Iehova Ena Hereva Ibounai Idia Vara Momokani
“Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.”—IOSUA 23:14.
1. Iosua be daika? Bona ena mauri dokonai dahaka ia karaia?
IOSUA be mai ena goada, taunimanima dekenai ia gari lasi tuari biaguna, Dirava ia abidadama henia, bona kara maoromaoro ia badinaia. Ia be Mose ia bamoa, bona Iehova ese ia abia hidi Israela taudia be taunimanima idia noho lasi gabuna amo do ia hakaudia siri bona rata bona hani amo ia honu tanona ai do ia hakaudia vareai. Iosua ena mauri dokonai, ia be Israela ena tau badadia dekenai hereva namona ta ia henia. Unai hereva be kamonai taudia edia abidadama ia hagoadaia bada. Bona unai hereva ese emu abidadama danu ia hagoadaia diba.
2, 3. Iosua be Israela ena tau badadia ia hereva henia neganai, Israela taudia edia noho dalana be edena bamona? Bona dahaka hereva namona ia henia?
2 Baibel dekenai inai sivarai oi duahia neganai, mani ia vara gauna oi lalohadailaia. Iosua ia gwau: “Nega daudau ia lao vadaeni, bona Lohiabada ese Israela taudia dekenai laga-ani ia henia. Idia dekenai idia tuari gwauraia taudia, Israela idia hagegea taudia be Lohiabada ese ia koua. Unai neganai Iosua be ia buruka, iena mauri lagani be momo. Vadaeni Iosua ese Israela besena ibounai ia boiria, edia tau badadia, edia hanua lohia taudia, bona edia kota biaguna taudia, bona edia gunalaia taudia dekenai ia hereva henia, ia gwau, ‘Lau be lau buruka vadaeni, egu mauri lagani be momo.’ ”—Iosua 23:1, 2.
3 Iosua ena mauri lagani be 110 bamona, bona ia be Dirava ese Israela taudia dekenai ia karaia hoa karadia momo ia itaia. Ma danu, Iehova ena gwauhamata herevadia momo idia guguru be ia itaia. Unai dainai, ia gwau: “Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.”—Iosua 23:14.
4. Iehova ese edena gwauhamata herevadia toi be Israela taudia dekenai ia gwauraia?
4 Iehova be edena gwauhamata herevadia—Iosua ena negai idia guguru herevadia—ia gwauraia? Mani Iehova ese Israela taudia dekenai ia henia gwauhamata herevadia toi ita laloa. Ginigunana be, Dirava be Israela taudia do ia hamauria. Iharuana be, Ia be Israela taudia do ia gimaia. Ihatoina be, Ia be Israela taudia do ia naridia namonamo. Hari inai negai danu, Iehova ese ena hesiai taudia dekenai unai bamona hereva ia henia, bona ita be Iosua bamona, unai hereva edia guguru karana ita itaia. To, Iehova ese hari ia hagugurua gaudia ita do herevalaia lasi lalonai, namona be Iosua ena negai ia hagugurua gaudia ita itaia guna.
Iehova be Israela Taudia Ia Hamauria
5, 6. Aigupito dekenai, Iehova be edena dala ai Israela taudia ia hamauria? Unai ese dahaka ia hahedinaraia?
