Iehova Ena Hereva be Ia Mauri Noho
Solomona Ena Ane Bukana Ena Hereva Badadia
“HAHINE edia huanai egu lalokau hahine be, sosana palauapalaua, ava ginigini edia huanai bamona.” “Tau edia huanai egu lalokau tauna be, apolo auna, uda audia edia huanai bamona.” “Inai be daika, iena toana be daba rere bamona? Mai ena hairaina, hua bamona? Mai ena diaridiari, dina bamona?” (Solomona ena Ane 2:2, 3; 6:10) Unai siri be namo herea! Solomona ena Ane bukana be “ane namo herea” ta, bona ena hereva be mai anina bada.—Solomona ena Ane 1:1.
King Solomona be lagani 1020 B.C.E., unai be ena lohia laganina 40 ai, inai ane ia torea. Unai ane be mamoe naria merona ta bona Sulama hanua kekenina ta edia hetura karana ena sivarai ia gwauraia. Unai ane ese ia herevalaia taudia haida be kekeni ena sinana bona taihudia, “Ierusalema ena hahine,” bona “Siona hahine.”—Solomona ena Ane 1:5; 3:11.
Solomona ena Ane bukana be Dirava ena Hereva ena kahana ta dainai, ia be mai anina bada. (Heberu 4:12) Ia ese gau rua ia herevalaia, ginigunana be, tau bona hahine huanai ia noho lalokau korikorina, bona iharuana be, Iesu Keriso bona horoa Keristani taudia huanai ia noho lalokau.—2 Korinto 11:2; Efeso 5:25-31.
AIEMAI URA HENIA HEMAMI UMUI HANOGAIA LASI
(Solomona ena Ane 1:1–3:5)
“Oiemu uduna ena bibina ese, kisi momo lau dekenai ia henia noho. Oiemu lalokau ena namo ese, uaina ena namo ia hereaia noho.” (Solomona ena Ane 1:2) Sulama kekenina be Solomona ena ruma dekenai ia noho neganai, unai ane ia abia. To, edena bamona unai gabu dekenai ia lao?
Kekeni ia gwau: “Egu taihuna ese lau dekenai idia badu, bona vain uma naria gaukara lau dekenai idia henia.” Iena taihudia be ia dekenai idia badu badina ia lalokau henia mamoe naria merona ese ia boiria idia ruaosi do idia loaloa totona. Idia ura lasi do ia lao dainai, idia ese gaukara ta idia henia, unai be “vain umadia idia hadikaia” mariboi do ia lulua. Unai gaukara ia karaia dainai, ia be Solomona ena kamepa kahirakahira ia lao. “Okari audia edia uma gabuna lalonai” ia raka neganai, Solomona ese iena hairai ia itaia, bona kamepa dekenai idia mailaia.—Solomona ena Ane 1:6; 2:10-15; 6:11.
Sulama kekeni be ena lalokau mamoe naria merona ia ura itaia dainai, Ierusalema hahine ese ia idia hamaoroa ‘mamoe edia aena gabudiai do ia raka’ bona unai mero do ia tahua. To Solomona ia ura lasi kekeni do ia lao. Solomona ese kekeni ena hairai ia herevalaia murinai, ia dekenai ia gwauhamata “golo herahera gaudia, mai siliva danu” do ia henia. To, unai ese kekeni ena lalona ia veria lasi. Mamoe naria merona be Solomona ena kamepa dekenai ia vareai bona kekeni ia davaria, bena ia gwau: “Egu lalokau e, oi be hairai herea momokani.” Kekeni ese Ierusalema hahine ia oda henia: “Aiemai ura henia dekena amo, ai do umui boiboi lasi, ai do umui hanogaia lasi, ela bona ai sibona ai ura do ai noga.”—Solomona ena Ane 1:8-11, 15; 2:7; 3:5.
