Oi Haheauka Diba ela Bona Iehova Ena Dina Ia Ginidae, A?
“Do umui abidadama sibona lasi . . . to haheauka danu do umui abia.”—2 PETERO 1:5, 6.
1, 2. Dahaka dainai ita haheauka be namo?
IEHOVA ena dina badana be kahirakahira vadaeni. (Ioela 1:15; Sepanaia 1:14) Namona be eda lalona ita hadaia Dirava do ita badinaia noho bona unai dina ita naria, badina Iehova be ena lohia siahuna do ia hahelagaia. To hari, eda abidadama dainai taunimanima ese ita idia badu henia, samania koikoi, dagedage henia, bona alaia mase. (Mataio 5:10-12; 10:22; Apokalupo 2:10) Unai dainai, haheauka karana be gau badana. Petero ia gwau: “Do umui abidadama sibona lasi . . . to haheauka danu do umui abia.” (2 Petero 1:5, 6) Iesu ia gwau: “Do ia haheauka ela bona dokona tauna be do ia mauri.”—Mataio 24:13, BHğ.
2 Danu ita gorere, ta ia mase neganai ita daradoko, bona hahetoho ma haida ita abia. Bema eda abidadama ia manoka, Satani be do ia moale! (Luka 22:31, 32) To, Iehova ese ita ia durua neganai, ita be hahetoho idauidau ita haheaukalaia diba. (1 Petero 5:6-11) Mani ekspiriens haida ita itaia. Badina unai ekspiriens ese idia hamomokania, eda abidadama ia goada noho bona ita haheauka diba ela bona Iehova ena dina ia ginidae.
Gorere ese Idia Ia Hamanokaia Lasi
3, 4. Herevana ita gorere to Iehova ita tomadiho henia diba ena ekspiriens ta mani oi gwauraia.
3 Ena be hari Dirava be hoa dalanai eda gorere ia hanamoa lasi, to Ia be goada ia henia gorere ita haheaukalaia totona. (Salamo 41:1-3) Sharon ia gwau: “Lau maragi negana amo, lau be uilisea dekenai lau helai. Lau vara neganai, egu kwarana ena harana dekenai be gorere ta (cerebral palsy gorere) lau abia. Unai dainai, egu maragi negadia lau moalelaia lasi.” Sharon be Iehova bona ena gwauhamata namodia ia dibaia dainai ia moale. Ena be Sharon ia hekwarahi ia hereva bona raka namonamo totona, to ia be Keristani haroro gaukara ia moalelaia. Lagani 1993 ai, Sharon ia gwau: “Lau diba egu gorere do ia bada ia lao, to egu mauri lalonai Iehova do lau abidadama henia bona tura henia noho. Lau moale bada badina Iehova ena taunimanima huanai lau noho, bona Dirava be nega ibounai lau ia durua bona naria namonamo!”
4 Aposetolo Paulo be Tesalonika ai idia noho Keristani taudia dekenai ia gwau: “Gari taudia [“lalometau taudia,” NW ] do umui hagoadaia.” (1 Tesalonika 5:14) Gau haida ese lalometau idia havaraia diba. Sharon ia gwau: “Lau mamia lau be hegeregere lasi gaukara ta lau karaia totona . . . bona lagani toi lalonai, lau lalometau bada. . . . Elda taudia amo hagoadaia hereva namodia lau abia. . . . Gima Kohorona magasin dekena amo, Iehova be ai ia durua lalometau gorerena ai lalopararalaia totona. Oibe, Iehova be ena taunimanima ia naria, bona edia hemami ia diba.” (1 Petero 5:6, 7) Hari inai negai, Sharon be Iehova ia tomadiho henia noho bona Iena dina badana ia naria noho.
