Abidadama Bona Dirava Gari Henia Karana Dainai Idia Lalogoada
“Do oi goada bona do oi boga auka. . . . Badina be lau Lohiabada, oiemu Dirava, ese oi loaloa gabudia ibounai dekenai oi do lau bamoa noho.”—IOSUA 1:9.
1, 2. (a) Taunimanima edia lalohadai dekenai, dahaka dainai Israela taudia be idia hegeregere lasi Kanana taudia idia halusia totona? (b) Iosua be dahaka hagoadaia herevana ia abia?
LAGANI 1473 B.C.E. ai, Israela taudia idia hegaegae gwauhamata tanona dekenai idia vareai totona. Unai dainai Mose ese do idia vara gaudia be Israela taudia dekenai ia hadibaia: “Hari dina Ioridane Sinavai do umui hanaia, bese badadia, goada dekenai umui idia hanaia besedia, edia tano be do umui abia. Hanua badadia danu, edia magu be guba dekenai idia daekau hanuadia be do umui abia. Unai bese taudia be badadia bona latadia. Idia be Anakima taudia. Edia sivarai umui kamonai vadaeni, idia gwau, ‘Anaki taudia edia vairana dekenai daika do ia gini diba?’ ” (Deuteronomi 9:1, 2) Taunimanima momo be unai tuari taudia badadia idia diba! Danu, Kanana taudia haida edia tuari taudia be mai edia hosi bona edia kariota be auri amo idia karaia bona tuari totona idia hegeregere momokani.—Gunalaia Taudia 4:13.
2 To Israela taudia be igui hesiai gaukara idia karaia bona lagani 40 lalonai tano gagaena ai idia loaloa. Unai dainai, taunimanima edia lalohadai dekenai, Israela taudia be do idia kwalimu lasi. To, Mose be Iehova ia abidadama henia; Iehova ese idia ia hakaua dalana be Mose ese ia “itaia” diba. (Heberu 11:27) Mose ese Israela taudia ia hamaoroa: “Lohiabada emui Dirava be umui vairana dekenai do ia hanaia. . . . Ia ese Anaki taudia do ia hadikaia bona hamanokaia.” (Deuteronomi 9:3; Salamo 33:16, 17) Mose ia mase murinai, Iehova ese Iosua ia hamaoroa ia do ia durua, ia gwau: “Oi toreisi, inai Ioridane Sinavai do oi hanaia, oi bona Israela taudia, idia dekenai lau ura do lau henia tanona do umui raka vareai. Iosua e, oiemu mauri dinadia ibounai lalonai tau ta ese oi do ia halusia diba lasi. Lau be oi dekenai do lau noho, Mose dekenai lau noho hegeregerena.”—Iosua 1:2, 5.
3. Dahaka dainai Iosua be abidadama bona lalogoada karana ia hahedinaraia?
3 Iosua be Dirava ena Taravatu ia duahia, ia laloa dobu bona ia badinaia be namo, bema unai bamona ia karaia, Iehova ese do ia durua bona hakaua. Iehova ia gwau: “Unai neganai oiemu raka do ia namo, bona oiemu kara ena anina do ia vara momokani. Oi lau hamaoroa vadaeni, ani, do oi goada bona do oi boga auka. Do oi gari lasi, bona oiemu lalona do ia manoka lasi, badina be lau Lohiabada, oiemu Dirava, ese oi loaloa gabudia ibounai dekenai oi do lau bamoa noho.” (Iosua 1:8, 9) Iosua be Dirava ia kamonai henia dainai, ia lalogoada, ia boga auka, bona ia kwalimu. To, iena uru taudia ibounai be Dirava idia kamonai henia lasi. Unai dainai, idia kwalimu lasi, bona tano gagaena ai idia mase ore.
Abidadama Lasi Taudia
4, 5. (a) Spai taudia 10 edia kara be edena bamona ia idau Iosua bona Kaleba edia kara amo? (b) Taunimanima edia abidadama lasi karana dainai, Iehova be dahaka ia karaia?
