Emu Headava Lasi Maurina Oi Moalelaia Dalana

BUKA bona muvini piksa haida dekenai idia hahedinaraia, headava be moale ia havaraia. Unai bamona gaudia dainai, momo idia laloa bema ta ia headava, moale do ia davaria. Ma danu, tano momo ai taunimanima be matamata taudia idia doria idia headava totona. Debby, ena mauri lagani be 25, ia gwau, “Momo idia laloa, kekeni ese headava sibona idia laloa be gau badana. Ma idia laloa ta be ia headava murinai, ena mauri ia matamaia.”

To, Iehova ena lalohadai ia abia tauna eiava hahinena be unai bamona taudia edia lalohadai kererena ia dadaraia. Ena be Israela taudia momo be idia headava, to Baibel ese ia hahedinaraia haida be idia headava lasi bona unai mauri dalana idia moalelaia. Hari, Keristani taudia haida be headava lasi maurina idia abia hidi, to momo be badina ma haida dainai idia headava lasi. Herevana dahaka dainai ta ia headava lasi, to mai anina bada henanadai be inai: Edena dala ai Keristani tauna ta ese ena headava lasi maurina ia moalelaia diba?

Iesu danu be ia headava lasi​—⁠Iehova ese Iesu dekenai ia henia gaukarana amo unai ena badina ita lalopararalaia. Ia ese ena hahediba taudia ia hamaoroa iena murinai idia raka taudia haida be headava lasi “mauri dalana” do idia abia dae danu. (Mat. 19:​10-​12, NW ) Iesu ese ia hahedinaraia, bema ita ura headava lasi maurina ita moalelaia, namona be mai eda lalona bona kudouna ibounai ida unai mauri dalana ita abia dae.

Haida idia headava lasi badina idia ura Iehova ena hesiai gaukara sibona idia karaia. Iesu be 1 Kor. 7:​34, 35 amo unai taudia sibona ia sisiba henia, a? Lasi. Mani taihu ta ladana, Ana ena haheitalai ita laloa​—⁠reana ia ura ia headava to do ia adavaia tau namona ta ia do davaria lasi. Ana ena mauri lagani be 35 bona ia gwau: “Vanegai lau ida ia gaukara hebou Witnes lasi tauna ta be lau ia hamaoroa ia ura lau do ia adavaia. Ena be lau moale, to karaharaga iena noinoi lau dadaraia badina lau ura lau adavaia tauna be lau do ia durua Iehova kahirakahira lau lao totona.”

Ana bona taihu momo be idia ura “Keristani tauna sibona” idia adavaia dainai, Witnes lasi tatau idia adavaia lasi.a (1 Kor. 7:​39; 2 Kor. 6:​14) Iehova Dirava ena sisiba idia badinaia dainai, idia momo ese headava lasi maurina idia abia hidi. Edena dala ai idia ese unai mauri dalana idia moalelaia diba?

Gau Namodia Laloa Karana Oi Dibaia

Herevana ita ura headava, to ita laloa gaudia ese ita do ia durua headava lasi maurina ita abia dae totona. Taihu Carmen be ia do headava lasi bona ena mauri lagani be 40 bamona, ia gwau, “Hari lau noholaia maurina lau moalelaia, bona lau dekenai idia noho lasi gaudia lau laloa momo lasi.” Oibe, ita headava lasi dainai, nega haida ita moale lasi. To, namona be ita diba iseda tanobada hegegemadai tadikaka oreana dekenai momo be unai bamona idia mamia danu, unai ese ita do ia durua ita haheauka totona. Iehova ese momo ia durua vadaeni edia headava lasi maurina idia moalelaia, bona hekwakwanai ma haida idia haheaukalaia totona.​​—⁠1 Pet. 5:​9, 10.

Tadikaka bona taihu momo idia davaria headava lasi maurina be mai ena namo. Ester, ena mauri lagani be 35 bona ia headava lasi, ia gwau, “Lau laloa herevana iseda noho dalana be edena bamona, to namona be iseda mauri lalonai ita karaia gau namodia ita laloa, unai amo do ita moale.” Danu, Carmen ia gwau, “Lau laloa, herevana do lau headava eiava lasi, to bema Basileia lau atoa guna, Iehova amo hahenamo momo do lau abia. Headava lasi maurina lau abia hidi be egu palani hegeregerena lasi, to lau moale bona unai bamona do lau karaia noho.”​—⁠Sal. 84:⁠11.

Idia Headava Lasi Taudia Haida Edia Sivarai

Iepeta ena natuna be reana ia ura headava. To tamana ia gwauhamata ena natuna be ena matamata negana ai dubu helaga dekenai hesiai gaukara do ia karaia. Reana unai ese iena palani ia haidaua dainai ena hemami ia dika. Hua rua lalonai ia tai badina ia laloparara ia be do ia headava lasi bona natuna do ia havaraia lasi. To ia ese ena hesiai gaukara ia abia dae bona ena mauri dinadia ibounai lalonai ia karaia. Unai kekeni be sibona ena ura ia dadaraia dainai, Israela kekeni be lagani ta ta ai ia idia vadivadi henia bona hanamoa.​​—⁠Gun. 11:​36-​40.

