Iehova ese Ita Ia Durua Ita Haheauka Totona

1. Dahaka dainai ita haheauka be namo, bona daika ese ita do ia durua? (1 Petero 5:10)

INAI dina gabedia lalonai Iehova ena taunimanima idia haheauka be namo. Haida be lagani momo lalonai idia gorere. Haida be edia lalokau taudia idia mase dainai idia lalohisihisi. Ma haida be famili taudia eiava gavamani taudia amo dagedage idia haheaukalaia noho. (Mat. 10:18, 36, 37) Namona be oi diba ena be edena bamona hekwakwanai oi davaria noho, to Iehova ese oi do ia durua oi haheauka totona.—1 Petero 5:10 duahia.

2. Keristani taudia idia haheauka totona, daika ena heduru idia tahua be namo?

² Haheauka ena anina be hahetoho, hisihisi eiava dagedage ita davaria neganai, ita gini goada noho bona iseda helaro ita dogoatao noho. Ita be Keristani taudia dainai sibona iseda goada amo ita haheauka diba lasi, to Iehova sibona ese goada, “taunimanima edia siahu ia hereaia gauna,” be ita dekenai do ia henia. (2 Kor. 4:7) Inai atikol ai, ita haheauka totona Iehova ese ita dekenai ia henia heduru gaudia 4 do ita herevalaia. Bona unai gaudia do ita gaukaralaia dalana do ita herevalaia.

GURIGURI

3. Guriguri karana dekenai dahaka ita dibaia?

³ Iehova be ita ia durua totona dala ia karaia, unai amo ita haheauka diba. Ia karaia dalana ta be ia ida ita herevahereva diba, ena be ita be kara dika taudia. (Heb. 4:16) Mani inai oi laloa: Nega idauidau ai Iehova ita hereva henia diba bona ia dekenai gau idauidau ita herevalaia diba. Iehova be gado idauidau ia kamonai diba bona herevana dibura ruma ai eiava taunimanima idia noho lasi gabuna ai ita noho, to iseda guriguri ia kamonai diba. (Iona 2:1, 2; Kara 16:25, 26) Bema ita lalometau bada dainai ita diba lasi edena bamona iseda lalohadai do ita gwauraia, Iehova be unai ia diba. (Roma 8:26, 27) Oibe, guriguri amo Iehova ita hereva henia diba!

4. Edena bamona ita diba haheauka totona Iehova dekenai ita guriguri neganai, ita do ia durua?

⁴ Baibel ai, Iehova ese ita ia hagoadaia, ia gwau “herevana dahaka ita gurigurilaia, bema unai be iena ura hegeregerena ia ese ita do ia kamonai henia.” (1 Ioa. 5:14) Ita haheauka totona Iehova ena heduru ita noia diba, a? Oibe! Bema iseda guriguri be iena ura hegeregerena, ita do ia durua diba. Dahaka dainai unai bamona ita gwau? Bema hahetoho ita haheaukalaia, ita be Iehova ita durua noho ena inai tauna Satana Diabolo ia haere henia totona. (Aon. 27:11) Danu Baibel ia gwau Iehova be ia ura bada “ia idia badinaia momokani taudia dekenai ena goada ia hahedinaraia.” (2 Siv. 16:9) Unai dainai, ita abia dae momokani Iehova be mai ena siahu bona ura bada ida ita do ia durua ita haheauka totona.—Isa. 30:18; 41:10; Luka 11:13.

