“Dirava Ena Lalokau Lalonai Do Umui Noho”
“Dirava ena lalokau lalonai do umui noho. Nega ibounai iseda Lohiabada Iesu Keriso do umui naria noho, mai abidadama danu. Badina be umui diba, ia ese iena bogahisihisi dainai, mauri hanaihanai umui dekenai do ia henia.”—IUDA 21.
DALA idauidau ai, Iehova Dirava be ita dekenai iena lalokau ia hahedinaraia. Iehova ese ita ia lalokau henia dala ginigunana be, iseda mauri davalaia boubouna ia karaia. Ia be taunimanima ia lalokau henia bada dainai, iena Natuna lalokauna be tanobada dekenai ia siaia mai bona ita totona ia mase. (Ioa. 3:16) Iehova be unai ia karaia, badina ia ura ita mauri hanaihanai, bona iena lalokau amo namo bada ita abia hanaihanai!
2 Ita gwau diba herevana dahaka ita karaia, Iehova be ita do ia lalokau henia, a? Lasi. Badina Iuda 21 ia gwau: “Dirava ena lalokau lalonai do umui noho. Nega ibounai iseda Lohiabada Iesu Keriso do umui naria noho, mai abidadama danu. Badina be umui diba, ia ese iena bogahisihisi dainai, mauri hanaihanai umui dekenai do ia henia.” Inai hereva “Dirava ena lalokau lalonai do umui noho” ena anina be Dirava ena lalokau lalonai ita noho totona kara ta do ita karaia. Dahaka ita karaia be namo?
Edena Dala ai Dirava Ena Lalokau Lalonai Ita Noho?
3 Tanobada ai, Iesu ena hanuaboi ginigabena ai, unai henanadai ena haere ia henia. Ia gwau: “Bema lauegu taravatu umui badinaia, umui be lauegu lalokau lalonai do umui noho, lau ese egu Tamana ena taravatu lau badinaia bona iena lalokau lalonai lau noho hegeregerena.” (Ioa. 15:10, NW ) Unai siri ese ia hahedinaraia, Iesu ia diba Iehova ena hahegani ia badinaia be gau badana, badina unai amo ena Tamana ia tura henia namonamo diba. Bema Dirava ena Natuna goevadaena be unai bamona ia karaia, anina be ita danu be unai bamona ita karaia diba, a?
4 Dirava ita badinaia amo ita hahedinaraia ita be Dirava ita lalokau henia. Aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioa. 5:3) Hari, taunimanima momo be idia ura lasi Dirava idia badinaia. To inai hereva, “taravatu be metau lasi” mani oi laloa. Iehova be ita ia doria lasi ita karaia diba lasi gaudia ita karaia totona.
5 Mani inai haheitalai ita laloa: Bema oi diba gau ta be ia metau bona emu turana do ia huaia diba lasi, ia do oi hamaoroa unai gau ia abia isi totona, a? Lasi! Iehova be hebogahisi Diravana, bona iseda goada ena hetoana ia diba. Baibel ia gwau, Iehova ia laloatao “ita be kahu sibona.” (Sal. 103:14) Iehova be ita ia doria lasi ita karaia diba lasi gauna ta ita karaia totona. Unai dainai ita gwau lasi, Iehova ena taravatu ita badinaia be auka. To ita ura Dirava ena taravatu ita badinaia neganai, ita hahedinaraia ita be eda guba Tamana ita lalokau henia bada bona ita ura iena lalokau lalonai ita noho.
Iehova amo Ia Mai Harihari Gauna Namona Ta
6 Hari inai tanobada dikana lalonai abia hidi momo ita karaia neganai, Dirava ena taravatu ita badinaia be gau badana. Edena dala ai ita diba ita karaia abia hidi be Dirava ena ura hegeregerena? Iehova be ita dekenai harihari gauna ta ia henia, badina unai harihari gauna ese ita do ia durua Dirava ena taravatu ita badinaia totona. Unai be iseda lalomamina. Lalomamina be dahaka? Unai gau ese ita ia durua ita sibona eda lalohadai o ura ita lalopararalaia totona. Lalomamina be diadi tauna ta bamona, ita ia hadibaia eda mauri lalonai ita abia hidi gaudia ita laloa namonamo, o ita karaia vadaeni gaudia ita laloa lou, unai amo ita itaia eda kara be maoro o kerere.—Roma 2:14, 15 duahia.
