“Dirava Ita Lalokau Henia Ena Anina be Inai”

1, 2. Dahaka dainai Iehova Dirava oi lalokau henia?

OI BE Dirava oi lalokau henia, a? Bema oi be emu mauri oi gwauhamatalaia bona Iehova Dirava oi tura henia, do oi gwau oibe! Vaia, ita ese Iehova ita lalokau henia badina Ia ese ita ia lalokau henia guna. Baibel ia gwau: “Ita be mai iseda lalokau, bona ena badina korikori be inai: Dirava ese ita ia lalokau henia guna.”—1 Ioane 4:19.

² Iehova ese ita dekenai lalokau ia hahedinaraia guna. Tanobada mai hairaina ia henia ita noholaia totona. Ia ese tauanina dalanai ita ia naria bona iseda dabu gaudia ia henia. (Mataio 5:43-48) Mai anina bada gauna be, iseda hetura karana Ia ida ia goada totona, Iehova be ita ia durua. Ia ese ita dekenai iena Hereva, Baibel ia henia. Ma danu, ita ia hagoadaia ia dekenai do ita guriguri bona ia gwauhamata iseda guriguri do ia kamonai bona lauma helaga do ia henia ita ia durua totona. (Salamo 65:2; Luka 11:13) Mai anina bada gauna be, Iena lalokau Natuna ia siaia iseda Mauri Davana Karaia Tauna ai ia lao, unai amo kara dika bona mase amo ita ia ruhaia. Iehova ese ita dekenai lalokau bada herea ia hahedinaraia unai!—Ioane 3:16; Roma 5:8.

3. (a) Dirava ena lalokau lalonai ita noho totona, dahaka do ita karaia? (b) Edena mai anina bada henanadai do ita laloa, bona ena haere be edeseniai do ita davaria?

³ Iehova ia ura ena lalokau amo namo do ita abia hanaihanai. To, unai lalokau amo namo do ita abia eiava lasi ena abia hidi be ita sibona ese do ita karaia. Baibel ese ita ia hagoadaia: “Dirava ena lalokau lalonai do umui noho . . . mauri hanaihanai umui dekenai do ia henia.” (Iuda 21) Inai hereva “do umui noho” ena anina be Dirava ena lalokau lalonai ita noho totona kara ta do ita karaia. Namona be iseda kara amo ita hahedinaraia Dirava ena lalokau ita laloa bada. Namona be inai mai anina bada henanadai ita laloa: ‘Egu lalokau Iehova dekenai be edena bamona lau hahedinaraia diba?’ Aposetolo Ioane ese haere ia henia: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioane 5:3) Namona be unai siri ena anina ita tahua namonamo, badina ita ura Dirava dekenai ita hahedinaraia Ia ita lalokau henia bada.

“DIRAVA ITA LALOKAU HENIA ENA ANINA BE INAI”

4, 5. Iehova oi lalokau henia matamaia negana mani oi herevalaia.

⁴ Aposetolo Ioane be ataiai ia noho sinado ena matamana ai ia gwau, “Dirava ita lalokau henia.” Mani ita itaia unai hereva ena anina be dahaka. To, unai ita do karaia lasi neganai, Iehova oi lalokau henia matamaia negana mani oi laloa lou.

⁵ Iehova bona iena ura oi dibaia bona oi abidadama henia negana ginigunana mani oi laloa. Oi laloparara, ena be oi be kara dika tauna, to Iehova be Keriso amo dala ia kehoa, Adamu ia haboioa mauri goevadaena oi abia diba bona oi mauri hanaihanai totona. (Mataio 20:28; Roma 5:12, 18) Oi laloparara Iehova be ia lalokau henia bada Natuna ia henia bona oi dainai ia mase. Unai ese emu kudouna ia hamarerea bona Dirava oi lalokau henia matamaia, badina ia ese oi dekenai lalokau bada ia hahedinaraia.—1 Ioane 4:9, 10.

6. (a) Lalokau korikorina be edena bamona ita hahedinaraia? (b) Dirava oi lalokau henia momokani dainai, dahaka oi karaia?