5. Edena dala ai guriguri karana ese ita dekenai lalomaino ia henia? (Isaia 26:3)

⁵ Baibel ia gwau, bema iseda lalohekwarahi gaudia dainai mai kudouna ibounai ida ita guriguri, “Dirava ena maino, laloparara ibounai ia hereaia gauna be Keriso Iesu amo do ia henia, bona unai ese [iseda] kudouna bona lalona do ia gimaia.” (Fili. 4:7) Unai ena anina mani ita laloa. Iehova idia hesiai henia lasi taudia be hekwakwanai momo idia davaria bona lalomaino davaria daladia idauidau do idia tahua. Hegeregere, haida be lalomaino idia abia totona, laloa dobu karana ta idia badinaia, unai amo edia lalona amo idia laloa momo gaudia idia kokia diba. To bema ta be unai bamona ia karaia, demoni ese ia idia biagua diba. (Mataio 12:43-45 hahegeregerea.) To, Iehova ese ia henia maino ese unai ibounai ia hereaia. Iehova dekenai ita guriguri neganai, ita hahedinaraia ia dekenai ita tabekau bona ia ese “noho hanaihanai maino do ia henia.” (Isaia 26:3 duahia.) Iehova ese unai ia karaia dalana ta be ita ia durua lalomaino idia henia Baibel siridia ita laloatao totona. Baibel ena hereva momokanidia ese iseda lalohekwarahi ia hamaragia, badina ita diba Iehova be ita ia laloa bada bona ia ura do ita kwalimu.—Sal. 62:1, 2.

6. Emu guriguri lalonai dahaka gaudia oi gwauraia diba? (Laulau itaia danu.)

⁶ Oi karaia diba gauna. Bema emu abidadama ia tohoa hahetoho ta oi haheaukalaia noho, “emu metau be Iehova dekenai oi negea lao” bona Dirava ena maino totona oi guriguri. (Sal. 55:22) Danu Iehova oi noia aonega do ia henia, unai amo oi davaria hekwakwanai do oi haheaukalaia. (Aon. 2:10, 11) Bona haheauka totona oi guriguri neganai, Iehova oi tanikiu henia danu. (Fili. 4:6) Danu Iehova ese hekwakwanai negadia lalonai oi ia durua daladia oi laloa bona oi ia durua dainai ia oi tanikiu henia. Namo lasi emu hekwakwanai oi laloa momo dainai Iehova ese oi ia durua daladia oi laloaboio.—Sal. 16:5, 6.

BAIBEL

7. Edena dala ai Baibel stadilaia karana ese ita do ia durua ita haheauka totona?

⁷ Iehova ese Baibel ia henia, unai amo ita ia durua ita haheauka totona. Baibel ai ita ia durua sivarai momo idia noho, unai dainai ita abia dae Iehova be ita do ia durua. Mani haheitalai ta ita itaia. Mataio 6:8 ai ia gwau: “Emui Tamana umui do noia lasi neganai, ia be emui dabu gaudia ia diba vadaeni.” Iesu ese unai hereva ia gwauraia, bona ia be Iehova ia diba namonamo. Unai dainai ita daradara lasi hahetoho ita davaria negadia ai Iehova be ita ia laloa bada. Baibel lalonai unai bamona hagoadaia herevadia momo idia noho, unai amo do ita haheauka diba.—Sal. 94:19.

8. (a) Baibel ena hakaua hereva ese ita ia durua ena haheitalai ta mani oi gwauraia. (b) Dahaka ese ita ia durua diba Baibel ena hakaua herevadia ita laloatao totona?

⁸ Baibel ena hakaua herevadia ese ita ia durua diba ita haheauka totona. Badina Baibel lalonai aonega herevadia idia noho, ita idia durua diba abia hidi maorodia ita karaia totona. (Aon. 2:6, 7) Hegeregere, Baibel ena hereva ese ita ia hagoadaia dina ta ta ai do ita karaia gaudia sibona ita laloa, kerukeru totona ita lalohekwarahi lasi. (Mat. 6:34) Bema hanaihanai Baibel ita duahia bona ita laloa dobu, Baibel ena hakaua hereva namodia do ita dibaia bona ita lalohekwarahi negadia ai unai ese ita do ia durua.

9. Edena dala ai Baibel ena sivarai ese ita ia hagoadaia diba, Iehova ena heduru dekenai ita tabekau totona?

⁹ Baibel ai mauri lalonai hekwakwanai idia davaria taudia edia sivarai idia noho, idia be Iehova dekenai idia tabekau bona Iehova ese idia ia durua. (Heb. 11:32-34; Iam. 5:17) Bema unai bamona sivarai ita duahia, ita do ia hagoadaia Iehova dekenai ita tabekau totona, ia be “iseda heau mauri gabuna bona goada ia henia tauna, metau negadia ai ia noho hegaegae heduru henia totona.” (Sal. 46:1) Idaunegai Iehova ena hesiai taudia edia abidadama karana ita itaia neganai, unai ese ita ia hagoadaia edia abidadama bona haheauka karana ita tohotohoa totona.—Iam. 5:10, 11.

