Mose Ia Hereaia Tauna Laloa Bada
“Lohiabada emui Dirava ese peroveta tauna ta do ia siaia umui dekenai, emui varavara tauna ta, lau bamona. Ia gwauraia herevadia ibounai do umui kamonai.”—KARA 3:22.
1. Edena dala ai Iesu Keriso ese taunimanima edia mauri ia haidaua?
LAGANI 2,000 gunanai, natuna mero ta ia vara dainai, guba dekenai aneru milioni momo be mai moale ida Dirava idia hanamoa, bona unai kara ena sivarai be mamoe naria taudia haida ese idia kamonai. (Luka 2:8-14) Unai natuna mero ena mauri lagani be 30 neganai, ia be lagani toi mai kahana lalonai haroro gaukara ia karaia, bona taunimanima edia mauri ia haidaua. Histori torea tauna ta, Philip Schaff ese unai mero be inai bamona ia herevalaia: “Ena be Iesu ese buka ta ia torea lasi, to iena hereva bona kara be taunimanima momo ese buka idauidau ai idia torea. Bona edia tomadiho hereva badadia, diba bada taudia idia torea bukadia, bona tomadiho anedia edia sinado ai iena hereva idia noho. Unai ese ia hahedinaraia taunimanima ibounai be iena kara bona hereva idia laloa bada.” Oibe, unai tau matamata be Iesu Keriso.
2. Aposetolo Ioane ese Iesu bona ena haroro gaukara be edena bamona ia herevalaia?
2 Aposetolo Ioane ese Iesu ena haroro gaukara ia herevalaia bona dokonai ia gwau: “Kara momo herea danu Iesu ese ma ia karaia. Ibounai bema idia torea, lau laloa tanobada ibounai ena bada be do ia hegeregere lasi, unai buka ibounai haboua totona.” (Ioa. 21:25) Ioane ia diba ia be Iesu ese lagani toi mai kahana lalonai ia karaia karadia bona gwauraia herevadia edia sivarai haida sibona ia torea. To, Ioane ese ena Evanelia bukana lalonai ia torea herevadia be mai anina bada.
3. Edena dala ai iseda laloparara Iesu ena gaukara Dirava ena ura lalonai ita habadaia diba?
3 Evanelia bukadia foa sibona lasi, to Baibel bukadia ma haida ese Iesu ena sivarai idia gwauraia danu, bona unai ese iseda abidadama ia hagoadaia bada. Hegeregere, Baibel be Iesu ia do vara lasi neganai idia noho abidadama tatau haida edia sivarai ia gwauraia, bona unai ese ita ia durua Iesu ena gaukara Dirava ena ura lalonai ita lalopararalaia totona. Unai gaudia haida mani ita laloa.
Idaunegai Abidadama Tatau Haida be Keriso Idia Laulaulaia
4, 5. Daidia ese Iesu idia laulaulaia, bona edena dala ai?
4 Ioane bona Evanelia bukadia ma toi idia torea taudia idia gwau Mose, Davida, bona Solomona ese Iesu idia laulaulaia, badina ia be Dirava ese ia Abia Hidi Tauna bona King. Edena dala ai unai abidadama tatau be Iesu idia laulaulaia, bona edia sivarai amo dahaka ita dibaia?
5 Baibel ia gwau, Mose be peroveta tauna, gwaukau tauna, bona Israela taudia ia hamauria tauna. Iesu danu be unai gaukara ia karaia. Davida be mamoe naria tauna bona king ta, bona ia ese Israela edia inai taudia ia halusidia. Iesu danu be mamoe naria tauna bona ia kwalimu king ta. (Ese. 37:24, 25) Solomona be Iehova ia badinaia noho neganai, ia be aonega lohia tauna, bona ena lohia henunai Israela taudia be maino ai idia noho. (1 Kin. 4:25, 29) Iesu danu be aonega bada tauna bona Baibel ese ia gwauraia “Maino ena Lohia.” (Isa. 9:6) Unai ese ia hahedinaraia, Iesu Keriso ena gaukara bona idaunegai abidadama tatau haida edia gaukara be tamona, to Dirava ena ura lalonai Iesu ena gaukara ese edia gaukara ia hereaia. Hari Iesu bona Mose idia hegeregere dalana do ita herevalaia, unai ese ita do ia durua Iesu ena gaukara Dirava ena ura lalonai ita laloa bada totona.