5. Edena ekspiriens ese ia hamomokania, Keristani taudia be gorere idia haheaukalaia diba?
5 Keristani taudia haida be guna idia vara karadia idia laloa loulou. Tanobada Tuarina Iharuana lalonai, Harley be tuari dikadia ia itaia, bona hanuaboi momo ai, unai tuari ia nihilaia. Ia mahuta lalonai, ia be mai gari danu do ia boiboi kava. Ia noga neganai, ena tauanina ibounai be varahu amo ia paripari. To, Harley be ena mauri lalonai Dirava ena hereva namodia ia badinaia dainai, unai bamona nihi be metairametaira idia ore idia lao.
6. Edena dala ai tadikaka ta be ena gorere ia haheaukalaia?
6 Tadikaka ta be gorere ta (bipolar disorder gorere) ia abia dainai, ruma-ta-ruma-ta ai ia haroro be auka. To, ia be unai gaukara ia rakatania lasi, badina ia diba unai gaukara amo ia bona kamonai taudia be mauri do idia davaria. (1 Timoteo 4:16) Nega haida, ruma ena iduara ai ia pidipidi be auka, to ia gwau: “Gabeai, egu lalona lau biagua diba dainai, ruma ma ta dekenai lau lao, bona lau pidipidi lou. Haroro gaukara lau karaia loulou dainai, lau be Iehova lau tura henia noho diba.” Kongrigeisen heboudia totona ia lao be auka danu, to ia gwau, tadikaka taihu ia bamoa be gau badana. Unai dainai, hanaihanai ia be hebou iboudiai dekenai ia lao.—Heberu 10:24, 25.
7. Ena be haida idia gari taunimanima edia vairanai idia hereva o hebou dekenai idia lao totona, to edena dala ai idia haheauka?
7 Tadikaka taihu haida be kara o gau haida dekenai idia gari. Hegeregere, idia gari taunimanima edia vairanai idia hereva eiava hebou dekenai idia lao totona. Mani oi laloa, unai bamona taudia idia gari Keristani heboudia ai idia haere o Tiokratik Haroro Sikuli dekenai tok idia henia totona! To idia haheauka, bona ita moale bada badina idia be hebou totona idia mai bona kahana haida idia durua.
8. Ita gorere neganai, dahaka ita karaia be namo?
8 Mahuta o laga-ani namonamo karana ese ta ia durua, gorere ia haheaukalaia totona. Eiava doketa ena heduru ia tahua. To kara hereadaena be, Iehova guriguri henia karana. Salamo 55:22 ia gwau: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” Danu, “Lohiabada do oi abidadama henia, mai emu kudouna ibounai.”—Aonega Herevadia 3:5, 6.
Daradoko Haheaukalaia
9-11. (a) Iseda lalokau tauna ta ia mase neganai, dahaka ese ita ia durua diba ita daradoko lasi totona? (b) Edena dala ai Ana ena kara be ita ia durua ita daradoko lasi totona?
9 Eda bese tauna ta ia mase neganai, ita daradoko bada. Sara ia mase neganai, Aberahamo be ena adavana lalokauna totona ia tai. (Genese 23:2) Goevadae tauna Iesu ena turana Lasaro ia mase neganai, “Iesu ia tai.” (Ioane 11:35) Oi lalokau henia tauna ta ia mase neganai, oi daradoko be kerere lasi. To, Keristani taudia idia diba, mase taudia be do idia toreisi lou. (Kara 24:15) Unai dainai, idia be tanobada taudia idia tohotoho lasi bona idia lalohisihisi bada lasi.—1 Tesalonika 4:13.
10 Edena dala ai daradoko ita hanaia diba? Haheitalai ta ita laloa be namo. Eda turana ta be gabu daudauna ta ia lao neganai, ita daradoko lasi badina ita diba ia be do ia giroa lou bona do ita itaia lou. Kamonai Keristani tadikaka o taihu ta ia mase neganai, ita diba ia be do ia toreisi lou dainai, ita lalohisihisi bada lasi.—Hadibaia Tauna 7:1.
