Herevahereva Lasi be mai Ena Nega

ASIA tano ena aonega hereva ta ia gwau: “Herevahereva karana be siliva bamona, bona herevahereva lasi karana be golo bamona.” Buka ta, Brewer’s Dictionary of Phrase and Fable ese Heberu gado ai unai aonega herevana be inai bamona ia gwauraia: “Bema hereva ta ena davana be sikele tamona bamona, vadaeni herevahereva lasi ena davana be sikele rua bamona.” Bona idaunegai Israela ena aonega tauna King Solomona ia gwau: “Tanobada dekenai idia vara gaudia ibounai be mai edia nega korikori . . . Regerege lasi dekenai ita noho be mai ena nega, bona do ita herevahereva danu be mai ena nega.”​​—⁠Had. 3:​1, 7.

To edena negai ita herevahereva lasi be maoro? Inai hereva “herevahereva lasi” be nega momo Baibel lalonai ia hedinarai. Baibel ai unai hereva idia gaukaralaia siridia ese idia hahedinaraia, iseda mauri lalonai nega haida ita herevahereva lasi be maoro. Unai bamona ita karaia ena badina toi be inai: Hemataurai karana ita hahedinaraia, ita aonega bona laloa kehoa, bona ita laloa dobu. Mani idia ta ta ita herevalaia.

Hemataurai Karana

Herevahereva lasi karana be hemataurai karana ta. Peroveta tauna Habakuku ia gwau: “Lohiabada be inai bamona lasi. Ia be iena Dubu Helaga lalonai ia noho. Umui tanobada dekenai noho taudia ibounai be Lohiabada ena vairanai do umui mai, regena ta lasi.” (Hab. 2:​20) Tomadiho momokani taudia be ‘Iehova ena hahemauri idia naria, mai regerege lasi ida.’ (Lal. 3:​26, BHğ) Sepanaia 1:7 ia gwau: “Lohiabada ena dina be ia kahirakahira vadaeni. Unai dina dekenai Dirava ese, kara badana ta do ia karaia. Unai dainai iena vairana dekenai, regena ta do umui karaia lasi.”

Ena be hereva ta ita gwauraia lasi, to Iehova ita hanamoa diba, a? Nega haida Dirava ese ia havaraia gaudia edia hairai ita itaia neganai, ita hoa dainai hereva ta ita gwauraia lasi, a? Unai havaraia gaudia namodia ita laloa neganai, iseda lalona ai Havaraia Tauna ita hanamoa. Salamo torea tauna be Dirava ena havaraia gaudia ia laloa neganai, ia gwau: “Dina bona hua e, Lohiabada do umui hanamoa. Hisiu mai emui diaridiari e, Lohiabada do umui hanamoa. Guba ataiai momokani, Lohiabada ena ladana do umui abia isi. Guba ena ataiai dekenai ia noho ranu e, Lohiabada ena ladana do umui hanamoa. Inai gaudia ibounai ese Lohiabada ena ladana idia abia isi be namo, badina Lohiabada ese ia oda dainai, idia be idia vara.”​​—⁠Sal. 148:​3-5.

Iehova sibona ita matauraia bona iena hereva ita badinaia be namo. Hegeregere, Dirava ena peroveta tauna Mose be Israela besena dekenai ena hereva dokona ia henia neganai, ia bona hahelaga taudia ese helai taudia ibounai idia hagoadaia, idia gwau: “Umui kamonai namonamo . . .  Lohiabada, emui Dirava ena oda bona taravatu ibounai, hari dina umui dekenai lau henia gaudia do umui kamonai henia.” Hahelaga taudia ese Dirava ena Taravatu idia duahia neganai, Israela natudia danu idia kamonai be namo. Mose ia gwau: “Taunimanima ibounai do umui haboua, tau bona hahine, memero bona kekeni, . . . Vadaeni do idia kamonai, edia lalona be do idia kehoa, bona Lohiabada emui Dirava do idia gari henia. Bona inai Taravatu ena hereva ibounai do idia badinaia, bona edia kara do idia karaia.”​​—⁠Deu. 27:​9, 10; 31:​11, 12.

