“Guriguri Kamonai Henia Diravana” Hereva Henia Dalana

“Guriguri Kamonai Henia Diravana” Hereva Henia Dalana

“Guriguri kamonai henia Diravana e, taunimanima iboudiai be oi dekenai do idia mai.”—⁠SALAMO 65:2, BHğ.

1. Dahaka dainai taunimanima be animal bamona lasi, bona unai ese dahaka dala ia kehoa?

TANOBADA dekenai be mauri gaudia tausen tausen idia noho, to taunimanima sibona be Havaraia Tauna idia tomadiho henia diba. Taunimanima sibona idia laloparara Dirava idia tomadiho henia be namo, bona idia ura unai bamona idia karaia. Unai ese dala namo hereana ia kehoa ita be eda guba Tamana ita tura henia totona.

2. Adamu ia kara dika neganai, ena hetura karana ena Havaraia Tauna ida be edena bamona?

² Dirava ese Adamu ia karaia, bona Adamu be ena Havaraia Tauna ia hereva henia diba. Adamu bona Heva be goevadae. Unai dainai, idia be mai gari lasi ida Dirava idia hereva henia diba, natuna ta be ena tamana ia hereva henia hegeregerena. To, idia kara dika neganai, unai hahenamo idia haboioa. Adamu bona Heva be Dirava idia gwau-edeede henia, bona idia tura henia lasi. (Genese 3:8-13, 17-24) To, Adamu ena goevadae lasi natudia be Dirava idia hereva henia diba, a? Oibe, Iehova idia hereva henia diba bema dala haida idia badinaia. Unai dala haida be dahaka?

Dirava Guriguri Henia Dalana

3. Goevadae lasi taudia ese edena dala ai Dirava idia guriguri henia be namo, bona edena haheitalai ese unai ia hahedinaraia?

³ Adamu ena natuna ruaosi dekenai ia vara gauna amo ita dibaia gauna be, bema goevadae lasi taudia idia ura Dirava idia guriguri henia, namona be dala haida idia badinaia. Kaino bona Abela be Dirava idia guriguri henia totona, boubou gaudia idia henia. To, Dirava be Abela ena boubou gauna ia abia dae, Kaino ena lasi. (Genese 4:3-5) Dahaka dainai? Heberu 11:4 ia gwau: “Abela ese Dirava ia abidadama henia, bona boubou gauna Dirava dekenai ia henia. Dirava ese Abela ena boubou gauna ia ura henia, to Kaino ena boubou gauna ia ura henia lasi. Abela ese Dirava dekenai ia abidadama henia, unai dainai Dirava ese kara maoromaoro tauna ia gwauraia.” Ia hedinarai goevagoeva, Dirava ese eda guriguri ia abia dae totona, Dirava abidadama henia karana be gau badana. Dala ma ta be Iehova ese Kaino dekenai ia gwauraia herevadia amo ita dibaia, ia gwau: “Bema kara namo oi karaia vadaeni, be oiemu boubou do lau abia dae.” Oibe, Dirava be Kaino ena guriguri do ia abia dae bema Kaino ese kara namodia ia karaia. To, Kaino be Dirava ena sisiba ia dadaraia, Abela ia hamasea, bona loa kava tauna ai ia lao. (Genese 4:7-12) Baibel ese ia hahedinaraia, unai nega ai, Dirava ia guriguri henia tauna ese Dirava ia abidadama henia bona kara namodia ia karaia be gau badana.

4. Dirava ita guriguri henia neganai, dahaka ita lalopararalaia be namo?

⁴ Bema ita ura Dirava ita guriguri henia, namona be ita laloparara ita be goevadae lasi taudia. Taunimanima ibounai be kerere idia karaia, bona unai ese Dirava guriguri henia dalana ia koua diba. Ieremia ese Israela taudia be inai bamona ia herevalaia: “Ai be ai kerere vadaeni . . . Oi ese ori ta dekena amo oi sibona oi koua, unai dainai aiemai guriguri, be oi dekenai idia ginidae lasi.” (Lalohisihisi ena Ane 3:42, 44) Herevana taunimanima be idia goevadae lasi, to sivarai gunadia ese idia hahedinaraia, Dirava idia abidadama henia bona mai kudou maorona ida Dirava ena taravatu idia badinaia taudia idia guriguri neganai, Dirava be mai ena ura ida unai guriguri ia abia dae. (Salamo 119:145) Unai bamona idia karaia taudia haida be daidia, bona edia guriguri amo dahaka ita dibaia diba?