⁶ To, unai be Iehova lalokau henia momokani karana ena matamana sibona. Unai bamona lalokau be hemami ta sibona lasi eiava hereva sibona lasi. Namo lasi iseda hereva sibona amo ita gwau, “Iehova lau lalokau henia,” badina unai be Dirava lalokau henia momokani karana lasi. To, abidadama bamona, lalokau korikorina be ita karaia karadia amo ita hahedinaraia. (Iamesi 2:26) Gau badana be, ita lalokau henia tauna ese ia moalelaia karadia do ita hahedinaraia. Unai dainai, emu kudouna amo Iehova oi lalokau henia matamaia neganai, unai ese emu lalona ia veria emu guba Tamana ia moalelaia dalana ai oi noho totona. Oi be bapatiso Witnes tauna ta, a? Bema oibe, Iehova oi lalokau henia bona badinaia karana ese oi ia durua emu mauri lalonai mai anina bada abia hidi ta oi karaia totona. Emu mauri be Iehova dekenai oi gwauhamatalaia bona bapatiso amo oi hahedinaraia oi ura Iena ura oi karaia. (Roma 14:7, 8) Iseda gwauhamata Iehova dekenai ita hamomokania totona, namona be aposetolo Ioane ese ia gwauraia herevana do ita badinaia.

“DIRAVA ENA TARAVATU DO ITA BADINAIA”

7. Dirava ena taravatu haida be dahaka, bona ita badinaia anina be dahaka?

⁷ Ioane ese Dirava lalokau henia ena anina ia gwauraia: “Dirava ena taravatu do ita badinaia.” Dirava ena taravatu be dahaka dahaka? Iehova be Baibel amo ita dekenai taravatu haida ia henia. Hegeregere, ia gwau do ita kekero lasi, heudahanai lasi, kaivakuku ita tomadiho henia lasi, ita henaohenao lasi, bona ita koikoi lasi. (1 Korinto 5:11; 6:18; 10:14; Efeso 4:28; Kolose 3:9) Dirava ena taravatu ita badinaia anina be iseda mauri lalonai Iena kara maoromaoro taravatudia hegeregerena do ita noho.

8, 9. Ena be gau haida dekenai Baibel be taravatu ta ia atoa lasi, to edena dala ai Iehova hamoalea dalana ita abia hidi diba? Haheitalai ta gwauraia.

⁸ To, Iehova ita hamoalea totona, Baibel dekenai ia gwauraia taravatu sibona ita badinaia be hegeregere lasi. Iehova be iseda mauri lalonai ita karaia gaudia ibounai dekenai taravatu aukadia ia atoa lasi. Unai dainai, dina ta ta ai ita karaia gaudia momo dekenai Baibel be taravatu ia atoa lasi. Vadaeni, edena bamona do ita diba Iehova be edena kara ia moalelaia? Baibel ese Dirava ena lalohadai ia hahedinaraia namonamo. Baibel ita stadilaia neganai, Iehova ia ura henia gaudia bona ia inai henia gaudia ita dibaia. (Salamo 97:10; Aonega Herevadia 6:16-19) Iehova ia ura henia karadia ita diba. Ita be Iehova ena kara bona lalohadai ita dibaia neganai, unai ese iseda abia hidi bona kara ia biagua. Unai dainai, ena be gau haida dekenai Baibel be taravatu ia atoa lasi, to “Lohiabada ena ura” ita diba vadaeni.—Efeso 5:17.

⁹ Hegeregere, dagedage bona matabodaga laulau idia hahedinaraia TV program do ita itaia lasi ena taravatu be Baibel lalonai ia noho lasi. To, Iehova ena lalohadai unai gaudia dekenai ita diba. Unai dainai, ena be unai bamona taravatu ta ia noho lasi, to ita diba unai laulau dikadia ita dadaraia be namo. Baibel ia gwau: “Taravatu utua [“dagedage,” NW] taudia be, Lohiabada ese ia badu henidia noho.” (Salamo 11:5) Ma ia gwau: “Dirava ese heudahanai taudia bona headava hadikaia taudia edia kerere davana do ia henia momokani.” (Heberu 13:4) Unai siri rua edia hereva ita laloa dobu neganai, Iehova ena ura do ita diba momokani. Unai dainai, ita ura lasi Dirava ia inai henia dagedage o matabodaga laulau dikadia ita raraia. Ita diba tanobada ena matabodaga moale karadia ita dadaraia neganai, Iehova ia moale.a

10, 11. Dahaka dainai ita ura Iehova ita kamonai henia, bona edena dala ai unai ita karaia?