Mose be Iesu Ia Laulaulaia
6. Dahaka dainai aposetolo Petero ia gwau Iesu ita kamonai henia be mai anina bada?
6 Pentekoste 33 C.E. murinai, aposetolo Petero be Mose ese ia gwauraia peroveta herevana ia gwauraia, bona unai peroveta herevana be Iesu Keriso dekenai ia guguru. Petero be dubu helaga lalonai taunimanima hutuma vairanai ia gini. Ia bona Ioane ese aena dika tauna ta idia hanamoa neganai, taunimanima momo idia “hoa bada” bona idia heau lao ia vara gauna idia itaia totona. Petero ia gwau, unai hoa karana ia vara ena badina be Iehova ena lauma helaga be Iesu Keriso amo ia gaukara noho. Bena, Heberu Revarevadia ena hereva ia gwauraia: “Mose ese iseda sene taudia dekenai ia hereva, ia gwau, ‘Lohiabada emui Dirava ese peroveta tauna ta do ia siaia umui dekenai, emui varavara tauna ta, lau bamona. Ia gwauraia herevadia ibounai do umui kamonai.’ ”—Kara 3:11, 22, 23; Deuteronomi 18:15, 18, 19 duahia.
7. Dahaka dainai Petero be Mose ia hereaia peroveta tauna ia herevalaia neganai, ena kamonai taudia idia laloparara?
7 Petero ena hereva idia kamonai taudia be Mose ese ia gwauraia herevadia idia diba. Badina idia be Iuda taudia bona Mose idia matauraia. (Deu. 34:10) Bona mai ura ida Mose ia hereaia peroveta tauna idia naria. Unai peroveta tauna be hamauria tauna sibona lasi, Mose bamona, to ia be Mesia, ‘Dirava ena Keriso, Iehova ena abia hidi tauna.’—Luka 23:35; Heb. 11:26.
Mose Bona Iesu Idia Hegeregere Dalana
8. Edena dala ai Mose bona Iesu idia hegeregere?
8 Dala haida ai, Iesu ena tanobada maurina be Mose ena mauri dalana ida ia hegeregere. Hegeregere, Mose bona Iesu be idia do beibi neganai, dagedage lohia taudia ese idia ura hamasedia, to idia hamasedia lasi. (Eso. 1:22–2:10; Mat. 2:7-14) Ma danu, Dirava ese idia ruaosi be ‘Aigupito amo ia boiria.’ Peroveta tauna Hosea ia gwau: “Israela be natuna maragina neganai lau lalokau henia. Lau ese Aigupito dekena amo lau boiria, badina ia be lauegu natuna.” (Hos. 11:1) Hosea be Dirava ena abia hidi tauna, Mose ese Aigupito amo Israela besena ia hakaua karana ia herevalaia. (Eso. 4:22, 23; 12:29-37) To, Hosea be Mose ena negai ia vara gauna sibona ia herevalaia lasi, to ia ese gabeai ia vara gauna ia herevalaia danu. King Heroda ia mase murinai, Iosepa bona Maria be Iesu ida Aigupito idia rakatania, unai neganai Hosea ena peroveta herevana ia guguru.—Mat. 2:15, 19-23.
9. (a) Mose bona Iesu be dahaka hoa karadia idia karaia? (b) Iesu bona Mose idia hegeregere daladia haida gwauraia. (Rau 26 ai, maua ladana “Dala Haida ai Iesu Bona Mose Idia Hegeregere” itaia.)
9 Mose bona Iesu be hoa karadia idia karaia, unai amo idia hahedinaraia Iehova be idia ia durua. Momokani, Baibel ai Mose be hoa karadia ia karaia tauna ginigunana. (Eso. 4:1-9) Hegeregere, Mose be ranu amo hoa karadia ia karaia, iena oda hegeregerena Naila Sinavai ena ranu be rara ai ia lao, Davara Kakakakana ia hapararaia, bona nadi amo ranu ia hadihoa. (Eso. 7:19-21; 14:21; 17:5-7) Iesu danu be ranu amo hoa karadia ia karaia. Ia karaia hoa kara ginigunana be, headava aria ta dekenai ranu be uaina ai ia halaoa. (Ioa. 2:1-11) Gabeai, ia ese Galilea Gohuna ai ia vara lai bona hurehure badadia ia koua. Bona ma nega ta ai, ia be davara ena latanai ia raka! (Mat. 8:23-27; 14:23-25) Mose bona Iesu idia hegeregere daladia haida be rau 26 ai ia noho maua dekenai oi itaia diba.