5 Aigupito dekenai Israela taudia be hesiai gaukara idia karaia bona Dirava dekenai idia taitai neganai, Iehova be ia kamonai. (Esodo 2:23-25) Lahi ese ia araia noho auna amo, Iehova be Mose ia hamaoroa: “Lau diho mai inai, Aigupito taudia edia imana dekena amo [egu taunimanima] do lau hamauridia totona. Unai tano dekena amo dohore lau hakaudia, ia lao bona tano namo herea dekenai.” (Esodo 3:8) Iehova ese unai bamona do ia karaia be moale gauna! Farao ia ura lasi Israela taudia be Aigupito idia rakatania dainai, Mose ese Farao ia hadibaia Dirava ese Naila Sinavai be rara dekenai do ia halaoa. Iehova ena hereva ia guguru. Ia ese Naila Sinavai be rara dekenai ia halaoa. Gwarume idia mase, bona ranu be taunimanima ese idia inua diba lasi. (Esodo 7:14-21) To Farao ese ena lalona ia ha-aukaia noho dainai, Iehova ia gwau hisihisi nain do ia mailaia bona ena hereva ena anina ia hagugurua. (Esodo, karoa 8-12) Hisihisi namba ten ai, Aigupito dekenai idia vara guna natudia bona animal idia mase neganai, Farao be gwaumaoro ia henia Israela taudia be Aigupito idia rakatania totona—bona Israela taudia be Aigupito idia rakatania!—Esodo 12:29-32.
6 Iehova ese Israela taudia ia hamauria neganai, idia be ena abia hidi besena ai idia lao bona idia dekenai Iena Taravatu ia henia. Unai ese ia hamomokania, Iehova be ena gwauhamata herevadia ia hagugurua. Bona Iehova ena siahu be dirava idauidau edia siahu ia hanaia. Unai hahemauri sivaraina ita duahia neganai, unai ese eda abidadama ia hagoadaia. Bema unai nega lalonai oi noho, reana do oi moale bada, ani? Iosua be unai ia itaia amo ia laloparara Iehova, ‘Ataiai Momokani Diravana, ese tanobada ia biagua noho.’—Salamo 83:18.
Iehova be Israela Taudia Ia Gimaia
7. Farao ena tuari taudia amo, Iehova be edena dala ai Israela taudia ia gimaia?
7 Gwauhamata iharuana—Iehova ese Israela taudia do ia gimaia—ena anina be dahaka? Iehova ia gwauhamata Israela taudia be Aigupito amo do ia hamauridia bona Gwauhamata Tanona dekenai do ia hakaudia vareai. Mani oi laloa, Farao bona ena tuari orea goadana mai edia kariota handred momo be Israela taudia idia lulua. Reana Farao ia laloa do ia kwalimu, badina Israela taudia be ororo bona davara edia huanai! To Dirava be Israela taudia durua totona, ori ta ia atoa idia bona Farao ena ami edia huanai. Aigupito taudia edia kahana ia dibura, to Israela taudia edia kahana dekenai be diari ia noho. Ori ese Aigupito taudia ia koua lalonai, Mose be ena au ia abia isi bena Davara Kakakaka ia parara, unai ese dala ia kehoa Israela taudia idia heau mauri totona bona Aigupito edia tarapu ia kehoa. Iehova be Israela taudia ia gimaia, bona Farao ena tuari orea goadana ia hadikaia ore.—Esodo 14:19-28.
8. Iehova be edena dala ai Israela taudia ia gimaia (a) taunimanima idia noho lasi gabuna dekenai? bona (b) Gwauhamata Tanona lalonai idia vareai neganai?
8 Unai murinai, Israela taudia be taunimanima idia noho lasi gabuna dekenai idia loaloa, bona Baibel ia gwau unai be gabu badana, gaigai bona doadoa idia noho, bona ranu be lasi. (Deuteronomi 8:15, BHğ) Danu, unuseniai Iehova be Israela taudia ia gimaia. To Israela taudia be edena dala ai Gwauhamata Tanona lalonai idia vareai? Kanana tuari orea goada be Israela taudia idia dagedage henia. To, Iehova be Iosua ia hamaoroa: “Oi toreisi, inai Ioridane Sinavai do oi hanaia, oi bona Israela taudia, idia dekenai lau ura do lau henia tanona do umui raka vareai. . . . Oiemu mauri dinadia ibounai lalonai tau ta ese oi do ia halusia diba lasi. Lau be oi dekenai do lau noho, Mose dekenai lau noho hegeregerena. Nega ibounai oi do lau bamoa, bona oi do lau rakatania lasi.” (Iosua 1:2, 5) Iehova be ena hereva ia hagugurua. Lagani siks lalodiai, Iosua be king ibounai 31 ia halusia bona Gwauhamata Tanona ena kahana badana ia biagua. (Iosua 12:7-24) Iehova ena gimaia karana dainai, Iosua ia kwalimu.