11 “Durua ibounai ia henia Diravana” ita abidadama henia neganai, unai ese ita ia durua daradoko ita haheaukalaia totona. (2 Korinto 1:3, 4) Iesu ena negai ia noho hahinena, Ana, ena haheitalai be ita do ia durua. Ia headava to lagani 7 sibona murinai iena adavana ia mase. Ana ena mauri lagani be 84, to dubu helaga ai Iehova ena hesiai gaukara ia rakatania lasi. (Luka 2:36-38) Ana be mai ena lalona ibounai ida Dirava ena hesiai gaukara ia karaia dainai, ena be sibona ia noho to ia daradoko lasi. Bema hanaihanai Iehova ena hesiai gaukara idauidau—Basileia harorolaia gaukarana danu—ita karaia, unai ese ita ia durua diba daradoko ita haheaukalaia totona.
Hahetoho Ma Haida
12. Keristani taudia haida ese edia famili lalonai, dahaka hahetoho idia haheaukalaia?
12 Keristani taudia haida ese edia famili lalonai idia vara hahetoho idauidau idia haheaukalaia be namo. Hegeregere, bema headava tauna ia heudahanai, unai ese ena famili taudia dekenai dika bada ia havaraia diba! Reana hahine be ena adavana ena kara dainai do ia hoa, lalohisihisi, mahuta namonamo lasi, bona tai momo. Ia lalometau dainai gaukara maragidia ia karaia namonamo lasi eiava aksiden o kerere maragimaragi do ia karaia. Eiava ia aniani namonamo lasi, ena tauanina ia maragi, bona lalona ena mamina ia namo lasi. Eiava Iehova ena hesiai gaukara idauidau ia karaia be auka. Reana natudia danu do idia noho namonamo lasi!
13, 14. (a) Solomona ena guriguri ese edena dala ai oi ia hagoadaia? (b) Dahaka dainai lauma helaga ita abia totona ita guriguri be namo?
13 Unai bamona hahetoho ita abia neganai, Iehova be heduru ia henia. (Salamo 94:19) Iehova ena dubu hahelagaia negana dekenai, King Solomona ena guriguri ese ia hahedinaraia, Dirava be ena taunimanima edia guriguri ia kamonai henia. Solomona ia gwau: “Edia guriguri do oi kamonai. Bema oiemu Israela taudia ta ese, mai lalohisihisi momokani danu be Dubu Helaga dekenai iena imana idia duduia neganai, iena guriguri do oi kamonai. Guba dekena amo do oi kamonai, iena kara dika do oi gwauatao, bona ia be oi ese do oi durua. Badina be oi sibona ese taunimanima ibounai edia laloa oi diba noho. Idia ta ta dekenai edia kara, edia kara hegeregerena, durua do oi henia. Unai dekena amo oiemu bese taudia ese oi do idia gari henia, edia sene taudia dekenai oi henia tano lalonai idia noho dinadia ibounai.”—1 King Taudia 8:38-40.
14 Gau badana be lauma helaga ita abia totona ita guriguri loulou. (Mataio 7:7-11) Dirava ena lauma helaga ena huahua rua be, moale bona maino. (Galatia 5:22, 23) Unai dainai, iseda guba tamana ita guriguri henia neganai, ia ese taitai ena gabunai moale ia atoa, bona badu ena gabunai maino ia atoa!
15. Edena siri ese ita ia durua diba ita laloa momo lasi totona?
15 Ita diba, bema hekwakwanai idia vara, do ita lalohekwarahi bada. To unai lalohekwarahi ita hanaia diba bema Iesu ena hereva ita laloatao, ia gwau: “Mai gari danu umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai. . . . To umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” (Mataio 6:25, 33, 34) Petero ia gwau: ‘Iseda laloa hekwarahi gaudia ibounai be Dirava ena imana dekenai do ita atoa.’ (1 Petero 5:6, 7) Hekwakwanai ta ita hamaoromaoroa be namo. To, bema ita kwalimu lasi, vadaeni ita lalohekwarahi lasi to Iehova dekenai unai ita gurigurilaia diba. Salamo torea tauna ia gwau: “Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.”—Salamo 37:5.