Keriso be Peroveta Tauna Dainai Ita Laloa Bada
10. Peroveta tauna korikorina ena gaukara be dahaka, bona dahaka dainai Mose be unai bamona tauna ta?
10 Taunimanima momo idia laloa peroveta tauna be vaira nega ai do idia vara gaudia ia perovetalaia, to ena gaukara be unai sibona lasi. Peroveta tauna korikorina be Iehova ena hereva ia gwauraia tauna, ia be Dirava ena ‘hoa gaudia ia herevalaia.’ (Kara 2:11, 16, 17) Ia be vaira nega ai do idia vara gaudia ia perovetalaia, Iehova ena ura ia gwauraia hedinarai, eiava Dirava ena hahemaoro herevana ia harorolaia. Mose be unai bamona peroveta tauna ta. Ia ese Aigupito ai do idia vara Hisihisi Ten ia perovetalaia. Sinai Ororo dekenai Taravatu gwauhamatana ia herevalaia. Bona Israela taudia dekenai Dirava ena ura ia hadibaia. To, Mose ia hereaia peroveta tauna ta be gabeai ia mai.
11. Edena dala ai Iesu ena peroveta gaukara be Mose ena ia hereaia?
11 Gabeai, Sekaraia be ena natuna, Ioane, ese do ia karaia gauna ia perovetalaia, unai amo Dirava ena ura ia hahedinaraia. (Luka 1:76) Unai natuna be Ioane Bapatiso bona ia be Iesu Keriso—Mose ia hereaia peroveta tauna—ena mai ia harorolaia. (Ioa. 1:23-36) Iesu be peroveta tauna dainai, gau momo ia perovetalaia. Hegeregere, ia be sibona ena mase, do ia mase dalana, do ia mase gabuna, bona daika ese do ia hamasea ia perovetalaia. (Mat. 20:17-19) Danu, Iesu ese Ierusalema bona ena dubu helaga do idia hadikaia karana ia perovetalaia neganai, ena kamonai taudia momo idia hoa. (Mar. 13:1, 2) Bona iseda nega lalonai do idia vara gaudia ia perovetalaia.—Mat. 24:3-41.
12. (a) Edena dala ai Iesu ese haroro gaukara ia hamatamaia? (b) Hari inai negai, dahaka dainai Iesu ena haheitalai ita tohotohoa?
12 Iesu be peroveta tauna ta sibona lasi, to ia be haroro bona hadibaia tauna. Ia be mai goada bada ida Dirava ena Basileia ena sivarai ia harorolaia, bona tau ta be unai bamona ia karaia lasi. (Luka 4:16-21, 43) Iesu be hadibaia tauna hereadaena. Iena hereva idia kamonai taudia haida idia gwau: “Hamatamaia nega dekena amo ia mai bona hari, tau ta ia hereva lasi inai tau ia hereva bamona.” (Ioa. 7:46) Iesu be gabu momo dekenai sivarai namona ia harorolaia goadagoada, bona ena hahediba taudia ia hagoadaia Basileia idia harorolaia goadagoada totona. Unai dainai, ia hamatamaia haroro bona hahediba gaukarana be hari inai negai tanobada hegegemadai idia do karaia noho. (Mat. 28:18-20; Kara 5:42) Lagani 2008 ai, Keriso ena murinai idia raka taudia 7 milioni bamona be hora 1,500,000,000 idia gaukaralaia Basileia ena sivarai namona idia harorolaia bona kamonai taudia dekenai Baibel ena hereva momokani idia hadibaia totona. Oi danu be unai gaukara oi karaia goadagoada, a?
