Oi Davaria Hel Ena Hahediba Herevana be Koikoi Neganai, Unai ese Edena Bamona Oi Ia Durua?

BEMA tau ta ese taunimanima ia hadibaia hel be hisihisi gabuna ta, ia ese Iehova Dirava ena ladana bona ena kara namodia ia hadikaia unai. Momokani, Baibel ia gwau Dirava ese kara dika taudia do ia hadikaia ore. (2 Tesalonika 1:​6-9) To, badu be Dirava ena kara badana ta lasi.

Iehova be badu kava o dagedage Diravana lasi. Esekiela 18:23 ai Dirava ia gwau: “Umui laloa lau be lau moale bema tau dikana ta ia mase, a? Lasi momokani.” Vadaeni, bema Dirava be kara dika tauna ena mase ia moalelaia lasi, edena bamona ia ese kara dika taudia be hisihisi do idia abia hanaihanai karana ia moalelaia diba?

Dirava ena kara badana be lalokau. (1 Ioane 4:⁠8) Oibe, “Lohiabada ena kara be namo, taunimanima ibounai dekenai. Ia karaia gaudia ibounai dekenai iena bogahisihisi ia henia.” (Salamo 145:⁠9) Unai hegeregerena, Dirava ia ura ita be mai iseda lalona ibounai ida Ia do ita lalokau henia.​​—⁠Mataio 22:​35-​38.

Hel Oi Garilaia o Dirava Oi Lalokau Henia​—⁠Edena Oi Ura?

Hel dekenai lauma ia hisihisi hanaihanai ena hahediba herevana dainai, taunimanima momo idia laloa Iehova be dagedage Diravana. To, bema tau ta be Dirava ena kara ia diba namonamo bona ia lalokau henia, ia be mai hemataurai ida Dirava do ia gari henia. Salamo 111:10 ia gwau: “Lohiabada gari henia kara be aonega hamatamaia ena dala. Lohiabada ena hereva idia badinaia taudia ibounai ese, diba namona idia abia noho.” Namo lasi ita gwau Dirava ita gari henia badina ia be dagedage Diravana. Lasi. To, iseda Havaraia Tauna ita gari henia, badina Ia ita matauraia bona ita ura lasi iseda kara amo Ia ita habadua.

Kathleen, ena mauri lagani be 32, ena sivarai mani ita itaia. Guna ia be drag ia ania momo, to ia diba hel be hisihisi abia gabuna lasi neganai, ena mauri ia haidaua. Ia be pati ia lao momo, matabodaga bona dagedage karadia ia karaia. Ia gwau: “Egu beibi lau itaia neganai, lau lalohisihisi badina egu kara be dika momokani bona iena mauri lau hadikaia noho. Unai dainai, lau be hel dekenai do lau lao.” Ena be Kathleen ia hekwarahi drag ania karana ia hadokoa, to ia rakatania diba lasi. Ia gwau: “Lau ura egu kara lau hanamoa, to egu mauri dalana be ia dika bona tanobada lalonai idia vara gaudia momo dainai lau lalometau. Toana be egu kara lau hanamoa be anina lasi.”

Gabeai, Kathleen be Iehova ena Witnes hahine ta ia hedavari henia. Ia gwau: “Egu Baibel stadi amo lau diba hel be lahi ia araia noho gabu korikorina ta lasi. Lau dekenai idia hahedinaraia Baibel siridia edia hereva be maoro. Hel dekenai lahi ese lau do ia gabua lasi herevana lau dibaia neganai, lau moale bada.” Danu, ia dibaia gauna ma ta be, Dirava ia gwauhamata taunimanima be tanobada ai do idia noho hanaihanai bona kara dika be do ia ore vaitani. (Salamo 37:​10, 11, 29; Luka 23:43) Ia gwau: “Hari lau be mai egu helaro​​—⁠Paradaiso ai mauri hanaihanai do lau abia!”

Kathleen ia diba hel ena hahediba herevana be koikoi dainai, unai ese do ia durua drag ania karana ia hadokoa, a? Ia gwau: “Lau ura dikadika drag lau ania neganai, Iehova Dirava lau noia lau ia durua unai ura lau koua totona. Lau diba Ia be unai kara mirona ia ura henia lasi bona lau ura lasi Ia do lau habadua. Ia ese lauegu guriguri ia haere henia.” (2 Korinto 7:⁠1) Kathleen ia ura lasi Dirava ia habadua dainai, unai ese ia durua drag ania karana ia rakatania totona.

Oibe, Dirava ita lalokau henia bona mai hemataurai ida ita gari henia karana ese ita do ia hagoadaia, Dirava ena ura ita karaia bona ita moale hanaihanai totona. Hel ena hahediba herevana dekenai ita gari karana be ita ia durua lasi. Salamo torea tauna ia gwau: “Lohiabada dekenai idia gari noho taudia ibounai be namo, badina iena dala dekenai idia raka noho.”​​—⁠Salamo 128:⁠1.

[Box/Pictures on page 9]

DAIDIA BE HEL AMO DO IDIA RUHAIA?

Greek gado amo idia hahanaia Baibel haida be daradara bada idia havaraia, badina Greek herevadia rua, Geʹen·na bona Haiʹdes idia hahanaia “hel.” Baibel lalonai inai hereva, Geʹen·na idia gaukaralaia neganai, ia hahedinaraia unuseniai idia lao kara dika taudia be do idia mase momokani bona idia toreisi lou diba lasi. To, Haiʹdes, o Hades dekenai idia lao mase taudia be idia toreisi lou diba.

Unai dainai, Iesu ia mase bona ia toreisi lou murinai, aposetolo Petero ese idia hebou taudia ia hamaorodia Dirava ese Iesu be “mase taudia edia gabu” o “hel” dekenai ia rakatania lasi. (Kara 2:​27, 31, 32; Salamo 16:10; King James Version) Unai siri lalonai Greek herevana Haiʹdes idia hahanaia “hel” o “mase taudia edia gabu.” To Iesu be lahi ia araia noho gabuna dekenai ia lao lasi. Hades o “hel” be gara o mase taudia idia guria gabuna. To, Dirava ese Hades amo Iesu sibona ia ruhaia lasi.

Baibel be toreisi lou ia herevalaia neganai, ia gwau: “Davara lalonai idia mase vadaeni taudia be davara ese idia ia henia daekau lou. Bona Mase, bona mase taudia edia gabu ese idia lalonai idia koua noho taudia idia henia daekau lou.” (Apokalupo 20:​13, 14) Hel o “mase taudia edia gabu ese idia lalonai idia koua noho taudia idia henia daekau lou,” anina be Dirava ese kara maoromaoro taudia do ia hatoredia isi lou. (Ioane 5:​28, 29; Kara 24:15) Unai be helaro namona ta vaira negana totona​​—⁠iseda lalokau mase taudia be edia mase gurina amo do idia “daekau lou”! Iehova, lalokau bada Diravana ese unai do ia karaia momokani.