Hari inai negai, namona be Iehova idia tomadiho henia taudia be mai hemataurai ida Keristani hebou maragidia bona badadia ai, hadibaia herevadia idia kamonai namonamo! Platfom amo Baibel ena hereva momokanidia idia henia neganai, ma haida ida anina lasi gaudia ita herevalaia karana ese ia hahedinaraia, ita be Dirava ena Hereva bona iena orea ita matauraia lasi, ani? Namona be program ia heau noho lalonai, ita herevahereva lasi bona ita kamonai namonamo.

Ta ida ita herevahereva neganai, ita kamonai namonamo karana amo ita hahedinaraia ia ita matauraia. Hegeregere, Iobu be ia idia samania taudia dekenai ia gwau: “Lau dekenai do umui hadibaia, vadaeni regerege ta lasi do lau noho.” Iobu be ia herevahereva lasi to mai ena ura ida edia hereva ia kamonai. Bona ia ura hereva neganai, ia gwau: “Harihari do umui hereva lasi, vadaeni do lau hereva.”​​—⁠Iobu 6:​24; 13:⁠13.

Aonega Bona Laloa Kehoa

Baibel ia gwau: “Iena uduna ena hereva ia koua noho tauna, be mai ena aonega.” “Aonega tauna be hereva ta do ia gwauraia lasi.” (Aon. 10:19; 11:12) Iesu be ia herevahereva lasi karana amo aonega bona laloa kehoa ia hahedinaraia namo herea. Iesu ia laloa bema ena inai taudia huanai hereva ta ia gwauraia, vadaeni gau namona ta do ia vara lasi, unai dainai “ia hereva lasi.” (Mat. 26:63) Gabeai, Pilato ena vairanai ia gini neganai, Iesu “ia haere lasi.” To mai aonega ida ia karaia gaudia bona ia herevalaia gaudia amo Pilato ia haere ia henia.​​—⁠Mat. 27:​11-​14.

Bema ta ese ita ia habadua, hereva ta ita gwauraia lasi karana be aonega karana. Aonega herevana ta ia gwau: “Iena badu ia hakerua tauna, be mai ena aonega danu, to bema ia badu haraga neganai, tau ta ese iena kavakava do ia habadaia.” (Aon. 14:29) Hepapahuahu ta lalonai, bema hereva kererena ta ita gwauraia haraga, gabeai unai hereva dainai do ita lalohisihisi. Unai bamona negadiai, iseda hereva be kavakava tauna bamona, bona unai ese iseda lalomaino ia hadikaia diba.

Bema iseda uduna ita naria namonamo, unai be aonega karana. Haroro gaukara lalonai haida ese ita idia hereva dika henia neganai, namona be ita herevahereva lasi. Danu, nega haida sikuli o gaukara turadia ese hevaseha mirodia o hereva dikadia idia gwauraia neganai, aonega dalana be ita herevahereva lasi o ita kiri lasi, unai amo do idia diba unai bamona herevadia ita moalelaia lasi. (Efe. 5:⁠3) Salamo torea tauna ia gwau: “Lau ese egu mauri dalana do lau naria namonamo, bona egu uduna ena hereva danu do lau naria, kara dika do lau karaia lasi totona. Bona tau dikadia be lau kahirakahira idia noho neganai, hereva ta do lau gwauraia lasi.”​​—⁠Sal. 39:⁠1.

Mai ena “aonega tauna” be hunia herevadia ia hahedinaraia lasi. (Aon. 11:12) Keristani tauna momokanina be ma haida dekenai hunia herevadia ia gwauraia hedinarai lasi be namo. Keristani elda taudia ese hunia herevadia idia gwauraia hedinarai lasi be namo, unai dala amo tadikaka taihu ese idia matauraia diba.