13. Dahaka ese ita do ia durua “ita noga noho” totona?
13 Ita diba momokani Iehova be Mose bamona peroveta tauna ta do ia abia hidi herevana ia hagugurua. Unai oi diba dainai edena bamona oi ia durua? Oi abia dae momokani Baibel ese vaira negana ai do idia vara gaudia ia perovetalaia be do idia guguru, a? Oibe, Mose ia hereaia tauna, Iesu ena haheitalai ita laloa dobu karana ese ita do ia durua, “ita noga noho” bona kahirakahira Dirava ese do ia karaia gaudia ita lalopararalaia.—1 Tes. 5:2, 6.
Keriso be Gwaukau Tauna Dainai Ita Laloa Bada
14. Edena dala ai Mose be Dirava bona Israela taudia edia gwaukau tauna?
14 Mose bamona, Iesu be gwaukau tauna. Iehova be Mose ia gaukaralaia, Israela taudia dekenai Taravatu gwauhamatana ia henia totona. Bema Israela taudia be Dirava ena taravatu idia badinaia, vadaeni idia be Iena abia hidi besena ai idia lao diba. (Eso. 19:3-8) Unai taravatu be lagani 1513 B.C.E. ai idia badinaia ela bona aposetolo edia nega ai ia ore.
15. Edena dala ai Iesu be gwaukau tauna hereadaena?
15 Lagani 33 C.E. ai, Iehova be Israela bese matamatana—“Dirava ena Israela”—ida gwauhamata matamatana ta ia karaia, unai bese matamata be tanobada hegegemadai ai idia noho horoa Keristani taudia. (Gal. 6:16) Dirava ese Mose dekenai ia henia Taravatu gwauhamatana be nadi dekenai ia torea, to Iesu ese ia karaia gwauhamata matamatana be unai ia hereaia. Dirava ese unai taravatu be taunimanima edia kudouna dekenai ia torea. (1 Timoteo 2:5; Heberu 8:10 duahia.) Unai dainai, “Dirava ena Israela” be hari Dirava ena abia hidi besena, bona Mesia Basileiana ena “huahua do ia havaraia.” (Mat. 21:43) Unai abia hidi taudia be gwauhamata matamatana lalonai idia noho. To, idia sibona ese unai hahenamo idia abia lasi. Unai taravatu gwauhamata matamatana ese taunimanima momo, idia mase vadaeni taudia danu, dekenai hahenamo idauidau do ia mailaia.
Keriso be Hamauria Tauna Dainai Ita Laloa Bada
16. (a) Edena dala ai Iehova ese Mose ia gaukaralaia Israela taudia ia hamauria totona? (b) Esodo 14:13 ena hereva bamona, daika be hahemauri ena Badina?
16 Israela taudia be Aigupito do idia rakatania ena hanuaboi ginigabena ai, idia haida be dika bada idia davaria diba. Badina unai hanuaboi ai Dirava ena aneru be Aigupito dekenai natuna roboana ibounai ia alaia mase. Iehova ese Mose ia hamaoroa, bema Israela taudia be Pasova ena mamoe natuna ena rara amo edia ruma edia iduara ena au kahana kahana bona iduara ena atai auna idia dahua, edia natuna roboana be do idia mase lasi. (Eso. 12:1-13, 21-23) Bona unai bamona ia vara. Gabeai, Davara Kakakakana ai, Israela taudia be dika bada idia davaria diba. Badina idia be Davara Kakakakana bona Aigupito ena tuari taudia huanai idia noho dainai, edia heau mauri dalana be lasi. To Iehova be Mose ia gaukaralaia hoa dalanai ranu ia hapararaia, unai amo idia ia hamauria.—Eso. 14:13, 21.
17, 18. Edena dala ai Iesu be Mose ia hereaia hahemauri tauna badana?
17 Iehova be Mose amo ena taunimanima ia hamauria karana be mai anina bada, to Iesu amo taunimanima ia hamauria karana ese unai ia hereaia. Iehova ese Iesu amo taunimanima be kara dika ena igui amo ia hamauria. (Roma 5:12, 18) Bona “mauri hanaihanai” idia abia diba. (Heb. 9:11, 12) Iesu ena ladana ena anina be, “Iehova be Hahemauri Tauna.” Iesu, iseda Hahemauri Tauna, ese kara dika ena igui amo ita ia hamauria sibona lasi, to danu dala ia kehoa vaira nega ai mauri namona ita moalelaia totona. Iesu ese ena hahediba taudia be kara dika ena igui amo ia hamauria dainai, idia be Dirava ena badu do idia abia lasi bona Iehova idia tura henia namonamo diba.—Mat. 1:21.
