Iseda Gaukara Ita Haria​​—⁠Dahaka Dainai Bona Edena Dala Ai?

TANOBADA ia do vara lasi neganai, gaukara haria karana ia matamaia. Iehova ese iena Natuna tamona sibona ia karaia, bona gabeai Natuna be “gaukara karaia tauna” ta bamona ia gaukaralaia tanobada bona guba ia karaia totona. (Aon. 8:​22, 23, 30; Ioa. 1:⁠3) Dirava ese tau bona hahine ginigunadia ia karaia neganai, Ia hamaorodia ‘do idia momo herea. Tanobada ena gabu ibounai dekenai do idia noho, bona unai tano do idia biagua.’ (Gen. 1:​28) Havaraia Tauna ese taunimanima dekenai gaukara ia henidia, idia ese Eden Paradaisona do idia habadaia ela bona tanobada ibounai. Oibe, matamana negana amo, Iehova bona Ia idia hesiai henia taudia be ma haida dekenai gaukara idia haria.

Gaukara haria ena anina be dahaka? Dahaka dainai elda taudia ese kongrigeisen lalonai ma haida dekenai gaukara idia haria karana idia dibaia be namo? Bona edena dala ai unai bamona idia karaia diba?

Gaukara Haria Anina be Dahaka?

“Gaukara oi haria” anina be, tau ta dekenai gaukara ta oi henia; tau ta oi abia hidi emu hereva ia gwauraia tauna ai ia lao; tau ta oi abia hidi gaukara ta o maduna ia naria o biagua totona.

Keristani kongrigeisen ai gaukara idia karaia taudia ese edia gaukara idia hagugurua be namo, edia gaukara ia heau namonamo o lasi idia ripotilaia, bona nega ibounai gaukara ia henia tauna ena heduru idia tahua be namo. To gaukara ia haria tauna ena maduna be, ia itaia gaukara ia heau namonamo eiava lasi. Bema ia itaia gaukara ia heau namonamo lasi, vadaeni namona be heduru herevadia haida ia henia danu. To reana haida do idia henanadai, ‘Bema oi sibona be hegeregere gaukara oi karaia totona, dahaka dainai ma haida dekenai gaukara oi haria?’

Dahaka Dainai Gaukara Oi Haria?

Mani oi laloa: Iehova be iena Natuna tamona sibona ia havaraia, unai amo Iesu ese ena Tamana do ia durua gau iboudiai idia karaia hebou totona. Oibe, “ia dekena amo Dirava ese gau ibounai ia karaia, guba dekenai bona tanobada dekenai. Ita itaia diba gaudia bona ita itaia diba lasi gaudia.” (Kol. 1:​16) Ena be Dirava ese gau ibounai ia karaia diba, to Ia ura bada iena Natuna danu ese gau ibounai havaraia gaukarana ia karaia bona ia moalelaia. (Aon. 8:​31) Unai ese Natuna ia durua Dirava ena kara namodia ma haida ia dibaia totona. Ita gwau diba, Tamana be unai dala amo iena Natuna tamona sibona ia hadibaia.

Iesu Keriso be tanobada ai ia noho neganai, ia be ena Tamana ia karaia bamona, ma haida dekenai gaukara ia haria. Iena hahediba taudia ia hadibaia. Haroro gaukarana totona Iesu ese aposetolo taudia 12 ia siaia guna bona unai murinai hahediba taudia 70 ia siaia. (Luka 9:​1-6; 10:​1-7) Edia haroro gaukara dainai gabeai Iesu be unuseniai ia haroro diba. Iesu be guba dekenai ia do lao lasi neganai, ia ese ia hadibaia vadaeni hahediba taudia dekenai mai anina bada gaukaradia haida ia henia, hegeregere, tanobada hegegemadai haroro gaukarana.​​—⁠Mat. 24:​45-​47; Kara 1:⁠8.

Idaunegai, Keristani kongrigeisen taudia be haida dekenai gaukara idia haria bona idia hadibaia danu. Aposetolo Paulo ese Timoteo ia hamaoroa: “Inai hadibaia hereva be abidadama goada taudia dekenai ma do oi gwauraia. Vadaeni idia ese ma taunimanima haida dekenai unai hereva do idia gwauraia lou.” (2 Tim. 2:⁠2) Oibe, namona be elda ese tadikaka ta ia hadibaia, unai amo tadikaka danu be ma haida do ia hadibaia.

Elda ta ese ma tadikaka ta dekenai ena gaukara haida ia haria neganai, unai elda be mai ena nega ma haida ia hadibaia bona ia vadivadi henidia totona. Elda taudia edia aonega bona goada be mai edia hetoana dainai, idia ese ma haida idia noia kongrigeisen gaukaradia haida idia durua totona. Baibel ia gwau: “Manau taudia ese aonega idia davaria noho.” (Aon. 11:⁠2) Manau tauna ia diba ia sibona ese gaukara haida do ia karaia diba lasi. Bema oi sibona ese gau ibounai oi karaia toho, reana emu goada do ia ore, bona reana oi be nega lasi emu ruma bese ida gau haida umui karaia hebou totona. Unai dainai, ma haida dekenai gaukara oi haria be aonega karana. Hegeregere, elda orea ena kodineita mani oi laloa. Reana ia ese elda ma ta ia noia diba kongrigeisen ena akaun ia odit totona. Unai amo unai elda be kongrigeisen ena akaun ena heau dalana do ia lalopararalaia namonamo danu.

