Itai Ena Badinaia Karana Tohotohoa

“LOHIABADA Dirava e, Siahu Ibounai Dirava e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. Lohiabada e, daika ese oi dekenai do ia gari henia lasi? Daika ese oiemu ladana do ia hanamoa lasi? Badina be oi sibona be helaga [“badinaia karana oi hahedinaraia,” NW ].” Unai ane be guba ai idia abia, bona “dagedage gauna mai ena laulauna dekena amo idia kwalimu” taudia ese idia abia. Unai ane be Dirava ena badinaia karana ia herevalaia. (Apok. 15:​2-4) Iehova ia ura ia idia tomadiho henia taudia be unai kara namona do idia hahedinaraia.

Satani Diabolo be ia gaukara goada tanobada ai Dirava ena hesiai taudia be Iena lalokau amo ia hakaua siri totona. To, momo be Dirava idia badinaia noho, ena be hekwakwanai badadia idia davaria. Ita moale diba badina ita be Iehova ita badinaia bona iseda kara ia laloa bada! Momokani, Baibel ia gwau: “Lohiabada ese, kara maoromaoro ia ura henia noho. Iena abidadama taudia, be ia ese do ia rakatania lasi.” (Sal. 37:28) Iehova ita badinaia noho totona Ia ese ita dekenai Baibel ia henia, bona Baibel lalonai Dirava badinaia taudia momo edia sivarai ese ita idia durua diba. Idia ta be Gata tauna, Itai.

Idau Bese Tauna be Iena Tano Ia Rakatania

Itai be Pilistia hanuana Gata amo, unai be Goliata bona Israela taudia ese idia gari henia taudia haida edia hanua. Baibel lalonai, Abesaloma be King Davida dekenai ia gwau-edeede neganai, unai be nega ginigunana tuari tauna Itai ena ladana ia hedinarai. Itai bona Pilistia tatau 600 be edia tano idia rakatania bona Ierusalema badinai idia noho gabudia dekenai idia noho.

Davida be Itai bona ia idia bamoa taudia dekenai ia vara gaudia ia laloa neganai, ena mauri gunana ia laloa. Unai nega ai Davida bona Israela ena tuari taudia 600 be Pilistia ena tano, Gata ena king Akisi ese ia lohiaia gabuna dekenai idia lao. (1 Sam. 27:​2, 3) To, Abesaloma ese Davida ia gwau-edeede henia dainai, Itai bona ia idia bamoa tatau be dahaka do idia karaia? Abesaloma do idia durua o Davida bona ia idia bamoa tatau do idia durua, eiava idia ruaosi edia hepapahuahu lalonai do idia vareai lasi?

Mani inai oi laloa, Davida be Ierusalema ia rakatania bona ia heau ela bona hanua ena ruma dokona dekenai ia ginidae. Olive Ororona amo Ierusalema oi lao, to Kiderona Kourana dekenai oi do ginidae lasi neganai, unai ruma be Ierusalema ena ruma dokona. (2 Sam. 15:17) Unuseniai Davida be ena tuari taudia ia sekea. Bona ia itaia, Israela taudia sibona ese ia idia bamoa lasi, to Kerete bona Pelete taudia ibounai, bona Gata tauna Itai bona ia idia bamoa tuari taudia 600 danu be ia idia bamoa.​​—⁠2 Sam. 15:⁠18.

Davida be mai hebogahisi ida Itai ia hamaoroa: “Badina dahaka oi danu ai dekenai oi mai noho? Namo oi giroa lou, king Abesaloma dekenai oi noho, badina oi be bese idau tauna, oiemu tano korikori taudia ese madi oi idia doria mai iniseni. Varani sibona oi mai, ma hari oi do lau hakaua loaloa, a? Lau be edena gabu do lau lao be lau diba lasi. Do oi giroa lou, bona oiemu tano taudia oi danu do oi abia lao, king Abesaloma do umui naria. Bona Lohiabada ese iena bogahisihisi bona iena durua umui dekenai do ia henia.”​​—⁠2 Sam. 15:​19, 20.