7 Edena dala ai eda lalomamina ita gaukaralaia namonamo diba? Inai haheitalai mani ita laloa. Tau ta be uda badana dekenai ia lao. Uda dekenai dala ta eiava saini ta be lasi. To, ia raka sibona bona iena ura gabuna ia lao henia. To, dahaka ese unai tau ia durua ena ura gabuna dekenai ia lao totona? Ia be kampasi ia gaukaralaia. Kampasi lalonai be not, saut, west bona ist idia noho, bona magneti amo idia karaia nila ta be hanaihanai not kahana ia poinia. Bema unai tau be kampasi ia abia lasi, ia be uda lalonai do ia boio. Unai hegeregerena, bema tau ta dekenai lalomamina be lasi, reana do ia diba lasi ena mauri lalonai ia abia hidi gaudia be maoro eiava kerere.
8 Kampasi be ia kerere diba. Bema uda dekenai ia loaloa tauna ese magneti ta be kampasi badinai ia atoa, unai kampasi ena nila be not do ia poinia lasi, to gabu kererena do ia poinia. Unai hegeregerena, bema iseda ura gaudia ese iseda kudouna idia biagua, dahaka do ia vara? Momokani, tauanina ena ura dikadia ese iseda lalomamina idia hakererea diba. Baibel ese ita ia hadibaia, “Taunimanima edia kudouna be mai koikoi bada, bona mai dika rohoroho danu.” (Ier. 17:9; Aon. 4:23) Danu, bema uda dekenai ia lao tauna be mapu maorona ia badinaia lasi, reana iena kampasi be anina lasi o heduru namona do ia henia lasi. Unai hegeregerena, bema ita be Baibel ena hakaua hereva maoromaorodia ita badinaia lasi, lalomamina be ita do ia durua lasi. (Sal. 119:105) Madi, inai tanobada lalonai, taunimanima momo be edia kudouna edia ura gaudia idia laloa bada, to Baibel ena taravatu idia badinaia lasi. (Efeso 4:17-19 duahia.) Unai dainai, taunimanima momo edia lalomamina be ia dika bona kara dika rohorohodia idia karaia.—1 Tim. 4:2.
9 Namona be iseda lalona ita hadaia unai bamona ita karaia lasi totona! To, Baibel amo iseda lalomamina ita hadibaia noho be namo, unai amo eda lalomamina be ita do ia durua. Momokani, ita ura Baibel amo ita hadibaia lalomamina ita badinaia dainai, ura dikadia ita dadaraia. Danu, ita ura bada eda tadikaka edia lalomamina ita matauraia. Momokani, ita ura lasi eda tadikaka ita hahekwakwanaia, badina ita laloatao, ita abia dae gaudia haida be reana tadikaka haida ese idia abia dae lasi.—1 Kor. 8:12; 2 Kor. 4:2; 1 Pet. 3:16.
10 To hari, dala toi ita kikilaia be namo, unai amo do ita itaia edena dala ai iseda mauri lalonai ita hahedinaraia diba, ita be Iehova ita lalokau henia bona badinaia. Unai dala toi dekenai lalomamina ita gaukaralaia be mai anina bada, to unai lalomamina be Baibel ena taravatu maoromaorodia amo ita hadibaia be gau badana. Mai lalokau ida Iehova ita badinaia daladia toi be inai: (1) Iehova ese ia lalokau henia taudia ita lalokau henia, (2) siahu taudia ita matauraia, bona (3) ita gaukara goada Dirava vairanai ita goeva totona.
