Tomadiho Namona be Taravatu Maorodia Ia Badinaia

TOMADIHO namona be ita dekenai namo gaudia ita laloa dalana ia hadibaia, bona eda kara ita hamaoromaoroa dalana ia hahedinaraia. Ita ia durua kara maorodia ita karaia bona namo ita davaria totona. Edena bamona ita diba tomadiho namona be unai bamona ia karaia be namo?

Aposetolo edia negai, Paulo ese Greece ai, Korinto Keristani taudia dekenai ia siaia hadibaia herevana mani ita laloa. Korinto hanuana ai be matabodaga taudia momo idia noho. Unai dainai, Paulo ena hadibaia herevana be inai: “Lebulebu taudia, kaivakuku idia tomadiho henia taudia, heudahanai taudia, o lebulebu hahine edia kara bamona idia karaia tatau, o tatau ese tatau danu hemarai karadia idia karaia taudia. O henaoa taudia, mataganigani taudia, kekero taudia, edia hereva dekenai haida idia hadikaia taudia, o haida edia gau idia dadia taudia. Inai bamona taudia ta lasi be Dirava ena Basileia do ia davaria diba.” Paulo ma ia gwau: “Umui haida be guna unai bamona umui karaia. To Dirava ese umui emui kara dika ia huria goeva vadaeni, ia ese helaga taudia umui ia halaoa vadaeni. Bona hari Dirava ena vairana dekenai umui be maoromaoro, Lohiabada Iesu Keriso dainai, bona Dirava ena Lauma dainai.” (1 Korinto 6:​9-​11) Mani oi laloa: Guna haida be taravatu maorodia idia badinaia lasi, to tomadiho namona ese ia durudia Dirava ena hesiai taudia namodia ai idia lao totona!

To, Baibel ena hadibaia hereva ma ta be inai: “Negana do ia ginidae, taunimanima be hereva maoromaoro do idia ura lasi kamonai. Lasi momokani. To edia ura sibona do idia tahua. Idia ese idia ura henia hadibaia taudia momo do idia haboua. Vadaeni inai hadibaia taudia ese sivarai kavakava do idia gwauraia, unai taudia idia ura kamonai gaudia sibona.”​​—⁠2 Timoteo 4:⁠3.

Oi diba tomadiho be unai bamona idia karaia o lasi? Baibel ena taravatu maorodia idia hadibaia, a? Eiava Baibel ena sisiba goevadia idia hadibaia lasi to taunimanima “idia ura kamonai gaudia sibona” idia hadibaia, a?

Huahua namona ia havaraia tomadihona oi diba totona, nega oi atoa henunai idia noho henanadai oi haerelaia totona?

SINADO: Headava.

BAIBEL BE DAHAKA IA HADIBAIA? “Headava kara be taunimanima ibounai ese do idia matauraia be namo. Tatau mai edia hahine e, emui headava do umui naria, ia be goevagoeva Dirava ena vairana dekenai. Do ia miro lasi. Badina be Dirava ese heudahanai taudia bona headava hadikaia taudia edia kerere davana do ia henia momokani.”​​—⁠Heberu 13:⁠4.

HENANADAI: Inai tomadiho ia ura ena memba taudia, idia noho hebou tau bona hahine unai, be gavamani ena taravatu hegeregerena idia headava, a?

SINADO: Headava hadokoa.

BAIBEL BE DAHAKA IA HADIBAIA? Haida be Iesu dekenai headava hadokoa kara idia henanadailaia neganai, Iesu ia gwau: “Bema iena adavana ia heudahanai lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.”​​—⁠Mataio 19:⁠9.

HENANADAI: Inai tomadiho be Iesu ena hakaua herevana ia matauraia, to matabodaga karadia dainai tau o hahine ese headava ia hadokoa bona ia headava lou karana ia abia dae, a?

SINADO: Matabodaga karadia.

BAIBEL BE DAHAKA IA HADIBAIA? “Matabodaga karadia amo umui heau siri. Tau ta ese ia karaia kara dika ibounai be ena tauanina ia hadikaia lasi, to matabodaga karana ia karaia tauna be ia sibona ena tauanina dekenai ia kara dika.”​​—⁠1 Korinto 6:​18, New International Version.

“Edia hahine danu headava kara maorona idia hadikaia, vadaeni hahine ta ese ma hahine ta dekenai idia sihari henia. Bona inai bamona danu, tatau ese hahine idia rakatania, vadaeni tatau ese ma tatau dekenai idia sihari henia. Inai bamona hemarai karadia dainai, edia dika davana idia abia noho.”​​—⁠Roma 1:​26, 27.

HENANADAI: Inai tomadiho ese taunimanima ia hadibaia, bema tau ta be hahine ta ida matabodaga karadia idia karaia o hahine rua be matabodaga karadia idia karaia, o tatau rua be matabodaga karadia idia karaia be taravatu utua karana, a?

SINADO: Tomadiho ena memba taudia be mai gari lasi ida Baibel ena taravatu bona hakaua herevadia idia badinaia.

BAIBEL BE DAHAKA IA HADIBAIA? “Iseda Keristani varavara tauna ta, bema ia be heudahanai tauna, o mataganigani tauna, o kaivakuku tomadiho henia tauna, o hereva dika tauna, o kekero tauna, o henaoa tauna, umui be ia danu do umui turana karaia lasi. Bona ia danu do umui aniani hebou lasi.” (1 Korinto 5:​11) Bema ta ia gwau ia be Keristani tauna, to kara dika ia karaia noho bona ia helalo-kerehai lasi be edena bamona? Baibel ia gwau: “Kara dika tauna be emui orea dekena amo umui atoa siri.”​​—⁠1 Korinto 5:​13.

HENANADAI: Bema tau ta o hahine ta be Baibel ena taravatu ia badinaia lasi to kara dika ia karaia noho, inai tomadiho ese ena lista amo unai tau o hahine ena ladana ia kokia o orea amo ia atoa siri, a?

[Blurb on page 6]

Edena tomadiho be Baibel ena taravatu maorodia ia badinaia noho?