Hebogahisi Karana Hahedinaraia Dalana
“Taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.”—GALATIA 6:10.
1, 2. Samaria tauna ena parabole amo hebogahisi karana dekenai dahaka ita dibaia?
TARAVATU ia diba momo tauna ta be Iesu ia nanadaia: “Lauegu badibadinai tauna be daika?” Iesu ena haere lalonai parabole ta ia gwauraia: “Tau ta Ierusalema dekena amo Ieriko dekenai ia lao neganai henaoa taudia haida ese idia davaria. Vadaeni iena dabua idia dadia, idia botaia, kahirakahira ia mase, vadaeni idia rakatania. Dubu ena hahelagaia tauna ta be unai dala dekenai ia raka lao, unai bero tauna ia itaia, to kahana dekenai ia raka hanaia. Levi ena orea tauna ta danu unai bamona, unai gabu dekenai ia ginidae, ia itaia, to ma kahana dekenai ia raka hanaia. To Samaria tauna be unai dala dekenai ia raka, bona unai gabu dekenai ia ginidae, bero tauna ia itaia. Vadaeni ia bogahisihisi henia. Ia dekenai ia lao, dehoro bona uaina dekena amo iena bero ia huria, ia kumia. Vadaeni ena doniki dekenai ia atoa, laolao taudia edia ruma dekenai ia abia lao, bona unai gabu dekenai ia naria. Dabai ia toreisi, siliva moni rua ia abia, ruma biaguna dekenai ia henia, ia gwau, ‘Do oi naria namonamo, bema dahaka dahaka do oi henia davana lasi, do lau giroa mai neganai, edia davana do lau henia oi dekenai.’ ” Bena, Iesu ese ia nanadaia: “Oi be dahaka oi gwau? Idia toiosi daika be dadia taudia ese idia haberoa tauna ena badibadinai tauna do ita gwauraia?” Unai tauna ia haere: “Ia bogahisihisi henia tauna.”—Luka 10:25, 29-37a.
2 Samaria tauna ese bero ia davaria tauna ia durua karana ese hebogahisi korikorina ia hahedinaraia! Samaria tauna be bero tauna ia hebogahisi henia dainai, kara ta ia karaia unai tauna ia durua totona. Danu, Samaria tauna be unai tauna ia diba lasi. Unai ese ia hahedinaraia hebogahisi karana be tano, tomadiho, eiava kastom karadia ese idia koua lasi. Iesu be unai parabole ia gwauraia murinai, unai taravatu hadibaia tauna ia hamaoroa: “Oi lao, oi danu unai bamona do oi karaia.” (Luka 10:37b) Ita danu be unai sisiba ita abia dae bona iseda mauri lalonai ita badinaia be namo. To edena dala ai do ita badinaia? Edena dala idauidau ai iseda mauri lalonai hebogahisi karadia ita hahedinaraia diba?
“Sedira Keristani Tadikaka ta . . . be Dabua Lasi”
3, 4. Dahaka dainai kongrigeisen lalonai hebogahisi karana ita hahedinaraia be gau badana?
3 Paulo ia gwau: “Dala ita davaria neganai, taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Galatia 6:10) Namona be, iseda tadikaka dekenai hebogahisi ita hahedinaraia daladia ita herevalaia guna.
4 Iamesi be Keristani taudia ia hagoadaia ta ta dekenai hebogahisi karana do idia hahedinaraia neganai, ia gwau: “Bogahisihisi ia henia lasi tauna ese Dirava dekena amo bogahisihisi do ia davaria lasi.” (Iamesi 2:13) Iamesi ese hebogahisi hahedinaraia daladia haida ia gwauraia. Hegeregere, Iamesi 1:27 ia gwau: “Keristani tauna ena kara goevagoeva bona momokani, Tamana Dirava ena vairanai be inai: Bema tamana bona sinana lasi maragidia bona vabu be mai edia hisihisi, ia ese do ia naridia. Bona tanobada ena kara mirodia dekena amo do ia raka siri.” Iamesi 2:15, 16 ia gwau: “Sedira Keristani tadikaka ta o taihuna ta be dabua lasi, bona ia be aniani lasi. Vadaeni umui ta ese bema ia hamaoroa, ia gwau, ‘Dirava ese oi do ia hanamoa, oi ese oiemu kopina do oi hasiahua, bona do oi boga kunu.’ Bema unai bamona umui hamaoroa, to dabua ta o aniani ta umui henia lasi neganai, emui hereva be anina lasi.”
