Dokona Ia Mai Neganai, Edeseniai Oi Noho be Namo?

ARAMAGEDONO ai Iehova ese inai tanobada dikana do ia haorea neganai, kara maoromaoro taudia dekenai dahaka do ia vara? Aonega Herevadia 2:​21, 22 ia gwau: “Kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.”

Edena dala ai kara maoromaoro taudia be tano ai do idia noho momokani? Idia totona heau mauri gabuna ta do ia noho, a? Dokona ia mai neganai, kara maoromaoro taudia be edeseniai idia noho be namo? Unai henanadai ita haerelaidia totona, Baibel lalonai idia noho sivarai foa do ita itaia.

Gabu be mai Anina Bada Negadia

Noa bona Lota edia roho mauri sivaraidia be Petero Iharuana 2:​5-7 ese ia gwauraia: “Gunaguna, taunimanima momo ese Dirava idia kamonai henia lasi neganai, ia ese idia ia bogahisihisi henia lasi. To abata bada herea ia havaraia, vadaeni ibounai idia mase. Noa, kara maoromaoro ia harorolaia tauna, bona taunimanima 7, idia sibona idia mauri. Dirava ese Sodoma bona Gomora danu ia kota henia. Lahi dekena amo unai hanua ruaosi ia araia ore. Unai kara dekena amo, Dirava ese ia dekenai idia gari henia lasi taudia ia hagaridia. Badina be do idia diba, edia kerere davana be dohore unai lahi hegeregere. Dirava ese unai kara maoromaoro tauna Lota ia hamauria. Lota be unai lebulebu taudia edia kara dainai iena lalona be ia metau.”

Edena dala ai Noa be Abata amo ia roho mauri? Dirava ese Noa ia hamaoroa: “Mauri gaudia ibounai do lau haorea. Ibounai do lau hamasea haorea, badina tanobada be edia kara dika dekenai ia honu momokani. Lagatoi namona ta, au namodia dekenai do oi haginia.” (Gen. 6:​13, 14) Noa ese lagatoi ia karaia Iehova ena hereva hegeregerena. Dina 7 idia do noho bona abata do ia ginidae neganai, Iehova ese Noa ia hamaoroa animal idauidau do ia haboudia bona iena ruma bese ida lagatoi lalonai do ia hakaudia vareai. Dina namba 7 ai Iehova ese lagatoi ena iduara ia koua, “bona medu be tanobada ena latanai ia diho, dina 40 bona hanuaboi 40.” (Gen. 7:​1-4, 11, 12, 16) Noa bona ena ruma bese “be ranu dekena amo idia mauri.” (1 Pet. 3:​20) Lagatoi lalonai idia noho dainai idia mauri. Tanobada ibounai dekenai roho mauri gabuna ta be lasi.​​—⁠Gen. 7:​19, 20.

Iehova ese Lota dekenai ia henia hadibaia hereva be ma idau. Aneru rua ese Lota idia hadibaia edena gabu ai ia noho lasi be namo. Lota idia hamaoroa: “Oiemu varavara ta ia noho inai hanua [Sodoma] dekenai, oi abidia, bona inai gabu umui rakatania! Badina be inai gabu do ai hadikaia ore.” Ororo dekenai do idia heau lao be namo.​​—⁠Gen. 19:​12, 13, 17.

Noa bona Lota edia haheitalai ese ia hahedinaraia “bema hisihisi bona metau Dirava badinaia taudia dekenai idia noho neganai, Lohiabada ese inai hisihisi dekena amo idia ia hamauria diba. Dirava ese danu kara dika taudia ia guia diba, ela bona Kota Bada Dinana ia ginidae.” (2 Pet. 2:⁠9) Inai sivarai rua amo ita diba, Noa bona Lota idia roho mauri totona Iehova ese ia gwauraia gabuna dekenai idia noho be gau badana. Noa ia roho mauri totona lagatoi lalonai ia noho be namo; Lota be dika ia davaria lasi totona, Sodoma ia rakatania bona ororo dekenai ia heau lao be namo. To, Iehova be unai dala sibona amo taunimianima ia hamauria, a? Herevana kara maoromaoro taudia be edeseniai idia noho o edia gabu idia rakatania lasi, to Iehova ese idia ia hamauria diba, a? Unai henanadai ena haere ita diba totona, mani inai sivarai rua ita laloa.

