Ta Ia Mase Neganai Dahaka Ia Vara?

“Taunimanima ibounai, kara dika taudia danu, edia lauma be ia mase diba lasi . . . Idia be ia bodo diba lasi lahina dekenai panisi idia abia, to idia mase lasi dainai, edia hisihisi ia ore diba lasi ela bona hanaihanai.”​​—⁠Alexandria tauna Clement ese lagani 200 C.E. bona 300 C.E. bamona ai unai hereva ia torea.

CLEMENT bamona, hel ena hahediba herevana idia hadibaia taudia idia abia dae taunimanima be mai edia mase diba lasi laumana. Baibel ese unai hereva ia hamomokania, a? Mani Dirava ena Hereva amo henunai idia noho henanadai edia haere ita tahua.

Tau ginigunana, Adamu be ia mase diba lasi, a? Dirava ese Adamu ia havaraia murinai, Adamu dekenai inai oda ia henia: “Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.” (Genese 2:​16, 17) Adamu be do ia mase diba.

Adamu ia kara dika neganai dahaka ia vara? Dirava ia gwau Adamu be hel dekenai hisihisi do ia abia hanaihanai, a? Lasi, Dirava ia gwau: “Do oi varahu, bona do oi gaukara auka, tano ena anina abia totona, ia lao bona tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.” (Italiks ai atoa; Genese 3:​19) Dirava ia gwau lasi Adamu ia mase murinai ena lauma be gabu ma ta dekenai ia mauri noho.

Taunimanima be idia mase diba lasi, a? Lasi, taunimanima ibounai be idia mase diba. Baibel be Hadibaia Tauna 3:20 dekenai ia gwau: “Idia ibounai be gabu tamona dekenai idia lao noho, tano ena kahu. Idia ruaosi be kahu dekena amo idia mai, bona idia ruaosi be kahu dekenai do idia giroa lou.” Aposetolo Paulo ia gwau: “Tau tamona [Adamu] dekena amo kara dika ia vareai mai tanobada dekenai, bona iena kara dika ese mase ia mailaia. Unai dainai mase be taunimanima ibounai ese idia abia, badina ibounai be mai edia kara dika.” (Roma 5:​12) Taunimanima ibounai be mai edia kara dika dainai, idia ibounai be idia mase diba.

Tau ta ia mase neganai, ia be gau ta ia diba o ia mamia diba, a? Dirava ena Hereva ia gwau: “Mauri taudia idia diba do idia mase, to mase taudia be gau ta idia diba lasi.” (Hadibaia Tauna 9:⁠5) Baibel ese tau ta ia mase neganai, dahaka ia vara be inai bamona ia herevalaia: “Idia mase neganai tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.” (Salamo 146:⁠4) Vadaeni, bema mase taudia be “gau ta idia diba lasi” bona “idia ura do idia karaia gaudia be do idia doko,” vadaeni edena bamona idia be hel dekenai hisihisi idia mamia diba?

Iesu Keriso ia gwau mase tauna be ia mahuta sibona.a (Ioane 11:​11-​14) To, haida be unai hereva idia dadaraia bona idia gwau, ‘Iesu ia gwau hel be lahi gabuna bona kara dika taudia be hel ena lahi dekenai do idia negea.’ Mani ita tahua, Iesu be hel ena hahediba herevana dekenai dahaka ia gwauraia.

[Footnote]