¹⁰ Dahaka dainai Dirava ena taravatu ita badinaia? Dahaka dainai ita ura dina ta ta ai Dirava ena ura hegeregerena ita noho? Ita ura lasi panisi ita abia dainai, a? Eiava ita ura lasi Dirava idia dadaraia taudia ese idia davaria hekwakwanai ita abia dainai, a? Lasi. (Galatia 6:7) To, Iehova ita badinaia karana amo ita hahedinaraia ita be Ia ita lalokau henia. Natu ta ese kara ta ia karaia ena tamana ia hamoalea hegeregerena, ita ura Iehova ita hamoalea danu. (Salamo 5:12) Ia be iseda Tamana, bona ita lalokau henia. Ita diba iseda noho dalana ese Iehova ia hamoalea dainai, ita danu ita moale.—Aonega Herevadia 12:2, NW.

¹¹ Namo lasi mai lalodika ida Dirava ita kamonai henia, o ena taravatu haida sibona ita badinaia o nega namodia sibona ai Ia ita kamonai henia.b Edena taravatu ita badinaia o edena taravatu ita dadaraia be ita ese ita abia hidi diba lasi. To, gau badana be mai iseda “lalona ibounai danu” Dirava ita kamonai henia. (Roma 6:17) Iseda hemami be salamo torea tauna ena bamona, ia gwau: “Oiemu oda hereva lau kamonai henia noho, mai egu moale bada danu, badina be oiemu oda lau ura henia noho.” (Salamo 119:47) Oibe, ita ura Iehova ita kamonai henia. Ita diba Iehova ia ura mai iseda kudouna ibounai ida ia sibona do ita kamonai henia. (Deuteronomi 12:32) Baibel ese Noa ia gwauraia bamona, ita ura Iehova ese ita danu be unai bamona ia gwauraia. Noa be lagani momo lalonai Dirava ia lalokau henia bona kamonai henia, Baibel ia gwau: “Noa ese unai bamona ia karaia, Dirava ena hereva ibounai hegeregere.”—Genese 6:22.

12. Edena dala ai Iehova ita hamoalea diba?

¹² Mai iseda ura ida Iehova ita kamonai henia neganai, Iehova ena hemami be edena bamona? Baibel ia gwau ita dekenai ia “moale.” (Aonega Herevadia 27:11) Iseda kamonai karana ese iunives ena Siahu Ibounai Diravana Iehova ia hamoalea diba, a? Oibe, mai badina namona dainai ia moale! Iehova ese ita dekenai ura kwalimu ia henia. Anina be ita be abia hidi ita karaia diba—Dirava do ita kamonai henia, eiava ita kamonai henia lasi. (Deuteronomi 30:15, 16, 19, 20) Bema mai eda ura ida Iehova ita kamonai henia bona unai ita karaia badina ia ita lalokau henia bada, iseda guba Tamana Iehova do ita hamoalea. (Aonega Herevadia 11:20) Danu ita be mauri dalana namona ita abia hidi unai.

“IENA TARAVATU BE METAU LASI”

13, 14. Dahaka dainai ita gwau diba Dirava ena “taravatu be metau lasi”? Haheitalai gwauraia.

¹³ Aposetolo Ioane be Iehova ena taravatu ia herevalaia neganai, ita ia hagoadaia herevana ta ia gwauraia, ia gwau: “Iena taravatu be metau lasi.” Baibel ma ta ese unai siri be inai bamona ia hahanaia: “Iena taravatu ese ita ia hametaua lasi.” (New English Translation) Iehova ena taravatu be ia auka lasi badinaia totona bona ita ia hametaua lasi.c Ita goevadae lasi taudia ese Ia ena taravatu ita badinaia diba.