Hanaihanai Gabu be mai Anina Bada Roho Mauri Totona, A?

Mose ena negai, Aigupito taudia dekenai Iehova ese hisihisi namba ten Ia do havaraia lasi neganai, Israela taudia Ia hagania, Pasova boubouna ena animal rarana be edia iduara ena au kahana kahana bona ataiai do idia atoa. Dahaka dainai? ‘Badina be Lohiabada ese inai tano do ia raka hanaia, Aigupito taudia do ia alaia mase, to rara be iduara ena ataiai au bona iduara ena kahana kahana au dekenai do ia itaia neganai, Lohiabada ese unai iduara do ia raka hanaia sibona, Alaia Aneruna ena dala do ia koua, do ia vareai lasi unai ruma dekenai, idia do ia alaia lasi totona.’ Unai hanuaboi ai, “Lohiabada ese vara guna memero ibounai Aigupito tano ibounai dekenai ia alaia mase, Farao, ena vara guna merona ia lao bona dibura ruma dekenai idia koua tauna ena vara guna merona, bona boromakau edia vara guna natudia danu.” Israela taudia edia vara guna natudia ibounai be idia mase lasi, bona idia roho mauri totona gabu ma ta dekenai idia lao lasi.​​—⁠Eso. 12:​22, 23, 29.

Danu Ieriko dekenai ia noho ariara hahine Rahaba ena sivarai mani oi laloa. Israela taudia be Gwauhamata Tanona do idia abia gwauraia. Israela ena spai taudia rua ese Rahaba idia hamaoroa Ieriko hanua be Israela taudia ese do idia hadikaia neganai, idia ia hamaoroa Ieriko hanua taudia be idia gari dikadika. Ia ese unai spai taudia rua ia hunia bona idia ia noia Ieriko hanuana idia hadikaia neganai, ia bona ena ruma bese do idia hamasea lasi. Unai spai taudia rua ese Rahaba idia hamaoroa ena ruma bese taudia ibounai be iena ruma ai do ia haboudia, iena ruma be magu latanai. Bema ruma idia rakatania, idia be dika do idia davaria. (Ios. 2:​8-​13, 15, 18, 19) To, gabeai Iehova ese Iosua ia hamaoroa “hanua maguna be do ia moru.” (Ios. 6:⁠5) Toana be matamanai spai taudia rua ese idia gwauraia roho mauri gabuna, be hari do idia hadikaia. Edena dala ai Rahaba bona ena ruma bese do idia roho mauri?

Ieriko hanuana hadikaia negana ia ginidae neganai, hahelaga taudia ese kibi idia hiriria bona Israela taudia idia boiboi badabada. Iosua 6:​20 ia gwau: ‘Vadaeni hanua ena magu ia moru diho, bona maoromaoro [Israela ena] tuari taudia idia raka vareai, hanua idia abia.’ Unai be tau ta ese ia koua diba lasi. To, Rahaba ena ruma sibona be ia moru lasi. Iosua ese spai taudia ruaosi ia hamaoroa, ia gwau: “Ariara hahine ena ruma dekenai do umui daekau, hahine mai ena varavara taudia ibounai danu do umui hakaua, emui gwauhamata umui henia hegeregerena.” (Ios. 6:​22) Rahaba ena ruma lalonai idia noho taudia ibounai idia roho mauri.

Dahaka be mai Anina Bada?

Noa, Lota, Mose ena negai idia noho Israela taudia, bona Rahaba edia roho mauri sivaraidia amo dahaka ita dibaia? Edena dala ai unai sivarai ese ita idia durua, inai tanobada dikana ena dokona ia mai neganai, ita be edeseniai do ita noho totona?

