita dibaia. Iseda lalokau Diravana be iseda noho dalana ia itaia bona Ia ura dala idauidau ai ita ia durua. Paragraf ginigunadia ai ita be Elsa Abt ena sivarai ita herevalaia. Mani unai taihu ena hereva dokona ita laloa: “Pulisi taudia be lau idia do dogoatao lasi neganai, taihu ta ese revareva ia torea lau dekenai bona ia gwau hahetoho bada lalonai Iehova ena lauma ese egu lalona dekenai maino ia havaraia diba. Lau laloa ena hereva be momokani lasi. To hahetoho lau davaria neganai, ena hereva lau hamomokania badina lau dekenai unai bamona ia vara. Bema oi dekenai unai ia do vara lasi, unai oi lalopararalaia be auka. To unai be lau dekenai ia vara momokani. Iehova ese ita ia durua diba.” Elsa be idaunegai Iobu dekenai ia vara eiava ia do vara lasi gauna ia herevalaia lasi. To ena hereva amo ia hahedinaraia hari inai negai “Iehova ese ita ia durua diba”!

Ia Haheauka Tauna be Do Ia Kwalimu

18. Iobu ia haheauka dainai, dahaka hahenamo ia davaria?

¹⁸ Ita momo be Iobu ese ia davaria hisihisi bamona do ita abia lasi. To, inai tanobada dekenai hahetoho idauidau ita davaria neganai, badina momo idia noho Dirava ita badinaia noho totona, Iobu ia karaia bamona. Iobu ia haheauka dainai, ena mauri lalonai namo bada ia davaria. Unai ese ia hagoadaia momokani. (Iamesi 1:​2-4) Bona ena hetura karana Dirava ida ia hagoadaia. Iobu ena hereva ese unai ia hamomokania: “Guna egu taiana sibona dekenai, oiemu sivarai lau kamonai, to harihari egu matana ese, oi idia itaia momokani vadaeni.” (Iobu 42:⁠5) Satani be koikoi tauna, badina Iobu ena abidadama ia hadikaia diba lasi. Bona ena be lagani handred momo idia hanaia vadaeni, to Iehova ese iena hesiai tauna Iobu ia do gwauraia noho kara maoromaoro tauna. (Esekiela 14:14) Iobu be Dirava ia badinaia bona ia haheauka dainai, hari inai negai, iena haheitalai ese Dirava ena taunimanima momo ia hagoadaia.

19. Dahaka dainai oi laloa haheauka karana be mai anina bada?

¹⁹ Iamesi be Keristani taudia ginigunadia ia tore henidia neganai, haheauka karana ese ia havaraia hahenamo ia herevalaia. Bona ia ese Iobu ena haheitalai ia gaukaralaia, Iehova ese ena kamonai hesiai taudia ia hanamoa dalana ia hahedinaraia totona. (Iamesi 5:​11) Iobu 42:12 ia gwau: “Vadaeni Lohiabada ese Iobu ena mauri ma ia hanamoa lou bada. Iena gorere ia ore murinai, iena noho be namo bada, to iena noho gunana be namo bada lasi.” Iobu ia haboioa gaudia be Dirava ese nega rua ia habadaia, bona Iobu be ia moale bona ia mauri daudau. (Iobu 42:​16, 17) Unai hegeregerena, inai nega dikana lalonai ita haheaukalaia hisihisi, eiava lalohisihisi gaudia be do idia boio momokani bona tanobada matamatana ai do ita lalodia lou lasi. (Isaia 65:17; Apokalupo 21:⁠4) Iobu ena haheauka sivaraina ita kamonai vadaeni, bona iseda lalona ita hadaia Iehova ena heduru amo Iobu ena haheitalai ita tohotohoa totona. Baibel ia gwau: “Hisihisi bona dibagani ia abia neganai ia gini noho, mai haheauka danu tauna be namo. Badina be unai dika dekena amo ia kwalimu neganai, ia ese Dirava ia gwauhamata gauna, mauri hanaihanai, iena kwalimu ahuna, do ia davaria. Dirava ia hereva vadaeni, ia idia lalokau henia taudia ibounai ese unai mauri hanaihanai do idia davaria.”​​—⁠Iamesi 1:⁠12.

Edena Bamona Do Oi Haere?

• Edena dala ai Iehova ita hamoalea diba?

• Dahaka dainai ita gwau lasi hekwakwanai ita davaria neganai, anina be Dirava be ita dekenai ia moale lasi?

• Dahaka gaudia ese Iobu idia durua ia haheauka totona?

• Iseda tadikaka ita hagoadaia totona, edena dala ai Elihu ena haheitalai ita tohotohoa diba?

[Picture on page 12]

Sisiba henia tauna namona be ma haida edia hemami ia laloa, hemataurai bona hebogahisi ia hahedinaraia

[Pictures on page 13]

Elsa bona Harald Abt