Edena Bamona Haroro Gaukara ai Oi Haheauka Diba?

NEGA haida hesiku mamina oi abia dainai, oi ura emu haroro gaukara oi rakatania, a? Dagedage karadia, lalometau, gorere, turadia edia laloani karana, o eda haroro gaukara ai anina namona ia vara lasi dainai hesiku mamina ita abia diba. To, Iesu ena haheitalai mani oi laloa. Ia be hahetoho badadia ia davaria, to “guba ena moale be iena vairanai ia noho dainai” ia haheauka. (Heb. 12:⁠2) Ia diba bema ia hahedinaraia Satani ena samania herevadia Dirava dekenai be koikoi, Iehova do ia hamoalea.​​—⁠Aon. 27:⁠11.

Bema haroro gaukara lalonai oi haheauka noho, oi danu ese Iehova do oi hamoalea. To, bema gau haida ese emu haroro gaukara idia koua, dahaka do oi karaia? Ia buruka bona gorere momo hahine ta ladana, Krystyna ia gwau: “Nega momo lau hesiku bona lalometau. Badina gorere bona dina ta ta ena lalohekwarahi gaudia ese egu goada idia haorea.” Ena be unai bamona hekwakwanai oi davaria, to edena bamona oi haheauka diba?

Peroveta Taudia Tohotohoa

Basileia harorolaia taudia be edia haroro gaukara idia karaia noho totona, idaunegai peroveta taudia edia laloa dalana idia abia be namo. Mani Ieremia oi laloa. Iehova ese ia boiria peroveta gaukara ia karaia neganai, Ieremia ia ura lasi unai gaukara ia karaia. To, Dirava ia abidadama henia momokani dainai, mai haheauka ida unai gaukara aukana be lagani 40 mai kahana lalonai ia karaia.​​—⁠Ier. 1:6; 20:​7-11.

Henryk be Ieremia ena haheitalai ese ia hagoadaia. Ia gwau: “Lagani 70 mai kahana lalonai haroro gaukara lau karaia neganai, taunimanima be idia dagedage bona idia badu, unai dainai nega haida lau lalomanoka. Unai bamona negadiai, lau be Ieremia ena haheitalai lau laloa​​—⁠ia be Iehova ia lalokau henia bona ia abidadama henia momokani dainai, ena hesiai gaukara ia karaia noho diba.” (Ier. 1:​17) Rafał danu be Ieremia ena haheitalai ese ia hagoadaia bada. Ia gwau: “Ieremia be sibona ena hemami bona lalohadai dekenai ia tabekau lasi, to Dirava dekenai ia tabekau. Ena be taunimanima ese idia dagedage henia to mai gari lasi ida haroro gaukara ia karaia noho. Iena haheitalai lau laloatao noho be namo.”

Peroveta tauna ma ta be Isaia, iena haheitalai ese momo ia durua haroro gaukara lalonai idia haheauka totona. Dirava ese Isaia ia hamaoroa iena tano taudia be ia do idia kamonai henia lasi. Iehova ia gwau: “Inai taunimanima edia lalona do oi koua, bona edia taiana danu do oi koua.” Vadaeni, oi laloa Isaia ena gaukara be anina lasi, a? Lasi, Dirava be unai bamona ia laloa lasi! Ia ese Isaia ia abia hidi peroveta gaukara ia karaia totona neganai, Isaia ia gwau: “Lau be inai, do lau lao! Lau do oi siaia.” (Isa. 6:​8-​10) Isaia be ena hesiai gaukara ia rakatania lasi. Oi danu be Isaia bamona, Dirava ese ia henia gaukarana oi abia dae bona karaia noho, a?

Haroro gaukara ita karaia noho totona, Isaia bamona namona be taunimanima ese ita dekenai idia gwauraia badu herevadia ita laloa momo lasi. Rafał be unai bamona ia karaia, ia gwau: “Taunimanima edia hevaseha bona lalohadai kereredia lau laloa momo lasi. Egu teritori ai idia noho taudia be mai edia maoro dahaka hereva idia gwauraia o karaia totona.” Anna ia gwau: “Lau idia hagoadaia lasi herevadia dekenai lau laloa momo lasi. Haroro gaukara dekenai lau do lao lasi neganai, lau guriguri bona dina ena siri lau itaia guna, unai ese lau ia durua bada. Bona lalohadai kereredia lau laloa momo lasi.”