5, 6. Iseda kongrigeisen lalonai edena dala ai tadikaka dekenai hebogahisi karana ita hahedinaraia diba?
5 Ma haida naria bona dabu taudia durua karana be tomadiho momokani ena toana ta. Iseda tomadiho dalana ese ita ia hagoadaia hebogahisi herevadia sibona ita gwauraia lasi, to ita hebogahisi henidia dainai, gau ta ita karaia idia ita durua totona. (1 Ioane 3:17, 18) Oibe, gorere tauna totona aniani ita nadua, buruka taudia edia gaukara haida ita karaia, iseda motuka amo hebou dekenai haida ita abia lao bona moni lasi taudia ita durudia be nega momo ita karaia hebogahisi karadia.—Deuteronomi 15:7-10.
6 Kongrigeisen taudia be tauanina dalanai ita durudia sibona lasi, to Dirava ena hereva amo ita hagoadaia danu be gau badana. Baibel ese ita ia sisiba henia: “Gari taudia do umui hagoadaia, bona manoka taudia do umui durua.” (1 Tesalonika 5:14) Baibel ia gwau, “hahine badadia” be “kara namo do idia hadibaia” be namo. (Tito 2:3) Elda taudia dekenai, Baibel ia gwau: “Idia ta ta ibounai be lai koua gabuna hegeregere do idia lao. Idia be guba bada ia toa neganai hunia gabudia namodia hegeregere.”—Isaia 32:2.
7. Suria Antioka ena hahediba taudia edia hebogahisi karana amo dahaka ita dibaia?
7 Aposetolo edia negai, Keristani taudia be vabu taudia, tama bona sina lasi natudia bona dabu taudia idia naridia sibona lasi, to gabu ma haida dekenai idia noho tadikaka idia durudia danu. Hegeregere, peroveta tauna Agabo ia gwau, “hitolo bada negana do ia vara tanobada kahana ibounai dekenai,” unai dainai Suria Antioka dekenai idia noho hahediba taudia be idia lalotamona bona “Iudea noho Keristani taudia dekenai moni idia siaia lao. Inai dainai, idia ta ta edia kohu edia kohu ia hegeregere dekenai, edia harihari gauna do idia siaia lao.” “Banaba bona Saulo dekena amo moni idia siaia lao.” (Kara 11:28-30) Hari be edena bamona? “Hesiai tauna mai ena kamonai, bona mai ena kara maoromaoro” be heduru henia komiti ia haginia, idia vara kava dika badadia, hegeregere lai badana, tano marere, eiava sunami dainai dika idia davaria tadikaka idia durua totona. (Mataio 24:45) Iseda tadikaka ita durua totona iseda nega, goada bona kohu ita gaukaralaia be hebogahisi ita hahedinaraia dalana namona.
“Bema Taunimanima Edia Toana Dekena amo Umui Kara Henidia”
8. Taunimanima edia toana laloa bada karana ese edena dala ai hebogahisi karana ia koua?
8 Iamesi ese hebogahisi bona “lalokau” ia koua karana ta ia herevalaia: “To bema taunimanima edia toana dekena amo umui kara henidia, kara dika umui karaia inai. Bona inai Taravatu ese umui ia gwauraia kerere.” (Iamesi 2:8, 9) Bema taunimanima haida be mai edia kohu momo eiava ladana bada dainai, idia sibona ita kara namo henia, ‘ogogami taudia edia taitai, do ita kamonai lasi.’ (Aonega Herevadia 21:13) Taunimanima edia toana laloa bada karana ese hebogahisi hahedinaraia karana ia koua. Unai dainai hebogahisi ita hahedinaraia totona, namona be taunimanima edia toana ita laloa bada lasi.