4 Lagani 40 gunanai, Israela taudia be Kanana kahirakahira idia ginidae neganai, Mose ese spai taudia 12 ia siaia tano idia itaia totona. Spai taudia 10 idia giroa mai neganai, idia gari dikadika. Idia gwau: “Unai gabu dekenai be tauanina lata herea taudia sibona idia noho. Bona tauanina bada herea taudia danu unuseni ai itaia, Anaki ena besena taudia, Nepili dekenai amo idia mai taudia. Ai ese ai laloa ai be maragi, kwadi bamona, idia edia vairana dekenai.” Anaki taudia sibona lasi, to taunimanima ibounai be idia lata bona bada herea, a? Lasi. Anaki taudia be abata badana ia do vara lasi negana ai idia noho Nefilim taudia edia tubudia, a? Lasi! To, unai koikoi herevadia dainai, Israela taudia be idia gari dikadika. Idia ura igui hesiai gaukara idia karaia tanona, Aigupito dekenai idia giroa lou!—Numera 13:31–14:4.
5 To spai taudia rua, Iosua bona Kaleba, be idia ura dikadika gwauhamata tanona dekenai idia vareai. Idia gwau, Kanana taudia be “do ita halusidia haraga. Lohiabada be ita dekenai ia noho, to idia be durua diravana ta lasi. Unai dainai do umui gari lasi.” (Numera 14:9) Iosua bona Kaleba edia hereva be anina lasi, a? Lasi! Iehova ese Hisihisi 10 amo Aigupito bona ena dirava idauidau ia hahemaraia karana be Israela taudia ibounai ese idia itaia. Bena idia itaia Iehova ese Farao bona ena tuari taudia be Davara Kakakakana ai ia hamasedia. (Salamo 136:15) Unai ese ia hahedinaraia, spai taudia 10 bona idia ese idia koia taudia idia gari be anina lasi. Iehova be ena lalohisihisi ia gwauraia: “Toa kara momo herea idia dekenai lau karaia vadaeni. Edena negai lau dekenai do idia abidadama henia?”—Numera 14:11.
6. Edena dala ai abidadama bona lalogoada idia gaukara hebou, bona hari inai negai unai kara be daidia ese idia hahedinaraia?
6 Iehova be ena hereva amo ia hahedinaraia unai Israela taudia be abidadama lasi, unai dainai idia gari. Oibe, bema ta be mai ena abidadama, do ia lalogoada. Unai dainai aposetolo Ioane ese Keristani kongrigeisen ia tore henia neganai, ia gwau: “Ita ese Dirava ita abidadama henia noho, bona inai abidadama dekena amo tanobada ena kara ita halusia noho.” (1 Ioane 5:4) Iosua bona Kaleba bamona, hari inai negai Basileia harorolaia taudia milioni 6 mai kahana—matamata bona buruka—be mai abidadama ida tanobada hegegemadai Basileia ena sivarai namona idia harorolaia. Mai lalogoada ida idia haroro dainai, edia inai taudia ese idia koudia diba lasi.—Roma 8:31.
“Dirava Ena Dala Do Ita Rakatania Lasi”
7. Inai hereva “Dirava ena dala do ita rakatania” ena anina be dahaka?
7 Hari inai negai, Iehova ena hesiai taudia be mai lalogoada ida sivarai namona idia harorolaia, badina edia lalohadai be Paulo ena hegeregerena, ia gwau: “Ita be Dirava ena dala do ita rakatania lasi. Ita be boio taudia lasi. Lasi, to ita be abidadama taudia dainai, mauri do ita abia.” (Heberu 10:39) Paulo ese ia gaukaralaia Greek herevana idia hahanaia “Dirava ena dala do ita rakatania,” ese nega kwadogina lalonai ita mamia garina dainai Iena dala ita rakatania karana ia herevalaia lasi. Badina Dirava ena abidadama hesiai taudia momo be nega haida idia gari. (1 Samuela 21:12; 1 King Taudia 19:1-4) To, buka ta ia gwau unai hereva ena anina be ta be “hereva momokani ia dogoatao auka lasi.” Ma ia gwau, “vanagi ena palai ia atoa diho dainai ia heau metairametaira” hegeregerena, Dirava ena hesiai gaukara ia karaia goadagoada lasi. To, abidadama goada taudia be dagedage, gorere, eiava hahetoho ma haida idia davaria neganai, Dirava ena dala idia rakatania lasi. Iehova idia hesiai henia noho, bona idia diba Iehova be idia ia laloa bona edia goada ia diba. (Salamo 55:22; 103:14) Emu abidadama be unai bamona, a?
8, 9. (a) Iehova ese Keristani taudia ginigunadia edia abidadama be edena bamona ia hagoadaia? (b) Dahaka ita karaia diba iseda abidadama ita hagoadaia noho totona?