10. Edena dala ai Baibel oi gaukaralaia namonamo diba?

¹⁰ Do oi karaia gauna. Dina ta ta ai Baibel oi duahia bona oi ia durua siri namodia edia lista oi karaia. Momo idia davaria dina ena siri duahia karana ese idia ia durua, unai dina ai Baibel ena hagoadaia herevadia idia laloa totona. Taihu ta ladana Mariea ia gwau, ena tama sina be kensa gorere idia abia neganai, dina siri duahia karana ese ia durua. Dahaka ese Marie ia durua ena tama sina edia hua dokodia lalonai ia haheauka totona? Ia gwau: “Daba ta ta ai, Dina Iboudiai Buka Helaga Tahua buklet amo siri ta lau duahia bona unai lau laloa dobu. Unai ese lau ia durua Baibel ena hereva namodia lau laloatao totona bona lau davaria nega aukana lau haheaukalaia totona.”—Sal. 61:2.

TADIKAKA BONA TAIHU

11. Ita diba iseda tadikaka bona taihu danu be hekwakwanai idia davaria, edena dala ai unai ese ita ia durua?

¹¹ Iehova ese dala ia karaia iseda Keristani tadikaka taihu ese ita idia durua totona, unai amo ita haheauka diba. Ita diba “[iseda] tadikaka oreana tanobada hegegemadai danu be unai bamona hisihisi idauidau idia davaria noho,” unai ita laloa neganai, ita do ia hagoadaia. (1 Pet. 5:9) Ita diba ita davaria hekwakwanai idauidau be ma haida ese idia davaria danu bona idia haheaukalaia. Unai ena anina be iseda hekwakwanai idauidau ita haheaukalaia diba!—Kara 14:22.

12. Edena dala ai tadikaka bona taihu ese ita idia durua, bona edena dala ai ita ese idia ita durua diba? (2 Korinto 1:3, 4)

¹² Hekwakwanai ita haheaukalaia neganai, iseda tadikaka bona taihu ese ita idia hagoadaia diba. Aposetolo Paulo ese unai ia hamomokania. Ia be dibura ruma ai ia noho neganai, nega momo ia idia durua taudia edia ladana ia gwauraia bona ia hanamoa. Badina unai taudia ese Paulo idia hagoadaia bona ena dabu gaudia dekenai ia idia durua. (Fili. 2:25, 29, 30; Kol. 4:10, 11) Hari inai negai, iseda tadikaka bona taihu ese ita idia hagoadaia danu. Bema hekwakwanai ita haheaukalaia noho, iseda tadikaka bona taihu be ita do idia durua bona hekwakwanai idia haheaukalaia neganai, idia do ita durua.—2 Korinto 1:3, 4 duahia.

13. Dahaka ese Maya ia durua ia haheauka totona?

¹³ Lagani 2020 ai, Russia ai, pulisi taudia ese taihu ta ladana Maya ena ruma dekenai gau momo idia sekea. Danu ia be ena abidadama dainai kota dekenai idia abia lao. Tadikaka oreana edia heduru ese Maya ia hagoadaia bada. Maya ia gwau: “Unai nega aukana ai, tadikaka taihu be lau idia hagoadaia bada. Lau lalomanoka, to lau idia rini henia bona revareva idia torea lau idia hagoadaia totona. Hanaihanai lau diba lau be mai egu famili badana. To lau idia durua murinai unai lau abia dae momokani.”

14. Ita haheauka noho lalonai, edena dala ai iseda tadikaka bona taihu ese ita idia durua diba? (Laulau itaia danu.)

¹⁴ Do oi karaia gauna. Hahetoho oi haheaukalaia lalonai, emu Keristani tadikaka bona taihu kahirakahira oi noho. Heduru totona elda taudia oi noia. Idia be “hunia gabuna bamona, medu bada negana ai idia be heau mauri gabuna ta bamona.” (Isa. 32:2) Danu laloatao, emu tadikaka bona taihu be hekwakwanai idauidau idia haheaukalaia noho. Ia dabu tauna ta oi durua neganai, oi davaria hahetoho be mai laloa maoromaoro ida oi haheaukalaia diba.—Kara 20:35.