¹⁴ Reana, inai bamona do ita haheitalaia. Emu turana namona ta be oi ia noia ruma ma ta dekenai iena kohu umui huaia lao totona. Maua be momo. Maua haida be idia metau lasi dainai tau tamona ese ia huaia diba, to haida be idia metau bona tatau rua ese idia huaia be namo. Emu turana be maua haida ia abia hidi oi huaia totona. Bema ia diba maua ta be ia metau bona oi sibona ese oi huaia be hegeregere lasi, oi do ia hamaoroa unai maua oi huaia totona, a? Lasi. Badina ia ura lasi oi sibona ese oi huaia bona dika oi davaria. Unai hegeregerena, iseda lalokau bona hebogahisi Diravana ese taravatu metaudia ia atoa lasi ita badinaia totona. (Deuteronomi 30:11-14) Ita ia hamaoroa lasi gau metauna ita huaia totona. Iehova be iseda manoka ia diba, badina “Ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.”—Salamo 103:14.

15. Dahaka dainai ita diba momokani Iehova ena taravatu be iseda namo totona?

¹⁵ Iehova ena taravatu be ita idia hametaua lasi, to idia be iseda namo totona. (Isaia 48:17) Unai dainai, Mose ese Israela taudia ia hamaoroa: “Lohiabada ese ai ia hamaoroa, inai Taravatu ibounai do ai badinaia, bona Lohiabada, iseda Dirava do ai gari henia. Bema unai bamona ai karaia neganai, Lohiabada ese aiemai bese do ia naria noho, bona do ia hanamoa noho hanaihanai, hari dina ai dekenai ia naria bamona.” (Deuteronomi 6:24) Ita diba momokani Iehova ese ita dekenai ia henia taravatu be ita do ia durua hanaihanai. Momokani, Iehova be ita ia hadikaia taravatu ta do ia atoa lasi. Iehova be aonega bada Diravana. (Roma 11:33) Unai dainai ia diba dahaka be namo ita totona. Danu, Iehova be lalokau Diravana. (1 Ioane 4:8) Lalokau be iena kara badana, bona unai kara ese iena kara ibounai ia biagua. Iena hesiai taudia dekenai ia henia taravatu ibounai edia badina be lalokau.

16. Ena be inai tanobada bona iseda tauanina edia ura ese ita idia hakaua kerere, to edena dala ai ita be Dirava ita badinaia noho diba?

¹⁶ Momokani, Dirava ita badinaia karana be mai ena hekwarahi. Satani ese inai tanobada ia gunalaia noho dainai, inai tanobada dikana ena laloani karadia ita dadaraia be namo. (1 Ioane 5:19) Ita be goevadae lasi taudia dainai, do ita hekwarahi iseda ura dikadia ita koua bona Dirava ena taravatu utua karadia ita dadaraia totona. (Roma 7:21-25) To, Dirava ita lalokau henia dainai ita kwalimu diba. Iseda kamonai karana amo ita hahedinaraia Dirava ita lalokau henia neganai, ia ese ita do ia hanamoa. “Iena kamonai taudia dekenai” lauma helaga ia henia. (Kara 5:32) Lauma helaga ese ita dekenai huahua namodia ia havaraia, bona unai kara namodia ese ita do idia durua Dirava kamonai henia dalana ita badinaia totona.—Galatia 5:22, 23.

17, 18. (a) Inai buka lalonai dahaka do ita stadilaia, bona unai ita karaia neganai edena gaudia ita laloatao be namo? (b) Karoa 2 ai dahaka do ita stadilaia?

¹⁷ Inai buka lalonai, Iehova ena hakaua herevadia bona kara maoromaoro taravatudia bona iena ura ma haida do ita stadilaia. Unai ita karaia neganai, namona be mai anina bada gaudia haida ita laloatao. Namona be ita laloatao, Iehova be ita ia doria lasi iena taravatu bona hakaua herevadia ita badinaia totona; to ia ura eda kudouna amo ia do ita badinaia. Namona be ita laloatao, Iehova ia ura ita ia durua ita noho namonamo totona, unai amo hari hahenamo do ita moalelaia bona nega vaira ai mauri hanaihanai do ita abia. Bona namona be mai iseda kudouna ibounai ida Iehova ita badinaia karana amo ita hahedinaraia ita ese Iehova ita lalokau henia.

¹⁸ Kara maoromaoro bona kara kerere edia toana ita diba totona, Iehova ese ita dekenai lalomamina ia henia. To, iseda lalomamina ese ita ia hakaua totona, namona be iseda lalomamina ita hadibaia namonamo. Karoa 2 ai unai do ita stadilaia.