Iehova be Israela Taudia Ia Naria Namonamo
9, 10. Taunimanima idia noho lasi gabuna dekenai, Iehova be edena dala ai ena taunimanima ia naria namonamo?
9 Gwauhamata ihatoina—Iehova ese Israela taudia ia naria namonamo—mani ita laloa. Israela taudia be Aigupito amo idia roho mauri murinai, Dirava ia gwauhamata: “Oi kamonai, lau ese emui aniani guba dekena amo do lau atoa diho, medu bamona, taunimanima be dina ta ta do idia raka lao, dina tamona ena aniani do idia haboua.” Unai gwauhamata herevana hegeregerena, Dirava ese guba amo “aniani” ia henia. “Israela taudia ese unai gauna idia itaia neganai, idia sibona dekenai idia nanadaia, idia gwau, ‘Inai be dahaka?’ ” Unai be mana—Iehova ia gwauhamata do ia henia aniani unai.—Esodo 16:4, 13-15.
10 Lagani 40 lalonai, Israela taudia be taunimanima idia noho lasi gabuna dekenai idia noho neganai, Iehova be idia dekenai aniani bona ranu ia henia. Iehova ese idia ia naria dainai, edia dabua ia dika lasi bona aena idia gudu lasi. (Deuteronomi 8:3, 4) Iosua be unai hoa karadia ibounai ia itaia. Iehova ena gwauhamata hegeregerena, ena taunimanima ia hamauria, gimaia, bona naria namonamo.
Hari, Iehova be Ena Taunimanima Ia Hamauria
11. Lagani 1914 ai, Brooklyn, New York dekenai be dahaka ia vara? Bona daidia edia nega ia doko?
11 Hari be edena bamona? Friday dabai, October 2, 1914 ai, Charles Taze Russell, unai negai idia noho Bible Student taudia ia gunalaia tauna, be New York ena Brooklyn Betele ena aniani gabuna ai ia raka vareai. Ia gwau: “Daba namona, ibounai.” Vadaeni ena sea dekenai ia helai neganai, mai moale ida ia gwau: “Idau Bese taudia edia nega be ia doko; king edia dina idia ore vadaeni.” Unai negai danu, Iehova, guba bona tanobada edia Lohiabadana be ena taunimanima ia hamauria!
12. Lagani 1919 ai be dahaka hahemauri karana ia vara?
12 Lagani faiv murinai, Iehova be ena taunimanima be “Babulonia badana”—tanobada ena tomadiho koikoi ibounai unai—amo ia hamauridia. (Apokalupo 18:2) Hari idia do mauri noho buruka taudia haida sibona be unai hahemauri negana idia itaia. Oibe, Iehova ena hereva ia guguru. Iehova ese tomadiho goevana ia haginia lou bona idia ura Iehova idia tomadiho henia taudia ia hatamonaia. Unai be Iehova ese Isaia amo ia perovetalaia hegeregerena: “Nega gabeai be inai bamona do ia vara: Lohiabada ena Dubu Helaga ia gini ororona, be ataiai momokani ororona do ia lao. Inai ororo be ia ese, ororo ibounai do ia hereaia. Bese ibounai ese ia dekenai do idia haboua lao.”—Isaia 2:2.