Peroveta tauna Esekiela be Babulonia ai idia noho kamonai lasi Iuda taudia huanai ena hesiai gaukara ia karaia. (Ese. 2:⁠6) Bema Esekiela ese Dirava ena hereva be taunimanima dekenai ia harorolaia lasi, bona ta be ena kara dika dainai ia mase, kerere be Esekiela ena. Iehova be Esekiela dekenai ia gwau: “Lau be do lau gwau unai tau ena mase be oiemu kerere dainai.”​​—⁠Ese. 3:​17, 18.

Henryk ia ura Esekiela ia tohotohoa, ia gwau: “Lau ura lasi taunimanima edia rara davana be lau dekenai ia noho. Taunimanima edia mauri be mai anina bada, unai dainai namona be idia ita durua.” (Kara 20:​26, 27) Zbigniew danu be unai bamona ia laloa, ia gwau: “Herevana taunimanima be lalohadai idauidau idia abia Esekiela dekenai, to Esekiela be ena gaukara ia karaia noho. Unai ese lau ia durua haroro gaukara dekenai Iehova ena lalohadai lau abia totona.”

Sibona Oi Gaukara Lasi

Haroro gaukara lalonai oi sibona oi gaukara lasi. Aposetolo Paulo bamona, ita gwau diba: “Ai ruaosi be Dirava ena gaukara ai karaia hebou noho.” (1 Kor. 3:⁠9) Krystyna be nega haida ia lalometau neganai, ia gwau: “Iehova lau noia lau dekenai goada ia henia totona. Bona Iehova be lau dekenai goada ia henia.” Oibe, haroro gaukara lalonai Dirava ena lauma helaga ese ita ia durua be namo!​​—⁠Sek. 4:⁠6.

Ita haroro neganai, lauma helaga ese ita do ia durua lauma ena huahua ita hahedinaraia totona. (Gal. 5:​22, 23, NW ) Unai ese ita ia durua haroro gaukara lalonai ita haheauka totona, herevana dahaka ia vara. Henryk ia gwau: “Haroro gaukara lau karaia neganai, unai ese lau ia durua egu kara lau hanamoa totona. Haheauka bona ma haida laloa bada karana lau hahedinaraia bona haroro gaukara ai lau hesiku haraga lasi.” Herevana haroro gaukara lalonai koua gaudia idia noho, to haheauka karana ese oi do ia durua lauma ena huahua ma haida oi hahedinaraia totona.

Iehova be ena aneru ia gaukaralaidia, haroro gaukara Ia gunalaia totona. (Apok. 14:⁠6) Baibel ese ia hahedinaraia aneru “milioni bona milioni” idia noho. (Apok. 5:​11) Iesu ena hakaua dalana henunai, aneru be Dirava ena hesiai taudia tanobada ai idia durua. Haroro gaukara oi karaia neganai unai oi laloa danu, a?

Anna ia gwau: “Haroro gaukara ai aneru be ita ida idia gaukara hebou karana lau lalohadailaia neganai, unai ese lau ia hagoadaia. Iehova bona Iesu edia hakaua dalana henunai aneru ese idia henia heduru lau laloa bada.” Kamonai anerudia danu ita gaukara hebou be hahenamo badana, ani?

Pablisa ma haida ida ita gaukara hebou neganai, edena dala ai unai ese ita do ia durua? Ita be abidadama witnes taudia hutuma bada huanai ita noho dainai, unai be hahenamo badana. Reana inai aonega herevana be oi dekenai ia guguru: “Tau ta ese ma tau ta dekena amo, diba ia davaria noho, auri ta ese ma auri ta ia segea noho bamona.”​​—⁠Aon. 27:⁠17.

