Duahia Taudia Edia Henanadai

Satani be edena nega ai guba amo idia negea diho?​​—⁠Apok. 12:​1-9.

Ena be Apokalupo bukana ese Satani idia negea diho ena nega korikorina ia gwauraia lasi, to idia vara gaudia haida ia herevalaia, unai ese ita ia durua Satani idia negea diho negana ita diba totona. Apokalupo bukana ese Mesia Basileiana ena vara ia gwauraia guna. Unai murinai, “guba dekenai tuari ia vara,” bona unai tuari ai Satani ia kwalimu lasi dainai guba amo idia negea diho.

Baibel ese ia hahedinaraia goevagoeva lagani 1914 ai ‘idau bese edia nega ia ore’ bona Iesu ena Basileia ia lohia matamaia.a (Luka 21:24) Vadaeni, edena nega ai guba dekenai tuari ia matamaia bona Satani be guba amo idia negea diho?

Apokalupo 12:4 ia gwau, “Unai huala [Satani] ese, unai do ia mara hahine ena vairanai ia gini hegaegae noho. Ia naria noho, ela bona unai hahine ese mero do ia havaraia, ia ese mero do ia ania totona.” Unai ese ia hahedinaraia, Satani ia ura ia vara Basileiana do ia hadikaia haraga. Ena be Iehova ese Satani ena ura dikana ia koua, to Satani be ena lalona ia hadaia unai Basileia matamatana ia hadikaia totona. Unai dainai, “Mikaela mai ena aneru” ida be karaharaga guba amo “huala mai ena aneru” ida idia negea diho, unai amo Basileia idia hadikaia lasi. Unai ese ia hahedinaraia, lagani 1914 ai Basileia idia haginia matamaia murinai, Satani be guba amo idia negea diho.

Ita laloa gauna ma ta be horoa Keristani taudia edia toreisi lou​​—⁠Baibel ese ia hahedinaraia bamona​​—⁠be Basileia idia haginia murinai ia vara.b (Apok. 20:⁠6) Baibel ese ia hahedinaraia Iesu mai ena aneru bona huala mai ena aneru be guba ai idia tuari bona unai huala mai ena aneru ida be tanobada dekenai idia negea diho neganai, horoa Keristani taudia be unai tuari lalonai idia noho lasi. Unai dainai ita gwau diba, unai tuari ia ore neganai, horoa Keristani taudia idia toreisi lou matamaia.

Unai dainai, Baibel ese Satani bona iena demoni be guba amo idia negea diho ena nega korikorina ia gwauraia lasi. To, idia vara gaudia ese idia hahedinaraia goevagoeva, lagani 1914 ai Iesu Keriso be king ai ia lao bona unai murinai Satani bona ena demoni be guba amo idia negea diho.

[Footnotes]