8 Nega ta, aposetolo taudia idia laloa edia abidadama ia maragi dainai, Iesu idia hamaoroa: “Aiemai abidadama oi habadaia.” (Luka 17:5) Aposetolo taudia edia noinoi ena haere be Pentekoste 33 C.E. ai idia abia, unai nega ai lauma helaga idia abia bona Dirava ena Hereva bona ura idia lalopararalaia momokani. (Ioane 14:26; Kara 2:1-4) Unai hahediba taudia edia abidadama ia hagoadaia dainai, ena be dagedage idia davaria to sivarai namona harorolaia gaukara be “tanobada ibounai dekenai” idia karaia.—Kolose 1:23; Kara 1:8; 28:22.
9 Iseda abidadama ita hagoadaia bona haroro gaukara ita goadalaia totona, namona be Baibel ita stadilaia, ita laloa dobu bona Dirava ena lauma helaga totona ita guriguri. Iosua, Kaleba, bona Keristani hahediba taudia ginigunadia idia karaia bamona, Dirava ena hereva momokani be iseda lalona bona kudouna ai ita atoa be namo. Unai ese ita do ia durua mai lalogoada ida lauma tuarina lalonai ita haheauka noho bona do ita kwalimu.—Roma 10:17.
Dirava Ia Noho Lalohadaina Ita Abia Dae Sibona be Hegeregere Lasi
10. Abidadama korikori ena anina be dahaka?
10 Idaunegai Dirava idia badinaia taudia be edia abidadama dainai, lalogoada bona haheauka idia hahedinaraia. Unai bamona abidadama ita hahedinaraia totona, Dirava ia noho lalohadaina ita abia dae sibona be hegeregere lasi. (Iamesi 2:19) To, namona be Iehova ita dibaia namonamo bona ita abidadama henia danu. (Salamo 78:5-8; Aonega Herevadia 3:5, 6) Unai ena anina be ita abia dae momokani Dirava ena taravatu bona hakaua herevadia ibounai ita badinaia neganai, ita do ia durua. (Isaia 48:17, 18) Abidadama ena anina ma ta be, ita abia dae momokani Iehova ese ena gwauhamata ibounai do ia hagugurua, bona “Dirava idia tahua taudia ibounai, be davana namona Dirava ese do ia henidia.”—Heberu 11:1, 6; Isaia 55:11.
11. Iosua bona Kaleba be abidadama bona lalogoada idia hahedinaraia dainai, Iehova ese edena bamona ia hanamodia?
11 Unai bamona abidadama be ia goada ia lao diba. Hereva momokani be iseda mauri lalonai ita badinaia neganai, namona be ena namo ita “tohoa,” ita diba ita gurigurilaia gaudia edia haere do ita abia, bona dala ma haida ai ita itaia Iehova ese ita ia hakaua. (Salamo 34:8; 1 Ioane 5:14, 15) Ita diba momokani Iosua bona Kaleba be Dirava ena kara namo idia tohoa, unai ese edia abidadama ia hagoadaia. (Iosua 23:14) Mani inai ita laloa: Lagani 40 lalonai tano gagaena ai idia loaloa bona idia mase lasi, Dirava ia gwauhamata bamona. (Numera 14:27-30; 32:11, 12) Bona lagani 6 lalonai, Iosua bona Kaleba ese Israela taudia idia gunalaia Kanana hanuadia idia tuari henidia totona. Danu idia mauri daudau, idia gorere lasi bona idia ta ta be ahuna idia abia. Mai lalogoada bona abidadama ida Iehova idia hesiai henia taudia be Iehova ese ia hanamodia!—Iosua 14:6, 9-14; 19:49, 50; 24:29.
12. Edena dala ai Iehova ena “hereva be namo herea”?
12 Dirava ese Iosua bona Kaleba dekenai ia hahedinaraia hebogahisi-mai-lalokauna be salamo torea tauna ena hereva ese ia hahedinaraia: “Oi ese oi hedinaraia vadaeni, oiemu ladana bona oiemu hereva be namo herea.” (Salamo 138:2) Iehova be gwauhamata ta ia karaia neganai, unai gwauhamata do ia guguru. Unai dainai ena hereva be “namo herea,” bona unai ese iseda laloa ibounai ia hereaia. (Efeso 3:20) Iehova idia abidadama henia taudia be do ia hanamoa.—Salamo 37:3, 4.