Isaia ena negai idia noho eunuko taudia be reana edia noho dalana idia moalelaia lasi. To, Baibel ese unai ena badina ia gwauraia lasi. Idia be Israela taudia ai do idia lao lasi, do idia headava lasi bona natuna do idia havaraia lasi. (Deu. 23:⁠1) To, Iehova ese edia hemami ia lalopararalaia, bona Israela ida ia karaia gwauhamatana idia badinaia dainai ia hanamodia bada. Iehova ese idia ia hamaoroa, edia ladadia be iena “Dubu Helaga lalonai do idia laloatao nega daudau” o “ladadia be do idia noho hanaihanai.” Ita gwau diba unai eunuko taudia be Iesu ena Mesia Basileiana henunai mauri hanaihanai do idia moalelaia. Iehova ese idia do ia laloaboio lasi.​​—⁠Isa. 56:​3-5.

Ieremia dekenai ia vara gauna be idau. Ieremia be peroveta tauna ai ia lao murinai, Dirava ese ia hamaoroa do ia headava lasi badina ia be nega dikana lalonai ia noho, bona ia be maduna badana ia huaia. Iehova ia gwau, “Hahine ta do oi adavaia lasi, bona natuna tau o natuna hahine ta do oi havaraia lasi inai gabu dekenai.” (Ier. 16:​1-4) Ieremia ena hemami unai hadibaia herevadia dekenai be Baibel ese ia gwauraia lasi, to ia hahedinaraia Ieremia be Iehova ena hereva ia moalelaia. (Ier. 15:16) Lagani haida murinai, Babulonia ese Ierusalema idia koua hegege bona hua 18 lalonai Ieremia ese unai hisihisi negana ia haheaukalaia. Reana unai negai ia laloparara Iehova ena hahegani hegeregerena, ia headava lasi be aonega karana.​​—⁠Lal. 4:​4, 10.

Emu Mauri Oi Hanamoa Diba Daladia

Ataiai ita herevalaia taudia be idia headava lasi, to Iehova be idia ia durua bona idia be mai edia ura bada ida Iehova ena hesiai gaukara idia karaia. Hari, bema ita danu be mai anina bada gaukaradia ita karaia, eda mauri do ia namo herea. Baibel ia gwau sivarai namona idia harorolaia hahinedia be tuari orea badana ta bamona. (Sal. 68:​11, NW ) Idia tausen momo be idia headava lasi. Idia ese edia hesiai gaukara ai anina namona idia havaraia dainai, kongrigeisen lalonai edia natudia be momo bamona.​​—⁠Mar. 10:​29, 30; 1 Tes. 2:​7, 8.

Loli be lagani 14 lalonai painia gaukara ia karaia vadaeni, bona ia gwau, “Painia gaukara ese egu mauri lalonai lau ia gimaia. Ena be lau headava lasi, to egu hesiai gaukara lau goadalaia dainai, egu mauri dalana lau moalelaia. Dina ta ta ai lau moale badina lau itaia egu hesiai gaukara lalonai taunimanima lau durua. Unai ese lau ia hamoalea bada.”

Taihu momo be gado matamata ta idia dibaia, bona edia hesiai gaukara habadaia totona gado ma ta idia herevalaia taudia idia haroro henia. Matamanai ita herevalaia taihuna, Ana ia gwau, “Lau noho siti ai idau tano taudia momo idia noho.” Ana be French gado ia diba dainai, unai gado idia herevalaia taudia ia haroro henia. Ia gwau, “Gado ma ta lau diba dainai, momo lau hereva henia diba bona egu haroro gaukara lau moalelaia dikadika.”

Headava lasi taudia be ruma bese ena maduna idia huaia lasi dainai, idia haida be pablisa momo lasi gabudia dekenai idia lao haroro. Lidiana​—⁠ia do headava lasi, ena mauri lagani be 35, bona pablisa momo lasi tanodia dekenai ia haroro​—⁠ia gwau, “Lau abia dae momokani bema Iehova ena hesiai gaukara ita habadaia, tura namodia momo do ita davaria bona ita mamia idia be ita idia ura henia. Lau be taunimanima idauidau lau tura henidia dainai, unai ese egu mauri lalonai moale bada ia havaraia.”

Baibel ese haroro tauna Filipo ena sivarai ia gwauraia neganai, ia hahedinaraia iena natuna kekeni be foa, idia headava lasi bona peroveta gaukara idia karaia. (Kara 21:​8, 9) Unai kekeni be edia tamana bamona, badina mai edia ura bada ida Dirava ena gaukara idia karaia. Idia be peroveta kekenidia dainai, reana edia peroveta gaukara amo Kaisarea dekenai idia noho Keristani tadikaka idia durua bada, a? (1 Kor. 14:​1, 3) Unai hegeregerena hari, idia do headava lasi taihu momo be hebou dekenai idia lao hanaihanai bona edia haere karana amo ma haida idia hagoadaia.

