Emu Natudia Oi Hadibaia Haere Idia Henia Totona

MEXICO dekenai, hahine ta ladana Perla ia gwau, ia maragi neganai iena sinana ese ia durua Gima Kohorona Stadi totona haere kwadogina ia hegaegaelaia. Hari Perla be mai ena natuna mero, iena mauri lagani be faiv. Edena dala ai ia durua? “Namona be Gima Kohorona lau hegaegaelaia guna. Unai bamona lau karaia lalonai, egu natuna ese do ia lalopararalaia bona sibona ena hereva amo ia gwauraia diba paragraf lau tahua. Bena lau abia hidi paragraf be egu natuna ida ai herevalaia. Egu natuna lau noia, ia lalopararalaia dalanai unai paragraf ia haerelaia totona. Bena unai haere ia gwauraia loulou. Gau ta ena bada be maikrofon ena bada bamona ai gaukaralaia, unai amo haere ia henia neganai ia diba maikrofon be edena bamona do ia dogoatao. Lau moale bada badina hebou ibounai dekenai ia be haere ia henia o ena imana ia abia isi. Nega momo, hebou ia do matamaia lasi neganai ia lao Gima Kohorona naria tadikaka ia hamaoroa, ia be edena paragraf do ia haerelaia.”

Hindi gado ena grup ia naria elda tauna ta, Jens be mai ena natuna memero rua, ta ena mauri lagani be rua bona ma ta ena mauri lagani be foa. Ia bona ena adavana be edia natudia ida hebou totona idia hegaegae neganai, Jens be ena tama sina amo ia dibaia gaudia ia gaukaralaia. Ia gwau: “Natudia ese idia lalopararalaia gaudia ai abia hidi. Bena unai kahana ena hereva badadia ai herevalaia, unai murinai ai ura hebou dekenai do idia henia haere ena henanadai ai henia. Nega momo ai hoa badina sibona edia hereva amo haere idia henia. Sibona edia hereva amo haere idia henia karana ese ia hahedinaraia idia laloparara. Unai dainai, edia haere amo Iehova idia hanamoa bona edia abidadama ena badina idia hahedinaraia.”