“Dirava Ia Hamoalea” Tauna
13, 14. Dahaka dainai Enoka be abidadama bona lalogoada ia hahedinaraia be namo?
13 Idaunegai ia noho witnes tauna Enoka, ena haheitalai ita laloa neganai, ena abidadama bona gari lasi karana amo gau momo ita dibaia. Enoka be peroveta herevana harorolaia gaukarana ia do matamaia lasi neganai, ia diba ena abidadama bona lalogoada dainai hahetoho do ia davaria. Dahaka dainai? Badina Eden umana ai, Iehova ia gwau Dirava idia hesiai henia taudia bona Satani Diabolo idia hesiai henia taudia huanai tuari, eiava inai heheni karana do ia noho. (Genese 3:15) Enoka ia diba inai heheni karana be Kaino bona Abela huanai ia vara. Momokani, Adamu ena mauri lagani be kahirakahira 310 neganai, Enoka ia vara.—Genese 5:3-18.
14 To, Enoka be mai lalogoada ida Dirava momokani ida ia raka ena “turana” bamona, bona Iehova idia “hereva dika henia” taudia ia gwauraia dika. (Genese 5:22; Iuda 14, 15) Enoka be mai gari lasi ida tomadiho momokani ia badinaia dainai, taunimanima momo ese idia inai henia bona idia ura hamasea. To, unai negai Iehova ese iena hesiai tauna be mase ena hisihisi amo ia ruhaia. Iehova ese Enoka dekenai ia hahedinaraia “ia ese [Ia] ia hamoalea bada,” unai murinai “ia abia hanai” unai amo mase do ia itaia lasi. Reana unai gaudia be ia abia nihi ta lalonai ia vara.—Heberu 11:5, 13; NW; Genese 5:24.
15. Hari Iehova ena hesiai taudia totona, Enoka be dahaka haheitalai namona ia hahedinaraia?
15 Paulo ese Enoka ena abia hanai karana ia herevalaia murinai, ia gwau abidadama be mai anina bada: “Tau ta bema Dirava ia abidadama henia lasi neganai, ia hegeregere lasi Dirava ena ura do ia badinaia.” (Heberu 11:6) Oibe, Enoka be abidadama tauna dainai, mai gari lasi ida Iehova ida ia raka bona Dirava diba lasi taudia dekenai hahemaoro ena sivarai ia harorolaia. Enoka ese ita totona haheitalai namona ia hahedinaraia. Ita danu, tomadiho momokani ia inai henia bona kara dika amo ia honu tanobadana lalonai haroro gaukara ita karaia noho.—Salamo 92:7; Mataio 24:14; Apokalupo 12:17.
Dirava Gari Henia Karana ese Lalogoada Ia Havaraia
16, 17. Obadaia be daika, bona ia be edena bamona negai ia noho?
16 Dirava gari henia karana ese lalogoada ia havaraia danu. Mani Dirava ia gari henia tauna ena haheitalai namona ita laloa. Ia be peroveta tauna Elia. Elia be King Ahaba, Israela ena not basileia ia lohiaia tauna, ena negai ia noho. Ahaba ena lohia negana lalonai, not basileia dekenai Bala tomadiho henia karana be ia bada. Momokani, Bala ena peroveta taudia 450 bona hahine dirava Asere ena peroveta taudia 400 be Ahaba ena adavana “Iesebele ese edia aniani ia henidia.”—1 King Taudia 16:30-33; 18:19.
17 Iesebele be Iehova ia inai henia momokani bona ia ura tomadiho momokani do ia haorea. Ia ese Iehova ena peroveta taudia ia hamasedia bona ia ura Elia danu do ia hamasea, to Dirava ese Elia ia hakaua bona Ioridane Sinavai ia hanaia bona ia roho mauri. (1 King Taudia 17:1-3; 18:13) Bema oi be idaunegai Israela ena not kahana basileiana dekenai oi noho, do ia auka tomadiho goevana oi badinaia totona, ani? Danu, bema oi be king ena ruma dekenai oi gaukara, oi idia davaria haraga diba, ani? Dirava ia gari henia tauna, Obadaia,a Ahaba ena ruma dekenai ia gaukara tauna, be unai bamona nega ai ia noho.—1 King Taudia 18:3.