16, 17. (a) Dahaka dainai gau momo ita lalohekwarahilaia? (b) Filipi 4:6, 7 ena hereva ita badinaia neganai, dahaka do ia vara?
16 Paulo ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia [“emui ura gauna be Dirava oi hamaorolaia,” BHğ] negadia ibounai, mai tanikiu danu do umui guriguri henia. Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” (Filipi 4:6, 7) Vaia, gau momo ita lalohekwarahilaia, badina ita be Adamu ena tubudia. (Roma 5:12) Esau ena Hiti hahine ruaosi dainai, Esau ena tamana Isako bona sinana Rebeka “edia lalona idia hekwarahi momo.” (Genese 26:34, 35) Keristani taudia haida hegeregere Timoteo bona Tropimo be gorere dainai, idia lalohekwarahi bada. (1 Timoteo 5:23; 2 Timoteo 4:20) Paulo be ena tadikaka dainai ia lalohekwarahi. (2 Korinto 11:28) To hanaihanai “guriguri kamonai henia Diravana” be Ia idia lalokau henia taudia do ia durua.—Salamo 65:2, BHğ.
17 Iehova ena dina ita naria lalonai, “maino ia henia Dirava” be ita ia durua bona hagoadaia noho. (Filipi 4:9) Iehova be “bogahisihisi bona hariharibada Diravana,” ia be ‘kara dika ia gwauatao noho,’ bona “ia diba, ita be tanobada ena kahu dekena amo ita ia karaia.” (Esodo 34:6; Salamo 86:5; 103:13, 14) Unai dainai, namona be ‘eda ura gaudia be Dirava ita hamaorolaia,’ bona “maino ia henia Dirava” ena maino do ita abia.
18. Iobu 42:5 ena hereva hegeregerena, edena dala ai ita be Dirava ita “itaia” bamona?
18 Iseda guriguri ena haere ita abia neganai, ita diba Dirava be ita kahirakahira ia noho. Iobu be hisihisi ia haheaukalaia murinai, ia gwau: “Guna egu taiana sibona dekenai, [Iehova] oiemu sivarai lau kamonai, to harihari egu matana ese, oi idia itaia momokani vadaeni.” (Iobu 42:5) Bema ita laloparara Dirava ese ita ia durua dainai ita abidadama henia bona ita tanikiu henia, unai be Dirava ita “itaia” bamona. Iehova kahirakahira ita noho dainai, eda kudouna bona lalona idia maino bamona!
19. ‘Iseda laloa hekwarahi gaudia ibounai be Iehova imana dekenai do ita atoa’ neganai, dahaka do ia vara?
19 ‘Iseda laloa hekwarahi gaudia ibounai be Iehova imana dekenai do ita atoa’ neganai, ita be hahetoho idauidau ita haheaukalaia diba bona eda lalona bona kudouna idia maino diba. Eda kudouna do ia namo eiava do ita gari lasi. Bona eda lalona do ia metau lasi o do ita daradara lasi.
20, 21. (a) Dagedage lalonai, Stefano be edena dala ai ia hamomokania ia lalomanau? (b) Idia lalomanau taudia haida edia ekspiriens mani oi gwauraia?
20 Stefano be ena abidadama tohoa karana ta ia vara neganai, ia be lalomaino karana ia hahedinaraia. Ena haroro ginigabena ia do henia lasi lalonai, Sanhedrin ai idia noho taudia ibounai be “Stefano ena vairana idia itaia noho neganai, iena vairana be aneru ta ena vairana hegeregerena.” (Kara 6:15) Iena vairana toana be moale bamona—Dirava ena hereva ia gwauraia aneru ta ena vairana bamona. Stefano ese ia hahedinaraia idia be Iesu idia hamasea taudia, vadaeni “Kaunsolo taudia be inai hereva idia kamonai neganai idia badu dikadika, bona edia isena idia ha-aukaia ia dekenai. To Stefano be Lauma Helaga dekenai ia honu, bona iena matana dekenai guba ia itaia noho, Dirava ena hairaina ia itaia, bona Iesu danu, Dirava ena idiba kahana dekenai ia gini noho.” Stefano be unai matahanai dainai, ia haheauka ela bona ia mase. (Kara 7:52-60) Herevana ita matahanai lasi, to taunimanima be ita idia dagedage henia neganai ita lalomaino diba.