9. Dahaka dainai ma haida ita laloa bada be kerere lasi?
9 Taunimanima edia toana ita laloa bada lasi dainai, ita be ma haida ita laloa bada be kerere, a? Lasi. Aposetolo Paulo be iena gaukara turana Epafrodito ia herevalaia neganai, Filipi Keristani taudia ia hagoadaia: “Iena kara bamona idia karaia taudia ibounai do umui matauraia.” Dahaka dainai? “Badina be Keriso ena gaukara totona Epafrodito kahirakahira ia mase. Iena mauri ia negea gwauraia, lau dekenai durua totona, bona umui karaia diba lasi durua gauna, be ia ese do ia karaia totona.” (Filipi 2:25, 29, 30) Epafrodito ese ia karaia gaukara idia laloa bada be namo. Danu, 1 Timoteo 5:17 ia gwau: “Ekalesia gunalaia taudia, gaukara namona idia karaia taudia edia gaukara davana do umui habadaia be namo. Bona ekalesia gunalaia taudia, haroro bona hadibaia gaukara idia karaia taudia edia davana umui habadaia herea, be namo.” Unai bamona idia karaia tadikaka bona taihu ita hanamodia be namo. Unai be taunimanima edia toana laloa bada karana lasi.
Dirava amo Ia Mai Aonega be mai Ena Hebogahisi
10. Dahaka dainai iseda malana ita biagua be namo?
10 Iamesi be iseda malana ia herevalaia neganai, ia gwau: “Mai dika danu mala ese ia mareremarere noho, bona tau ta ese iena dika ia koua diba lasi. Mala be taunimanima alaia poisini dekenai ia honu masemase. Mala dekena amo iseda Lohiabada bona Tamana ita hanamoa noho. Bona mala dekena amo danu taunimanima, Dirava ese iena toana bamona ia karaia taudia, ita hadikaia noho. Uduna tamona ese hanamoa hereva bona hadikaia hereva ia gwauraia noho.” Ma Iamesi ia gwau: “Umui emui lalona dekenai, bema mama, bona umui sibona habadaia kara idia noho neganai, emui aonega be momokani lasi. Unai be aonega koikoi, bona do umui heagilaia lasi, Dirava ena hereva momokani do umui hadikaia garina. Unai bamona aonega be Dirava dekena amo ia diho mai lasi. Ia be tanobada gauna sibona, tauanina sibona gauna, bona Satani dekena amo ia mai. Mama bona sibona habadaia kara idia noho neganai maino be lasi, bona kara dikadia ibounai danu idia noho. To Dirava dekena amo aonega ia abia tauna ena kara ginigunana be inai: Ia laloa goevagoeva. Ma iena kara haida be inai: Mai ena maino, laloa manada bona gado namo. Ia be mai ena bogahisihisi, bona kara namodia momo ia havaraia noho. Ia be maka tamona dekena amo taunimanima ibounai ia kara henidia, edia toana dekena amo lasi. Ma inai tau be Keristani koikoi tauna lasi.”—Iamesi 3:8-10a, 14-17.
11. Edena dala ai iseda hereva amo hebogahisi karana ita hahedinaraia diba?
11 Unai dainai, iseda malana ita gaukaralaia dalana amo ita hamomokania ita be Dirava amo ia mai aonega mai ena hebogahisi ita hahedinaraia eiava lasi. To, edena bamona bema ta ita mama henia eiava ia ida ita hepapahuahu dainai, sibona ita abia isi, ma haida dekenai koikoi herevadia ita gwauraia, eiava unai tauna ita maumauraia? Salamo 94:4 ia gwau: “Kara dika taudia ibounai ese, mai hekokoroku danu edia dika idia herevalaia.” Bona hereva dikadia ese kerere lasi tauna ena ladana namona ia hadikaia haraga diba! (Salamo 64:2-4) Danu, “uitnesi tauna maoromaorona lasi” ese nega ibounai koikoi herevadia ia gwauraia dainai ia havaraia dika, mani oi laloa. (Aonega Herevadia 14:5; 1 King Taudia 21:7-13) Iamesi be malana gaukaralaia kerere karana ia herevalaia murinai ia gwau: “Lauegu varavara taudia e, inai bamona kara ia vara be dika.” (Iamesi 3:10b) Hebogahisi korikorina ita hahedinaraia totona, namona be mai laloa goevagoeva, maino, bona dala maorona ai iseda malana ita gaukaralaia. Iesu ia gwau: “Umui lau hamaoroa, hereva kava ibounai taunimanima ese do idia gwauraia, be Dirava ena Kota Badana dina dekenai, edia davana do idia abia.” (Mataio 12:36) Unai dainai iseda herevahereva dalana ai hebogahisi ita hahedinaraia be mai anina bada!