18. Dahaka dainai Obadaia be Iehova tomadiho henia karana dekenai haheitalai namona ia hahedinaraia?
18 Ita daradara lasi, Obadaia be Iehova tomadiho henia totona ia ura ia karaia karadia, be ia laloa namonamo guna bena mai aonega ida ia kara. Bona Iehova ia badinaia noho. Momokani, 1 King Taudia 18:3 ia gwau: “Obadaia danu be Lohiabada ia tomadiho henia tauna ta.” Obadaia be Dirava gari henia karana dekenai haheitalai namona ia hahedinaraia! Ena be Iesebele be Iehova ena peroveta taudia ia hamasedia, to Obadaia be Dirava ia gari henia dainai, ia lalogoada.
19. Obadaia be edena bamona ena gari lasi karana ia hahedinaraia?
19 Baibel ia gwau: “Iesebele ese Lohiabada ena peroveta taudia ia alaia murinai, Obadaia ese peroveta taudia 100 ia abia, nadi matuna lalonai idia ia hunia. Orea rua dekenai ia hunidia, orea ta 50, bona orea ta 50. Bona Obadaia ese aniani bona ranu ia henia idia dekenai.” (1 King Taudia 18:4) Mani oi laloa, unai negai hehuni dalanai tatau 100 ubua karana ese dika ia havaraia diba. Obadaia be Ahaba bona Iesebele, bona king ena ruma dekenai hanaihanai idia mai peroveta koikoi taudia 850 amo ia hunia be namo, unai amo do idia dogoatao lasi. Unai sibona lasi, to unai tano ai idia noho tomadiho koikoi taudia ibounai amo ia hunia be namo, badina bema Obadaia idia davaria, king bona kwini do idia hadibaia badina idia ura king bona kwini ese idia do idia hanamoa. To, Obadaia be unai kaivakuku tomadiho henia taudia huanai ia loaloa bona Iehova ena peroveta taudia ia durudia. Dirava gari henia karana be mai ena siahu!
20. Obadaia be Dirava ia gari henia dainai, unai ese edena bamona ia durua, bona edena dala ai iena haheitalai ese oi ia durua?
20 Obadaia be Dirava ia gari henia bona lalogoada karana ia hahedinaraia dainai, Iehova ese ena inai taudia amo ia gimaia. Aonega Herevadia 29:25 ia gwau: “Taunimanima do oi gari henia neganai, dika do oi davaria, tarapu lalonai oi moru bamona. To bema Lohiabada oi abidadama henia neganai, mauri do oi davaria noho.” Obadaia be ita amo ia idau lasi; ia do idia dogoatao bona hamasea dainai ia gari, ita danu be gari mamina do ita abia. (1 King Taudia 18:7-9, 12) To, Dirava ia gari henia dainai ia lalogoada, bona taunimanima dekenai ia gari lasi. Iehova idia tomadiho henia dainai edia ura kwalimu bona mauri idia haboioa diba taudia bona ita ibounai dekenai, Obadaia be haheitalai namona ia hahedinaraia. (Mataio 24:9) Namona be ita ibounai be “mai hemataurai bona mai gari danu” Iehova ita hesiai henia.—Heberu 12:28.
21. Stadi gabena ai dahaka do ita herevalaia?
21 Abidadama bona Dirava gari henia karana sibona ese lalogoada karana idia havaraia sibona lasi; to lalokau ese ita ia hagoadaia diba unai kara ita hahedinaraia totona. Paulo ia gwau: “Dirava ese gari laumana ita dekenai ia henia lasi, to siahu bona lalokau bona aonega Laumana ita dekenai ia henia vadaeni.” (2 Timoteo 1:7) Stadi gabena ai, do ita itaia edena dala ai hari inai nega dokona ai lalokau ese ita do ia durua, mai gari lasi ida Iehova ita hesiai henia totona.—2 Timoteo 3:1.
[Footnote]
a Ia be peroveta tauna Obadaia lasi.
Oi Haere Diba, A?
• Dahaka dainai Iosua bona Kaleba be mai gari lasi ida idia kara?
• Abidadama korikori ena anina be dahaka?
• Dahaka dainai Enoka be mai gari lasi ida Dirava ena hahemaoro sivaraina ia harorolaia?
• Edena dala ai Dirava gari henia karana ese ta ia durua ia lalogoada totona?
[Picture on page 18, 19]
Iehova ese Iosua ia hamaoroa: “Do oi goada bona do oi boga auka”
[Picture on page 20]
Obadaia ese Dirava ena peroveta taudia ia naria bona gimaia
[Pictures on page 21]
Enoka be mai gari lasi ida Dirava ena hereva ia gwauraia