Emu Helaro Oi Gwauraia Hedinarai, Oi Marere Lasi
1 Hari inai negai, Dirava ena taunimanima be ‘nega korikori dekenai aniani idia abia’ dala badana be Gima Kohorona Stadi amo. (Mat. 24:45) Unai mai anina bada hebouna dekenai ita lao ena badina be rua—ita ura iseda goada lauma dalana ai ita habadaia bona ita ura taunimanima ma haida dekenai iseda helaro ita gwauraia hedinarai.—Heb. 10:23-25.
2 Sibona Ita Hanamoa: Ia hedinarai gauna be inai, kahirakahira kongregesen iboudiai dekenai helai taudia kahana toi toi amo kahana tamona sibona ese stadi herevana idia hegaegaelaia guna. Unai taudia sibodia idia haere danu. Gima Kohorona Stadi lalonai lauma aniani aukana idia hahedinaraia, bona unai hebou sibona lalonai hereva ena mamina ibounai ita abia diba lasi. Namona be nega ita atoa unai stadi herevana ita hegaegaelaia guna totona.
3 Stadi totona ita hegaegae neganai, ita ia durua gauna be stadi ena hereva dokona kahana ai ia noho maua lalonai idia noho henanadai ita duahidia bona ita lalodia namonamo. Unai henanadai ese iseda lalona idia veria stadi ena hereva badadia ita lalodia totona.
4 Stadi ia heau noho lalonai ita hakala namonamo. Stadi naria tauna ena hamatamaia herevadia ita hakala henia namonamo; unai hereva ese iseda lalona ia veria stadi herevadia ita lalodia totona. Reana stadi lalonai do idia haerelaia henanadai toi eiava hani do ia gwauraidia hedinarai, eiava bema hari pura ena stadi be pura gunana ena stadi herevana do ia habadaia, stadi gunana ena hereva badadia do ia riviulaidia. Bema iseda diba peroveta herevana ta dekenai eiava Baibel ena taravatu ta dekenai ita hamaoromaoroa be namo, ia ese unai lalohadai matamatana ita dekenai do ia hahedinaraia. Momokani, stadi naria tauna ena hereva do idia kwadogi sibona, badina stadi ena badina ta be kongregesen taudia edia helaro idia gwauraia hedinarai diba. Haida ese edia diba hegeregerena haere idia henia neganai namona be oi hakala namonamo; unai ese oi ia durua emu abidadama ia hagoadaia totona.
5 Emu Helaro Oi Gwauraia Hedinarai: Stadi lalonai oi ese haere haida oi henia, a? Haere kwadogi bona maorodia oi henia be namo. (Luka 21:1-4 itaia danu.) Kudouna amo haere kwadogina oi henia neganai helai taudia iboudiai ese idia moalelaia. Namona be henanadai ena haere ginigunana be ia kwadogi bona anina ia hedinarai namonamo. Unai murinai ma haida edia haere amo Baibel siri ta eiava paragraf ena hereva ma ta idia gwauraia hedinarai diba. Unai dala amo helai taudia momo ese edia helaro idia gwauraia hedinarai diba. Hanaihanai idia henia haere amo heduru bona hagoadaia herevadia sibodia idia gwauraia be namo.
6 Bema hari sibona Gima Kohorona stadi dekenai oi lao eiava bema haere henia garina oi gari, namona be stadi naria tauna oi nanadaia oi ia durua totona. Paragraf ta ena haere oi hegaegaelaia bena unai paragraf be dahaka oi hadibaia, bena henanadai do ia gwauraia neganai oiemu imana do ia tahua diba. Bema oi ura, idia torea Baibel sirina ta oi duahia bena ena anina be hereva kwadogina amo oi gwauraia diba. Haere oi hegaegaelaia neganai, namona be rau ena isena dekenai hereva haida oi torea oi idia durua totona. Bema oi be mero o kekeni maragina ta, laloaboio lasi, ai ura haere oi henia bona ai moalelaia danu.—Mat. 21:16.
7 Iseda abidadama ita gwauraia hedinarai be gau badana, bona Gima Kohorona Stadi be nega namona unai ita karaia totona. Haere totona bema oi gari, oi goada karaia unai hekwakwanai oi hanaia totona, bona sibona oi hagoadaia haere tamona oi henia totona. Unai amo hebou do oi durua, bona sibona dekenai do oi moale. Vadaeni, namona be oi hegaegae pura vaira ena Gima Kohorona Stadi dekenai haere tamona sibona do oi henia totona, ani?—Her. 15:23.
[Questions]
1. Gima Kohorona Stadi dekenai dahaka ita abia?
2. Gima Kohorona Stadi amo namo bada do ita abia dalana be dahaka?
3. Stadi totona ita hegaegae neganai, heduru gauna namona ta be dahaka?
4. (a) Stadi ia heau noho lalonai dahaka dahaka totona ita hakala namonamo be namo? (b) Unai ese ita edena bamona do ia durua diba?
5. Haere ita henia neganai, namona be edena bamona ita haere mani oi gwauraia hedinarai.
6. Bema hari sibona oi mai hebou eiava haere garina oi gari, heduru do oi abia totona, dahaka do oi karaia diba?
7. Gima Kohorona Stadi dekenai ita lao neganai, dahaka do ita karaia be namo?