Bema haroro gaukara ai ma haida ida ita gaukara hebou, unai ese ita do ia durua haroro dala namodia haida ita dibaia totona. Elżbieta ia gwau, “Pablisa idauidau ida lau gaukara hebou neganai, unai ese lau ia durua tadikaka taihu bona lau davaria taudia dekenai lalokau lau hahedinaraia totona.” Namona be haroro gaukara ai pablisa idauidau danu oi gaukara hebou. Unai ese emu haroro gaukara do ia hanamoa bona do oi moale.

Sibona Oi Naria Namonamo

Haroro gaukara ita moalelaia noho totona, namona be ita palani namonamo, nega ita atoa sibona eda stadi ita karaia totona, bona ita laga-ani namonamo. Anina be, iseda hetura karana Iehova ida bona iseda tauanina ita naria namonamo.

Baibel ia gwau: “Mai haheauka danu ia gaukara noho tauna ena laloa, ese anina ia havaraia bada noho.” (Aon. 21:⁠5) Zygmunt, ena mauri lagani be 88 ia gwau: “Sediual namona ese lau ia durua hesiai gaukara ai anina namona lau havaraia totona. Egu nega lau gaukaralaia namonamo, unai amo lau be mai egu nega haroro gaukara lau karaia totona.”

Baibel ena diba maoromaoro ese ita ia hagoadaia bona ita ia durua haroro gaukara ita karaia namonamo totona. Aniani korikori ese iseda tauanina ia hagoadaia hegeregerena, ita haroro noho totona, namona be hanaihanai Dirava ena Hereva ita stadilaia. Dina ta ta ai Baibel bona “nega korikori ai” ita abia Baibel buka bona magasin ita stadilaia neganai, unai ese ita do ia hagoadaia haroro gaukara ita karaia noho totona.​​—⁠Mat. 24:​45-​47, NW.

Elżbieta be ena mauri dalana ia haidaua, unai amo ena haroro gaukara ia hanamoa diba. Ia gwau: “TV raraia karana ena nega lau hamaragia, unai amo nega bada lau atoa haroro gaukara totona lau hegaegae. Hanuaboi ta ta ibounai Baibel lau duahia neganai, lau be teritori ai lau davaria taudia lau laloa. Idia lau durua totona magasin ena hereva haida bona siri haida lau tahua.”

Laga-ani namonamo karana ese oi dekenai goada do ia henia, haroro gaukara oi karaia namonamo totona. To, bema moale karadia dekenai nega bada oi haorea, unai ese oi do ia durua lasi. Ia haroro goadagoada pablisa ta, Andrzej, ia gwau: “Bema ita laga-ani namonamo lasi, iseda tauanina do ia hesiku bada, bona unai dainai do ita lalomanoka. Lau ura lasi unai be lau dekenai do ia vara.”​​—⁠Had. 4:⁠6.

Herevana ita gaukara goada, to taunimanima haida sibona be sivarai namona idia abia dae. To, Iehova be iseda gaukara namona do ia laloaboio lasi. (Heb. 6:​10) Ena be ita haroro neganai momo idia ura lasi ita idia hereva henia, to reana edia ruma ita rakatania murinai, iseda vadivadi idia herevalaia. Unai be Esekiela ese ia gwauraia hegeregerena: Taunimanima be “do idia diba momokani, peroveta tauna ta be idia edia huanai ia mai vadaeni.” (Ese. 2:⁠5) Momokani, iseda haroro gaukara be mai ena hekwarahi, to unai ese ita bona ita idia kamonai henia taudia dekenai namo bada do ia havaraia.

Zygmunt ia gwau: “Haroro gaukara ita karaia neganai, unai ese ita do ia durua kara namodia ita karaia, bona iseda lalokau Dirava bona dekena taudia dekenai ita hahedinaraia totona.” Andrzej ia gwau: “Taunimanima hamauria gaukarana ita karaia be hahenamo badana. Unai gaukara be gabeai do ita karaia lasi.” Bema hari haroro gaukara lalonai oi haheauka, oi danu be hahenamo momo oi abia diba.​​—⁠2 Kor. 4:​1, 2.

[Pictures on page 31]

Iseda hetura karana Iehova ida bona iseda tauanina naria namonamo karana ese ita ia durua haroro gaukara ita karaia noho totona