Toreisi Lou—Ia be mai Anina Bada Oi Dekenai, A?
“Mase taudia dohore idia toreisi lou.”—KARA 24:15.
1. Dahaka dainai mase be ita reaia diba lasi?
“HARI tanobadana lalonai ita reaia diba lasi gaudia rua be inai: Mase bona takisi henia karana.” Unai hereva be lagani 1789 ai America ena gavamani tauna Benjamin Franklin ese ia torea, bona diba bada taudia idia gwau unai hereva be momokani. To, taunimanima momo be idia koikoi bona takisi moni idia henia lasi eiava takisi moni ena kahana sibona idia henia. Toana be ita ibounai do ita mase, bona bema heduru ita abia lasi, mase do ita reaia diba lasi. Sheol—mase taudia edia guri gabuna—be ia hitolo bada, bona ia ura iseda lalokau taudia do ia hadonoa. (Aonega Herevadia 27:20) To, mani inai lalohadai namona ita laloa.
2, 3. (a) Taunimanima momo idia laloa do idia mase, to dahaka dainai haida be do idia mase lasi? (b) Inai stadi lalonai dahaka do ita herevalaia?
2 Baibel ese toreisi lou, mase amo mauri lou ena helaro ia gwauraia. Unai be nihi ta sibona lasi, bona gau ta guba ai eiava tanobada ai ese Iehova do ia koua lasi unai helaro namona ia hagugurua totona. Taunimanima momo idia laloa ita ibounai do ita mase, to haida idia abia dae do idia mase lasi. Dahaka dainai? Badina Baibel ia gwau, “hutuma bada” be “hisihisi badana” amo do idia roho mauri, bona do idia mauri ela bona hanaihanai. Unai dainai, do idia mase lasi. Bona “Dirava ese mase danu do ia haorea.”—Apokalupo 7:9, 10, 14, NW; 1 Korinto 15:26.
3 Aposetolo Paulo bamona, namona be ita diba toreisi lou helarona be do ia vara momokani. Ia gwau: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:15) Toreisi lou karana dekenai, mani henanadai toi ita laloa. Ginigunana be, dahaka ese ia hahedinaraia toreisi lou do ia vara momokani? Iharuana be, edena dala ai toreisi lou helarona ese oi ia hagoadaia? Ihatoina be, unai helaro ese edena dala ai hari inai negai emu mauri dalana ia durua diba?
Toreisi Lou Do Ia Vara Momokani
4. Dahaka dainai Iehova ena palani dekenai toreisi lou helarona be mai anina bada?
4 Gau haida ese idia hahedinaraia toreisi lou be do ia vara momokani. To, gau badana be toreisi lou helarona be mai anina bada Iehova ena palani dekenai. Laloatao, Satani ese taunimanima ia koia dainai idia kara dika, unai amo mase ia vara. Iesu ese Satani be inai bamona ia gwauraia: “Hamatamaia nega dekena amo ia be alaia tauna.” (Ioane 8:44) To Iehova ia gwauhamata iena “hahine,” eiava iena hahine bamona guba oreana be “garana” ta do ia havaraia, bona unai garana ese “idaunegai gaigaina,” Satani ena kwarana do ia moia, bona do ia hamasea vaitani. (Genese 3:1-6, 15, BHğ; Apokalupo 12:9, 10; 20:10) Iehova ese Garana ena gaukara ia hahedinaraia neganai, ia hedinarai garana ese Satani do ia haorea sibona lasi, to kara ma haida do ia karaia danu. Baibel ia gwau: “Dirava ena Natuna ia hedinarai ena badina korikori be inai: Satani ena kara dika do ia haorea momokani.” (1 Ioane 3:8) Iehova ese do ia haorea kara badana ta be, Adamu amo ia mai kara dika bona mase do ia kokia, bona Iesu amo unai do ia karaia. Unai dainai, Iesu ena mauri davalaia boubouna bona toreisi lou helarona be mai anina bada.—Kara 2:22-24; Roma 6:23.
5. Dahaka dainai toreisi lou karana ese Dirava ena ladana do ia hahelagaia?
5 Iehova be ia ura iena ladana ia hahelagaia. Satani ese Dirava ena ladana ia hadikaia bona koikoi herevadia ia gwauraia. Ia koikoi bona ia gwau Adamu bona Heva ‘do idia mase lasi’ bema Dirava ese ia taravatua au huahua idia ania. (Genese 2:16, 17; 3:4) Unai nega amo, Satani be unai bamona koikoi herevadia ma haida ia havaraia. Hegeregere, hahediba koikoi herevana amo taunimanima ia koia, ia gwau idia mase neganai edia laumana be ia mauri noho. To, toreisi lou helarona amo, Iehova ese unai hahediba hereva ibounai do ia hakoikoia. Bona Iehova be do ia hahedinaraia ia sibona be Mauri Henia Tauna.