“Taunimanima Edia Dika Umui Gwauatao”
12, 13. (a) King amo moni bada ia abiatorehai hesiai tauna ena parabole amo dahaka ita dibaia hebogahisi karana dekenai? (b) Iseda tadikaka ena dika ita gwauatao “nega 70 x 7” ena anina be dahaka?
12 Iesu ese ia gwauraia parabolena ese hebogahisi hahedinaraia dalana ma ta ia hahedinaraia. Unai parabole lalonai hesiai tauna ese king amo 1,000,000 kina ia abiatorehai. Hesiai tauna be iena abiatorehai be ia haloua diba lasi dainai, king ia noia ia hebogahisi henia totona. King ese “ia bogahisihisi ia dekenai” dainai, iena abiatorehai ia gwauatao. To, unai hesiai tauna ia raka murimuri dekenai bona iena gaukara turana ta ia davaria, ia be 5 kina ia abiatorehai ia dekenai. Mai hebogahisi lasi ida unai hesiai tauna ma ta be dibura ruma dekenai ia atoa. Biaguna be unai sivarai ia kamonai neganai, ena abiatorehai ia gwauatao hesiai tauna ia boiria mai bona ia hamaoroa: “Oi be hesiai tauna dikana, oi noinoi dainai oiemu abiatorehai ena davana ibounai lau gwauatao. Ia maoro lasi, a, bema oi bogahisihisi oiemu bamona dekenai, oi dekenai lau bogahisihisi bamona?” Biaguna ese unai hesiai tauna be dibura ruma dekenai ia atoa. Iesu be unai parabole ena dokonai ia gwau: “Egu Tamana guba dekenai ia noho be unai bamona do ia karaia umui dekenai, bema umui ta ta emui kudouna dekenai emui tadikakana edia dika do umui gwauatao lasi neganai.”—Mataio 18:23-35.
13 Unai parabole ese ia hahedinaraia, namona be ita noho hegaegae ma haida edia dika ita gwauatao totona! Unai be hebogahisi karana. Iehova ese iseda kara dika ena abiatorehai bada herea ia gwauatao vadaeni. Unai dainai ‘taunimanima edia dika ita gwauatao’ be namo, ani? (Mataio 6:14, 15) Iesu be hebogahisi lasi hesiai tauna ena parabole ia do gwauraia lasi neganai, Petero ese ia nanadaia: “Lohiabada e, lauegu tadikakana do ia hadikaia lau dekenai, bona iena dika do lau gwauatao ela bona nega hida? Nega 7, o?” Iesu ia gwau: “Umui lau hamaoroa, nega 7 sibona lasi, to nega 70 x 7.” (Mataio 18:21, 22) Oibe, hebogahisi tauna be ia noho hegaegae ta ena dika “nega 70 x 7” ia gwauatao totona, anina be dika gwauatao karana be hetoana lasi.
14. Mataio 7:1-4 hegeregerena, edena dala ai dina ta ta ai hebogahisi karana ita hahedinaraia diba?
14 Hebogahisi ita hahedinaraia dalana ma ta be Iesu ese ena Ororo Harorona ai ia gwauraia: “Umui emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi. Badina be umui gwauraia kerere karana hegeregerena Dirava ese umui do ia gwauraia kerere. . . . Badina be dahaka au ena momoru oiemu tadikakana ena matana lalonai oi itaia, to au badana oiemu matana lalonai ia noho be oi laloa lasi? Badina be dahaka oiemu tadikakana oi hamaoroa, oi gwau, ‘Mani au ena momoru oiemu matana dekena amo lau kokia,’ to au badana be oiemu matana dekenai ia do noho?” (Mataio 7:1-4) Unai dainai, dina ta ta ai hebogahisi ita hahedinaraia dalana ta be ma haida edia kerere ita haheaukalaia, anina be ita hahemaoro henidia lasi eiava idia ita gwauraia dika lasi.
“Taunimanima Ibounai Dekenai Kara Namodia Do Ita Karaia”
15. Dahaka dainai hebogahisi karana be tadikaka sibona dekenai ita hahedinaraia be hegeregere lasi?
15 Baibel bukana Iamesi ese ia hahedinaraia Keristani taudia be ta ta dekenai hebogahisi do idia hahedinaraia, to unai kara be Keristani taudia sibona dekenai do ita hahedinaraia lasi. Salamo 145:9 ia gwau: “Lohiabada ena kara be namo, taunimanima ibounai dekenai. Ia karaia gaudia ibounai dekenai iena bogahisihisi ia henia.” Baibel be ita ia hagoadaia ‘Dirava ena kara bamona ita karaia’ totona bona “taunimanima ibounai dekenai kara namodia do ita karaia.” (Efeso 5:1; Galatia 6:10) Ena be ita ese ‘tanobada bona tanobada ena gaudia ita ura henia lasi,’ to bema murimuri tauna ta ia dabu ia ita durua diba.—1 Ioane 2:15.