18 Iesu ese kara dika ena igui amo ita ia hamauria dainai, vaira nega ai ita be do ita gorere bona mase lasi. Unai ita lalopararalaia namonamo totona, mani inai sivarai oi laloa: Iesu be Iairo ena ruma dekenai ia lao, badina iena natuna kekeni ia mase, iena mauri lagani be 12 sibona. Iesu ese Iairo ia hagoadaia: “Oi gari lasi, oi abidadama sibona lau dekenai, vadaeni ia be do ia namo lou.” (Luka 8:41, 42, 49, 50) Iesu ena hereva hegeregerena, kekeni be mase amo ia toreisi lou! Ena tama sina edia moale mani oi laloa! Oibe, “mase guria gabu dekenai idia noho taudia ibounai ese [Iesu ena] gadona do idia kamonai” bona do idia toreisi lou neganai, do ita mamia moalena mani oi laloa. (Ioa. 5:28, 29) Momokani, Iesu be iseda Hahemauri Tauna!—Kara 5:31 duahia; Tito 1:4; Apok. 7:10.
19, 20. (a) Iesu, Mose ia hereaia tauna ena gaukara ita laloa neganai, unai ese edena dala ai ita ia durua? (b) Hereva gabena ai dahaka do ita stadilaia?
19 Ita diba taunimanima ita durua be namo Iesu ena hahemauri karadia amo namo idia abia totona, unai ese ita ia hagoadaia haroro bona hahediba gaukara ita karaia totona. (Isa. 61:1-3) Ma danu, Mose ia hereaia tauna, Iesu ena gaukara ita diba karana ese ita ia hagoadaia dainai, ita abia dae Iesu ese ia idia badinaia taudia do ia hamauria bona kara dika taudia do ia hahemaoro henia.—Mat. 25:31-34, 41, 46; Apok. 7:9, 14.
20 Oibe, Iesu be Mose Badana. Ia karaia kara badadia momo be Mose ese ia karaia lasi. Iesu be peroveta tauna bamona ia hereva bona gwaukau tauna bamona ia kara dainai, tanobada taudia ibounai be namo idia davaria. Iesu be Hamauria Tauna dainai, ia ese dala ia kehoa taunimanima be mauri hanaihanai idia abia totona. To, idaunegai abidadama hesiai taudia amo Iesu ita dibaia noho. Hereva gabena ese do ia hahedinaraia edena dala ai Iesu be Davida Badana bona Solomona Badana.
Anina Oi Gwauraia Diba, A?
Edena dala ai Iesu be Mose ia hereaia
• peroveta tauna?
• gwaukau tauna?
• hamauria tauna?
[Box/Picture on page 26]
Dala Haida Ai Iesu Bona Mose Idia Hegeregere
◻ Idia ruaosi be Iehova bona ena taunimanima idia hesiai henia totona, edia dagi badadia idia rakatania.—2 Kor. 8:9; Fili. 2:5-8; Heb. 11:24-26.
◻ Idia ruaosi be Iehova ena abia hidi taudia.—Mar. 14:61, 62; Ioa. 4:25, 26; Heb. 11:26.
◻ Idia ruaosi be Iehova ena ladanai idia mai.—Eso. 3:13-16; Ioa. 5:43; 17:4, 6, 26.
◻ Idia ruaosi idia manau.—Num. 12:3; Mat. 11:28-30.
◻ Idia ruaosi be taunimanima hutuma idia ubua.—Eso. 16:12; Ioa. 6:48-51.
◻ Idia ruaosi be hahemaoro gaukara bona taravatu henia gaukara idia karaia.—Eso. 18:13; Mal. 4:4; Ioa. 5:22, 23; 15:10.
◻ Idia ruaosi be Dirava amo siahu idia abia, Iena ruma naria taudia ai idia lao totona.—Num. 12:7; Heb. 3:2-6.
◻ Idia ruaosi be Iehova ena kamonai Witnes taudia.—Heb. 11:24-29; 12:1; Apok. 1:5.
◻ Mose bona Iesu idia mase murinai, Dirava ese edia tauanina ia hunia.—Deu. 34:5, 6; Luka 24:1-3; Kara 2:31; 1 Kor. 15:50; Iuda 9.