Baibel Henanadaidia Edia Haere:
1:2, 3—Dahaka dainai Sulama kekeni be mamoe naria merona ena lalokau herevadia ia laloa neganai, idia be uaina bamona, bona iena ladana be dehoro bamona? Uaina ese ta ena lalona ia hamoalea bona kwarana dekenai idia bubua dehoro be namo herea bamona, kekeni ese mero ena lalokau bona ladana ia laloatao neganai, ia moale bona ena lalona ia hagoadaia. (Salamo 23:5; 104:15) Keristani taudia korikori, horoa taudia unai, be Iesu Keriso ese idia dekenai ia hahedinaraia lalokauna idia laloatao be namo, unai ese idia do ia hagoadaia.
1:5—Dahaka dainai Sulama kekeni ia gwau ena kopina koremana be “Kedara dabua rumadia bamona”? Nanigosi ena huina amo dabua idia karaia, bona unai dabua amo gau momo idia karaia diba. (Numera 31:20) Hegeregere, ‘nanigosi huina amo idia karaia dabua’ idia gaukaralaia “Palai Dubu” idia karaia totona. (Esodo 26:7) Hari inai negai, Bedouin taudia edia palai rumadia bamona, Kedara dabua rumadia be nanigosi ena huina koremana amo idia karaia.
1:15—Mamoe naria merona ena hereva: “Oiemu matana ena toana be pune manu bamona,” ena anina be dahaka? Mamoe naria merona ia gwau iena turana kekeni ena matana be mai ena hairai, pune manu ena matana bamona.
2:7; 3:5—Dahaka dainai Sulama kekeni ese Ierusalema hahine be ‘uda nanigosi bona dia namodia’ edia ladana ai ia oda henidia? Uda nanigosi bona dia namodia be mai edia hairai bona edia toana be namo herea. Unai dainai, Sulama kekeni ese mai hairai bona toana namo herea gaudia ibounai amo Ierusalema hahine ia oda henidia, ia dekenai lalokau ena hemami do idia havaraia lasi.
Ita Dibaia Gaudia:
1:2; 2:6. Kekeni bona mero idia loa hebou neganai, lalokau herevadia goevadia idia gwauraia. To, namona be edia hereva ese lalokau korikori ia hahedinaraia, bona ura dikana ia havaraia lasi. Badina ura dikana ese ia veridia diba matabodaga karana idia karaia totona.—Galatia 5:19.
1:6; 2:10-15. Sulama kekeni ena taihudia idia ura lasi, edia taihuna be mamoe naria merona ida taunimanima idia noho lasi ororo gabuna dekenai do ia lao. Idia gwau lasi ia be lebulebu eiava lalohadai dikana ta ia abia dainai idia koua. To, ia idia koua ena badina be, idia ura lasi hedibagani do ia davaria. Idia loa hebou mero bona kekeni dekenai unai be hakaua hereva namona ta, namo lasi taunimanima idia noho lasi gabudia dekenai idia lao.
2:1-3, 8, 9. Ena be ia be mai ena hairai, to Sulama kekeni be mai manau ida ia gwau ia be Sarona dekenai idia vara palauapalaua ta sibona. Ia be Iehova ia abidadama henia bona mai ena hairai dainai, mamoe naria merona ia gwau ia be “sosana palauapalaua, ava ginigini edia huanai bamona.” Bona mero ena toana be edena bamona? Ia be mai ena hairai dainai, kekeni ia gwau ia be “uda nanigosi” bamona. Bona ia be Iehova ia badinaia bona abidadama henia momokani. Kekeni ia gwau: “Tau edia huanai egu lalokau tauna be, apolo auna, uda audia edia huanai bamona.” Oi ura adavaia tauna be Dirava ia abidadama henia bona ia badinaia be namo.
2:7; 3:5. Sulama kekeni be Solomona ia lalokau henia lasi. Kekeni ese Ierusalema hahine danu ia oda henia tau idauna ma ta ia lalokau henia ena hemami ia dekenai idia havaraia lasi totona, badina ia be mamoe naria merona sibona ia lalokau henia. Namo lasi ita ese tau ta eiava kekeni ta ita ura henia kava. To, bema headava lasi Keristani tauna ta ia ura headava, Iehova ena hesiai tauna ta sibona ia adavaia be namo.—1 Korinto 7:39.