5, 6. Aberahamo ese Dirava ia guriguri henia dalana amo dahaka ita dibaia?

⁵ Aberahamo be unai bamona ia karaia. Dirava ese Aberahamo ena guriguri ia abia dae, bona Aberahamo ia gwauraia “lauegu turana.” (Isaia 41:⁠8) Aberahamo ese Dirava ia guriguri henia dalana amo dahaka ita dibaia diba? Aberahamo be Iehova ia nanadaia: “Lau be natuna lasi. Edena bamona lau dekenai hanamoa do oi habadaia?” (Genese 15:2, 3; 17:18) Nega ma ta ai, Aberahamo ia henanadai, Dirava ese Sodoma bona Gomora ai idia noho kara dika taudia ia kota henia neganai, ta do Ia hamauria eiava lasi. (Genese 18:23-33) Aberahamo be ma haida totona ia guriguri danu. (Genese 20:7, 17) Bona Abela bamona, nega haida Aberahamo be Iehova ia guriguri henia neganai, boubou gaudia ia henia danu.—⁠Genese 22:9-14.

⁶ Unai nega idauidau ai, Aberahamo be mai gari lasi ida Iehova ia guriguri henia. To Aberahamo be mai manau ida ia guriguri, ena Havaraia Tauna ese ia lalonamo henia totona. Genese 18:27 (BHğ) ai, Aberahamo ese mai hemataurai ida ia gwauraia herevadia mani oi laloa, ia gwau: “Lau be kahu sibona, to lauegu lalona lau hagoadaia Lohiabada lau hereva henia totona.” Namona be Aberahamo ena haheitalai namona ita tohotohoa!

7. Iduhu kwarana taudia ese Iehova dekenai dahaka gaudia idia gurigurilaia?

⁷ Iduhu kwarana taudia be gau idauidau totona idia guriguri neganai, Iehova ia kamonai. Iakobo ese ena gwauhamata be guriguri amo ia gwauraia. Iehova ena heduru ia noia murinai, ia gwauhamata: “Gau ibounai lau dekenai do oi henia be dohore lau haria karaia, kahana ibounai 10, bona kahana ta do lau henia oi dekenai.” (Genese 28:20-22) Gabeai, Esau ia hedavari henia gwauraia neganai, Iakobo be Iehova ena heduru totona ia guriguri: “Oi dekenai lau noinoi inai, mani lauegu kakana Esau ena siahu dekena amo do oi hamauria lau. Badina be lau gari.” (Genese 32:9-12) Iobu be ena ruma bese totona Iehova ia guriguri henia, bona boubou gaudia ia henia. Iobu ena turana toi idia hereva kerere neganai, Iobu be idia totona ia guriguri, bona “Lohiabada ese Iobu ena guriguri ia kamonai henia.” (Iobu 1:5; 42:7-9) Unai sivarai amo, Iehova dekenai ita gurigurilaia gaudia haida ita diba. Danu ita itaia, Iehova be dala maorona ai idia guriguri taudia ia kamonai henia.