16. Ma haida dekenai hebogahisi ita hahedinaraia neganai, dahaka gaudia ita laloa be namo?
16 Ita be Keristani taudia dainai, “nega dika idia davaria” taudia dekenai heduru ita henia be namo. (Hadibaia Tauna 9:11) Oibe, iseda moni, nega, bona goada hegeregerena, idia ita durua diba. (Aonega Herevadia 3:27) Bema ita ura ma haida ita durua neganai, namona be ita naria namonamo, namo lasi ita hahedinaraia kara namo dainai idia be lahedo taudia ai idia lao. (Aonega Herevadia 20:1, 4; 2 Tesalonika 3:10-12) Unai dainai, hebogahisi karana ta ita karaia neganai, namona be mai laloa maoromaoro ida ita karaia.
17. Murimuri taudia dekenai hebogahisi ita hahedinaraia dalana hereadaena be dahaka?
17 Hebogahisi ita hahedinaraia dalana hereadaena be murimuri taudia dekenai Baibel ena hereva momokani ita gwauraia. Dahaka dainai? Badina, hari inai negai momo be Dirava ena hereva idia lalopararalaia lasi. Taunimanima momo be hekwakwanai idia hanaia diba lasi eiava helaro lasi dainai, idia be “tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Dirava ena Hereva be lamepa bamona idia ia hakaua neganai, idia ia durua mauri ena hekwakwanai idia hanaia totona. Danu, Dirava ena Hereva be diari bamona edia dala do ia hadiaria, badina Baibel ese Dirava ena ura nega vaira totona ia gwauraia, bona helaro namona ia henia. (Salamo 119:105) Dirava ena hereva idia ura henia taudia dekenai sivarai namona ita gwauraia be hahenamo badana momokani! “Hisihisi badana” be kahirakahira do ia vara dainai, hari be nega namona Basileia harorolaia bona hahediba taudia halaoa gaukarana do ita karaia goadagoada. (Mataio 24:3-8, 21, 22, 36-41; 28:19, 20) Unai kara ese hebogahisi karadia ibounai ia hereaia.
Mai Iseda Kudouna Ibounai Ida
18, 19. Dahaka dainai ita hekwarahi iseda mauri lalonai hebogahisi karadia momo ita hahedinaraia totona?
18 Iesu ia gwau, harihari gaudia ita henia neganai, mai iseda kudouna ibounai ida ita karaia be namo. (Luka 11:41, NW ) Kara namona ita karaia totona, namona be mai iseda kudouna ibounai ida hebogahisi ita hahedinaraia. (2 Korinto 9:7) Inai tanobada ai, kara auka, sibona edia namo tahua karana, bona ma haida edia hisihisi eiava hekwakwanai laloa lasi karana be ia bada, unai dainai hebogahisi karadia ese ta ena lalona ia hanamoa!
19 Namona be ita hekwarahi iseda mauri lalonai hebogahisi karadia ita habadaia totona. Hebogahisi karadia momo ita hahedinaraia neganai, ita be Dirava ita tohotohoa unai. Unai ese ita ia durua mauri namona ita noholaia totona.—Mataio 5:7.
Dahaka Oi Dibaia?
• Dahaka dainai iseda tadikaka dekenai hebogahisi ita hahedinaraia be mai anina bada?
• Kongrigeisen lalonai edena dala ai hebogahisi ita hahedinaraia diba?
• Edena dala ai murimuri taudia dekenai hebogahisi ita hahedinaraia diba?
[Picture on page 8]
Samaria tauna be mai hebogahisi ida ia kara
[Pictures on page 9]
Keristani taudia be hebogahisi karadia momo idia karaia
[Picture on page 10]
Murimuri taudia dekenai hebogahisi ita hahedinaraia dala hereadaena be idia dekenai Baibel ena hereva momokani ita harorolaia