Duahia Taudia Edia Henanadai
Baibel ese “buka ladana Iasara” bona “Lohiabada ena tuari buka” ia gwauraia. (Ios. 10:13; Num. 21:14) To idia be Baibel ena buka ta lasi. Unai buka rua be lauma helaga ena siahu amo idia torea bona gabeai idia boio, a?
Ita gwau diba lasi unai buka rua be lauma helaga ena siahu amo idia torea bona gabeai idia boio. Lauma helaga ese ia hasiahudia bona Baibel idia torea taudia be nega haida buka ma haida edia hereva idia gaukaralaia danu. Idia torea herevadia haida be Baibel ena buka haida amo idia abia, to idia gaukaralaia ladadia be hari ita lalopararalaia lasi. Hegeregere, 1 Sivarai 29:29 be “Samuela, Natana, bona Gadi edia Sivarai Bukadia” ia gwauraia. Unai buka toi be reana hari ita gwauraia 1 Samuela bona 2 Samuela, eiava Hahemaoro Tauna bukadia.
Ma danu, reana buka haida edia ladana be Baibel bukadia edia ladana hegeregerena, to idia be Baibel ena kahana ta lasi. Hegeregere, inai idaunegai buka 4: “Iuda Ena King Edia Sivarai Buka,” “Iuda bona Israela King Taudia Edia Sivarai Buka,” “Israela Ena King Taudia Edia Sivarai Buka,” bona “Israela bona Iuda King Edia Sivarai Buka.” Unai buka edia ladadia be Baibel bukadia 1 King Taudia bona 2 King Taudia bamona, to unai buka 4 be lauma helaga ena siahu amo idia torea lasi, bona idia be Baibel ena kahana ta lasi. (1 Kin. 14:29; 2 Siv. 16:11; 20:34; 27:7) Peroveta tauna Ieremia bona Esera be edia Baibel ena sivarai idia torea neganai, unai idaunegai sivaraidia idia herevalaia bukadia idia noho danu.
Oibe, Baibel torea taudia haida be idaunegai sivarai bukadia idia sekea bona edia sivarai haida idia gaukaralaia danu, to unai bukadia be lauma helaga ena siahu amo idia torea lasi. Eseta 10:2 be “Media bona Parasa king edia sivarai buka” ia gwauraia danu. Unai hegeregerena, Luka be ena Evanelia bukana ia torea totona, ‘idia vara gaudia ia tahua namonamo, edia hamatamaia nega dekena amo.’ Reana Luka ena hereva ena anina be, iena nega ai idia noho buka ma haida ia sekea o tahua namonamo, bena Iesu ena bese ena lista be ena Evanelia bukana lalonai ia torea. (Luka 1:3; 3:23-38) Ena be Luka ese ia sekea bukadia be lauma helaga ena siahu amo idia torea lasi, to Luka ena Evanelia bukana be lauma helaga ena siahu amo ia torea. Bona ita dekenai unai Evanelia bukana be mai anina bada.
Toana be inai buka rua—“buka ladana Iasara” bona “Lohiabada ena tuari buka”—be guna idia noho, to Dirava ena lauma helaga ena siahu amo idia torea lasi. Unai dainai, unai buka rua be hari idia noho lasi. Unai buka rua edia hereva haida be Baibel ai idia torea dainai, diba bada taudia idia gwau unai buka rua lalonai, be Israela bona edia inai taudia huanai idia vara tuari anedia idia torea. (2 Sam. 1:17-27) Baibel ensaiklopidia ta ia gwau, unai buka rua lalonai be “ane abia taudia ese idaunegai Israela ena histori lalonai idia vara gaudia edia sivarai ena ane idia haboua bona naria.” Ena be Dirava ena peroveta taudia haida be buka ma haida idia torea danu, to unai buka be Iehova ese ena lauma helaga amo ia havaradia lasi o ia abia hidi lasi Baibel, ‘mai ena namo hadibaia, sisiba henia, gau idauidau hamaoromaoroa’ bukana unai, ena kahana ta ai idia lao totona.—2 Tim. 3:16, NW; 2 Siv. 9:29; 12:15; 13:22.
Baibel ese unai bamona bukadia haida edia ladana ia gwauraia bona edia hereva haida be Baibel ai idia torea, to unai ese ia hamomokania lasi unai bukadia be Dirava ena lauma helaga ena siahu amo idia torea. Iehova Dirava be “ena hereva” lalonai idia noho toretoredia ia gimaia namonamo bona unai toretore be “do ia gini noho ela bona hanaihanai.” (Isa. 40:8) Oibe, Iehova ese ia abia hidi Baibel bukadia 66 be hegeregere ita idia durua totona, unai amo iseda ‘goada be hegeregere momokani, vadaeni kara namodia ibounai do ita karaia diba, mai kwalimu danu.’—2 Tim. 3:16, 17.