Taravatu Gwauhamatana Henunai

8. Taravatu hegeregerena, daika be taunimanima totona Iehova ia guriguri henia?

⁸ Iehova be Aigupito amo Israela besena ia hamauria neganai, idia dekenai Taravatu gwauhamatana ia henia. Taravatu ia gwau, hahelaga tauna be taunimanima totona Dirava do ia guriguri henia. Levi taudia haida be hahelaga gaukara idia karaia, bona taunimanima totona Dirava idia guriguri henia diba. Israela besena ai gau badana ta ia vara neganai, taunimanima edia gwaukau tauna ta—⁠nega haida, ia be king o peroveta tauna—⁠be Dirava dekenai do ia guriguri. (1 Samuela 8:21, 22; 14:36-41; Ieremia 42:1-3) Hegeregere, dubu hahelagaia negana ai, King Solomona be Iehova ia guriguri henia. Iehova be unai guriguri ia abia dae dainai, Iena hairai amo dubu ia hahonua bona ia gwau: “Iniseni idia gwauraia guriguri do lau kamonai.”—⁠2 Sivarai 6:⁠12–7:3, 15.

9. Dubu helaga dekenai Iehova ese do ia abia dae guriguri dalana be dahaka?

⁹ Dubu helaga dekenai Iehova ese do ia abia dae guriguri dalana be Taravatu gwauhamatana ese ia herevalaia danu. Dahaka ia gwau? Daba ta ta bona hanuaboi ta ta ai, hahelaga tauna badana ese animal ia bouboulaia neganai, Iehova vairanai bonana namo muramurana ia gabua be namo. Gabeai, hahelaga taudia danu be unai gaukara idia karaia diba, to Kara Dika Ena Davana Karaia Dinana ai unai idia karaia lasi. Bema hahelaga taudia be unai bamona idia karaia lasi, Iehova be edia hesiai gaukara do ia moalelaia lasi.—⁠Esodo 30:7, 8; 2 Sivarai 13:⁠11.

10, 11. Edena bamona ita diba Iehova be ma haida edia guriguri ia kamonai danu?

¹⁰ Matamanai, Israela taudia be bese kwarana taudia, king taudia, peroveta taudia, bona hahelaga taudia sibona amo Dirava idia guriguri henia, a? Lasi, Baibel ese ia hahedinaraia, Iehova be taunimanima ma haida edia guriguri ia abia dae danu. Dubu hahelagaia negana ai, Solomona be Iehova dekenai ia guriguri: “Bema oiemu Israela taudia ese, mai lalohisihisi momokani danu be Dubu Helaga dekenai edia imana idia duduia neganai, edia guriguri . . . guba dekena amo do oi kamonai.” (2 Sivarai 6:29, 30) Luka bukana ia gwau, Ioane Bapatiso ena tamana Sekaraia be dubu helaga lalonai bonana namo muramurana ia gabua neganai, Iehova tomadiho henia taudia momo be “murimuri dekenai idia gini noho, idia guriguri,” herevana idia be hahelaga taudia lasi. Toana be, hanaihanai hahelaga tauna be golo patana ai bonana namo muramurana be Iehova vairanai ia gabua lalonai, taunimanima be dubu helaga ena murimuri dekenai idia guriguri.—⁠Luka 1:8-10.

¹¹ Unai dainai, bema ta be dala maorona ai ia sibona totona eiava bese ibounai totona Iehova ia guriguri henia, Iehova be mai moale ida ia kamonai. Hari inai negai, ita be Taravatu gwauhamatana henunai ita noho lasi. To, Israela taudia ese Dirava idia guriguri henia dalana dekenai, mai anina bada gaudia haida ita dibaia diba.

Keriso ese Dala Ia Karaia Iehova Ita Guriguri Henia Totona

12. Edena dala ai Keristani taudia be Iehova idia guriguri henia diba?

¹² Hari, Keriso be dala ia karaia Iehova ita guriguri henia totona. Anina be hahelaga taudia be dubu korikorina ai taunimanima totona do idia guriguri lasi, eiava dubu korikorina ta ita vaira henia bena Dirava ita guriguri henia be anina lasi. To, Iehova be dala ta ia kehoa, Ia ita guriguri henia totona. Unai dala be dahaka? Lagani 29 C.E. ai, Iehova ese Keriso ia horoa bona Hahelaga Tauna Badana ai ia halaoa neganai, lauma dubuna ta ia gaukara matamaia.a Unai dala matamatana dainai, ita be Iesu Keriso ena boubou gauna amo Iehova ita guriguri henia bona tomadiho henia diba.—⁠Heberu 9:11, 12.