Elda taudia ese gaukara idia haria ena namo be inai: Haida be gaukara karaia dalana idia diba namonamo, to danu, elda taudia be unai dala amo idia itaia diba tadikaka ta be ia hegeregere ena gaukara do ia karaia namonamo o lasi. Unai dainai, bema elda taudia ese tadikaka haida dekenai gaukara maorodia idia henia, idia be tadikaka “idia tohoa guna” bamona, unai amo idia itaia ia hegeregere gabeai hesiai tauna ai ia lao totona eiava lasi.​​—⁠1 Tim. 3:​10, NW.

Elda taudia be gaukara idia haria neganai, idia abia dae ma haida be gaukara do idia karaia namonamo. Paulo be Timoteo dekenai misinari gaukara ia hadibaia. Idia ruaosi be tura namodia ai idia lao. Paulo ese Timoteo ia hamaoroa, “oi be lauegu natuna korikori, Iesu oi badinaia dainai.” (1 Tim. 1:⁠2) Unai hegeregerena, Iehova bona Iesu be gau ibounai idia karaia hebou bona tura namodia ai idia lao. Elda taudia ese ma tadikaka haida dekenai gaukara idia henia bona idia be tura namodia ai idia lao diba.

Dahaka Dainai Elda Haida Idia Ura Lasi Gaukara Idia Haria

Ena be gaukara haria karana be mai ena namo, to elda taudia haida idia ura lasi edia gaukara idia haria, badina reana idia laloa unai ese edia gaukara ia hamaragia. Reana idia laloa hanaihanai idia ese gaukara idauidau idia biagua be namo. To, inai oi laloatao be namo: Iesu be guba dekenai ia do lao lasi neganai, iena hahediba taudia dekenai gaukara badana ta ia henidia, bona ia diba idia ese unai gaukara idia hagugurua diba!​​—⁠Mat. 28:​19, 20; Ioa. 14:⁠12.

Elda ma haida be guna tadikaka haida dekenai gaukara idia haria, to tadikaka be unai gaukara idia karaia namonamo lasi. Reana idia laloa idia sibona ese unai gaukara idia karaia namonamo bona idia karaia haraga diba. To, mani Paulo ena haheitalai oi laloa. Ia be gaukara haria ena namo ia diba, to danu, ia laloparara ia hadibaia taudia haida be nega haida iena ura dalanai gaukara do idia karaia lasi. Iena misinari loaloa ginigunana ai, Paulo ese Mareko dekenai haroro dalana ia hadibaia. To, gabeai Mareko ese Paulo ia rakatania bona ia giroa lou hanua dekenai, unai dainai Paulo ia lalohisihisi. (Kara 13:13; 15:​37, 38) Ena be unai ia vara, to unai ese Paulo ia koua lasi ma haida ia hadibaia totona. Ita herevalaia vadaeni bamona, Paulo be Keristani matamata tauna Timoteo ia boiria, ena misinari gaukarana dekenai ia do ia bamoa totona. Paulo ia itaia Timoteo be ia hegeregere maduna badadia ia huaia neganai, Paulo ese Efeso dekenai ia rakatania, bona Timoteo dekenai gwaumaoro ia henia kongrigeisen ai elda bona hesiai taudia ia abia hidi totona.​​—⁠1 Tim. 1:3; 3:​1-​10, 12, 13; 5:​22.

Unai hegeregerena, hari inai negai, ena be ta ese ena gaukara ia karaia namonamo lasi, to namona be elda taudia ese ma haida idia hadibaia noho. Ma haida dekenai gaukara oi henia bona oi hadibadia be gau badana bona aonega karana. To, elda taudia be ma tadikaka haida dekenai gaukara idia haria neganai, dahaka gau ma haida idia laloatao be namo?

Gaukara Haria Dalana

Gaukara oi do haria lasi neganai, namona be oi itaia guna tadikaka ia hegeregere o lasi. Nega ta aposetolo taudia be ‘mai edia ladana namona tatau 7, idia be lauma helaga bona aonega amo idia honu’ tatau haida idia abia hidi, unai amo Ierusalema ai haida dekenai aniani idia haria diba. (Kara 6:⁠3) Bema gaukara ia diba namonamo lasi tauna ta oi abia hidi, reana ia ese unai gaukara do ia karaia namonamo lasi. Unai dainai, tadikaka dekenai gaukara maragidia oi henia guna. Bema tadikaka ta be gaukara maragidia ia karaia namonamo, vadaeni reana gabeai gaukara badadia ma haida oi henia diba.