6, 7. Taunimanima hatorea isi lou karana dekenai Iehova ena hemami be dahaka, bona edena bamona unai ita diba?
6 Iehova ia ura bada mase taudia do ia hatorea isi lou. Iehova ena hemami be Baibel ese ia hahedinaraia. Hegeregere, abidadama tauna Iobu ena hereva mani oi laloa, ia gwau: “Bema tau ta ia mase, ia be do ia mauri lou, a? To lau ese nega namodia totona do lau naria noho. Do lau naria noho, ela bona inai hisihisi bona hekwarahi idia ore. Unai neganai oi ese lau dekenai do oi boiboi, vadaeni oi dekenai do lau haere, bona lau, oi ese oi karaia tauna dekenai, do oi moale noho.” (Iobu 14:14, 15) Unai hereva ena anina be dahaka?
7 Iobu ia diba ia mase neganai, do ia naria noho sibona. Ia be “davana totona idia gaukara auka taudia edia noho bamona,” ena ruhaia negana do ia naria noho. Iobu ia diba ia naria negana be do ia mai. Dahaka dainai? Badina Iehova ena hemami ia diba. Iehova ena ura badana be ena hesiai taudia do ia itaia lou. Unai ese ia hahedinaraia, Dirava ia ura momokani kara maoromaoro taudia do ia hatorea isi lou. Iehova ese dala do ia kehoa ma haida be tanobada Paradaiso ai mauri hanaihanai idia abia totona. (Luka 23:43; Ioane 5:28, 29) Unai be Dirava ena ura dainai, daika ese Ia do ia koua?
8. Edena dala ai Iehova ese toreisi lou helarona ia “hamomokania”?
8 Iseda helaro nega vaira totona be Iesu ena toreisi lou ese ia hamomokania. Paulo be Atena dekenai ia haroro neganai, ia gwau: “Dirava ese dina ta ia abia hidi vadaeni, unai dina dekenai iena abia hidi Tauna ese tanobada ibounai do ia kota henia mai maoromaoro danu. Bona inai kara Dirava ese ia hamomokania taunimanima ibounai edia vairanai, unai Tau mase dekena amo ia hamauria dainai.” (Kara 17:31) Paulo ena hereva idia kamonai taudia haida be toreisi lou herevana idia kamonai neganai, idia kirikirilaia. To, haida be abidadama taudia ai idia lao. Reana, toreisi lou helaro be do ia vara momokani dainai, unai ese edia lalona ia veria. Iehova ese Iesu ia hatorea isi lou neganai, unai be hoa kara badana ta. Ia ese ena Natuna be mase amo ia hatorea isi lou neganai, ia be lauma tauna goadana ta bamona ia toreisi lou. (1 Petero 3:18) Iesu ia toreisi lou murinai, ia abia siahuna ese guna tanobada dekenai ia do mai lasi negana ai ia abia siahuna ia hereaia. Iesu be mase diba lasi maurina ia abia bona iena siahu be bada herea, Iehova sibona ese iena siahu ia hereaia. Hari, Iesu be ia hegaegae noho iena Tamana amo gaukara namona ta ia abia totona. Iesu dainai, Iehova ese toreisi lou do ia havaraia, haida be guba dekenai bona haida be tanobada dekenai. Iesu ia gwau: “Toreisi lou be lau inai, mauri danu be lau.” (Ioane 5:25; 11:25) Iehova be iena Natuna ia hatorea isi lou dainai, ia hamomokania kamonai taudia ibounai be do idia toreisi lou.
9. Edena dala ai Baibel ese ia hahedinaraia toreisi lou be do ia vara momokani?
9 Toreisi lou karana be taunimanima ese idia itaia bona Baibel lalonai idia torea. Baibel ese tanobada ai idia mase bona idia mauri lou taudia 8 edia sivarai ia gwauraia. Unai hoa karadia be hunia dekenai idia karaia lasi, to taunimanima ese idia itaia. Lasaro be ia mase bona dina foa murinai Iesu ese ia hatorea isi lou, bona idia taitai noho taudia momo be unai idia itaia—reana unai taudia be iena ruma bese taudia, turadia, bona dekena taudia. Unai ese ia hamomokania Iesu be Dirava ese ia siaia mai, bona Iesu ena inai taudia ese unai idia hakoikoia diba lasi. To, dala idia tahua Iesu bona Lasaro idia hamasea totona! (Ioane 11:17-44, 53; 12:9-11) Oibe, ita diba toreisi lou be do ia vara momokani. Dirava ese guna idia vara toreisi lou edia sivarai be Baibel dekenai ia torea, ita ia durua bona iseda abidadama ia hagoadaia totona.