Iehova ese Ia Lalokau Henia Taudia Ita Lalokau Henia
11 Ginigunana be, namona be Iehova ese ia lalokau henia taudia ita lalokau henia. Taunimanima be mereki eiava kapusi huria totona ita gaukaralaia spansi bamona. Badina ita dibaia gaudia ibounai be ita abia dae sibona. Iseda Havaraia Tauna ia diba iseda turadia ese ita idia hadikaia diba o durua diba. Unai dainai, Ia be inai sisiba namona ia henia: “Aonega tauna danu ia raka hebou noho tauna, be do ia aonega, to kavakava taudia danu oi turana karaia neganai, dika do oi davaria.” (Aon. 13:20; 1 Kor. 15:33) Ita ibounai ita ura lasi “dika” ita davaria. To, ita ibounai ita ura ita be “aonega” taudia ai do ita lao. Iehova be aonega bada Diravana bona ta ese ia hakaua kerere diba lasi. Ia be haheitalai namona, badina taunimanima namodia sibona ia bamoa. Mani inai henanadai oi laloa—Iehova be edena goevadae lasi taudia ia abia hidi bona Iena turana ai ia halaodia?
12 Iehova be Aberahamo dekenai ia gwau, “lauegu turana.” (Isa. 41:8) Aberahamo be Iehova ia abidadama henia, kara namodia ia karaia, bona Dirava ena hereva ia badinaia. (Iam. 2:21-23) Iehova be unai bamona taudia ia bamoa. Hari inai negai, Iehova be unai bamona ia karaia noho. Vadaeni, bema Iehova be taunimanima namodia sibona ia bamoa, namona be ita goevadae lasi taudia danu be taunimanima namodia ita bamoa, ani?
13 Dahaka ese oi ia durua diba turana namodia oi abia hidi totona? Baibel ese ia sivarailaia taudia haida edia haheitalai ita stadilaia be namo. Idia hetura namonamo taudia haida be Ruta bona Naomi, Davida bona Ionatana, o Timoteo bona Paulo. (Ruta 1:16, 17; 1 Sam. 23:16-18; Fili. 2:19-22) Unai bamona taudia idia hetura namonamo badina idia be Iehova idia lalokau henia bada. Unai lalokau idia hahedinaraia taudia haida be edeseniai oi davaria diba? Iseda kongrigeisen lalonai be tura namodia momo herea oi davaria diba. Idia ese emu hetura karana Iehova ida idia gimaia diba. Danu, idia be oi do idia durua Iehova ena taravatu oi badinaia, Iehova oi tura henia, bona lauma helaga ena gau do oi hadoa. (Galatia 6:7, 8 duahia.) Momokani, oi do idia durua Dirava ena lalokau lalonai oi noho totona.
Siahu Taudia Ita Matauraia
14 Dala iharuana be, Iehova ita lalokau henia totona, namona be siahu taudia ita matauraia. To, dahaka dainai nega haida siahu taudia ita matauraia be auka? Badina ta be, siahu taudia o maduna idia huaia taudia hegeregere elda taudia be goevadae lasi taudia. Unai sibona lasi, ita danu be goevadae lasi taudia. Unai dainai, iseda lalonai ia noho gwau-edeede urana ita dadaraia totona be mai ena hekwarahi.
15 Reana oi henanadai, ‘Bema siahu taudia ita matauraia be auka, vadaeni dahaka dainai idia ita matauraia be namo?’ Unai henanadai ita haerelaia totona, namona be henanadai ma ta ita laloa guna. Oi be daika ena lohia dalana oi abia dae? Bema ita abia dae Iehova be iseda Lohia Tauna, vadaeni namona be iena lohia siahuna ita matauraia. Bema Iehova ena lohia siahuna ita matauraia lasi, ita gwau diba Ia be iseda Lohia Tauna, a? Danu, Iehova be goevadae lasi taudia dekenai siahu ia henia taunimanima idia naria totona. Bema unai siahu taudia ita matauraia lasi, Iehova be edena bamona ita do ia laloa?—1 Tesalonika 5:12, 13 duahia.
16 Haheitalai be inai: Israela besena be Mose dekenai idia maumau bona idia matauraia lasi neganai, Iehova ia badu bona ia gwau idia be Ia danu idia matauraia lasi. (Num. 14:26, 27) Dirava be ena kara ia haidaua lasi. Bema Iehova ese ia abia hidi taudia o maduna idia huaia elda taudia ita matauraia lasi, anina be Iehova ita matauraia lasi danu!