Itai ena hereva ese ia hahedinaraia Dirava ia badinaia momokani. Ia gwau: “Lauegu lohia bona lauegu king e, Lohiabada ena ladana dekenai oi dekenai lau gwauhamata inai: Lau be oi dekenai do lau noho, bona oi lao gabuna do lau lao, mase dekenai, o mauri dekenai.” (2 Sam. 15:21) Unai hereva amo Davida be iena tubuna Ruta ena hereva ia laloatao. (Ruta 1:​16, 17) Itai ena hereva ese Davida ena kudouna ia hamarerea dainai, Kiderona Kourana hanaia totona Davida ese Itai ia hamaoroa: “Vadaeni, ia namo, umui raka lao. Unai dainai Itai, Gata tauna mai iena orea taudia danu idia raka lao, edia natuna maragidia danu.”​​—⁠2 Sam. 15:⁠22.

‘Ita Hadibaia Totona’

Roma 15:4 ia gwau: “Buka Helaga dekenai idia torea hereva be ita dekenai hadibaia totona idia torea.” Unai dainai sibona ita nanadaia, Itai ena haheitalai amo dahaka ita dibaia? Mani oi laloa. Dahaka dainai Itai be Davida ia badinaia? Ena be Itai be idau bese tauna bona ena hanua Pilistia ia rakatania, to ia diba Iehova be mauri Diravana bona Davida be Iehova ese ia abia hidi tauna. Itai ia diba Israela taudia be Pilistia taudia idia inai henia, bona Davida be Pilistia ena tuari tauna badana Goliata bona Itai ena tano taudia momo ia hamasedia, to ia be unai ia laloa lasi. (1 Sam. 18:​6, 7) Itai be Davida ena lalokau Iehova dekenai bona ena kara namodia ia laloa bada. Unai dainai, Davida ese Itai ia matauraia bada. Bona Davida ena tuari taudia haida be “Itai, Gata tauna ese ia gunalaia” Abesaloma ena tuari taudia idia tuari henia totona!​​—⁠2 Sam. 18:⁠2.

Unai dainai, namo lasi taunimanima edia kastom, kopina ena kala, o iduhu eiava edia dagedage bona badu karadia ita laloa, to namona be edia kara namodia ita laloa bada. Davida bona Itai be tura namodia ai idia lao. Unai ese ia hahedinaraia Iehova ita dibaia bona lalokau henia karana ese ita ia durua diba, ma haida edia kara namodia ita laloa bada totona.

Itai ena haheitalai ita laloa neganai, sibona ita nanadaia: ‘Davida Badana, Keriso Iesu dekenai unai bamona badinaia karana lau hahedinaraia, a? Basileia harorolaia bona hahediba taudia halaoa gaukarana lau karaia goadagoada amo egu badinaia karana lau hahedinaraia, a?’ (Mat. 24:14; 28:​19, 20) ‘Herevana lau dekenai dahaka ia vara, lau be Dirava do lau badinaia noho, a?’

Ruma bese kwaradia be Itai ese ia hahedinaraia badinaia karana idia laloa dobu neganai, idia do ia durua. Itai be Davida ia tura henia namonamo bona ia ura Dirava ese ia abia hidi king ia matauraia. Unai hegeregerena, ruma bese kwaradia be tomadiho momokani idia durua totona abia hidi haida idia karaia neganai, gau haida idia vara diba bona hekwakwanai haida idia havaraia diba. To, Baibel ese ita ia hagoadaia: “[Iehova] ese kara maoromaoro tauna dekenai, kara maoromaoro ia hahedinaraia.”​​—⁠Sal. 18:​25, NW.

Baibel be gabeai Davida bona Abesaloma huanai idia vara gaudia ia herevalaia neganai, Itai dekenai dahaka ia vara be ia gwauraia lasi. To, Baibel lalonai ena sivarai ia noho dainai, Davida ena nega aukana ai Itai be dahaka kara namodia ia hahedinaraia ita dibaia. Itai ena sivarai be Baibel lalonai ia noho ese ia hamomokania, Iehova be Ia idia badinaia taudia ia laloa bada bona hahenamo ia henidia.​​—⁠Heb. 6:​10.