13. Ierusalema dubuna ai idia karaia guriguri dalana bona lauma dubuna ai idia karaia guriguri dalana be edena bamona idia hegeregere?

¹³ Ierusalema dubuna ai idia karaia karadia—⁠guriguri karana danu—⁠ese lauma dubuna dekenai idia karaia karadia ia laulaulaia. (Heberu 9:1-10) Hegeregere, daba ta ta bona hanuaboi ta ta ai, dubu ena Helaga gabuna ena pata ai idia bouboulaia bonana namo muramurana be dahaka ia laulaulaia? Apokalupo bukana ia gwau, “muramura ena bonana namona be Dirava ena taudia edia guriguri ena toana.” (Apokalupo 5:8; 8:3, 4) Davida ia gwau: “Lau ura egu guriguri do oi abia dae, bona ena mamina oi dekenai be namo, muramura mai bonana namona bamona.” (Salamo 141:⁠2) Oibe, Keriso ese ia karaia dalana dekenai, Iehova hanamoa bona guriguri henia karadia be bonana namo muramurana ese ia laulaulaia be maoro.—⁠1 Tesalonika 3:10.

14, 15. (a) Horoa Keristani taudia be edena dala ai Iehova idia guriguri henia? (b) “Mamoe idaudia” be edena dala ai Iehova idia guriguri henia?

¹⁴ Lauma dubuna ai, daika be Dirava do ia guriguri henia? Dubu korikorina dekenai, hahelaga taudia bona Levi taudia be dubu ena lalona ariara dekenai idia gaukara, to hahelaga taudia sibona be Helaga gabuna dekenai idia vareai. Dubu ena lalona ariara bona Helaga gabuna be guba helarona idia abia horoa Keristani taudia edia noho idauna ta ia laulaulaia dainai, idia be Dirava idia guriguri henia bona hanamoa diba.

¹⁵ To, tanobada ai do idia noho “mamoe idaudia” taudia be edena bamona? (Ioane 10:16) Peroveta tauna Isaia ese ia hahedinaraia, “nega dokona” ai bese idauidau do idia mai Iehova tomadiho henia totona. (Isaia 2:2, 3, NW ) Isaia ma ia gwau, “idau bese taudia” danu idia mai Iehova idia tomadiho henia totona. Dirava ia ura idia edia noinoi ia abia dae, badina ia gwau: “Egu guriguri rumana dekenai lau ese moale do lau henidia.” (Isaia 56:6, 7) Danu, Apokalupo 7:9-15 ia gwau,“bese idauidau” o hutuma bada herea taudia be lauma dubuna ena murimuri ariara dekenai idia gini, “dina bona hanuaboi” ai, Dirava idia guriguri henia bona tomadiho henia totona. Momokani, hari inai negai idia noho Dirava ena hesiai taudia be Dirava idia guriguri henia diba, bona idia diba momokani Iehova be do ia kamonai!

Edena Bamona Ita Guriguri be Maoro?

16. Keristani taudia ginigunadia edia guriguri karana amo dahaka ita dibaia?

¹⁶ Keristani ginigunadia be guriguri karana idia goadalaia taudia. Dahaka gaudia idia gurigurilaia? Keristani elda taudia be orea ena maduna huaia taudia idia abia hidi totona, Iehova ena heduru idia noia. (Kara 1:24, 25; 6:5, 6) Epafra be ena Keristani tadikaka totona ia guriguri. (Kolose 4:12) Petero be dibura rumana ai ia noho neganai, Ierusalema kongrigeisen taudia be ia totona idia guriguri. (Kara 12:⁠5) Dagedage negana lalonai idia gari lasi totona, Keristani taudia ginigunadia be Dirava dekenai idia guriguri: “Lohiabada e, edia hagaria hereva harihari do oi laloa, bona oiemu hesiai taudia dekenai goada oi henia, vadaeni ai ese oiemu hereva do ai gwauraia, gari lasi.” (Kara 4:23-30) Hahediba tauna Iamesi ese Keristani taudia ia hagoadaia, hahetoho idia davaria neganai, Dirava dekenai aonega totona idia noinoi be namo. (Iamesi 1:⁠5) Iehova oi guriguri henia neganai, oi be unai gaudia totona oi noinoi danu, a?

