Tomadiho Namona be Ena Orea Taudia Bona Ma Haida Ia Lalokau Henia
BAIBEL ia gwau: “Mai ena lalokau lasi tauna ese Dirava ia diba lasi, badina Dirava be lalokau.” (1 Ioane 4:8) Unai dainai, tomadiho namona ese ena orea taudia bona ma haida ia lalokau henia be namo.
Tomadiho momo be gaukara namodia idia karaia, hegeregere gorere taudia, buruka taudia bona ogogami taudia idia naria bona durua. Idia ese edia orea taudia idia hagoadaia aposetolo Ioane ena sisiba idia badinaia totona, ia gwau: “Bema tau ta be mai ena kohu momo, bona iena tadikakana ia itaia mai ena ogogami, to ia bogahisihisi henia lasi, edena bamona ia hereva, ‘Lau ese Dirava lau lalokau henia?’ Lauegu natuna e, iseda lalokau be hereva gauna sibona lasi. Namo ita lalokau henia, hereva sibona dekena amo lasi, to mai kara, bona mai momokani danu.”—1 Ioane 3:17, 18.
To, tanobada besedia idia tuari neganai be edena bamona? Dirava ena hahegani be inai: “Oiemu badibadinai tauna dekenai oi lalokau henia, oi sibona oi lalokau henia bamona.” Unai hahegani be maino negadiai sibona do ita badinaia, ani? To bema gavamani tauna ta eiava king ta ia gwau eda tano kahirakahira ia noho tanona ita tuari henia, ita be do ita tuari, a?—Mataio 22:39.
Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Henunai idia noho henanadai oi itaia neganai, oi sibona oi nanadaia, ‘Inai tomadiho ena memba taudia be nega ibounai edia kara bona hereva amo idia hahedinaraia, idia be taunimanima ibounai idia lalokau henia, a?’
SINADO: Tuari.
BAIBEL BE DAHAKA IA HADIBAIA? Iesu be ena hahediba taudia ia oda henia: “Umui lau hamaoroa, emui inai taudia umui lalokau henia, umui idia inai henia taudia umui kara namo henia.”—Mataio 5:44, New Catholic Edition of the Holy Bible.
Tuari taudia be Iesu dogoatao totona idia mai neganai, aposetolo Petero be kaia ia abia Iesu ia durua totona. To Iesu ia gwau: “Emu tuari kaia be ena gabu dekenai oi atoa lou, badina be tuari kaia idia iusilaia taudia ibounai, be tuari kaia dekenai do idia mase.”—Mataio 26:52.
Aposetolo Ioane ia gwau: “Umui diba Dirava ena natuna be Diabolo ena natuna amo idia idau, badina Diabolo ena taudia be kara maorodia idia karaia lasi o ta ta dekenai idia lalokau henia lasi. Hamatamaia negana amo umui idia hamaoroa herevana be, namona be ta ta dekenai umui lalokau henia. Kaino bamona umui karaia lasi, ia be Diabolo ena tau, bona iena tadina korikori Abela ia alaia mase.”—1 Ioane 3:10-12, Contemporary English Version.
HENANADAI: Inai tomadiho ese ena memba taudia ia hagoadaia tuari lalonai idia vareai totona, a?
SINADO: Politikol.
BAIBEL BE DAHAKA IA HADIBAIA? Haida be Iesu ena hoa karadia idia itaia neganai, idia ura Iesu be edia politikol karadia lalonai ia vareai. To dahaka ia karaia? “Iesu ia diba idia be do idia mai, do idia dogoatao, edia king dekenai do idia halaoa gwauraia. Unai dainai ia be sibona ororo dekenai ma ia daekau lou.”—Ioane 6:15.
Haida ese Iesu idia dogoatao bona idia gwau ia be taunimanima edia lalona ia ania gavamani idia inai henia totona neganai, Iesu ia gwau: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria. Gau tamona, lauegu Basileia be iniseni lasi.”—Ioane 18:36.
Iesu be ena hahediba taudia totona Dirava dekenai ia guriguri neganai, ia gwau: “Oiemu hereva lau henia vadaeni idia dekenai, bona tanobada ese ia badu henia vadaeni idia dekenai, badina idia be tanobada ena lasi, lau hegeregerena, lau be tanobada ena lasi.”—Ioane 17:14.
HENANADAI: Herevana tomadiho ta ena orea taudia be politikol taudia ese do idia inai henia, to inai tomadiho be Iesu ena haheitalai ia tohotohoa bona politikol lalonai ia vareai lasi, a?
SINADO: Taunimanima inai henia kava karana.
BAIBEL BE DAHAKA IA HADIBAIA? Idau bese o kopina utua lasi Iuda taudia ginigunadia be Keristani taudia ai idia lao neganai, aposetolo Petero ia gwau: “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”—Kara 10:34, 35.
Iamesi be aposetolo edia negai idia noho Keristani taudia ia tore henia neganai, ia gwau: “Lauegu varavara taudia e, ita be Lohiabada Iesu Keriso ita abidadama henia noho. Ia be guba ena hairai diarina ena Lohiabada momokani. Unai dainai namo lasi umui ese toana namo o dagi bada taudia do umui laloa bada, to ogogami bona dagi lasi taudia do umui laloa maragi. Unai be maoro lasi. Sedira kohu momo tauna ta, mai ena imana kwakikwakina rini, golo gauna, bona mai ena dabua namodia danu emui dubu lalonai ia raka vareai. Ma ogogami tauna ta, mai ena dabua dikana, be emui dubu do ia raka vareai danu. Sedira dabua namona tauna do umui hereva henia, do umui gwau, ‘Mani emu kara, inai helai gauna namona dekenai do oi helai.’ To ogogami tauna dekenai do umui hereva henia, do umui gwau, ‘Unuseni do oi gini noho, o foloa dekenai do oi helai, lauegu aena badinai.’ Bema unai bamona umui karaia neganai, umui be mai emui kerere. Emui kerere be inai: Maka tamona dekenai taunimanima umui kara henidia lasi, to mai emui laloa maoromaoro lasi danu, taunimanima edia toana sibona umui itaia, bona idia edia kara umui laloa kerere, kota biaguna dikana ia karaia bamona.”—Iamesi 2:1-4.
HENANADAI: Inai tomadiho ese taunimanima ia hadibaia Dirava ena vairanai taunimanima ibounai be hegeregere dainai, tomadiho ena orea taudia ese kopina idau taudia o ladana bada bona ladana maragi taudia idia hapararaia lasi, a?
[Blurb on page 7]
Edena tomadiho ese ena orea taudia ia hadibaia taunimanima idia hapararaia gaudia, hegeregere politikol, kopi idau taudia o ladana bada bona ladana maragi taudia inai henia kava karana idia dadaraia totona?