Lidia be Filipi Keristani hahine ta, bona ena heabidae karana ena sivarai be Baibel dekenai idia torea. (Kara 16:​14, 15, 40) Lidia​​—⁠reana ia headava lasi o ia be vabu⁠​—⁠be ena hariharibada karana dainai, loaloa naria taudia hegeregere Paulo, Sila bona Luka edia hetura karana ia moalelaia. Hari inai negai, bema ita danu be unai bamona kara ita hahedinaraia, ita be Lidia ia davaria hahenamodia do ita davaria danu.

Ma Haida be Ita Idia Lalokau Henia

Ita ibounai be mai anina bada gaukaradia ita karaia sibona lasi, to ita ura ma haida ese ita idia lalokau henia. Edena dala ai headava lasi taudia ese unai bamona hahenamo idia abia diba? Ginigunana be, Iehova be nega ibounai ita ia lalokau henia, hagoadaia bona kamonai henia. Nega haida King Davida be “sibona ia noho, bona ia lalomanoka,” to ia diba hanaihanai Iehova ena heduru ia noia diba.” (Sal. 25:16; 55:22) Ia gwau, “Badina be egu tamana bona sinana, ese lau idia rakatania, to Lohiabada ese lau do ia abia dae.” (Sal. 27:10) Iehova Dirava ese iena hesiai taudia ibounai ia boiria ia kahirakahira do idia lao bona iena turana namodia ai idia lao.​​—⁠Sal. 25:14; Iam. 2:​23; 4:⁠8.

Ma danu, iseda tanobada hegegemadai tadikaka oreana lalonai tamana, sinana, kakana, bona taihuna ita davaria diba, bona idia edia lalokau karana ese iseda mauri ia hanamoa diba. (Mat. 19:29; 1 Pet. 2:​17) Idia do headava lasi Keristani taudia momo be Doreka ena haheitalai idia tohotohoa, “ia be kara namona bona bogahisihisi kara dekenai ia goada.” (Kara 9:​36, 39) Loli ia gwau, “Ena be edeseniai lau noho, to kongrigeisen ai tura korikoridia lau tahua, badina idia ese lau do idia lalokau henia bona lau lalometau neganai lau do idia hagoadaia. Unai bamona hetura karana ia goada totona, lau hekwarahi ma haida lau lalokau henia bona edia namo lau laloa bada. Lau be kongrigeisen idauidau 8 dekenai hesiai gaukara lau karaia vadaeni, bona unuseniai nega ibounai tura korikoridia lau davaria. Idia haida be hahine burukadia o matamata taudia.” Kongrigeisen iboudiai lalonai, tadikaka taihu haida idia ura ita lalokau henidia bona tura henidia. Unai bamona kara ese ita do ia durua idia ita lalokau henia totona, bona idia danu be ita do idia lalokau henia.​​—⁠Luka 6:​38.

Dirava Ia Laloaboio Lasi

Baibel ese ia hahedinaraia ita be nega dikana lalonai ita noho dainai, namona be Keristani taudia ibounai ese gau haida idia dadaraia be namo. (1 Kor. 7:​29-​31) Tadikaka taihu momo be 1 Korinto 7:39 ena sisiba idia badinaia noho dainai idia ura lasi idia headava​—⁠idia ita matauraia bona laloa bada be gau badana. (Mat. 19:12) Unai bamona taudia be edia headava lasi mauri dalana idia moalelaia.

Lidiana ia gwau, “Lauegu mauri lau moalelaia badina Iehova lau tura henia bona hesiai henia. Lau diba headava taudia haida be idia moale to ma haida be idia moale lasi. Unai ese lau ia hadibaia, ena be vaira neganai do lau headava eiava lasi, to unai ese lau dekenai moale korikori do ia henia lasi.” To Iesu ese ia hahedinaraia, moale korikori be iseda henia karana bona hesiai gaukara amo ia mai​—⁠unai be Keristani taudia ibounai ese idia karaia diba karadia.​​—⁠Ioa 13:​14-​17; Kara 20:⁠35.

Ita moalelaia gauna hereadaena be inai: Ita diba herevana Iehova ena ura ita karaia totona dahaka gaudia ita dadaraia to Iehova ese ita do ia hanamoa. Baibel ese ita ia hagoadaia, ia gwau: “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi.”​​—⁠Heb. 6:⁠10.

[Footnote]

[Blurb on page 25]

“Lau dekenai idia noho gaudia sibona lau moalelaia, to lau dekenai idia noho lasi gaudia lau laloa momo lasi.”​​—⁠Carmen

[Picture on page 26]

Loli bona Lidiana ese pablisa momo lasi gabudia dekenai edia hesiai gaukara idia moalelaia

[Picture on page 27]

Dirava ese iena hesiai taudia ibounai ia boiria ia kahirakahira idia lao totona