17 Aposetolo Paulo ese ia hahedinaraia, eda kongrigeisen elda taudia ita matauraia be namo. Ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.” (Heb. 13:17) Momokani, namona be ita hekwarahi elda taudia dekenai manau bona hemataurai ita hahedinaraia totona. Namona be ita laloatao, ita ura be Dirava ena lalokau lalonai do ita noho. Unai dainai, ita hekwarahi be gau badana, ani?
Iehova Vairanai Ita Goeva Noho
18 Iehova ita lalokau henia dala ihatoina be: Ita gaukara goada Iehova vairanai ita goeva totona. Tama sina momo idia hekwarahi edia natudia edia toana ia namo bona ia goeva totona. Dahaka dainai? Badina bema natuna ia goeva, do ia noho namonamo bona do ia gorere momo lasi. Ma danu, bema ruma bese lalonai natuna ta ia goeva, unai ese ia hahedinaraia tama sina be edia natuna idia lalokau henia bona laloa bada. Unai hegeregerena, Iehova ia ura ita goeva. Ia diba bema ita goeva, do ita noho namonamo. Danu, ia diba bema ita goeva, ita be eda guba Tamana ena ladana ita abia isi. Unai be gau badana, badina bema taunimanima idia itaia ita be inai tanobada taudia amo ita idau, unai ese idia do ia veria ita hesiai henia Diravana kahirakahira idia lao totona.
19 Dahaka gaudia dekenai ita goeva noho be namo? Iseda mauri ibounai lalonai ita goeva noho be namo. Idaunegai, Iehova ese Israela taudia ia hadibaia edia tauanina ia goeva be namo. (Lev. 15:31) Mose ena Taravatu be kukuri kokia daladia, disi hagoevaia dalana, bona imana, aena, bona dabua huria daladia ia gwauraia hedinarai. (Eso. 30:17-21; Lev. 11:32; Num. 19:17-20; Deu. 23:13, 14) Mose ese Israela taudia ia hadibaia, edia Dirava Iehova be helaga dainai idia goeva be mai anina bada. Momokani, Dirava helagana ena hesiai taudia idia helaga be namo.—Levitiko 11:44, 45 duahia.
20 Momokani, iseda tauanina bona lalona idia goeva be namo. Namona be eda lalona dekenai gau goevadia sibona ita laloa. Herevana inai tanobada be matabodaga karadia amo ia honu, to Iehova ena kara maoromaoro taravatudia ita badinaia noho. Mai anina bada gauna be inai: Namona be iseda tomadiho karana ia goeva—anina be tomadiho koikoi edia hahediba koikoidia o kara mirodia ibounai ita dadaraia. Isaia 52:11 ena hadibaia herevana ita laloatao, ia gwau: “Dubu Helaga ena kohu umui huaia noho taudia e, Babulonia dekena amo do umui raka siri momokani! Miro gauna ta do umui dogoatao lasi. Do umui helaga noho, bona unai gabu do umui rakatania.” Hegeregere, ena be taunimanima momo be tomadiho koikoi edia moale karadia, hegeregere krismas idia moalelaia, to ita be unai bamona moale karadia ita dadaraia. Momokani, inai tanobada dekenai ita goeva noho totona be ia auka. To, Iehova ena hesiai taudia idia hekwarahi idia goeva noho totona, badina unai ese idia ia durua Dirava ena lalokau lalonai idia noho totona.
21 Iehova ia ura iena lalokau lalonai do ita noho ela bona hanaihanai. To, namona be ita ibounai ta ta ita hekwarahi Dirava ena lalokau lalonai ita noho totona. Unai ita karaia totona, Iesu ena haheitalai ita tohotohoa bona Iehova ena taravatu ita badinaia karana amo ita hamomokania ita be Ia ita lalokau henia. Unai bamona ita karaia neganai, ita be “Dirava ena lalokau, Keriso Iesu iseda Lohiabada ese ia hedinaraia vadaeni gauna, dekena amo ita do ia kokia diba lasi.”—Roma 8:38, 39.
Inai Oi Laloatao, A?
• Edena dala ai iseda lalomamina ese ita do ia durua Dirava ena lalokau lalonai ita noho totona?