ISEDA HELARO

15. Helaro ese edena dala ai kamonai hesiai taudia bona Iesu ia durua? (Heberu 12:2)

¹⁵ Iehova ese ita dekenai helaro namona ia henia, unai ese ita ia durua ita haheauka totona. (Roma 15:13) Mani oi laloa, helaro laloatao karana ese Iesu ia durua ena mauri ai ia davaria hahetoho badana ia haheaukalaia totona. (Heberu 12:2 duahia.) Iesu ia diba ena badinaia karana ese Iehova ena ladana do ia hahelagaia. Danu Iesu ia ura ena Tamana ida do ia hedavari lou bona gabeai guba Basileia lalonai ena tadikaka ida do ia lohia. Unai hegeregerena, Dirava ena tanobada matamata ai do ita mauri hanaihanai ena helaro ese ita do ia durua, Satani ena tanobada ai ita davaria hahetoho idauidau ita haheaukalaia totona.

16. Helaro laloa karana ese edena dala ai taihu ta ia durua ia haheauka totona, bona ena hereva amo dahaka oi diba?

¹⁶ Basileia ena helaro ese Russia taihu ta ladana Alla ia durua, ena adavana be pulisi ese idia dogoatao bona dibura ruma ai idia atoa. Unai ia vara neganai, Alla ia gwau: “Vaira nega ena helaro namona totona lau guriguri bona laloa dobu neganai, lau ia durua lau lalometau lasi totona. Lau laloparara inai hekwakwanai do ia ore bona gau namodia do ia vara. Iehova do ia kwalimu, bona ita danu do ita kwalimu.”

17. Edena dala ai ita hahedinaraia diba Baibel ena helaro namona ita abia dae? (Laulau itaia danu.)

¹⁷ Do oi karaia gauna. Nega oi atoa Iehova ese ia gwauhamatalaia vaira nega namona oi laloa totona. Dirava ena tanobada matamatana ai oi noho bona oi abia hahenamo idauidau oi laloa. Bona hari ita davaria noho hahetoho idauidau be “nega sisina gauna bona ia metau lasi.” (2 Kor. 4:17) Danu, ma haida ida emu abidadama oi herevalaia. Mani oi laloa, unai taudia be Satani ena tanobada lalonai dika momo idia davaria bona Dirava ena gwauhamata vaira nega totona be idia diba lasi. Nega sisina idia ida oi hereva neganai, edia lalona oi veria diba Basileia ena helaro namona idia abia dae totona.

18. Dahaka dainai Iehova ena gwauhamata namodia ita abidadama henia diba?

¹⁸ Iobu be hahetoho momo ia haheaukalaia murinai, Iehova dekenai ia gwau: “Hari lau diba oi be hegeregere gau ibounai oi karaia totona bona oi ura oi karaia gaudia danu be gau ta ese ia koua diba lasi.” (Iobu 42:2) Iobu ia diba, Iehova be ena ura hagugurua totona gau ta ese do ia koua diba lasi. Ita danu be unai ita diba neganai, ita ia hagoadaia ita haheauka totona. Mani ia lalometau noho gorere hahine ta oi laloa. Ia be doketa idauidau dekenai ia lao, to ena gorere ia namo lasi. Gabeai doketa namona ta ese ena gorere ena badina ia davaria bona ia dekenai ia gwauraia hedinarai edena dala ai unai gorere do ia hanamoa. Ia moale bada ena be nega sisina do ia naria. Ia haheauka noho diba badina ia diba helaro namona ia noho, unai be ena gorere amo do ia namo lou. Unai hegeregerena, Paradaiso ena helaro namona ita laloa neganai, ita ia durua ita haheauka noho totona.

19. Ita haheauka totona, dahaka ita karaia be namo?

¹⁹ Ita herevalaia bamona, Jehovah ese guriguri, Baibel, iseda tadikaka bona taihu, bona iseda helaro amo ita ia durua ita haheauka totona. Bema unai heduru gaudia ita abia dae, Iehova ese ita do ia durua hahetoho idauidau ita haheaukalaia ela bona Satani ena tanobada do ia ore.—Fili. 4:13.