21 Tanobada Tuarina Iharuana ai, Nazi taudia ese idia hamasea Keristani taudia haida edia hereva mani ita itaia. Ta ese ena kota ena ekspiriens ia herevalaia, ia gwau: “Kota ia gwau, lau be do lau mase. Kota ena hereva lau kamonai, bona unai murinai lau gwau, ‘Dirava oi abidadama henia ela bona mase,’ bona eda Lohiabada ena hereva ma haida lau gwauraia, vadaeni kota ia ore. To laloa momo lasi. Egu lalona dekenai maino ia noho!” Keristani matamata ta be aiona idia do utua oho lasi neganai, iena tama sina ia tore henia bona ia gwau: “Taim be 12 o’klok ia hanaia vadaeni. Nega ia do noho, egu lalona lau senisia totona. To, bema egu Lohiabada lau dadaraia, do lau moale, a? Lasi vaitani! To hari, umui lau hadibaia, lau be mai moale bona maino ida do lau mase.” Momokani, Iehova be iena hesiai taudia ia durua bada.
Oi Haheauka Diba!
22, 23. Oi haheauka bona Iehova ena dina oi naria lalonai, oi diba Iehova be dahaka ia karaia diba?
22 Reana oi be unai bamona hahetoho oi davaria lasi. To, Dirava ia gari henia tauna Iobu ena hereva be maoro, ia gwau: “Ita ibounai, hahine edia bogana, dekena amo ita vara taudia, iseda mauri dinadia be momo lasi, bona iseda hekwarahi be bada herea.” (Iobu 14:1) Reana oi be tama ta o sina ta bona oi gaukara goada Baibel amo emu natudia oi hakaua totona. Bona oi moale badina natudia be sikuli ai hahetoho idia haheaukalaia sibona lasi, to Iehova bona ena hakaua herevadia idia badinaia goadagoada! Eiava moni gaukara gabunai oi be hahetoho idauidau oi davaria. To unai hahetoho bona ma haida ita haheaukalaia diba, badina be Iehova ese “dina ibounai iseda maduna metaudia ia huaia noho.”—Salamo 68:19.
23 Reana oi sibona oi laloa Dirava vairanai oi be anina lasi, to inai oi laloatao: Iehova be oi ia laloaboio lasi, badina kara namodia oi karaia bona ena ladana helagana oi lalokau henia. (Heberu 6:10, BHğ) Iehova ena heduru dainai, emu abidadama tohoa gaudia oi haheaukalaia diba. Unai dainai, oi guriguri o palani oi karaia neganai, namona be Dirava ena ura oi laloaboio lasi. Vadaeni, oi haheauka bona Iehova ena dina oi naria lalonai, namona be oi abia dae Dirava be oi ia hanamoa bona durua diba.
Edena Bamona Do Oi Haere?
• Dahaka dainai ita haheauka be namo?
• Dahaka ese ita ia durua gorere bona daradoko ita haheaukalaia totona?
• Edena dala ai guriguri ese ita ia durua hahetoho ita haheaukalaia totona?
• Dahaka dainai ita diba ita haheauka diba ela bona Iehova ena dina ia ginidae?
[Picture on page 15]
Iehova ita abidadama henia dainai, daradoko ita haheaukalaia
[Picture on page 17]
Guriguri ese ita ia durua eda abidadama tohoa gaudia ita haheaukalaia totona