“BADINA DAHAKA LAU, SULAMA HAHINE UMUI URA ITAIA?”
(Solomona ena Ane 3:6–8:4)
Gau ta be “tano kaukau dekena amo ia mai noho, kwalahu ena ori toana bamona.” (Solomona ena Ane 3:6) Ierusalema hahine be dahaka idia itaia? Solomona bona ena hesiai taudia be hanua dekenai idia giroa mai noho! Bona king be Sulama kekeni danu ia mailaia.
Mamoe naria merona be kekeni ia tahua bona ia davaria neganai, ia hamaoroa, ia ese ia lalokau henia. Kekeni be unai ia kamonai neganai ia ura unai hanua do ia rakatania, ia gwau: “Muro ena ororo dekenai do lau lao, unai bonana namo gabua muramura, ena ororo dekenai do lau noho, ela bona daba do ia rere, bona hanuaboi do ia ore.” Kekeni ese mamoe naria merona ia boiria “ena uma, dekenai do ia raka vareai, bona iena huahua namodia momokani do ia ania.” Mero ia gwau: “Egu lalokau, egu adavana e, egu uma lalonai lau raka vareai vadaeni.” Ierusalema hahine idia gwau: “Aiemai turadia e, do umui aniani, bona inuinu. Umui lalokau tauna bona hahine e, do umui inua momo.”—Solomona ena Ane 4:6, 16; 5:1.
Sulama kekeni be Ierusalema hahine dekenai ena nihi ia gwauraia murinai, ia ese idia ia hamaoroa: “Egu ura henia ese, egu lalona ia hamasea noho.” Idia henanadai: “Oiemu lalokau tauna be edena bamona iena namo, ese tau haida edia namo ia hereaia?” Kekeni ia gwau: “Egu lalokau tauna ena kopina, be goevagoeva bona kakakaka, tau ibounai 10,000 edia huanai, ia sibona be namo herea.” (Solomona ena Ane 5:2-10) Ena be Solomona be kekeni ena lalona ia veria totona, hanamoa herevadia ia gwauraia, to kekeni ia gwau: “Badina dahaka lau, Sulama hahine umui ura itaia?” (Solomona ena Ane 6:4-13) King ia laloa unai be nega namona kekeni ena lalona do ia veria totona, unai dainai hanamoa hereva ma haida ia gwauraia. To, kekeni be mamoe naria merona ia lalokau henia bada. Unai dainai, Solomona ese kekeni be ena hanua dekenai ia siaia lou.
Baibel Henanadaidia Edia Haere:
4:1; 6:5—Dahaka dainai Sulama kekeni ena huina be “nanigosi orea” bamona? Unai ese ia hahedinaraia iena huina be mai ena hairai bona namo herea, nanigosi ena huina koremana bamona.
4:11—Sulama kekeni ena ‘udu bibina be hani ena mamina namona’ bona ena “malana be rata bona hani,” ena anina be dahaka? Nanigo ena hani haboua rumana amo idia abia hani be ia gaiho momokani. Bona Sulama kekeni malana be hani bona rata bamona, ena anina be ena hereva be hemami namona ia havaraia bona ia kamonai tauna ia hamoalea.
5:12—Mero ena “matana be pune manu, ranu namona badinai noho gaudia bamona, rata dekenai idia huria gaudia” ena anina be dahaka? Laulau dalanai Sulama kekeni ia gwau ena lalokau merona ena matana ena toana be namo herea.
5:14, 15—Dahaka dainai inai siri lalonai mamoe naria merona ena aena bona imana be unai bamona ia gwauraia? Sulama kekeni be mamoe naria merona ena ima kwakikwaki bona ena koukouna ia herevalaia, idia be golo, idia koroa kuboru gaudia bona mai herahera nadi bamona. Ia gwau mero ena aena be “nadi kurokuro du goadadia bamona,” badina idia goada bona edia toana be namo herea.