Toreisi Lou Helarona ese Ita Ia Hagoadaia
10. Edena dala ai Baibel lalonai toreisi lou sivaraidia ese ita idia hagoadaia diba?
10 Bema mase dainai oi gari, dahaka ese oi do ia hagoadaia? Baibel lalonai idia torea toreisi lou sivaraidia ese oi do idia hagoadaia. Unai bamona sivarai oi duahia, oi laloa dobu bona lalohadailaia neganai, do oi abia dae toreisi lou helarona be do ia vara momokani. (Roma 15:4) Unai be gori sibona lasi. To, gabu korikori ai bona nega korikori ai taunimanima dekenai ia vara. Mani Baibel lalonai idia torea toreisi lou karana ginigunana ita laloa.
11, 12. (a) Vabu dekenai dahaka ia vara, bona ia be dahaka ia laloa? (b) Iehova ena siahu amo Elia ese vabu totona dahaka hoa karana ia karaia?
11 Mani inai oi laloa. Wiki haida lalonai, peroveta tauna Elia be Sarepata hanua ena vabu ta ena ruma dekenai ia noho. Unai be lalohisihisi negana. Unai gabu ai medu ia diho lasi dainai doe ia vara. Taunimanima momo idia mase noho. Guna, Iehova ese Elia ia gaukaralaia hoa karana ta amo unai abidadama vabu ia durua totona. Aniani be bada lasi dainai, vabu bona iena natuna mero be do idia hitolo bada, to Dirava ena siahu amo Elia be hoa karana ta ia karaia, bona vabu ena flaoa bona oela ia ore lasi. To hari, vabu dekenai dika ta ia vara. Iena natuna mero be ia gorere bona ia mase. Unai vabu ia lalohisihisi bada! Iena tau ia mase dainai, mauri be ia auka, ma hari iena natuna ia mase dainai ia lalohisihisi bada herea. Ia gwau Elia bona Iehova Dirava ese ena natuna idia hamasea! Peroveta tauna be dahaka do ia karaia?
12 Elia be unai vabu ena lalohisihisi herevana dainai ia gwau henia lasi. To, ia gwau: “Oiemu natuna lau dekenai do oi mailaia.” Elia ese mero maragina be ataiai daiutuna dekenai ia abia lao, bona ia guriguri loulou natuna maragina ia mauri lou totona. Vadaeni Iehova ese mase amo unai mero ia hatorea isi lou! Elia be ia itaia mero maragi ia hahodi bona matana ia kehoa neganai, ia moale bada herea. Elia ese mero maragina be ena sinana dekenai ia henia bona ia gwau: “Oi itaia, oiemu natuna be ia mauri noho.” Vabu ia moale bada herea bona ia gwau: “Harihari lau diba oi be Dirava ena tau momokani, bona Lohiabada ese iena hereva oiemu uduna dekena amo ia gwauraia momokani.” (1 King Taudia 17:8-24) Unai ese vabu ena abidadama Iehova bona peroveta tauna Elia dekenai ia hagoadaia.
13. Dahaka dainai Elia ese vabu ena natuna ia hatorea isi lou sivaraina ese ita ia hagoadaia?
13 Unai bamona sivarai oi laloa dobu neganai, oi do ia hagoadaia bada. Ia hedinarai Iehova ese iseda inai tauna mase ia halusia diba! Unai vabu be taunimanima momo idia toreisi lou negana ai do ia moale bada herea! Guba dekenai moale be do ia bada herea, badina Iehova ese iena Natuna do ia gaukaralaia tanobada hegegemadai mase amo taunimanima do ia hatoredia isi lou. (Ioane 5:28, 29) Oiemu lalokau tauna ta ia mase, a? Ita diba Iehova ese mase tauna ia hamauria lou neganai, ita moale bada!
Emu Helaro Bona Mauri Hari Inai Negai
14. Toreisi lou helarona ese oi edena bamona ia durua diba?
14 Hari inai negai, toreisi lou helarona ese edena dala ai oi ia durua diba? Bema nega aukadia, dagedage, eiava dika haida oi davaria, unai helaro ese oi do ia hagoadaia. Satani ia ura mase dainai oi gari, unai amo oiemu abidadama oi rakatania diba. Laloatao, Satani ese Iehova ia hamaoroa: “Tau ta ese iena gau ibounai do ia negea, iena mauri do ia dogoatao totona.” (Iobu 2:4) Satani ese ita ta ta be unai bamona ia gwauraia. Momokani dagedage oi davaria neganai, do oi mase, a? Toreisi lou helarona oi laloa neganai, emu lalona oi hadaia diba emu guba Tamana ena ura oi karaia noho totona.
