Duahia Taudia Edia Henanadai
Guba helarona idia abia Keristani taudia haboua karana be edena nega ai do ia ore?
Baibel ese unai henanadai ena haere ia gwauraia lasi. To ita diba, lagani 33 C.E. ai, Dirava ese Iesu ena hahediba taudia ia horoa matamaia, guba dekenai idia lohia totona. (Kara 2:1-4) Ita diba aposetolo taudia idia mase murinai, horoa Keristani taudia, “uiti” unai, bona “ava,” Keristani taudia koikoidia unai, idia tubu hebou. (Mataio 13:24-30) Lagani 1800 dokonai, horoa Keristani taudia be edia gaukara idia goadalaia lou. Lagani 1919 ai, “tanobada ena anina” gogoa gaukarana ia hamatamaia, bona horoa taudia oredia idia haboua danu.—Apokalupo 14:15, 16.
Lagani 1800 ena dokona amo ema bona lagani 1931 ai, haroro gaukara idia karaia goadagoada ena badina badana be Keriso ida do idia lohia taudia oredia idia haboua totona. Lagani 1931 ai, Bible Student taudia be Baibel amo inai ladana Iehova ena Witnes taudia idia abia, bona November 15, 1933 ena Watchtower ia gwau, Mataio 20:1-16 ai Iesu ese ia gwauraia “kina ta” be unai ladana namona ia laulaulaia. Idia laloa unai parabole ai hora 12 be lagani 12, lagani 1919 amo ia lao lagani 1931. Unai dainai, lagani momo lalonai idia laloa guba Basileia dekenai Keriso ida do idia lohia taudia haboua karana be lagani 1931 ai ia ore, bona lagani 1930 bona 1931 lalonai idia haboua horoa taudia be ginigabedia. (Mataio 20:6-8) To, lagani 1966 ai, unai parabole dekenai lalohadai matamata idia abia, bona idia laloparara ia be horoa taudia edia boiria karana ena dokona ia herevalaia lasi.
Lagani 1935 ai, idia laloparara Apokalupo 7:9-15 ese ia gwauraia “hutuma bada” be “mamoe idaudia,” idia be tanobada helarona idia abia Keristani taudia. Idia be “nega ena dokona” ai do idia haboua bona Aramagedono ai do idia roho mauri. (Ioane 10:16; 2 Timoteo 3:1; Apokalupo 21:3, 4) Lagani 1935 murinai, hahediba taudia halaoa gaukara idia karaia goadagoada ena badina badana be hutuma bada taudia idia haboua. Unai dainai, lagani 1966 murinai, idia laloa guba helarona idia abia taudia haboua karana be lagani 1935 ai ia ore. Unai idia hamomokania badina lagani 1935 murinai idia bapatiso taudia momo idia abia dae edia helaro be tanobada dekenai. Idia laloa bema ta be unai lagani murinai guba helarona ia abia, ia be hereva momokani ia rakatania horoa Keristani tauna ta ena gabu ia abia.
Ita daradara lasi, bema horoa tauna ta be hereva momokani ia rakatania, Iehova ese ma ta do ia abia hidi ena gabu ia abia totona. (Roma 11:17-22) To, hereva momokani idia rakatania horoa taudia edia namba be bada lasi. Bona, lagani 1935 murinai idia bapatiso Keristani taudia haida be Dirava ese lauma helaga ena siahu amo ia abia hidi guba helarona idia abia totona. (Roma 8:16, 17) Unai ese ia hahedinaraia guba helarona idia abia Keristani taudia haboua karana ia doko negana ita abia hidi diba lasi.
Bema ta be ia diba momokani ia be hari horoa tauna, bona Memorial dekenai uaina ia inua bona paraoa ia ania, unai bamona tadikaka o taihu be edena bamona ita laloa be namo? Ia do ita hahemaoro henia lasi. Unai be ia bona Iehova huanai. (Roma 14:12) To, horoa Keristani taudia idia gwau lasi taunimanima be idia do idia laloa bada. Idia laloa lasi idia be horoa taudia dainai edia diba be bada, to hutuma bada taudia edia diba be maragi. Idia gwau lasi idia sibona ese lauma helaga ena siahu bada idia abia, bona mamoe idaudia idia abia siahu be maragi. Danu idia gwau lasi haida ese do idia kara namo henia be namo, bona idia be uaina idia inua bona paraoa idia ania dainai, idia ese kongrigeisen lalonai idia noho elda taudia idia hereaia. Idia laloatao aposetolo edia negai horoa taudia haida be elda eiava hesiai tauna ena maduna idia abia lasi. (1 Timoteo 3:1-10, 12, 13; Tito 1:5-9; Iamesi 3:1) Horoa Keristani taudia haida be lauma dalanai idia manoka danu. (1 Tesalonika 5:14) Bona ena be taihu haida be horoa taudia, to kongrigeisen ai hadibaia gaukara idia karaia lasi.—1 Timoteo 2:11, 12.
Unai dainai, horoa Keristani taudia bona edia bamodia, mamoe idaudia taudia unai, idia ura edia hetura karana Iehova ida do ia goada noho, lauma helaga ena huahua do idia hahedinaraia bona idia gaukara goada kongrigeisen lalonai maino ia noho totona. Keristani taudia ibounai, horoa taudia eiava mamoe idaudia, be Hakaua Oreana ena hakaua henunai idia gaukara goadagoada sivarai namona idia harorolaia bona hahediba taudia halaoa gaukarana idia karaia. Horoa Keristani taudia be Dirava ena ura hegeregerena, tanobada dekenai Iehova ena hesiai gaukara idia karaia noho diba dainai, idia moale.