Ena be ta ia herevahereva lasi, to ita gwau lasi ia be unai bamona tauna. Lagani 1900 ai, England ena toretore tauna Sydney Smith, be ena negai ia noho tauna ta ia herevalaia, ia gwau: “Nega haida ia herevahereva lasi, bona unai dainai ia hereva neganai hagoadaia hereva namodia sibona ia gwauraia.” Momokani, turadia rua idia herevahereva neganai, tamona ia hereva bona ma ta ia kamonai be namo. Unai amo ia be ta ena hereva ia kamonai namonamo diba.

Solomona ia gwau: “Hereva momo ese kara kerere idia havaraia noho, to iena uduna ena hereva ia koua noho tauna, be mai ena aonega.” (Aon. 10:19) Unai dainai, ia herevahereva momo lasi tauna be nega momo do ia hereva kerere lasi. To Baibel ia gwau: “Kavakava tauna bema ia hereva lasi neganai, taunimanima do idia laloa ia be aonega tauna. Bema iena uduna ia hakapua neganai, do idia gwau ia be mai lalona tauna.” (Aon. 17:28) Unai dainai, namona be guriguri amo Iehova ita noia iseda ‘uduna do ia gimaia’ totona.​​—⁠Sal. 141:⁠3.

Laloa Dobu Karana

Baibel ia gwau, kara maoromaoro idia badinaia taudia be “Lohiabada ena Taravatu idia laloa, dina bona hanuaboi ibounai lalonai.” (Sal. 1:⁠2) The Amplified Bible ia gwau: “Iena taravatu be . . . nega ibounai ia laloa dobu . . . dina bona hanuaboi ibounai lalonai.” Edena negai Dirava ena taravatu oi laloa dobu be namo?

Aberahamo ena natuna, Isako be ‘adorahi ta, dina ia diho kahirakahira neganai, tano palaka dekenai ia loaloa [“gau haida ia laloa dobu totona,” NW ].’ (Gen. 24:63) Isako be regerege lasi negana bona gabuna ta ia abia hidi ia laloa dobu totona. King Davida be hanuaboi ai regerege be lasi neganai, ia laloa dobu. (Sal. 63:⁠6) Ena be Iesu be goevadae tauna, to ia ura regerege lasi gabudia ai ia noho bona ia laloa dobu, hegeregere taunimanima idia noho lasi gabudia, ororo gabudia, bona regerege lasi gabudia ma haida dekenai ia lao.​​—⁠Mat. 14:23; Luka 4:​42; 5:​16.

Regerege lasi be mai ena namo. Ita do ia durua sibona eda lalohadai bona kara ita tahua namonamo bona hanamoa diba. Herevahereva lasi o regerege lasi karana ese ita dekenai lalomaino ia henia diba. Regerege lasi negadiai mai anina bada gaudia ita laloa dobu neganai, unai ese ita do ia hagoadaia ita manau bona iseda mauri lalonai mai anina bada gaudia ita laloa bada.

Ena be herevahereva lasi karana be mai ena namo, to “herevahereva danu be mai ena nega.” (Had. 3:⁠7) Hari inai negai tomadiho momokani taudia be “tanobada ibounai dekenai” Dirava ena Basileia ena sivarai namona idia harorolaia goadagoada. (Mat. 24:14) Unai gaukara dainai edia namba ia bada ia lao bona idia moale bada. (Mika 2:​12) Unai dainai, namona be Basileia ena sivarai namona idia harorolaia goadagoada taudia ida ita gaukara hebou, bona Dirava ena kara namodia ita herevalaia. Unai mai anina bada gaukarana ita karaia neganai, namona be iseda mauri dalana amo ita hahedinaraia, nega haida herevahereva lasi karana be mai anina bada, ia be golo bamona.

[Picture on page 3]

Iseda Keristani heboudia lalonai, namona be ita kamonai namonamo bona diba ita abia

[Picture on page 4]

Haroro gaukara lalonai haida ese ita idia hereva dika henia neganai, namona be ita herevahereva lasi

[Picture on page 5]

Regerege lasi negadiai ita laloa dobu