To, gau ma haida danu ita laloa be namo. Tadikaka ta ena kara bona diba be ma haida edia amo ia idau. Ia moale tadikakana be atendan gaukara ia karaia diba, to tadikaka ma ta be ia hegeregere kongrigeisen ena seketere ia durua diba. Memorial negana ai taihu ta abia hidi flaoaflaoa ia hegaegaelaia totona, badina ia be unai gaukara ia diba.

Bema oi ura tadikaka ta dekenai gaukara ta oi henia, do ia karaia gaudia oi gwauraia hedinarai namonamo. Ioane Bapatiso ese hahediba taudia be Iesu dekenai ia do siaidia lasi neganai, idia ia hadibaia Iesu dekenai dahaka henanadai do idia henia. (Luka 7:​18-​20) To, Iesu be hoa karana amo hutuma ia ubua murinai, ena hahediba taudia ia hamaoroa aniani oredia idia haboua be namo, bona ia rakatanidia edia diba dekenai unai gaukara idia karaia totona. (Ioa. 6:​12, 13) Namona be elda tauna ia diba edena gaukara ia henia bona tadikaka be ia hegeregere unai gaukara ia karaia totona. Namona be elda tauna bona heduru tauna idia diba unai gaukara amo dahaka do ia vara bona heduru tauna ese nega hida elda tauna dekenai ripoti do ia henia. Namona be idia ruaosi idia laloparara gaukara haida be heduru tauna sibona ese ia karaia diba. Bema elda ese gaukara ia karaia haorea ena deit korikori ia makaia, vadaeni namona be elda tadikaka bona unai gaukara ia karaia tadikaka be unai nega idia kikilaia namonamo, namo lasi elda sibona be unai nega ia makaia kava.

Namona be gaukara karaia tauna be mai ena tulu, moni bona heduru ma haida. Namona be elda ma haida be unai idia diba danu. Iesu ese Petero dekenai “guba basileia ena ki” ia henia neganai, ma hahediba taudia haida vairanai unai ia karaia. (Mat. 16:​13-​19) Unai hegeregerena, kongrigeisen ai tadikaka taihu oi hadibaia be namo, unai amo idia diba daika be unai maduna o gaukara ia naria.

Danu, namona be oi naria namonamo. Bema tadikaka ta dekenai oi henia gaukara oi biagua toho lou, unai be hegeregere unai tadikaka dekenai oi gwau, “Lau laloa oi be hegeregere lasi unai gaukara oi karaia totona.” Momokani, reana nega haida gaukara ta be emu ura hegeregerena do idia karaia lasi. To, bema tadikaka ta dekenai gaukara oi henia, vadaeni namona be iena diba hegeregerena ia karaia, unai amo gaukara karaia dalana ia diba bona ia manadalaia. To namona be unai gaukara ia karaia dalana oi laloa bada. Ena be Iehova ese Natuna ia abia hidi gau ibounai ia karaia totona, to Iehova be unai gaukara ia durua danu. Iehova ese Gaukara Karaia Namonamo Tauna ia hamaoroa: “Taunimanima ita karaia namo, iseda toana bona iseda laulau hegeregerena.” (Gen. 1:​26) Unai dainai, emu hereva bona kara amo gaukara ia karaia tauna oi durua, bona ena hekwarahi dainai ia oi hanamoa. Ia karaia gaukarana oi sekea lou be namo, unai ese ia do ia durua danu. Bema tadikaka be unai gaukara ia karaia namonamo lasi, vadaeni namona be heduru herevadia haida oi henia. Inai oi laloatao: Oi ese gaukara oi henia dainai, oiemu maduna be unai gaukara oi sekea loulou ela bona ia karaia namonamo.​​—⁠Luka 12:⁠48.

Elda taudia be tadikaka edia namo idia laloa bada bona idia dekenai gaukara idia henia dainai, idia momo be namo idia abia. Momokani elda taudia ibounai ese gaukara idia haria ena badina bona dalana idia lalopararalaia be namo, unai amo idia be Iehova idia tohotohoa.

[Box on page 29]

GAUKARA HARIA KARANA BE

• ma haida ese moale idia davaria dalana

• gaukara hagugurua dalana

• aonega bona manau dalana

• ma haida hadibaia dalana

• idia abia dae ma haida be gaukara do idia karaia namonamo

[Box on page 30]

GAUKARA HARIA DALANA

• Gaukara idia karaia diba tadikaka oi abia hidi

• Herevahereva

• Idia karaia gaudia oi gwauraia hedinarai namonamo

• Namona be gaukara idia karaia taudia be mai edia tulu, moni bona gau ma haida

• Gaukara oi laloa bada, bona oi hahedinaraia tadikaka ese oi henia gaukarana do idia karaia

• Oiemu maduna be unai gaukara oi sekea loulou ela bona idia karaia namonamo

[Pictures on page 31]

Ma tadikaka haida dekenai gaukara oi haria bona gaukara ia heau namonamo dalana oi itaia danu