6:4—Dahaka dainai inai siri ese Sulama kekeni be Tirisa hanua ida ia hahegeregerea? Unai Kanana hanuana be Iosua ese ia abia, bona Solomona ena negai unai hanua be Israela ena iduhu 10 ena siti ginigunana ai ia lao. (Iosua 12:7, 24; 1 King Taudia 16:5, 6, 8, 15) Buka ta ia gwau: “Toana be unai hanua be mai ena hairai, unai dainai unai siri lalonai idia gwauraia.”
7:4—Dahaka dainai Solomona ia gwau Sulama kekeni ena aiona be “aivori” ena kohoro bamona? Solomona ese guna ia hereva henia neganai, ia gwau: “Oiemu aiona be Davida ena kohoro bamona.” (Solomona ena Ane 4:4) Kohoro be ia lata, bona aivori be ia manada. Kekeni ena aiona be manada momokani bona ia lata dainai, Solomona ese ia ura henia.
Ita Dibaia Gaudia:
4:7. Ena be Sulama kekeni be ia goevadae lasi, to Solomona ena laloani herevadia ia dadaraia dainai, ia hahedinaraia ia be kara maoromaoro ia badinaia. Unai kara ia goadalaia dainai, unai ese iena hairai ia habadaia. Keristani hahine be unai bamona idia karaia be namo.
4:12. Sulama kekeni ena lalokau be hegeregere uma gabu hairaina ta bamona. Ia lalonai au idia tubu bona ia be magu amo idia koua bona idia lokaia geiti sibona amo idia vareai diba. Gabeai do ia adavaia tauna sibona dekenai iena lalokau ia hahedinaraia. Unai be haheitalai namo herea headava lasi hahine bona tau dekenai!
“LAHI ENA SIAHU BAMONA”
(Solomona ena Ane 8:5-14)
Sulama kekeni be ruma dekenai ia giroa neganai, ena taihudia idia henanadai: “Unai be daika, tano kaukau dekena amo ia mai noho, iena lalokau tauna ena imana ia dogoatao noho?” Guna idia ta ia gwau: “Bema ia be magu neganai, ai ese siliva kohoro dekena amo do ai ha-aukaia. Bema ia be iduara neganai, sida reirei audia dekena amo do ai koua.” Sulama kekeni ena lalokau be idia tohoa vadaeni dainai, ia gwau: “Lau be magu, bona egu ratana ruaosi be kohoro bamona. Unai dainai egu lalokau tauna dekenai, lau ese lalo namo bona maino lau henia noho.”—Solomona ena Ane 8:5, 9, 10.
Lalokau korikori be “lahi ena siahu bamona.” Dahaka dainai? Badina unai bamona lalokau be Iehova amo. Ia ese ma ta lalokau henia hemamina ia atoa ita dekenai. Unai bamona lalokau ena siahu be ita habodoa diba lasi. Solomona ena Ane bukana ese tau bona hahine huanai ia noho lalokauna ia hahedinaraia namo herea, ia gwau ia be “mase ena goada hegeregerena.”—Solomona ena Ane 8:6.
Solomona ena ane ese guba dekenai Iesu Keriso bona ena “headava matamata kekeni” huanai ia noho lalokauna ia hahedinaraia danu. (Apokalupo 21:2, 9) Iesu ena lalokau horoa Keristani taudia totona ese tau bona hahine huanai ia noho lalokauna ia hereaia. Headava matamata kekeni ena orea taudia be edia abidadama dekenai idia gini goada noho. Iesu be mai lalokau ida “mamoe idaudia” totona ena mauri ia henia danu. (Ioane 10:16) Iehova idia tomadiho henia taudia be Sulama kekeni ena lalokau bona badinaia karana ena haheitalai idia tohotohoa diba.
[Picture on page 4, 5]
Solomona ena Ane hegeregerena, ita ura adavaia tauna dekenai dahaka gaudia ita tahua be namo?