15. Dika ita davaria neganai, Iesu ena hereva Mataio 10:28 dekenai be edena dala ai ita ia hagoadaia?
15 Iesu ia gwau: “Tauanina be do idia alaia diba, to lauma be do idia alaia diba lasi taudia dekenai do umui gari lasi. To lauma bona tauanina ruaosi lahi ia araia gabuna dekenai do ia alaia mase diba Diravana dekenai be do umui gari, be namo.” (Mataio 10:28) Satani bona iena taunimanima dekenai do ita gari lasi. Momokani, haida ese ita idia hadikaia eiava hamasea diba. To, helaro ia noho. Iehova be iena hesiai taudia ese dagedage amo idia davaria hisihisi do ia haorea, bona mase amo do ia hatorea isi lou. Iehova sibona ita gari henia, ita matauraia bona ita hanamoa be gau badana. Ia sibona be mai ena siahu taunimanima edia mauri hari inai nega ai bona nega gabena ai ia kokia totona. Ia ese taunimanima edia mauri bona tauanina be Gehena dekenai ia negea diba. To, Iehova ia ura lasi oi dekenai unai ia vara. (2 Petero 3:9) Toreisi lou helarona dainai, ita, Dirava ena hesiai taudia be mase dekenai do ita gari lasi. Bema Dirava ita badinaia noho mauri hanaihanai do ita abia, bona Satani bona iena taunimanima be unai do idia koua diba lasi.—Salamo 118:6; Heberu 13:6.
16. Toreisi lou helarona ita laloa karana ese edena dala ai ita ia durua abia hidi maorona ita karaia totona?
16 Bema toreisi lou helarona ita abidadama henia momokani, iseda mauri ia haidaua diba. Ita diba herevana ‘ita mauri noho o do ita mase, to ita be Iehova ena.’ (Roma 14:7, 8) Unai dainai, mai anina bada gaudia ita abia hidi neganai, Paulo ena sisiba ita badinaia be namo: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:2) Taunimanima momo be edia ura gaudia sibona idia abia totona, idia hekwarahi bada. Badina idia laloa mauri be kwadogi dainai, moale karadia idia tahua momo, bona “Dirava ena ura” ida ia hegeregere lasi tomadiho dalana idia badinaia.
17, 18. (a) Baibel ese taunimanima edia mauri kwadogina be edena bamona ia herevalaia, bona Dirava ena ura be dahaka ita dekenai? (b) Dahaka dainai ita ura dina ta ta ai Iehova ita hanamoa?
17 Mauri be kwadogi. “Aiemai mauri be idia ore haraga, vadaeni ai boio,” reana lagani 70 o 80 sibona. (Salamo 90:10) Taunimanima edia mauri be kwadogi momokani, rei ia kakoro haraga, dina ena laulau ia hanaia haraga bona hahodi tamona sibona bamona. (Salamo 103:15; 144:3, 4) To, Dirava ia ura lasi lagani haida sibona lalonai ita noho, diba ita abia, ita gorere eiava ita buruka ita lao bena ita mase. Iehova ese taunimanima ia havaraia neganai, noho hanaihanai urana be edia lalona dekenai ia atoa. Baibel ia gwau: “Nega hanaihanai edia lalona ai ia atoa.” (Hadibaia Tauna 3:11, NW ) Dirava ese unai ura ia henia, to mase ia koua lasi ese ia hahedinaraia ia be dagedage Diravana, a? Lasi, ia be dagedage Diravana lasi, badina “Dirava be lalokau.” (1 Ioane 4:8) Iehova ese mase taudia do ia hatoredia isi lou dainai, mauri hanaihanai do idia abia.
18 Toreisi lou helarona dainai ita moale, bona iseda vaira negana do ita lalohekwarahilaia lasi. Namo lasi ita laloa momo, bona hari inai nega lalonai iseda ura gaudia ibounai ita karaia. Inai tanobada be kahirakahira do ia ore dainai, ena “gau namodia” do ita tahua lasi. (1 Korinto 7:29-31; 1 Ioane 2:17) Tanobada taudia be helaro lasi, to iseda hahenamo namona be ita diba bema Iehova Dirava ita badinaia noho, mauri hanaihanai do ita abia bona Ia do ita hanamoa ela bona hanaihanai. Unai dainai namona be dina ta ta ai Iehova ita hanamoa, badina toreisi lou helarona be do ia vara momokani!
Edena Bamona Do Oi Haere?
• Toreisi lou helarona be edena bamona ita laloa be namo?
• Dahaka dainai toreisi lou helarona be do ia vara momokani?
• Edena dala ai toreisi lou helarona ese oi ia hagoadaia diba?
• Toreisi lou helarona be edena bamona emu mauri dalana ia durua diba?
[Picture on page 10]
Iobu ia diba Iehova be ia ura dikadika kara maoromaoro taudia do ia hatorea isi lou
[Picture on page 11]
“Oi itaia, oiemu natuna be ia mauri noho”