17. Daika ena guriguri be Iehova ese do ia kamonai henia?

¹⁷ Dirava be guriguri haida ia abia dae lasi. Unai dainai, edena bamona ita guriguri be maoro, unai amo Dirava be do ia kamonai? Gunaguna, kamonai taudia be mai momokani bona kudou maorona ida Dirava idia guriguri henia neganai, Dirava be ia kamonai. Edia kara namodia amo edia abidadama idia hahedinaraia. Ita diba hari inai negai danu, Iehova be unai bamona taudia edia guriguri do ia kamonai.

18. Bema Keristani taudia idia ura Iehova ese edia guriguri ia abia dae, dahaka idia karaia be namo?

¹⁸ Kara ma ta danu be mai anina bada. Aposetolo Paulo ia gwau: “Keriso dainai ita ibounai, . . . Lauma tamona ita dekenai ia henia.” (Efeso 2:13, 18) Oibe, Iesu sibona amo ita be Tamana ita guriguri henia diba.—⁠Ioane 14:6; 15:16; 16:23, 24.

19. (a) Israela taudia be dahaka idia karaia dainai, Iehova be edia boubou gaudia ia abia dae lasi? (b) Edena dala ai Iehova be iseda guriguri do ia abia dae?

¹⁹ Paragraf 13 dekenai ita herevalaia hegeregerena, Israela ena hahelaga taudia ese idia bouboulaia bonana namo muramurana be Dirava ena kamonai hesiai taudia edia guriguri ia laulaulaia. To nega haida, Israela taudia ese idia bouboulaia bonana namo muramurana be Iehova ese ia abia dae lasi. Unai be momokani, badina Israela taudia be dubu ai bonana namo muramurana idia gabua sibona lasi, to kaivakuku idia tomadiho henia danu. (Esekiela 8:10, 11) Hari inai negai danu, haida be Iehova idia tomadiho henia sibona lasi, to taravatu utua karadia idia karaia dainai, Iehova be edia guriguri ia abia dae lasi. (Aonega Herevadia 15:⁠8) Unai dainai, namona be iseda kara ibounai ita hagoevaia noho, unai amo Dirava ese iseda guriguri do ia abia dae, bonana namo muramurana ta bamona. Iehova be ena dala maorona idia badinaia taudia edia guriguri ia kamonai henia. (Ioane 9:31) To, henanadai haida ita laloa be namo. Edena bamona ita guriguri be namo? Dahaka gaudia ita gurigurilaia diba? Bona Dirava ese iseda guriguri be edena bamona ia haere henia? Stadi gabena ai, ita be unai bona henanadai ma haida do ita herevalaia.

[Footnote]

a Gima Kohorona, May 15, 2001, rau 27 itaia.

Anina Oi Gwauraia Diba, A?

• Edena dala maorona ai goevadae lasi taudia ese Dirava idia guriguri henia diba?

• Ita guriguri neganai, edena dala ai iduhu kwarana taudia ita tohotohoa diba?

• Keristani taudia ginigunadia edia guriguri amo dahaka ita dibaia diba?

• Edena negai iseda guriguri be bonana namo muramurana ai ia lao diba?

[Picture on page 23]

Dahaka dainai Dirava ese Abela ena boubou gauna ia abia dae to Kaino ena lasi?

[Picture on page 24]

“Lau be kahu sibona”

[Picture on page 25]

“Kahana ta do lau henia oi dekenai”

[Picture on page 26]

Iehova dekenai ita gwauraia guriguridia be bonana namo muramurana bamona, a?