13. Iehova ena taunimanima edia namba ia bada ia lao eiava lasi?
13 Isaia 2:2 ena hereva ia guguru. Lagani 1919 lalonai, tanobada hegegemadai, horoa orena taudia be mai gari lasi ida idia haroro bona Dirava ena tomadiho idia abia isi. Toana be lagani 1930 murinai, horoa taudia ese “mamoe idaudia haida” idia boiria, tomadiho goevana lalonai idia vareai totona. (Ioane 10:16) Matamanai taunimanima tausen idia vareai, bena handred tausen momo idia vareai danu, to hari be milioni momo herea idia vareai noho! Aposetolo Ioane ese ena matahanai lalonai, idia be inai bamona ia herevalaia, ia gwau: “Taunimanima momo herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau.” (Apokalupo 7:9) Emu mauri lalonai be dahaka oi itaia vadaeni? Hereva momokani oi dibaia matamaia neganai, tanobada hegegemadai Iehova ena Witnes taudia be hida? Hari, Iehova ena Witnes taudia edia namba be 6,700,000 mai kahana. Iehova ese ena taunimanima be Babulonia Badana amo ia hamauridia dainai, hari ita itaia Iena tanobada oreana ena namba be ia bada ia lao noho.
14. Gabeai dahaka hahemauri karana do ia vara?
14 Iehova ena hahemauri negana ma ta be kahirakahira do ia vara—tanobada taudia ibounai be unai do idia itaia. Iehova be ena siahu hahedinaraia totona, Ia ese ia idia dagedage henia taudia ibounai do ia hadikaia ore, bona ena taunimanima be kara maoromaoro taudia ese do idia noholaia tanobada matamatana lalonai do ia hakaudia vareai. Unai be moale negana, badina kara dika ia ore, bona nega namo hereana do ia matamaia!—Apokalupo 21:1-4.
Hari, Iehova be Ena Taunimanima Ia Gimaia
15. Hari inai negai, dahaka dainai Iehova ese ita ia gimaia be mai anina bada?
15 Ita itaia vadaeni, Iehova ese Iosua ena negai idia noho Israela taudia ia gimaia be namo. Hari inai negai, Iehova ena taunimanima be edena bamona? Iehova ese idia ia gimaia be namo! Iesu ese ena murinai idia raka taudia ia hamaoroa, taunimanima ese “umui emui mase totona hereva do idia atoa, do idia hadikaia umui, do idia alaia mase umui. Lauegu ladana dainai bese ibounai ese umui do idia badu henia.” (Mataio 24:9) Lagani momo lalonai, tano momo ai, Iehova ena Witnes taudia be hisihisi o dagedage idia davaria. To, Iehova be ena taunimanima ia durua. (Roma 8:31) Baibel ia gwau, gau ta—“tuari gauna ta”—be eda Basileia harorolaia gaukara bona hadibaia gaukarana do ia koua lasi.—Isaia 54:17.
16. Edena bamona oi diba Iehova be ena taunimanima ia gimaia?
16 Herevana tanobada taudia be Iehova ena Witnes taudia idia inai henia, to tano 236 ai, Iehova ena Witnes taudia edia namba be ia bada ia lao noho. Unai ese ia hamomokania, Iehova be ita ia gimaia noho, herevana haida idia ura ita idia hadikaia eiava eda gaukara idia koua toho. Emu mauri lalonai, Dirava ena taunimanima idia dagedage henia politikol lohia taudia eiava tomadiho gunalaia taudia haida edia ladana oi diba, a? Idia dekenai dahaka ia vara vadaeni? Hari idia be edeseniai? Unai bamona dagedage taudia momo idia kwalimu lasi, bona idia be Mose bona Iosua edia negai ia noho tauna Farao bamona. To hari inai negai Dirava idia badinaia dainai idia mase taudia be edena bamona? Iehova ese edia ladana ia laloatao, Iena lalona dekenai ia gimadia bamona. Iehova sibona be edia roho mauri gabuna. Momokani, Iehova be ena hereva hegeregerena, idia ia gimaia.