• Dahaka dainai Iehova ese ia lalokau henia taudia ita lalokau henia be namo?
• Dahaka dainai siahu taudia ita matauraia be mai anina bada?
• Dahaka dainai Dirava idia hesiai henia taudia idia goeva be mai anina bada?
[Study Questions]
1, 2. Edena dala ai ita diba Iehova be ita ia lalokau henia?
3. Iesu be iena Tamana ena lalokau lalonai ia noho totona, ia gwau dahaka ia karaia be namo?
4, 5. (a) Iehova ita lalokau henia totona, dahaka ita karaia be namo? (b) Dahaka dainai ita gwau lasi, Iehova ena taravatu ita badinaia be auka?
6, 7. (a) Lalomamina be dahaka? (b) Edena dala ai iseda lalomamina ese ita do ia durua Dirava ena lalokau lalonai ita noho totona? Haheitalai gwauraia.
8, 9. (a) Dahaka ese iseda lalomanina ia hadikaia diba? (b) Dahaka ita karaia diba, unai amo iseda lalomamina ese ita do ia durua?
10. Edena dala toi do ita herevalaia?
11. Dahaka dainai Iehova ese ia lalokau henia taudia ita lalokau henia be namo?
12. Iehova be edena bamona taudia ia tura henia?
13. Dahaka ese oi do ia durua tura namodia oi abia hidi totona?
14. Dahaka dainai nega haida siahu taudia ita matauraia be auka?
15, 16. (a) Dahaka dainai Iehova ese ia abia hidi taudia ita matauraia? (b) Israela besena be Mose dekenai idia maumau bona idia matauraia lasi neganai, Iehova ese idia ia kara henia dalana amo dahaka ita dibaia?
17. Kongrigeisen elda taudia dekenai dahaka lalohadai maorona ita abia be namo?
18. Dahaka dainai Iehova ia ura ita goeva?
19. Edena dala ai ita diba tauanina dalanai ita goeva be mai anina bada?
20. Edena dala ai ita goeva noho diba?
21. Edena dala ai ita diba ita be Dirava ena lalokau lalonai do ita noho?
[Box/Picture on page 20]
ITA IA DURUA KARA NAMODIA ITA HAHEDINARAIA BUKANA
Lagani 2008 ena distrik hebouhebou dekenai rau 224 bukana idia halasia, ena ladana be “Dirava Ena Lalokau Lalonai Do Umui Noho.” Dahaka dainai unai buka matamatana idia halasia? Inai buka matamatana ese Keristani taudia do ia durua Iehova idia dibaia, iena taravatu idia badinaia, bona Keristani kara namodia idia hahedinaraia totona. “Dirava Ena Lalokau Lalonai Do Umui Noho” bukana ita stadilaia namonamo neganai, do ita abia dae momokani hari inai negai Iehova ena taravatu ita badinaia be mauri dalana namona bona ita do ia durua vaira negana ai mauri hanaihanai do ita abia totona.
Danu, inai buka ese ita ia hadibaia, Iehova ena hereva ita badinaia karana be ita dekenai metau ia havaraia lasi. Bona Iehova ena hereva ita badinaia neganai, ita hahedinaraia ita be Ia ita lalokau henia bada. Unai dainai, unai buka ese ita do ia hagoadaia inai henanadai, ‘Dahaka dainai lau be Iehova lau badinaia?’ ita laloa totona.
Nega momo haida be Baibel ena hadibaia hereva ta dainai lasi, to kara ta idia karaia kerere dainai Iehova lalokau henia karana idia rakatania. Unai dainai, eda mauri lalonai Iehova ena taravatu bona hakaua herevadia ita ura henia bada karana ia goada be namo! Ita diba momokani inai buka matamatana ese tanobada hegegemadai Iehova ena mamoe do ia durua kara maorona idia karaia, Satani ena hereva idia hakoikoia, bona Dirava ena lalokau lalonai idia noho totona!—Iuda 21.
[Picture on page 18]
“Bema umui ese lauegu taravatu do umui badinaia, vadaeni egu lalokau dekenai do umui noho, lau hegeregerena, egu Tamana ena taravatu lau badinaia, vadaeni iena lalokau dekenai lau noho”