Momokani, Noa be lagatoi lalonai ia noho dainai ia mauri. To, dahaka dainai ia be unuseniai ia noho? Badina ia be Dirava ia abidadama henia bona kamonai henia dainai, a? Baibel ia gwau: “Noa ese unai bamona ia karaia, Dirava ena hereva ibounai hegeregere.” (Gen. 6:​22; Heb. 11:⁠7) Ita be edena bamona? Iehova ese ita dekenai ia henia hahegani ita badinadia, a? Noa be “kara maoromaoro ia harorolaia tauna” danu. (2 Pet. 2:⁠5) Ena be iseda teritori ai haida idia kamonai lasi, to ita be Noa bamona haroro gaukara ita karaia goadagoada noho, a?

Lota be Sodoma ia heautania dainai, ia roho mauri. Ia roho mauri badina Dirava ena matanai ia kara maoromaoro, bona Sodoma bona Gomora taudia edia lebulebu karadia dainai ia lalometau bada. Hari inai negai idia vara kara dika dainai ita lalometau, a? Eiava ita itaia loulou dainai ita laloa bada lasi, a? Ita hekwarahi ‘mai goevagoeva bona kerere lasi danu’ ita noho totona, a?​​—⁠2 Pet. 3:​14.

Aigupito ai idia noho Israela taudia bona Ieriko hahinena Rahaba bona ena ruma bese be idia roho mauri totona, edia ruma lalonai idia noho be namo. Unai idia karaia totona abidadama bona badinaia kara be gau badana. (Heb. 11:​28, 30, 31) Mani oi laloa, Aigupito dekenai “taitai badana ia vara” neganai, Israela taudia ta ta be reana edia ruma bese ena vara guna natuna sibona idia itaia noho. (Eso. 12:30) Mani oi laloa, Ieriko ena haba idia moru ena regena be ia mai kahirakahira neganai, Rahaba be reana ena ruma bese taudia ida gabu tamona dekenai idia haboua. Rahaba be mai ena abidadama dainai, hereva ia kamonai bona ruma lalonai ia noho.

Kahirakahira Satani ena tanobada dikana be do ia ore. Iehova ese ena “badu dinana dekenai” ena taunimanima do ia gimaia dalana be ita do diba lasi. (Sep. 2:⁠3) Herevana unai neganai ita be edeseniai do ita noho, to ita diba momokani bema Iehova ita abidadama henia bona kamonai henia, do ita roho mauri. Unai nega ita do naria noho lalonai, Isaia ia perovatalaia ‘ruma’ dekenai, lalohadai maorona ita abia be mai anina bada.

“Emui Ruma Dekenai Do Umui Raka Vareai”

Isaia 26:20 ia gwau: “Egu bese taudia e, emui ruma dekenai do umui raka vareai, bona emui iduara do umui koua. Nega sisina lalonai do umui hunia, ia lao bona Dirava ena badu do ia ore.” Lagani 539 B.C.E. ai, Mede bona Parasa ese Babulonia idia abia neganai, unai be Isaia ena peroveta herevana ia guguru negana ginigunana. Parasa tauna Kurese be Babulonia lalonai ia vareai neganai, taunimanima ibounai ia hagania edia ruma lalonai do idia noho, badina ia be ena ami taudia ia oda henia vadaeni bema tau ta be murimuri dekenai idia davaria, do idia hamasea.

Iseda negai, Isaia ese ia herevalaia “ruma” be tanobada hegegemadai Iehova ena Witnes taudia edia kongrigeisen 100,000 mai kahana. Unai kongrigeisen be mai anina bada ita ta ta eda mauri lalonai. Bona “hisihisi badana” negana lalonai danu ita do idia durua noho. (Apok. 7:​14) Dirava be ena taunimanima ia haganidia “ruma” dekenai idia vareai, bona idia hunia “ia lao bona Dirava ena badu do ia ore.” Unai dainai namona be kongrigeisen ita badinaia noho, bona iseda lalona ita hadaia kongrigeisen ida ita gaukara hebou totona. Paulo ena sisiba ita laloa diba, ia gwau: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do [ita] habadaia be namo. Badina be Lohiabada ena Dina be kahirakahira do ia ginidae.”​​—⁠Heb. 10:​24, 25.

[Pictures on page 7]

Idaunegai Dirava ese ia karaia hahemauri karadia amo dahaka ita dibaia?

[Picture on page 8]

Hari inai negai, “ruma” be dahaka ia laulaulaia?