Hari, Iehova be Ena Taunimanima Ia Naria Namonamo
17. Iehova be dahaka gwauhamata ia henia?
17 Iehova ese Israela be taunimanima idia noho lasi gabuna dekenai ia naridia namonamo, bona hari unai bamona ia karaia danu. Ia ese dala ia karaia dainai, “hesiai tauna mai ena kamonai, bona mai ena kara maoromaoro” oreana be ita ia durua Dirava kahirakahira ita lao totona. (Mataio 24:45) Lagani handred momo lalonai, idia hunia herevadia momo be ita dekenai ia hadibaia. Aneru ese Daniela ia hamaoroa: “Peroveta herevana do oi hunia noho, bona . . . buka do oi koua momokani, do ia noho ela bona dokona negana ia ginidae. Unai neganai taunimanima momo do idia heau lao, heau mai, bona aonega do ia bada herea.”—Daniela 12:4.
18. Dahaka dainai ita gwau hereva momokanidia momo ita diba?
18 Ita be nega dokona lalonai ita noho, bona hereva momokanidia momo ita diba. Tanobada hegegemadai, lauma helaga ese hereva momokani idia ura henia taudia ia veria mai Dirava bona ena ura idia diba namonamo totona. Hari, tanobada ibounai, Baibel bona Baibel idia herevalaia bukadia be momo herea dainai, taunimanima be mai anina bada hereva momokani idia lalopararalaia. Hegeregere, Baibel be Dahaka Ia Hadibaia? bukana ena rau 2 mani ita laloa.a Unuseniai karoa idauidau idia noho, hegeregere: “Dirava be Edena Bamona Tauna?,” “Mase Taudia be Edeseniai?,” “Dirava Ena Basileia be Dahaka?,” bona “Dahaka Dainai Dirava ese Hisihisi Ia Koua Lasi?” Lagani tausen momo lalonai, taunimanima be unai henanadai edia haere idia tahua. Hari, haere ia noho vadaeni. Herevana taunimanima be Baibel idia laloa maragi bona Kerisendom be taunimanima dekenai hahediba koikoidia idia hadibaia, to Dirava ena Hereva be ia kwalimu noho, bona Iehova be Ia idia hesiai henia taudia ia naria namonamo.
19. Edena gwauhamata herevadia idia guguru be oi itaia? Bona dahaka oi gwau diba?
19 Momokani, iseda matana amo ita itaia bona ita gwau diba: “Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi.” (Iosua 23:14) Iehova ese ena hesiai taudia ia hamauria, gimaia, bona naria namonamo. Iehova ena gwauhamata hereva ibounai be nega korikori ai idia guguru, a? Oibe, Ena gwauhamata hereva ibounai be idia guguru. Unai dainai, Dirava ena Hereva ita abidadama henia be maoro.
20. Dahaka dainai ita gwau diba vaira negana be do ia namo herea?
20 Vaira negana ai be dahaka do ia vara? Iehova ia gwau, ita momo be tanobada paradaisona lalonai do ita noho. Ita huanai idia noho taudia haida be Keriso ida guba dekenai do idia lohia. Herevana eda helaro be guba o tanobada, to Iosua bamona Iehova ita abidadama henia ena badina be momo. Nega ta do ia mai, bona Iehova ita abidadama henia ena badina do ia itaia. Vadaeni, ita be Iehova ena gwauhamata herevadia momo do ita laloa lou bona do ita gwau: “Ibounai idia vara momokani, ta ia moru lasi.”
[Footnote]
a Iehova ena Witnes taudia ese idia karaia.
Anina Oi Gwauraia Diba, A?
• Iosua ese Iehova ena gwauhamata idia guguru be ia itaia—unai be dahaka dahaka?
• Edena gwauhamata herevana ia guguru be oi itaia?
• Dirava ena Hereva be do ia kwalimu eiava lasi?
[Picture on page 23]
Iehova be ena taunimanima ia hamauria
[Picture on page 23]
Davara Kakakakana ai, Iehova be edena dala ai ena taunimanima ia gimaia?
[Picture on page 24]
Taunimanima idia noho lasi gabuna ai, Iehova be edena dala ai ena taunimanima ia naria namonamo?
[Pictures on page 25]
Hari inai negai, Iehova be ena taunimanima ia laloa bada